صعوبات التعلم في سن الطفولة مش ظاهرة نادرة، لإنها بتأثر على عقول أطفال كتير حول العالم، وبنلاقي العديد من أنواع صعوبات التعلم عند الأطفال اللي بتواجههم في سن صغير، وفهم الأنواع دي هي الخطوة الأولى لمساعدة طفلك، لإن عدم اكتشافها ومعالجتها بدري ممكن يأثر على شخصية الطفل، ومستقبله الدراسي بشكل دائم.
في المقال دا هنتكلم بالتفصيل عن أنواع الصعوبات دي، ونكتشف الأساليب المختلفة اللي عن طريقها نقدر نتغلب عليها.
أنواع صعوبات التعلم عند الأطفال
في البداية لازم تعرف إن مفيش علاقة مباشرة بين صعوبات التعلم وذكاء الطفل، لكن صعوبات التعلم هي مشكلة بتأثر على طريقة فهم الشخص، وتلقيه للمعلومات، ومن هنا بتتعدد أنواعها، واللي منها:
1- عسر القراءة – Dyslexia
عسر القراءة هو واحد من أكتر أنواع صعوبات التعلم عند الأطفال من حيث الانتشار، لإنه بيمثل ما لا يقل عن 80% من جميع صعوبات التعلم تبعًا للي ذكره موقع National Library of Medicine.
النوع دا من صعوبات التعلم بيأثر على قدرة الطفل على القراءة، وطريقة فهمه لمصطلحات اللغة، وبالتالي ممكن يواجه صعوبة كبيرة في التعبير عن نفسه شفهياً.
أعراض عسر القراءة
- صعوبة التمييز بين أصوات الحروف وربطها بالكلمات.
- صعوبة فهم الكلمات واستخدامها بشكل صحيح.
- تجنب قراءة الكتب أو الاستمتاع بمجلات الأطفال.
- القراءة ببطء وفهم النص بعد محاولات متكررة.
- ضعف الإملاء وتجنب القراءة بصوت عالي.
- تأخر النطق.
كمان بنلاقي نوع تاني من أنواع صعوبات التعلم عند الأطفال مرتبط جداً بعسر القراءة وهو عسر الكتابة، ودا اللي هنتعرف عليه دلوقت.
2- عسر الكتابة – Dysgraphia
ودا اضطراب بيخلي الطفل يواجه صعوبة في تنظيم أفكاره وترتيبها على الورق بطريقة منطقية ومفهومة، ودا بيعمل إحباط للطفل، ويأثر على مستواه الدراسي، وبنلاقي إن من 10 لـ 30 % من الأطفال بيعانوا منه، وبيكون منتشر عند الأولاد أكتر من البنات حسب المذكور على NCBI.
أعراض عسر الكتابة
- صعوبة ترتيب الأفكار أو بناء النصوص بشكل منطقي.
- قضاء وقت طويل في كتابة جمل قصيرة.
- الكتابة بسرعة بغض النظر عن الجودة.
- مسك أداة الكتابة بشكل غير صحيح.
- الكتابة بخط غير واضح وغير منظم.
- صعوبة فهم قواعد الإملاء والنحو.
- الكلام بصوت عالي أثناء الكتابة.
وهنا بنلاقي إن التدخل المبكر وكتر تدريب الطفل على الإملاء والنحو بيأثر بشكل إيجابي جداً في علاج مشكلة عسر الكتابة.
3- عسر الحساب – Dyscalculia
عسر الحساب هو واحد من أنواع صعوبات التعلم عند الأطفال اللي بتأثر على قدرتهم على فهم الأرقام، وبتخليهم يواجهوا صعوبة كبيرة في حل المسائل الرياضية.
أعراض عسر الحساب
- صعوبة فهم العلاقات والمفاهيم الرياضية.
- الارتباك عند حل المسائل الرياضية.
- صعوبة عد الأرقام وتكوين الأعداد.
- صعوبة تذكر الجداول الحسابية.
- صعوبة قراءة وكتابة الأرقام.
عسر الحساب ليه أشكال كتير، والتكاسل عن حل المشكلة مع الطفل بدري ممكن يخليها تكمل معاه لفترات طويلة جداً، وتأثر على مستواه الدراسي في مواد الرياضيات، وعشان كدا بننصح بالتدخل المبكر وعلاج الطفل من صغره.
4- اضطراب فرط الحركة وتشتت الانتباه – ADHD
من أنواع صعوبات التعلم عند الأطفال المشهورة هو اضطراب فرط الحركة وتشتت الانتباه، وهو اضطراب عصبي بيأثر على قدرة الطفل على التركيز والتحكم في سلوكياته، بالإضافة لفرط النشاط الحركي، واللي بدوره بيسبب عائق تعليمي كبير.
وعلى الرغم من إن الاضطراب دا لا يعد إعاقة في التعلم، إلا أن الأبحاث المقدمة من منظمة LDA بتشير إلى إن حوالي 30 لـ 50 % من الأطفال المصابين باضطراب فرط الحركة وتشتت الانتباه بيعانوا من إعاقة تانية محددة في التعلم، وإن اجتماع المشكلتين سوا بيخلي التعلم أصعب على الطفل.
أعراض اضطراب فرط الحركة وتشتت الانتباه
- صعوبة في متابعة التعليمات والانتهاء من المهام المطلوبة.
- صعوبة في التفاعل الاجتماعي وبناء العلاقات.
- الانفعالات القوية وسرعة تغيُر المزاج.
- صعوبة في تنظيم وإدارة الوقت.
- الهمجية والنشاط الزائد.
- النسيان المتكرر.
على عكس باقي أنواع صعوبات التعلم عند الأطفال واللي بتحتاج للتدخلات التعليمية، فاضطراب فرط الحركة وتشتت الانتباه نقدر نعالجه عن طريق الأدوية.
5- اضطراب معالجة الإشارات السمعية – ASPD
هو اضطراب بيأثر على قدرة الشخص على استقبال وفهم الإشارات الصوتية بشكل صحيح، وبيواجه الطفل صعوبة في التمييز بين الأصوات وفهم الكلام.
أعراض اضطراب ASPD
- التأخر في تطوير مهارات الكلام واللغة، وصعوبة تعلم القراءة.
- صعوبة في تمييز الأصوات المهمة عن ضوضاء الخلفية.
- صعوبة في تذكر الطفل للحاجات اللي بيسمعها.
- صعوبة في فهم اللهجات والأصوات المختلفة.
- مشكلة في التمييز بين الكلمات المتشابهة.
- السماع بوضوح للأصوات الضعيفة.
النوع دا من الاضطراب مش مرتبط بضعف السمع، ولكنه أحد أنواع صعوبات التعلم عند الأطفال اللي بتأثر عليهم في القدرة على التمييز بين الأصوات وبعضها.
6- اضطراب معالجة الإشارات البصرية – VSPD
هو اضطراب عصبي بيأثر على القدرة على استقبال وتفسير المعلومات البصرية من البيئة المحيطة، وبيعاني الطفل المصاب بيه من صعوبة في تحليل المعلومات البصرية بشكل صحيح، ودا بيأثر بشكل مباشر على مجموعة واسعة من الوظائف الحياتية والتعليم.
أعراض اضطراب معالجة الإشارات البصرية عند الأطفال
- الانفعالات القوية وضعف في التحكم في الاستجابات البصرية.
- التركيز على التفاصيل والفروق الدقيقة في الصور.
- القراءة والكتابة والأداء الأكاديمي.
- تمييز الأشكال والألوان.
اضطراب معالجة الإشارات البصرية هو واحد من أنواع صعوبات التعلم عند الأطفال اللي بتتسبب في مشاكل في التنسيق بين اليد والعين، وعشان كدا ضروري نعالج الطفل من المشكلة دي من بدري.
7- اضطراب التناسق الحركي والخلل الأدائي – Dyspraxia
هو اضطراب عصبي بيأثر على القدرة على التنسيق والتحكم في الحركات الجسدية، ودا من أكتر أنواع صعوبات التعلم عند الأطفال خطورة، لأنه بيأثر على حركات الطفل اليومية، وبيخليه يواجه صعوبة في ممارسة أنشطة حياته الطبيعية.
وحسب موقع Dyspraxia Foundation فاضطراب التناسق الحركي بيأثر على 5% من الأطفال في سن المدرسة، وبيتأثر حوالي 2% منهم بشدة.
أعراض اضطراب التناسق الحركي
- ضعف في أداء المهام الحركية اللي بتتطلب الدّقة، زي: الكتابة والرسم ونط الحبل.
- الحساسية ضد الضوء، ومواجهة مشاكل في الشم والتذوق.
- عدم القدرة على إمساك القلم بشكل صحيح.
- صعوبات في الكلام وصعوبة في حركة العين.
- مشاكل في مسك المعلقة، وربط الحذاء.
مهم جداً نفهم إن عدد الطلبة اللي بيعانوا من صعوبات التعلم حول العالم مش قليل خالص، فمثلاً في العام الدراسي 2020-2021 في الولايات المتحدة الأمريكية، وصل عدد الطلبة اللي بتتراوح أعمارهم بين 3 لـ 21 سنة وبيعانوا من صعوبات تعلم محددة إلى 2.34 مليون فرد، ودا حسب الإحصائية المقدمة من موقع Statista.
ومع التقدم في العمر، بنلاقي إن مواجهة أي مشكلة من دول بتكون أصعب، وحلها بيتطلب مجهود مضاعف، وعشان كدا ضروري نتكلم عن أهمية التدخل المبكر لحل أي مشكلة من المشاكل اللي ذكرناها.
ما أهمية التدخل المبكر؟
التدخل المبكر هو عنصر حاسم عند التعامل مع العديد من أنواع صعوبات التعلم عند الأطفال اللي ممكن يواجهوها، وأهميته بتتمثل في:
- تحديد الأدوات والاستراتيجيات المناسبة لكل طفل بدقة، ودا بيزود من فرص نجاحه في المستقبل.
- تحقيق أقصر مدة للتأثير، لأنه بيقلل من مدى تأثير التحديات التعليمية والنفسية على الأطفال.
- تحسين جودة حياة الأطفال، ومساعدتهم على التكيف مع مختلف جوانب حياتهم.
- تقليل التأثير النفسي، ومساعدة الطفل في التعامل مع التحديات بشكل فعّال.
- المساهمة في تحسين النتائج التعليمية، وتحقيق تقدم أكبر في المدرسة.
بشكل عام، التدخل المبكر بيعزز من فرص نجاح الأطفال وبيساهم في تقليل تأثير التحديات التعليمية والنفسية على حياتهم.
وعشان كدا ضروري نهتم بعلاج الطفل بدري عند مواجهة أي نوع من أنواع صعوبات التعلم عند الأطفال.
طرق علاج صعوبات التعلم
في كتير من الطرق اللي ممكن نستخدمها في علاج صعوبات التعلم، ولازم يتم تحديد الطريقة المناسبة استنادًا لنوع وشدة صعوبات التعلم اللي بيواجهها الطفل، ودا طبعًا بيكون تحت إشراف طبي. ودي أكتر الطرق الشائعة لعلاجها:
العلاج الدوائي
في بعض الحالات، ممكن يكون العلاج الدوائي ضروري جداً للتعامل مع الاضطرابات، زي اضطراب فرط الحركة وتشتت الانتباه، وممكن يلجأ الطبيب لصرف علاج للاكتئاب أو القلق الشديد.
العلاج البديل
ودا أحد طرق علاج أنواع صعوبات التعلم عند الأطفال المعتمدة على طريقة مختلفة من العلاج زي: تغيير العادات الغذائية، واستخدام الفيتامينات، وإجراء تمارين للعين، وغيرها.
نصائح لأولياء الأمور لحل مشكلة صعوبات التعلم عند الأطفال
ومن أبرز الحاجات اللي مكن ولي الأمر ينفذها عشان يساعد في حل مشكلة طفله:
1- وضع الطفل في فصول دراسية خاصة
النوع دا من العلاج بيتضمن تقديم دعم تعليمي مخصص لاحتياجات الفرد حسب مشكلته، زي:
- استخدام برامج الكمبيوتر اللي بتدعم الكتابة، وبتحتوي على نصوص صوتية للمساعدة على القراءة.
- الاشتراك في جلسات تعليمية فردية مع معلمين متخصصين.
- إعطاء الطفل وقت أكبر في حل واجباته وامتحاناته.
2- متابعة الجديد عن الموضوع
مهم إنك كولي أمر تتابع الأبحاث الجديدة اللي ليها علاقة بطرق علاج صعوبات التعلم اللي بيعاني منها طفلك، وتساعد طفلك على تطبيقها.
3- تقديم الدعم النفسي والاجتماعي
لازم طبعًا نوفر الدعم النفسي والاجتماعي للأطفال اللي بيعانوا من صعوبات التعلم، لإنه بيساعد في تعزيز الثقة بالنفس، والتغلب على التوتر النفسي الملازم للصعوبات دي.
4- التعاون مع المعلمين
ضروري يحصل تعاون وتنسيق بين المعلمين والأهل لتقديم الدعم اللازم ومتابعة تقدم الطفل في البيت والمدرسة.
الخلاصة
لازم ندرك إن صعوبات التعلم بتشكل تحدي حقيقي للأطفال ولأسرهم، لكن الصعوبات دي مش نهاية العالم، دي نقطة بداية لرحلة جديدة من الاكتشاف والتعلم.
ومن خلال التقييم المبكر، وتقديم الدعم المناسب، نقدر نساعد الأطفال على تجاوز الصعوبات دي وتحقيق نجاح كبير في دراستهم وفي حياتهم اليومية.
وبغض النظر عن أي نوع من أنواع صعوبات التعلم عند الأطفال اللي بيواجهها طفلك لازم تفتكر دايمًا إنه عنده موهبة ومهارات خاصة في مجالات معينة، ودي حاجة بتحتاج لقدر أكبر من الاهتمام والدعم لاكتشافها.
المصادر
Detecting Learning Disabilities.
The Top 5 Most Common Learning Disabilities & Their Symptoms.
أضف تعليق