تعرفي إن طفلك ممكن يطلع كاتب روايات مشهور، أو مترجم أو صحفي متفوق عشان بيقرأ كتير وبيحب القراءة؟
ودا لإن القراءة مهارة أساسية في حياة الطفل، وبالتالي لازم نبدأ نغرسها في الطفل من صغره، لإنها بتساعده على التواصل بشكل أفضل مع الآخرين، وبتزود إبداعه، وبتكوّن عنده حصيلة لغوية كبيرة.
لكن على الرغم من سهولتها، إلا إن صعوبات القراءة عند الأطفال منتشرة بشكل لا يستهان بيه، وفي المقال دا هنعرف إيه هي الصعوبات دي، وهنتناقش في طرق واستراتيجيات التغلب عليها.
صعوبات القراءة عند الأطفال
حوالي 64% من الأطفال على مستوى العالم في سن العاشرة مش بيكونوا قادرين يقرأوا ويفهموا قصة قصيرة مكتوبة، ودي النسبة اللي أشارت ليها الـ UNICEF في 19 سبتمبر 2022، وحذرت وقتها من وجود أزمة تعليم عالمية.
فالقراءة من المهارات اللي بتفرق جداً في حياة الطفل سواء وهو صغير أو حتى بعد ما يكبر. لكن كل طفل بتختلف عنده درجات الاستيعاب والفهم، ومن هنا بتظهر صعوبات القراءة عند الأطفال، واللي ممكن نحصرها في أكتر 3 صعوبات شائعة بتواجهيها مع طفلك، وهي:
1- صعوبة النطق
أطفال كتير بيبقى عندها أزمة في نطق الحروف أو الكلمات، وأحياناً دا بيكون يا إما بسبب إنه خايف ينطق عشان ما يغلطش، أو محتاج يحسن من مهارة الثقة في النفس، أو إنه ما عرفش من البداية النطق الصحيح لكل حرف وطريقة تجميع الأصوات مع بعضها عشان يقدر يكّون كلمة وينطقها.
وعشان تقدري تتغلبي على أول صعوبات القراءة عند الأطفال، محتاجة تنفذي بعض الخطوات مع طفلك، زي:
- رؤية صور لكل حرف أو كلمة بيحاول ينطقها، وهنا هتساعديه في حفظ صوت الحروف خلال الكلام.
- الاستماع الجيد لصوت كل حرف في اللغة سواء عن طريق معلم أو فيديوهات اليوتيوب.
- تقسيم الكلمة خلال القراءة، ومن بعدها تقسيم الكلمات كلها لو بيقرأ سطر أو أكتر.
- كتابة الكلمات مع النطق، والخطوة دي مهمة جدًا وهتفرق في مستواه.
سهل تتغلبي على صعوبة النطق، لإن الطرق المتبعة مش بتكون صعبة أوي على الطفل، وكمان لإنك بتنفذيها معاه وقت المذاكرة مش في وقت منفصل.
ولكن الأهم هو التمرين المستمر، والتركيز على التشجيع وعدم الترهيب، مع توفير حافز للتعلم، طبعاً مع الدعم المستمر منك كأم. كل دي حاجات بسيطة لكن هتفرق بشكل ملحوظ مع الطفل.
2- صعوبة الفهم
أحياناً مهارة النطق عند طفلك بتكون كويسة، ولكن واحدة من أشهر صعوبات القراءة عند الأطفال اللي ممكن يواجهها هي فهم الكلمة نفسها.
بس إزاي؟ وليه طفل يعرف ينطق بس مش بيقدر يفهم كويس؟
المشكلة كلها بتكمن في قلة التركيز، سواء في التفاصيل الصغيرة الموجودة في النص اللي بيقرأه طفلك أو حتى في المعلومات الأساسية اللي بيناقشها النص.
ودا مش بيكون أبداً بسبب ضعف قدرات الطفل، ولكن بعض الأطفال نسبة التشتت بتكون عندهم أعلى من نسبة التركيز.
والحل للتغلب على صعوبة فهم النص عند طفلك بيتمثل في أكتر من أسلوب، منهم:
- وفري له رسومات ومخططات خاصة بالأطفال، تساعده على تثبيت المعلومات بشكل أسرع.
- ساعديه يختار مواضيع بيحبها خارج منهج الدراسة، ويبدأ في قراءتها وتلخيصها.
- اطرحي أسئلة تنشط ذاكرة طفلك بعد قراءة نص معين.
- اطلبي منه يعمل ملخص سريع لكل جزء بيخلص قراءته.
- خليه يقرأ بشكل جزئي، لو كان النص كبير عليه.
دعم طفلك وتطوير مستواه في القراءة عن طريق هواياته، والحاجات اللي بيحبها هيساعده جداً في التغلب على صعوبات الفهم، وكمان المناقشة والحوار المستمر معاه هيفرق في مستوى معرفته وتركيزه.
3- صعوبات فردية
صعوبات القراءة عند الأطفال مش بتنحصر في أسباب متعلقة بالقراءة والكتابة بس، ولكن فيه أسباب مختلفة ليها، وأشهرها هي عوائق التعلم غير الإرادية، زي:
الـ Dyslexia
وهي ما تسمى بعسر القراءة، واللي بتلاحظي تأثيرها على مستوى الطفل في القراءة، والكتابة، والتهجي، وبتحصل بسبب فروق فردية في مناطق الدماغ اللي بتعالج اللغة، وبالتالي بتكون سبب إضافي في صعوبات القراءة عند الأطفال، وبتسبب صعوبة في النطق، أو الربط بين أصوات الحروف وبعضها.
وعسر القراءة ليه أنواع كتير، أبرزها:
عسر القراءة الأولي
دا أشهر الأنواع وأخطرها، وممكن يستمر مدى الحياة لو ما تمش التدخل العلاجي بدري.
عسر القراءة الثانوي
بيحصل بسبب مشاكل في الحمل والولادة، لكن تأثيره بيقل مع نمو الطفل.
عسر القراءة الناتج عن الصدمة
بعد تعرض الطفل لصدمة أو إصابة، ممكن تتأثر المنطقة المسؤولة عن النطق والقراءة في الدماغ، وبالتالي يعاني الطفل من صعوبة القراءة.
عسر القراءة الصوتي
هنا بيواجه الطفل مشكلة في تحويل الحروف اللي بيسمعها إلى كلمات مكتوبة.
عسر القراءة البصري
وهنا بيصعب على الطفل التعرف على الحروف لما بيشوفها، وبالتالي بيواجه صعوبة في تذكر نطقها.
عسر القراءة المضاعف أو المزدوج
ودا حالة نادرة، اللي بيحصل فيها إن الطفل بيتصاب بأكتر من نوع من أنواع عسر القراءة في نفس الوقت.
الـ ADHD
وفقاً للإحصائيات المقدمة من (CDC) هنلاقي إنه تم تشخيص أكتر من 6 مليون طفل في الولايات المتحدة مصاب بالـ ADHD في الفترة بين 2016 لـ 2019.
الاضطراب معروف باسم اضطراب فرط الحركة ونقص الانتباه، واللي بيكون عامل إضافي في التاثير على مستوى تركيز طفلك خلال التعلم، وبيشكل صعوبة من صعوبات القراءة عند الأطفال، لإنه بيخلي فهم الطفل للكلمات والجمل أصعب.
والحل لاضطرابات زي دي بيكون من خلال:
- تشجيع الطفل على ممارسة الألعاب الرياضية، لإنها بتحسن من مستوى الانتباه، وبتقلل التشتت.
- تنظيم وقت طفلك بين تعلم القراءة واللعب، حتى لو وقت اللعب هيكون أكبر في البداية.
- تقسيم مهامه اليومية لأجزاء أصغر، يكون بينها أوقات استراحة أقل، ودا هيزود تركيزه.
- توفير بيئة تعلم منظمة بصرياً، عن طريق استخدام المخططات والكتب المصورة.
- الاستعانة بمتخصصين يساعدوكي تتعاملي مع طفلك بشكل سليم.
اقرئي أيضًا: أنواع صعوبات التعلم عند الأطفال وطرق علاجها.
علامات صعوبات القراءة عند الأطفال
بتختلف أعراض وعلامات صعوبات القراءة حسب السن والمرحلة العمرية اللي بيعيشها الشخص المصاب بيها، زي:
مرحلة ما قبل المدرسة
دي أفضل مرحلة ممكن تكتشف فيها حالة الطفل عشان تساعده من بدري، ومن أعراضها:
- الخلط بين الكلمات المتشابهة، وصعوبة تكوينها بشكل صحيح.
- صعوبة استيعاب أصوات الحروف وتمييزها.
- صعوبة تذكر الحروف، والأرقام، والألوان.
- التأخر في الكلام، وتعلم الكلمات ببطء.
مرحلة الدراسة
بمجرد دخول الطفل المدرسة بتبدأ تظهر الأعراض بشكل أوضح، وبيكون أسهل للمعلمين في المدارس إنهم يكتشفوها، ومن أعراض صعوبات القراءة عند الأطفال في المرحلة دي:
- صعوبة رؤية وسماع أوجه الشبه والاختلاف في الحروف والكلمات.
- ضعف قدرة الطفل على القراءة مقارنةً بالأطفال اللي في سنه.
- مشاكل في فهم الطفل للكلام اللي بيسمعه.
- عدم قدرته على قراءة الكلمات غير المألوفة.
- الابتعاد عن الأنشطة اللي بتتضمن القراءة.
- صعوبة في تكوين إجابات للأسئلة.
مرحلة المراهقة والبلوغ
بتتشابه أعراض المرحلة دي مع الأعراض اللي بتظهر عند الأطفال، ومنها:
- ضعف القدرة على حل المسائل اللفظية في الرياضيات.
- مواجهة صعوبة في تلخيص قصة أو تعلم لغة جديدة.
- النطق غير الصحيح للأسماء والكلمات.
- القراءة والكتابة ببطء وبمجهود شاق.
- تجنب الأنشطة اللي بتتضمن القراءة.
- مواجهة مشكلات في التهجي.
أسباب صعوبات القراءة عند الأطفال
بتختلف الأسباب اللي بتأثر على مهارات الطفل في القراءة حسب نوع الصعوبة اللي بيتعرضلها، واللي منها:
- العوامل الوراثية، زي العوامل اللي بتسبب الـ Dyslexia، ودي واحدة من أكتر الأسباب انتشاراً.
- صعوبة سماع الطفل لصوته أثناء القراءة، ودا بيصعب عليه تمييز الكلمات عن بعضها.
- عدم وجود دعم في البيت للطفل، وقلة تشجيعه على القراءة.
- صعوبة تمييز الطفل للأصوات، وربطها بالحروف المكتوبة.
- المشاكل الصحية زي اضطرابات التركيز والانتباه.
- مشاكل في الرؤية والإبصار، زي قصر النظر.
هل عدم الاهتمام بالقراءة ممكن يشكل صعوبة عند طفلك؟
في البداية عرفنا إن صعوبات القراءة عند الأطفال ممكن تختلف من طفل للتاني، يعني بتعبير آخر ممكن طفلك ما يكونش بيعاني من أي صعوبة في القراءة في بداية تعلمه، ولكن بعد دخوله الحضانة أو المدرسة تلاقيه بيقرأ بصعوبة، وبيواجه مشاكل في نطق بعض الكلمات والحروف.
بس يا ترى ممكن يكون السبب إيه؟
خوف، وقلة ممارسة، وعدم اهتمام بالقراءة!
ممكن يكون سبب صعوبات القراءة عند الأطفال واحد من التلاتة دول، ولكن الأكيد إن العامل الأساسي هو عدم الاهتمام بالقراءة، ولو طفلك بيمارس القراءة كل يوم بشكلها الصحيح دا هيقوي عنده المهارة نفسها، وهيزود ثقته في نفسه. بالتالي مش هيكون خايف ينطق.
أسباب عدم اهتمام الطفل بالقراءة
نقدر نقسم أسباب عدم الاهتمام بالقراءة لحاجتين:
1- التعرض المحدود للقراءة
ودا بيولد صعوبة، لإن الطفل بطبيعة الحال بيقضي معظم وقته ما بين اللعب والتليفزيون، بدل ما يقرأ قصة أو كتاب للأطفال، ولكن استثمار ساعة واحدة في اليوم للقراءة هيكون ليه فاعلية كبيرة على تطور الطفل، ودي من الطرق الفعالة للقضاء على صعوبات القراءة عند الأطفال.
2- مشاكل في الرؤية أو في السمع
بعض الأطفال ممكن يكون عندهم قصر نظر، أو بيعانوا من عدم سماع صوتهم أثناء القراءة، ودي كلها مشاكل بتأثر عليهم نفسياً، وبتقلل من اهتمامهم بالقراءة، والحل هنا هو زيارة الطبيب المختص عشان تلحقي المشكلة من بدايتها.
3- الإصابة بملل القراءة
أحياناً ممكن يصاب طفلك بالملل من القراءة، لإنه مش قادر يدرك قيمة القراءة في حياته، ودا من أخطر المؤثرات في سلسلة صعوبات القراءة عند الأطفال.
لإن الطفل لو بيمل من القراءة من صغره، هيتأثر جداً كل ما يكبر، وممكن يوصل لمرحلة الجامعة وهو مش بيقدر يقرأ بطلاقة، ومخارج الحروف عنده مش مظبوطة، بالتالي ممكن جداً يتعرض للتنمر أو الإساءة.
والحل هنا هو اهتمام الوالدين بغرس أهمية القراءة في الطفل، ودا عن طريق ربط هوايات طفلك بالقراءة، بمعنى إنه لو بيحب الكورة يقرأ عنها قصص ومقالات مناسبة لسنه.
ولو بيميل للطبيعة يبدأ يقرأ كتب مصورة عن النباتات والأشجار وأنواعها، وممكن نحاول نخليه يقرأ كتب صغيرة عن الأخلاق والدين مناسبة لعمره.
كلها أنشطة هتكسر حاجز الملل عند الطفل مع الوقت، وهتزود من مستوى اهتمامه بالقراءة.
نصائح للتغلب على صعوبات القراءة عند الأطفال
بعد معرفة الأسباب المتعلقة بصعوبة القراءة عند طفلك، بيكون سهل تعالجيها وتطبيقها بأفضل شكل يتناسب معاكي ومع الطفل، ومن النصائح اللي هتساعدك:
- البحث عن معنى الكلمات والجمل خلال القراءة، عشان تثبت في دماغه، ويزود من حصيلته اللغوية.
- تكرار النطق سواء للكلمة أو الجمل، وقراءة القصة نفسها أكتر من مرة، لإن دا بيقوي ذاكرة الطفل.
- تقديم الدعم المستمر للطفل، ودايمًا نحسسه إن صعوبات القراءة اللي عنده شيء مؤقت وهينتهي.
- تقسيم الكلمات عند النطق، لإن دا هيسهل على طفلك ينطق الكلمة بسهولة، ويكتبها صح.
- إعطاء الطفل دروس إضافية -لو تطلب الأمر- عشان يزود من قدرته على القراءة.
اقرئي أيضًا: أنشطة لعلاج صعوبات القراءة: تعرف على أهم 13 نشاط لتنمية مهارات طفلك.
الخلاصة
صعوبات القراءة عند الأطفال هي تحدي ممكن يكون عند طفلك وطفل تاني لأ، ولكن الاكتشاف المبكر للأمر، وعدم إهمال المشكلة هو بداية الطريق للتخلص من الصعوبات دي.
وبالتأكيد وجود الدعم النفسي والمعنوي للطفل هيفرق جداً في استجابته لأي أسلوب، ويساعده يواجه أي تحدي في حياته بشكل أقوى.
المصادر
Common Types of Reading Problems and How to Help Children Who Have Them.
أضف تعليق