إيه هي أفضل طرق التعليم المنزلي؟
في ظل التغيرات الكتير اللي بتحصل للمفاهيم الأساسية عند الناس، ونتيجة للانفتاح والرغبة في الوصول لأفضل تعليم للطفل، ظهر مصطلح التعليم المنزلي “Homeschooling”.
التعليم المنزلي هو طريقة للخروج عن المألوف في تعليم الأطفال، ووسيلة تناسب طموحات الأهالي لمستوى أطفالهم التعليمي، خاصةً مع ارتفاع المصروفات المدرسية للمدارس المتميزة.
كل الأسباب دي خلت التعليم المنزلي طوق نجاة، وحل مثالي لحصول الطفل على تعليم متميز، بجانب توفير المصروفات من خلال الاستعانة بالمنصات الإلكترونية المتوفرة مجاناً على الإنترنت.
هنعرض لك من خلال المقال إيه التعليم المنزلي، وأفضل طرقه اللي ممكن يتبعها الآباء لتعليم أبنائهم في المنزل، وغيرهم.
ما هو التعليم المنزلي؟
التعليم المنزلي هو أحد الطرق المستخدمة في السنوات الأخيرة للتعليم في مختلف الدول، وأصبح استخدامه رسمي في الولايات المتحدة الأمريكية وبعض دول أوروبا، ولا زال في تزايد مستمر.
دا غير إنه اتطبق بالدول العربية، وظهر بشكل ملحوظ في مصر، ودا بيرجع لدوافع كتير عند الأهالي للاستعانة بطرق التعليم المنزلي، زي:
- عدم الرضا عن المستوى الدراسي بالمدارس
- صعوبة التعلم عند الأطفال
- تعرض الأطفال للتنمر
وغيرهم من المشاكل الكتير اللي بتؤثر على سلوكيات الطفل ونفسيته، بالإضافة لرغبة الوالدين في تزويد الطفل بمستوى تعليمي قوي قائم على التعليم الأكاديمي، والتجربة العملية.
عشان كدا جات فكرة التعليم المنزلي للطفل كوسيلة مثالية للتركيز معاه، وتوفير بيئة سليمة ليه، وتخصيص وقت كبير لفهمه، وفهم احتياجاته، وتقديم الاهتمام اللازم ليه دراسيًا.
وفي حالة الخوف من الخطوة دي ومدى تأثيرها على المستقبل الجامعي للطالب، ودخوله الكليات زي أقرانه اللي بيدرسوا بالطريقة التقليدية، الدراسات أثبتت إن النتيجة واحدة والتعليم المنزلي ما بيأثرش بالسلب على الطفل.
فوفقاً لما نشره موقع NHERI بنلاقي إن الإحصائيات بشكل عام بتؤكد إن 78٪ من أطفال التعليم المنزلي أدائهم الأكاديمي أفضل من أقرانهم.
ما هي أفضل طرق التعليم المنزلي؟
للتعليم المنزلي طرق متنوعة، وبيتنفذ على حسب الإمكانيات المتاحة، واختلاف طريقة تفكير الأهالي، ومن أشهر الطرق:
1- التعليم المنزلي التقليدي
يعد التعليم التقليدي من أكتر طرق التعليم المنزلي استخدامًا في مصر، وهو قائم على اتباع نفس منهج المدرسة، وبيسجل الأبوين للطفل في واحدة من المدارس الحكومية أو الخاصة، والطفل بيروح المدرسة يومين مثلًا أو تلاتة، وبيدرس باقي الوقت بالبيت، ودا بيوفر له وقت كبير.
في الحالة دي بيقوم الأبوين بدور المُدرس في الشرح والمذاكرة للطفل بالطريقة اللي تكون أمتع وأسهل ليه، أو بيستعينوا بالدروس الخصوصية.
وبيلجأ الآباء للحل دا في حالة إن الطفل بيعاني من صعوبة تعلُم، أو مستواه الدراسي ضعيف، ومش زي زمايله، فبيدرس نفس المنهج في المنزل لكن بالأسلوب الأسهل ليه من غير أي ضغط، وبياخد شهادته عادي.
ويمكن وصف التعليم التقليدي باسم التعليم الموازي بمعناه المبسط، وهو الاعتماد على الوالدين لتعليم الطفل وتنمية مهاراته.
والتعليم الموازي هو بديل تعليمي بيعتمد على قبول الطلبة في الكليات بنسبة أقل من التنسيق في مقابل مصاريف أعلى شوية، وبدأ يتطبق في المدارس كمان، وبتكون مميزاته هي نفس التعليم التقليدي.
مميزات التعليم التقليدي المنزلي
- تقليل عدد الساعات اللي بيقضيها في المدرسة والاستفادة منها لأي نشاط
- اكتشاف الطريقة الأفضل للطفل للمذاكرة والفهم
- زيادة الترابط بين الطفل والوالدين
عيوب التعليم التقليدي المنزلي
- عدم توفير منهج مختلف ينمي من مهارات الطفل ويوسع مداركه
- لا يعتمد على ربط المعلومات ببعضها في مختلف المواد
- اعتماده على التعليم النظري مش التجريبي العملي
2– التعليم عن بُعد
النوع التاني من طرق التعليم المنزلي هو التعليم عن بُعد، والنوع دا مُكلف ماديًا، وبيعتمد على تسجيل الأبوين للطفل في كورسات المدارس الأجنبية المتوفرة على الإنترنت.
والتعليم عن بعد له أنواع كتير، منها بيتطلب حضور الطالب للشرح في محاضرات فيديو، ومنها بيوفر مناهج وفيديوهات مشروحة من متخصصين، بالإضافة لتوفير اختبارات دورية ونهائية.
والاختبارات النهائية بتكون أونلاين، أو بيؤديها الطالب في مقر سفارة الدولة، وفي الآخر بيحصل على شهادة بتفتح له فرصة الالتحاق بالجامعات الأجنبية في الخارج، أو فروعها بمصر.
وفي المرحلة الثانوية بيقدر الطالب يلتحق بشكل رسمي بنظام تعليم أجنبي زي الـ IG.
3- النظام المختلط أو المرن
النظام المختلط بيعتمد على دمج التعليم العادي مع منهج تاني لتنمية مهارات الطفل، وبيتم عن طريق التسجيل للطفل في مدرسة عادية، واتباع المناهج الدراسية من غير حضور، وبيوفر الأهل منهج تاني للطفل في المنزل يساعده ويطور من مهاراته.
وفي النوع دا من طرق التعليم المنزلي بيكون دور الوالدين هو مساعدة الطفل على اجتياز اختبارات المدرسة عشان ياخد شهادته بشكل طبيعي، واختيار مناهج وطرق تعليم مختلفة تساعده ينمي مهاراته ويطورها، من خلال المنصات المتوفرة بشكل مجاني أو بمقابل مادي بسيط.
4- التعليم المنزلي اللامدرسي
التعليم اللامدرسي هو أحد طرق التعليم المنزلي المتبعة في الدول الأوروبية بشكل متزايد، وبيعتمد على ميول الطفل، وشغفه، وتفضيلاته للدراسة بدون الرجوع للمنهج الدراسي نهائيًا.
على سبيل المثال: لو الطفل ميوله أكتر ناحية الرسم والألوان، فبيحتاج الوالدين إحضار الأدوات اللازمة للطفل، لإشباع رغبته وشغفه.
ورغم إن الطريقة دي بتساعد على تنمية مهارات الطفل، إلا إنها مش مدروسة بشكل كبير لحد دلوقتي، وممكن ما تناسبش كل الأطفال أو الأهالي، لكن يُمكن تطبيقها في الإجازة الصيفية للطفل.
هل يوجد أماكن توفر طرق التعليم المنزلي في مصر؟
لحد دلوقتي مصر لا تعترف بالتعليم المنزلي بشكل رسمي، لكن في منصات كتيرة وليها صدى كبير ممكن تشارك في تحقيق تعليم منزلي متميز للطفل، وبتوفر أفضل طرق تعليم منزلي للطلاب، ومنها:
1- مؤسسة نماء
المؤسسة بتقدم تطبيق متكامل للتعليم الإلكتروني، وهي من المنصات اللي بتشرح المناهج بشكل متقدم، وبتحط خطة لطرق التعليم المنزلي.
وبتحتوي المنصة على نظام إدارة معلومات الطالب، ونظام إدارة التعليم للجامعات والمدارس والمعاهد، وبتساعد المؤسسات التعليمية على استخدامها، وبناء قاعدة بيانات لكل مدرسة لوحدها مقابل أجر سنوي بسيط لكل طالب.
2- مؤسسة ابن خلدون
مؤسسة ابن خلدون من أقدم المؤسسات اللي بتقدم خدمة التعليم المنزلي، وبتمشي خطوة بخطوة مع المستخدم، وبتوفر نماذج مناهج لإعداد الطفل من البداية، بالاعتماد على أسلوب تعليمي متكامل، بيشمل وقت التمارين، والتدريبات، وكافة طرق التعليم المنزلي الأخرى.
كمان بتقدم للوالدين دورات تدريبية لتعليم أطفالهم بالمنزل، وبتوفر لهم اختيارات مناهج مختلفة من خلال منصات التعليم عن بُعد، واللي بتقدم مناهج مجانية، أو بمقابل مادي بسيط، ودلوقتي المؤسسة بتقوم بإعداد مناهج خاصة بيها.
3- مؤسسة مش مدرسة
هي مؤسسة حديثة ومفيدة للمراحل الأولى والتمهيدية Kg1 -Kg2، وبتقدم مناهج متطورة ومختلفة عن المناهج التقليدية.
كمان بتوفر النشاطات اللي بتفيد الطفل في الفترة دي، بالإضافة إنهم بيقدموا سيمينارات عشان يشوفوا أفكار وتوقعات الآباء، والأمهات لتطوير خدماتهم لطرق التعليم المنزلي.
اقرأ أيضاً: أهم 7 أسئلة وأجوبة عن مدارس التعليم المنزلي.
ما الذي يجب مراعاته عند اختيار التعليم المنزلي لطفلك؟
الانتقال للتعليم المنزلي قرار مش سهل، وبيحتاج مراعاة بعض الأمور المهمة، زي:
1- الوقت والمجهود
يختلف التعليم المنزلي تمامًا عن التعليم التقليدي في تنظيم الوقت والمجهود، في حالة التعليم التقليدي الطفل بيروح المدرسة والأم والأب بيساعدوه في الواجب المدرسي، ومتابعة أدائه مع المدرسين.
لكن في حالة التعليم المنزلي هيقضي الأبوين وقت كبير مع ابنهم، ودا هيحتاج جهد وتنظيم للوقت، وعشان كدا لازم قبل بدء العام الدراسي يكونوا جهزوا خطة دراسية للترم لكل المواد، بجانب ترتيب وقت الترفيه والتدريبات.
2- الصعوبات الاجتماعية اللي ممكن يقابلها الطفل
المدرسة بالنسبة للطفل مش مجرد مكان للتعليم بس، لكنها مكان بيكوّن فيه صداقات، وعلاقات اجتماعية بالإضافة لوقت الترفيه.
فلازم يكون من ضمن الخطة وقت للترفيه، وتوفير بديل عشان يقدر الطفل يكوّن علاقات، ويكتسب مهارة التواصل، ودا عن طريق الأنشطة الرياضية، والتنزه معاه بشكل دوري، عشان ما يحسش بالملل من وجوده الدائم في المنزل.
3- مستوى الطفل الأكاديمي
من المهم جدًا الاهتمام بمستوى الطفل الأكاديمي، يعني ما يكنش كل التركيز على اكتساب المهارات والمعرفة، لازم يكون في نفس مستوى زملائه في المدرسة، ودا بيكون عن طريق التركيز على المهارات الأساسية، زي:
- الأخطاء اللغوية
- علامات الترقيم
- القراءة
- الكتابة
- القواعد
4- أثر البيئة المتوفرة للطفل بدلًا من المدرسة
يلجأ الآباء والأمهات للتعليم المنزلي في الأساس بسبب خوفهم على أطفالهم من البيئة غير المناسبة لنفسية الطفل، وحمايته من اكتساب سلوكيات غير أخلاقية من زملائه في المدرسة.
فلازم نراعي عدم تعرض الطفل لبيئة غير مناسبة في التمارين أو الأنشطة اللي هيقوم بيها، دا غير إن وجود الطفل في البيت بشكل مستمر بيعرضه لأشخاص من أعمار مختلفة، وممكن يتكلموا في موضوعات مش مناسبة لسنه، فلازم نحط دا في الاعتبار.
نصائح لتنظيم الوقت أثناء التعليم المنزلي
تنظيم الوقت هو أساس النجاح في التعليم المنزلي، ودي بعض النصائح اللي هتساعدك على تنظيم وقت الدراسة لطفلك في المنزل:
- قراءة المنهج قبل البدء، وتجميع الدروس اللي بتتكلم عن نفس الموضوع بس من وجهة نظر كل مادة، وتقديمها لطفلك
- ضرورة وجود خطة دراسية محددة قبل بدء العام الدراسي، وتحديد جدول للمواد يوميًا
- تحديد عدد ساعات يوميًا للدراسة تناسبك بشكل ثابت عشان الطفل يتعود عليها
- تثبيت وقت للراحة والترفيه مهم زي المذاكرة والشرح
- عدم التكاسل أو تأجيل يوم إلا في حالة مرض الطفل
- تحديد المهام بوقت معين بداية ونهاية
وبمرور الوقت هتكتشف طرق تانية لتنظيم الوقت لطفلك، والاستفادة بشكل أكبر من الدراسة بالمنزل.
اقرأ أيضاً: كيفية إنشاء جدول للتعليم المنزلي مع نسخة جاهزة للتحميل.
5 أدوات تقنية لتسهيل طرق التعليم المنزلي
تقدر تستخدم التكنولوجيا لتسهيل المدرسة المنزلية لطفلك، ومنها:
1- الكتب الإلكترونية
نتيجة لاستخدام الأجهزة الإلكترونية بشكل كبير، أصبح استخدام الكتب الإلكترونية مهم، ومن أهم مميزاتها:
- يمكن لأكتر من شخص قراءة نفس الكتاب في نفس الوقت.
- تتوفر بإصدارات مجانية في بعض الأحيان.
- توفر مساحة تخزينية.
وهتلاقي الكتب دي في أكتر من مكان زي: المكتبة الرقمية الدولية للأطفال، والمكتبة المفتوحة، وماني بوكس.
2- البريد الإلكتروني
البريد الإلكتروني تقدر تعتبره منطقة تخزين للمستندات والواجبات، والروابط لمواقع الويب والدورات التدريبية، فممكن تعمل بريد إلكتروني خاص بالأطفال على أجهزتهم الإلكترونية، وتبعت لهم عليه المقاطع، والفيديوهات، وغيرها.
3- الدورات الإلكترونية
تعد الدورات الإلكترونية من أهم عوامل نجاح طرق التعليم المنزلي المختلفة، ودا لتواجد عدد كبير منها بشكل مجاني، وتابع لمنصات، وبالتالي فهي بتحسن العملية التعليمية، وفهم الموضوعات بشكل أكبر.
4- جوجل درايف
بيفيد جوجل درايف طرق التعليم المنزلي، لإنه بيوفر عدد من البرامج الأساسية المهمة، زي: جداول البيانات، والعروض التقديمية، والمستندات، والتقويم، ودا بيساعد في سهولة الوصول، والمشاركة، وتنظيم المهام وحفظها.
5- قنوات اليوتيوب
هتلاقي على يوتيوب عدد كبير من القنوات التعليمية المفيدة والمجانية، واللي هتسهل عليك تقديم المعلومات للطالب بشكل مرتب.
وأخيراً، قرار التعليم المنزلي لطفلك قرار مش سهل، لكنه بيكون ضروري أحيانًا، خاصةً في حالة وجود دافع قوي، زي: تحسين مستواه الدراسي، وزيادة معرفته، وتنمية مهاراته، وتوفير بيئة مناسبة للحفاظ على نفسية سليمة لطفلك، فالتعليم المنزلي وسيلة مهمة وفعالة لتحقيق دا.
طرق التعليم المنزلي كتيرة ومتنوعة، وتقدر تكتشف أفضلها بناءً على تجربتك مع طفلك.
المصادر
Top 7 Homeschooling Tips that Every Parent Needs To Know.
أضف تعليق