كيفية إنشاء جدول للتعليم المنزلي مع نسخة جاهزة للتحميل

كيفية إنشاء جدول للتعليم المنزلي مع نسخة جاهزة للتحميل.

في الفترة الأخيرة بدأ يتحمس عدد كبير من أولياء الأمور لفكرة التعليم المنزلي، واللي بتتولى فيها الأم مهمة التدريس لأطفالها في المنزل، وتنظيم يومهم بالكامل وبالشكل المناسب ليهم.

التعليم المنزلي ليه مميزات كثيرة جدًا زي: حرية اختيار المواد الدراسية المناسبة للطالب، وعدم تضييع الوقت في المدرسة، ومساعدة الطفل إنه يعيش حياة طبيعية بعيدًا عن النظام التعليمي التقليدي، بالإضافة لتحقيقه نتائج مذهلة في حال تنفيذه بالطريقة الصحيحة وتبعًا لجدول تعليم منزلي مناسب لطفلك.

في المقال دا هناقش إزاي تقدري تعملي جدول للتعليم المنزلي المناسب لطفلك، وإزاي تلتزمي بيه، وفي النهاية هنقدملك الحل اللي هيساعدك في تنظيم الجدول دا بكل سهولة.

ماذا قبل إنشاء جدول للتعليم المنزلي المناسب لطفلك؟

قبل ما تبدئي تنظمي جدول للتعليم المنزلي لازم تكوني ملمة ببعض النقاط اللي هتساعدك في تخطيط جدول فعال وقابل للتنفيذ بدون ما يشكل ضغوطات نفسية على الطفل، ومن أهمها:

1- تنظيم روتين يومي

أفضل ضمان لالتزام طفلك بجدول للتعليم المنزلي هو بناءه على هيئة روتين يومي ثابت، فمثلًا وضع مواعيد محددة للاستيقاظ والنوم، بالإضافة لتحديد مواعيد ثابتة أيضًا للدراسة، وتناول الوجبات، وممارسة الرياضة، وهكذا,

فمع اتباع أسلوب الروتين طفلك هيتعود إنه يقوم بجميع المهام في المواعيد الخاصة بيها، وبالتالي مش هيأجلها.

في البداية ممكن الطفل يواجه صعوبة في الالتزام بجدول التعليم المنزلي، وهنا بيكون الحل إنك تضيفي كل يوم مهمة صغيرة جديدة لروتين طفلك، وتدريجيًا هيكون عندنا جدول تعليم منزلي كامل ليوم طفلك بدون ما نسبب تعب أو إرهاق للطفل.

2- تقسيم اليوم لفترات لا مهام

أثناء قيامك بترتيب يوم طفلك يفضل إنك تقسميه لفترات بدلًا من مهام مفردة، زي تقسيم اليوم لـ 4 أو 5 فترات، كل فترة مخصصة لعمل شيء محدد؛ مثلاً الدراسة أو ممارسة الأنشطة أو القيام بالأعمال المنزلية
أو غيرهم.

ولكن مع تقسيم جدول للتعليم المنزلي لمواد دراسية أو مهام، الطفل هيلاقي نفسه قدام جدول معقد ومليان بالمهام والتفاصيل، واللي هينعكس على شعوره بإنه مكلف بأشياء كثير صعب يخلصها، وبالتالي سهل جدًا إنه يتكاسل في عملها.

3- تخصيص وقت زائد لكل مهمة

في حال كانت واجبات مادة اللغة العربية بتستغرق من الوقت 4 ساعات مثلًا لإنجازها، فالأحسن وأنتي بتعملي جدول للتعليم المنزلي إنك تخصصي مدة قدرها 5 ساعات للواجب، ودا تحسبًا لأي ظروف طارئة ممكن تعطل الطفل، وبالتالي بتقللي تأثير الظروف دي على روتين اليوم كامل، وفي نفس الوقت بتساعدي الطفل يخلص المهمة.

4- عدم تقسيم المهمة على أيام وإنجازها في فترة زمنية محددة

بدلاً من إنجاز مهمة واحدة بجانب غيرها من المهام في كذا يوم يُفضل تفريغ يوم كامل لإنجاز المهمة بإتقان، والتفرغ لباقي المهام في الأيام اللي بعد كدا.

فعلى سبيل المثال، خصصي لطفلك يوم كامل لواجب الرياضيات، وفي اليوم اللي بعده خليه يتفرغ لمادة العلوم، واليوم الثالث لمادة اللغة الإنجليزية، وهكذا.

الطريقة دي أكثر فاعلية وبتقلل من تشتت الطفل اللي بتحصل لما يتنقل من مادة للتانية، بالإضافة لإنها هتوفر وقت كبير للطفل واللي يمكن استغلاله في ممارسة الأنشطة.

5- ربط المهام الجديدة بالعادات اليومية

من أبرز الوسائل الفعالة في إنجاز المهام الصعبة هو ربطها بعادات يومية لا بد منها، زي تخصيص نصف ساعة للقراءة بعد وجبة الغداء، أو النوم مباشرة بعد انتهاء برنامج تلفزيوني معين.

وبكدا يتعود الطفل على إنجاز المهام بعد ما كان بيميل لتأجيلها، ومع الاستمرار هيقوم بيها لوحده وبدون إرشاد من الآباء.

6- فهم طبيعة شخصية الطفل

كل طفل ليه ميول وتفضيلات شخصية بتخليه يختلف عن غيره من الأطفال، وواحدة من أهم مزايا التعليم المنزلي إنه بيساعدك على استيعاب شخصية طفلك، وتخصيص نظام تعليمي كامل مناسب ليه.

وعلشان كدا من المهم إنك تراعي شخصية طفلك وأنتِ بتخططي لعمل جدول للتعليم المنزلي، فلو الطفل بيكون في أعلى درجات استيعابه بعد الفجر حاولي تستغلي الوقت دا كويس في الدراسة.

وفي حالة إن الطفل مش بينجذب لنظم التعليم التقليدية والورقية فدورك وقتها إنك تضيفي بعض الأنشطة والوسائل البصرية أثناء شرحك للدرس؛ وبكدا تساعديه يحقق أعلى استفادة ممكنة، وكمان تحببيه في التعليم.

7- إنشاء جدول مرن

وأنتِ بتخططي لجدول للتعليم المنزلي لازم تكوني متوقعة إنه ممكن ما يناسبش طفلك من أول مرة، وفي البداية هتضطري تعدلي على الجدول لحد ما توصلي لنتيجة مرضية بالنسبالك وتكون ملائمة ومريحة لطفلك، وللسبب دا مهم إنك تعملي جدول مرن يسمحلك بإجراء التغيرات وقت اللزوم من غير ما نفقد الروتين بشكل كامل.

8- التخطيط للأسبوع المقبل

كم مرة نسيتي إتمام أو جدولة مهمة ضرورية؟

طبعًا المشكلة دي بتتكرر باستمرار، وخاصة لو كنتي بتصممي جدول للتعليم المنزلي لطفلك بشكل يومي، وعلشان تتفادي المشكلة دي لازم تبدئي بالتخطيط بشكل أسبوعي، لإنك بالطريقة دي هتعرفي تحددي أولوية المهام المطلوبة من طفلك، وبالتالي تنظمي مهام الأسبوع بناءً عليها،

كمان تقدري تستعيني بمفكرة تسجلي فيها يوميًا كل الأفكار الجديدة، والمهام المطلوب إتمامها على مدار الأسبوع القادم، وبكدا تضمني إنك مش هتنسي أي مهمة أو تأجليها عن موعدها المطلوب.

9- الاستعانة بالمحتوى المرئي على الإنترنت

المحتوى المرئي على الإنترنت بيمثل حلقة بين التعليم والترفيه، فممكن تستغلي فترات الفتور أو الملل أثناء الدراسة بفيديوهات تعليمية، واللي بيكون ليها دور كبير في توصيل المعلومة، وفي نفس الوقت الطالب مش بيحس إنه يبذل مجهود كبير لما يشوفها.

10 – تعويض الوقت الضائع

مش دائمًا بيكون لينا سيطرة كاملة على الأوضاع المحيطة بالطفل، والنتيجة بتكون إن أي ظرف ممكن يأخر الطفل عن إنجاز المهمة في اليوم المحدد لها.

وعلشان كدا مهم إن الطفل يتعلم إنجاز المهام المتأخرة في وقت الفراغ أو الإجازات، وإنه حصوله على الإجازة بشكل كامل مرتبط بإنجازه لكل المهام.

ما هو الجدول الأنسب لطفلك ؟

جدول للتعليم المنزلي جاهز للطباعةعشان نسهل عليكي ونساعدك في إعداد جدول للتعليم المنزلي بدون مجهود قدمنا لك جدول للتعليم المنزلي تقدري تطبيعه، وتنظمي يوم طفلك باستخدامه بسهولة.

الجدول متقسم لـ 9 خانات رأسية بتشمل أيام الأسبوع، وخانة الـ Block والـ Time، من خلال خانة الـ Block هيكون عندك الإمكانية لتقسيم اليوم لـ 4 فترات خلال اليوم مخصصين للمذاكرة وإتمام المهام والنشاطات المختلفة ، وفي خانة الـ Time هتحددي وقت كل مهمة من المهام المطلوبة من ابنك في كل فترة، وبكدا تكوني نظمتي مهام كل أيام الأسبوع بشكل مرتب وبدون صعوبة.

حملي جدول التعليم المنزلي ونظمي وقت طفلك.

كيفية إدارة وقتك بين عملك وجدول التعليم المنزلي لأطفالك

كيفية إدارة وقتك بين عملك وجدول التعليم المنزلي لأطفالك.psdاختيارك لنظام التعليم المنزلي لأطفالك مش معناه انقطاعك عن عملك وتفرغك بشكل كامل لمتابعتهم، وإنما هدفه في الأساس هو تخفيف العبء والضغط عليكِ وعلى أطفالك، وإضافة المرونة لروتين أطفالك اليومي.

ولكن أحيانًا بتظهر مشكلة عدم القدرة على الموازنة بين عملك وتعليم أطفالك تعليم منزلي وحياتك الاحتماعية، واللي تقدري تحليها بسهولة من خلال تنظيمك لوقتك بطريقة صحيحة واتباع بعض النصائح المهمة زي:

حددي أوقات فراغك وانشغالك

في بداية تخطيطك لجدول للتعليم المنزلي لازم تحددي أوقات فراغك وانشغالك، وكمان فترات تواجدك خارج المنزل، وعلى الأساس دا تقدري تبني جدول للتعليم المنزلي مناسب ليكي ولأطفالك.

توقعي عدم تنفيذ الجدول بشكل كامل

لازم تحطي في اعتبارك احتمالية حدوث اضطرابات في الجدول، وعدم قدرتك إنك تلتزمي بيه بدقة في كل الأوقات، وحاولي إن دا ما يأثرش عليكي نفسيًا أو يصيبك بالإحباط تجاه فكرة التعليم المنزلي.

علمي أطفالك الاعتماد على نفسهم

كلفي أطفالك في أوقات انشغالك بإنجاز الواجبات البسيطة والمهام السهلة زي: مراجعة المعلومات السابقة، أو مشاهدة بعض البرامج التعليمية.

حاولي تزودي مسئوليتهم تدريجيًا، وتشجيعهم على الدراسة بنفسهم دون مساعدة منك، وكلفي الأطفال الأكبر سنًا بمساعدة الأطفال الأصغر مع عدم التأثير على روتينهم الخاص.

غيري تنظيم الجدول مع تغيير مواعيدك

عيدي هيكلة جدول التعليم المنزلي مع تغيير مواعيدك بشكل ما يسببش ضغط ليكي، واستمتعي بقضاء وقت أكبر مع أطفالك بعيد عن ضغوطات الحياة والشغل.

الخلاصة

وجود طفلك في المدرسة لسبع ساعات متواصلة مش هو الحل الوحيد للتفوق، وفي السنين القادمة هيتزايد عدد الطلاب الملتحقين بأنظمة التعليم المنزلي، وعلشان تقدري تنظمي وقت طفلك بكفاءة وذكاء في البيت قدمنا لك من خلال المقال مجموعة ملاحظات هتساعدك في بناء جدول للتعليم المنزلي كامل، ووفرنا نسخة من جدول جاهز للطباعة.

يمكنك قراءة أيضًا: مناهج التعليم المنزلي للأطفال | تعرف على أشهر 5 مناهج

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية

إقرأ أكثر..

  • No comments yet.
  • Add a comment