إيه هو الفرق بين صعوبات التعلم واضطرابات التعلم؟
بيعتقد البعض إن صعوبات التعلم واضطرابات التعلم حاجة واحدة، ولكن دا مش صحيح بشكل كبير، بالرغم من كونهم بيوصفوا مشاكل في وتيرة تعلم الفرد، لكن الحالتين بينهم اختلافات طفيفة في مدى تأثيرهم عليه، وعلى شكل حياته.
عشان كدا في المقال دا هنعرض تعريف صعوبات التعلم واضطرابات التعلم، والأسباب، والأعراض، وكمان هنتكلم عن العلاج، فتابع معنا.
ما هي صعوبات التعلم؟
هي حالة ذهنية بتخلي الطفل مش قادر على استقبال المعلومات وفهمها، ولكن دا مش معناه إن الطفل بيكون ذكاؤه ضعيف.
لإن صعوبات التعلم مالهاش أي تأثير على الذكاء؛ ممكن يكون الطفل ذكي جداً، لكن عنده مشكلة في مهارة من مهارات التعلم زي: القراءة، والكتابة، والحساب؛ ودي نقطة مهمة في الفرق بين صعوبات التعلم واضطرابات التعلم لإن في الاضطرابات بتأثر على الذكاء.
وبكدا يكون صاحب صعوبات التعلم هو شخص عادي معندوش أي مشاكل ذهنية، ومستوى ذكائه طبيعي، لكن في أسباب بيئية محيطة بيه أدت لوجود مشاكل في الإدراك، واستيعاب بعض المهارات الأكاديمية، وملهاش أي تأثير على المهارات الحياتية، ولكن يمكن تشخيصه وعلاجه.
ودا على عكس اضطرابات التعلم اللي مش بنقدر نعالجها، بنقلل من أعراضها بس.
طيب هل كل طفل مش عارف يحل الواجب يبقى عنده صعوبة تعلم؟ لأ طبعاً، ممكن دا يكون لأسباب تانية كتير زي، إنه مش فاهم كويس، أو تعبان، أو المادة صعبة عليه، أو نفسيته تعبانة، وغيرها من الأسباب.
لكن مشكلة صعوبة التعلم معناها إن الطفل عنده قصور أو ضعف في مهارة من مهارات التعلم أثناء الدراسة، يعني وهو بيحل الواجب مش بيعرف يحل كويس، أو وهو في المدرسة مش بيعرف يقرأ كويس، وعنده مشكلة مستمرة في الحساب.
ومع استمرار المشكلة واستمرار الضعف بنلاقي إن الطفل دا عنده صعوبات تعلم، فبيواجه مشكلة في واحدة من المهارات الأساسية، زي: القراءة، والكتابة، والحساب، بالإضافة لصعوبة في فهم المعلومات، ومعالجتها، وتخزينها.
أنواع صعوبات التعلم
من النقاط المهمة في الفرق بين صعوبات التعلم واضطرابات التعلم، وهي الأنواع:
- اضطراب فرط الحركة ونقص الانتباه ADHD
- اضطراب التناسق الحركي والخلل الأدائي
- اضطراب معالجة الإشارات السمعية
- اضطراب معالجة الإشارات البصرية
- عُسر القراءة
- عُسر الكتابة
- عُسر الحساب
ووفقاً لدراسة نشرها Journal of Positive School Psychology حول صعوبات التعلم في مرحلة الثانوية، بنلاقي إن عسر الحساب والكتابة والقراءة هما الأكتر انتشاراً بدرجات متفاوتة بين البنات والأولاد.
أعراض صعوبات التعلم
علامات صعوبة التعلم تختلف من مرحلة لأخرى، ودا من أهم أساسيات الفرق بين صعوبات التعلم واضطرابات التعلم.
فبنلاقي إن الأم بتلاحظ علامات في سن ما قبل المدرسة، وفي مراحل تانية كمان، لو الطفل وقتها متعرضش على مختص ممكن المشكلة تكبر.
سن ما قبل المدرسة
ووفقاً لدراسة اتنشرت في International Journal of Early Childhood Special Education للعلامات المبكرة اللي بتظهر على الأطفال في مرحلة ما قبل المدرسة بنلاقي:
1– تأخر الكلام عن العمر الطبيعي
يعني في أطفال ممكن تقول بابا أو ماما عند سن 3 شهور، وممكن يتأخر لسنة و 3 شهور، لكن وصوله لسن سنتين ولسه مش قادر يتكلم، ويوصل لعمر 3 سنين مش قادر يكون جملة، فدي مشكلة.
فعشان كدا تأخر الكلام بيديلنا جرس إنذار إن الطفل دا عنده ضعف في قدراته الذهنية، ولو متعالجش هيبقى عنده صعوبات تعلم أثناء الدراسة.
2- الطفل مش قادر ينطق صح
يعني الأم بتحاول تعلمه كلمات بسيطة، زي أسماء إخواته، وبعض الحاجات اللي حواليه، زي: باب، كرسي، ولو معرفش ينطق صح فدي علامة على صعوبات التعلم عنده.
3- الطفل مش عارف يتعلم
بعد عمر 3 سنين بتبدأ الأم تعلم الطفل الحاجات البسيطة زي: الأرقام، والألوان، والحروف، ولو مقدرش يتعلم المهارات البسيطة دي، فدا معناه إنه هيعاني من صعوبات التعلم أثناء الدراسة.
علامات سن المدرسة
أما عن علامات صعوبة التعلم في سن المدرسة، فالأم والمعلم بيلاحظوا على الطالب العلامات دي:
- تكرار، أو حذف، أو تبديل الحروف، والجمل، والكلمات أثناء القراءة
- عدم التركيز في شيء معين لإن مدة الانتباه عنده قليلة جدًا
- مشكلة الفهم القرائي؛ بيحب يحل المسائل البسيطة فقط
- مشاكل في تنفيذ الأوامر المركبة، والاتجاهات
- عدم التفريق بين الحروف المتشابهة
- كتابة الأرقام بالمقلوب
- كتابة الحروف غلط
- عدم إكمال الواجب
مرحلة سن 10 – 13 سنة
بيوصل الطفل لحالة متأخرة جداً، وبتكون علامات صعوبات التعلم عليه هي:
- صعوبة في التعبير عن مشاعره وأفكاره بصوت عالي
- الفوضوية، وضعف في المهارات التنظيمية
- سوء الخط، وبيكون خطه غير مناسب لسنه
- وجود مشاكل في تهجئة الكلام
- صعوبة فهم الرياضيات
- صعوبة القراءة
وبعد ما الأم بتلاحظ العلامات دي، أو معلم الفصل، بتبدأ رحلة التشخيص.
تشخيص صعوبات التعلم
التشخيص كمان من الأمور المختلفة في الفرق بين صعوبات التعلم واضطرابات التعلم، لإن الاضطرابات بتكون ناتجة عن مشاكل عصبية واضحة على الطفل من سن قبل المدرسة، لكن صعوبات التعلم بتختلف علاماتها في كل عمر.
في الأول هنجاوب عن سؤال “هل في تحليل أو اختبار واحد لتشخيص صعوبات التعلم؟ الإجابة لأ.
والطفل عشان يتشخص بصعوبات التعلم بنلاقي إن المختص بيحتاج:
- معلومات عن الأسرة وهل في مشاكل أسرية كبيرة ولا لأ، لإنها ممكن تكون سبب لتأخر الطفل دراسياً.
- تقرير من معلم الفصل، لإنه بيقدر يلاحظ على الطفل مشاكل صعوبات في التعلم.
- التقييم الخفي اللي ممكن يعمل صعوبات تعلم، زي كشف النظر، واختبار السمع.
- التقييم النفسي، زي تشخيص الطفل باضطراب فرط الحركة ونقص الانتباه.
- الاختبار الأكاديمي، من خلال تقرير من ملاحظات الأم، والطفل، والمعلم.
- تقييم للطفل لمعرفة مدى تطوره ذهنياً وبدنياً.
ولو الطفل اتشخص إنه بيعاني من صعوبات التعلم وحددنا نوعه، بيكون وقتها العلاج سهل، ودا ميزة جوهرية في الفرق بين صعوبات التعلم واضطرابات التعلم، وهو إن التدخل المبكر بيفيد الطفل، وبيخلصه من صعوبات التعلم.
علاج صعوبات التعلم
بيعتمد العلاج على 3 عوامل، وما ينفعش يكون عامل فيهم مش موجود:
دور الأسرة
دور الأسرة بيكون بمتابعة الطفل، وملاحظة العلامات المذكورة سابقاً، واستشارة المختص باستمرار، عشان ولي الأمر يتأكد إن بيتعامل مع حالة طفله بالشكل الصحيح.
دور المعلم
المعلم هو أكتر شخص بيلاحظ الصعوبات دي على الطفل أثناء الدراسة بالمقارنة مع زملائه، وبيلاحظ تأخره عنهم، وبخبرته هيقدر يطبق مع الطفل أساليب تساعده في رحلة العلاج، طبعًا ممكن ناخد توصيات من المتخصص ونوصلها للمعلم عشان نسهل عليه التعامل مع الطفل.
دور المختص
المختص هو الشخص المسؤول عن تقييم الحالة من خلال بعض الاختبارات، وتوضيح طبيعة المشكلة لولي الأمر، وطريقة التعامل معاها، عشان الطفل يوصل لمرحلة كويسة، والأعراض تبدأ تقل.
مراحل العلاج بتكون عبارة عن:
- تحديد الأساليب المستخدمة لتحسين الحالة
- تنمية نقاط القوة
- تقوية نقاط الضعف
فمن خلال تحديد الأهداف دي، هنقدر نعالج صعوبة التعلم عند الطفل، بتوفير برنامج يركز على نقطة الضعف، وتنميتها.
وبكدا نكون وضحنا خطوات تحديد، واكتشاف صعوبات التعلم عن الطفل، وأهم العلامات ليه، والتشخيص، والعلاج، وأهم نقاط الفرق بين صعوبات التعلم واضطرابات التعلم.
تعرف أيضاً على: أهم مشكلات الأطفال السلوكية أسبابها وعلاجها.
ما هي اضطرابات التعلم؟ | الفرق بين صعوبات التعلم واضطرابات التعلم
هي إعاقة ذهنية بتأثر على العملية التعليمية، وكمان جميع جوانب حياة الطفل، وبتسبب انخفاض معدل الذكاء، ودي نقطة مهمة في الفرق بين صعوبات التعلم واضطرابات التعلم.
ودا لإن مصاب اضطراب التعلم بيعاني من إعاقة ذهنية، حصلت أثناء حمل الأم، أو نتيجة حادثة حصلتله فور الولادة، فأصبح شخص غير طبيعي، ليه معدل ذكاء مختلف، واستيعاب مختلف بيؤثر على جميع المهارات الأكاديمية.
هنلاقي إن اضطرابات التعلم بتكون للأفراد اللي بيتولدوا بالمتلازمات، والإعاقات الذهنية، زي:
- اضطراب طيف التوحد “ليست جميع الحالات”
- متلازمة برادر ويلي
- متلازمة أسبرجر
- متلازمة ويليام
- متلازمة ريت
- متلازمة داون
أنواع اضطرابات التعلم
بيعاني أطفال اضطرابات التعلم من:
- اضطرابات الرياضيات
- اضطرابات القراءة
- اضطرابات الكتابة
والاضطرابات دي مالهاش أي علاقة بمشاكل في الرؤية، أو السمع، أو الاضطراب العاطفي، ولكن ليها أسباب معينة بتوضح الفرق بين صعوبات التعلم واضطرابات التعلم.
أسباب اضطرابات التعلم
تبدأ معظم اضطرابات التعلم في رحم الأم، ويمكن توقعها أثناء الحمل عند التشخيص زي متلازمة داون مثلاً، وممكن يصاب بيها الطفل مع تقدمه في العمر.
ورغم إن أسباب اضطرابات التعلم مش مفهومة بشكل كامل، إلا إنها تشمل مشاكل أساسية زي:
- أسباب بيئية، زي تعرض الطفل للرصاص، أو حالات عدوى الجهاز العصبي المركزي، والسرطان.
- مشاكل عند المولود نفسه، زي: انخفاض الوزن عند الولادة، أو اليرقان، وغيره.
- وجود مضاعفات أثناء الحمل أو الولادة، زي: تسمم الحمل، والمخاض المطول.
- تعرض الطفل لأحداث صادمة في مرحلة الطفولة من اعتداء، وسوء معاملة.
وتعد الأسباب دي من النقاط الهامة في الفرق بين صعوبات التعلم واضطرابات التعلم، بالإضافة لطريقة العلاج.
علاج اضطرابات التعلم
بيعتمد العلاج في حالة اضطراب التعلم بشكل أساسي على الأدوية العصبية والنفسية، وإدارة تعليمية خاصة، ورغم إننا مش بنوصل مع الطفل لمرحلة علاج تام من الاضطراب دا، إلا إننا نقدر نتعامل معاه ونقلل من حدته.
عشان كدا لازم نتابع حالة الطفل مع طبيب متخصص، ونلتزم بتعليماته، وناخد منه دايمًا استشارات تساعدنا في التعامل بشكل صحيح مع الطفل اللي بيعاني من اضطرابات التعلم.
الخلاصة
بيعتقد كتير من الناس إن مصطلح صعوبة التعلم واضطرابات التعلم ليهم معنى واحد؛ وهما فعلاً بيتفقوا في كون المتعلم غير قادر على تلبية المطالب التعليمية بالشكل المناسب للعمر.
والفرق بين صعوبات التعلم واضطرابات التعلم بيظهر في إن صعوبة التعلم هي مشكلة بتعيق مهارة من مهارات التعليم، وما لهاش أي تأثير على باقي جوانب الحياة.
أما اضطرابات التعلم فهي حالة ليها تأثير قوي على قدرة الشخص على التعلم، وعلى كل مجالات حياته، وطبعًا العلاج بيختلف في الحالتين.
المصادر
Learning disability vs Learning difficulty: What is the difference?
What is the difference between learning disability and learning difficulty
Learning disabilities\ How to get support?
Specific Learning Disorder and Treatment
أضف تعليق