املي جدول طفلك اليومي، واتعرفي على أهم الأنشطة لاستغلال العطلة الصيفية للأطفال بشكل مفيد!
الطفل بيكون طول السنة مشغول في المدرسة والمذاكرة والدروس، وبييجي وقت الإجازة بيفضل قاعد طول اليوم على الموبيل أو قدام التليفزيون، ويسهر، ويومه يتلغبط، والنظام اللي تعبتي فيه بيتغير.
عشان كدا لازم تشغليه بأنشطة ترفيهية وتعليمية، وتستغلي وقت الإجازة في إنك تنمي مهارات طفلك.
عشان كدا هنعرض لك في المقال أهم الأنشطة لاستغلال الصيف بشكل مفيد للأطفال، تابعي معنا.
أنشطة مفيدة لاستغلال العطلة الصيفية للأطفال
تختلف الأنشطة اللي ممكن يمارسها الطفل على حسب سنه، فالأطفال اللي سنهم أقل من 8 سنوات بتختلف هواياتهم والأنشطة الممتعة بالنسبالهم عن الأطفال من سن 10- 12 سنة، وفي أنشطة بتبدئي بيها مع الطفل وبتستمر معاه لحد ما يكبر.
وقبل ما نتعرف على الأنشطة الصيفية للأطفال، لازم تفهمي إن قدرة كل طفل بتختلف عن التاني، وكل طفل ليه قدراته الخاصة.
عشان كدا لازم تهتمي بمعايير اختيار النشاط أو اللعبة اللي هينفذها الطفل على حسب:
- قدراته الشخصية
- هواياته
- ميوله
- سِنه
ودي أهم الأنشطة اللي تقدري تختاري منها على حسب المعايير اللي اتكلمنا عليها:
1- اللعب في الخارج
اللعب في الأماكن الواسعة والهواء الطلق بيفرق جدًا مع الطفل، وبتساعده في تجديد طاقته العقلية والجسدية.
ودا من خلال اللعب الفردي أو الجماعي زي ركوب الدراجات، والجري، وكرة القدم، وغيرها من الألعاب.
اقرأ أيضًا: أفضل رياضة للأطفال البنات
2- الزيارات العائلية
الطفل في وقت الدراسة بيكون مشغول بين المدرسة والدروس والمذاكرة، ودا مش بيسمحله يشوف بقية أفراد عيلته ويتعرف عليهم.
عشان كدا اهتمي بتخصيص وقت للزيارات العائلية، وعرفيه على الأطفال اللي من سنه، ويكون صداقات معاهم.
3- الزراعة
من الأنشطة المهمة للطفل مهما كان عمره إيه، وبتساعده على التفكير والصبر والرعاية، وبتنمي عنده الإحساس بالمسؤولية.
ودا من خلال زراعة أي نوع فاكهة أو خضروات في بلكونة البيت، وبكدا الطفل هيشوف إزاي البذرة بتكبر بالتدريج، وتبقى زرعة، وتطلع ثمارها.
وهتتجلى عظمة ربنا في عينه، وهيتعلم يصبر كل يوم وهو بيستناها تنمو وتكبر.
4- استكشاف الطبيعة
من أهم الأنشطة الترفيهية والتعليمية لاستغلال العطلة الصيفية للأطفال، هي استكشافهم للطبيعة من خلال الخروج في الحدائق، واللعب على شواطيء البحر، وغيرها من الأنشطة اللي بتسعده نفسيًا وبتجدد نشاطه، ويمكن استغلالها بشكل علمي من خلال إنك تسأليه عن حاجات يدور عليها ويعرفها.
زي النبات بيتغذى على إيه؟ وإيه الفرق بين البحر والنهر؟ في كم بحر في مصر؟ وهكذا.
5- تعلم برامج الحاسوب
استغلي الإنترنت بشكل صحيح من خلال أسئلة الطفل وبحثه عن أجوبة ليها، أو متابعة برامج تعليمية مفيدة، أو الكورسات المجانية على اليوتيوب لتعلم برامج الميكروسوفت، والفوتوشوب، والبرمجة.
ودا هيكون مناسب للأطفال من سن 10 سنوات لتعلم برامج الحاسوب المختلفة بدل من متابعة التيك التوك، والترندات، والأغاني.
اقرأ أيضًا: أهم 24 نشاط للأطفال سن 10 سنوات.
6- حفظ القرآن الكريم
من أعظم الحاجات اللي ممكن تقديمها لطفلك في صغره هي حفظه للقرآن في سن صغير، وهيكون فضله عظيم عليه؛ لإنه بيخليه عنده سلام داخلي واتزان نفسي، دا غير إنه هيقلل عنده العصبية.
ودا بيكون متوفر أول ما يدخل الحضانة من سن 3 سنوات، وممكن تدعميه من خلال دروس القرآن أو الأكاديميات اللي بتحفز الأطفال من خلال المسابقات والجوائز التشجيعية.
وأفضل شيء إنك تستمري على متابعته، وتخليها عادة عنده يكبر عليها.
7- القراءة
من أهم الأنشطة لاستغلال الإجازة الصيفية للأطفال هي خلق عادة القراءة عند الطفل، ودا من خلال اختيار كتب وقصص مناسبة لسنه، ومساعدته في قراءتها وفهمها في الإجازة.
تقدري تنظمي دا من خلال قراءة كتاب كل شهر تشتريه من المكتبة، ويكون في أكتر من مجال، وبالوقت هتتعرفي على النوع المفضل لطفلك.
ولو متاح مكاتب عامة للقراءة بمنطقتك، لما الطفل يكبر ويقدر يتحرك لوحده، ويستعير كتب منها.
ودا هيعود عليه بإنه هيحسن عنده القراءة، ويخليه مُطلع ومفكر بشكل كبير.
8- تعلم اللغات
تنمية المهارات اللغوية للطفل مهمة جدًا سواء من خلال تطوير لغته الأم، أو تعليمه لغة تانية زي الإنجليزي، أو الألماني، أو غيرها.
ودا من خلال الاشتراك في الكورسات أو القنوات التعليمية على اليوتيوب، ومتابعة طفلك في رحلة تعلمه ومساعدته.
والأفضل تبدئي معاه من عمر 3 سنوات، ويفضل يتعلم لحد ما يتقن لغة، هتفيده جداً بعد الدراسة وفي مجال الشغل.
اقرئي أيضًا: كيفية تعلم اللغة الإنجليزية للأطفال من سن 2 – 5 سنوات.
9- المشاركة في الأعمال التطوعية
العمل التطوعي وبذل الجهد للغير هيعلم الطفل حاجات كتير منها:
- بيساهم في زيادة الرفاهية والإيجابية عند المراهقين، ودا اللي بتأكده دراسة اتنشرت في مجلة Time.
- بينمي عنده إحساسه بالمسؤولية، وإيمانه بدوره في المجتمع.
- بيحسن من الصحة النفسية والعقلية عند الأطفال.
- بيغرس في الطفل عمل الخير والمساعدة.
ودا ممكن تبدئيه معاه من سن صغير زي مساعدتك في توزيع ملابس أو طعام على المحتاجين، ولما يكون سنه مناسب للتطوع في واحدة من الجمعيات الخيرية خليه يشارك في واحدة منهم، ويتعلم يعطي ملابسه وكتبه وألعابه اللي مبقتش مناسبة ليه للمحتاجين.
10- ممارسة الرياضة
ممارسة الرياضة تعد من الأمور المهمة جدًا للطفل، لإنها بتمنعه من القعدة على الشاشات لفترة طويلة، وكمان بتساعده يكون عنده جسم صحي ولائق.
11- المشاركة في المعسكرات الصيفية
من أفضل الأنشطة المفيدة لاستغلال العطلة الصيفية للأطفال هي مشاركتهم برحلات التخييم، والمعسكرات، والمشاركة بفريق الكشافة؛ ودا لإنها ممتعة والطفل بيعتبرها مغامرة، وبتعلمه الاعتماد على نفسه، وبتكون ترفيهيه وبعيدة عن جو المدرسة والبيت.
12- المشاركة في ورش العمل
دوري على الأماكن اللي بتوفر ورش عمل فنية وإبداعية للطفل، وخليه يشارك فيها، هتلاقي مثلًا بعض المدارس الخاصة أو الأكاديميات بتوفر ورش عمل في الرسم، أو النحت، أو بناء الروبوتات، أو الخياطة، أو ترميم الكتب، وغيرها من الأنشطة.
الورش دي هتطور عند الطفل مهاراته الفنية والإبداعية، وهتكون نشاط مختلف بالنسباله.
13- زيارة الأماكن العامة
استغلي إجازة طفلك في زيارة أماكن جديدة له ومفيدة، زي: المتاحف، والحدائق العامة، والمزارات السياحية.
دا هيساعده في تطور مهاراته الاستكشافية والمعرفية بشكل كبير.
حاولي تقرئي معلومات عن المكان اللي ناويين تزوريه معاه، عشان تقدري تردي عن أسئلته، وتديله فكرة عن المكان.
14- امتلاك كائن أليف
اشتري لطفلك كائن أليف يعتني بيه لو متاح معاكي، زي قط صغير، أو كلب، أو سلحفاة، أو عصفورة، أو حوض سمك.
دا هيشغله بشكل كبير، وهينمى عنده روح المسؤولية، وهيعلمه إزاي يهتم بالغير ويحافظ عليه.
15- تعلم الأشغال اليدوية
تعلم الأشغال اليدوية من الأنشطة المفيدة للطفل في جوانب كتير؛ لإنها بتعلمه الصبر، وبتحسن مهاراته الحركية والإبداعية.
ودا اللي أثبتته دراسة اتنشرت على موقع ResearchGate عن أهمية تعلم الأطفال الأشغال اليدوية، وتأثيرها في تحسين المهارات الفكرية والإبداعية.
ويمكنك اكتشاف أنشطة أكتر وتنفيذها لطفلك على أد المتاح معاكي، حتى لو هيكون في البيت من خلال الطبخ، أو الكراتين، أو الأدوات القديمة.
المهم تشغلي طفلك بعمل أو ألعاب مفيدة وتعليمية في فترة الصيف تنمي من مهاراته.
نصائح لأولياء الأمور لاستغلال العطلة الصيفية للأطفال بشكل مفيد
ودلوقتي هنذكر أهم النصائح اللي هتساعدك تنفذي الأنشطة لطفلك بشكل سليم، ومن غير ضغط علىه؛ عشان يستفيد بأكبر قدر:
- استغلال العطلة الصيفية للأطفال في تقضية وقت أكبر معاهم، وزيادة الارتباط الأسري مع إخواتهم، وباقي العيلة.
- الموازنة بين الأنشطة اللي بتنمي مهارات الطفل العقلية والإبداعية، والأنشطة الترفيهية للترويح عنه.
- المحافظة على روتين الطفل اليومي من الصحيان، والنوم في مواعيد محددة، والصلاة، والتمارين، وغيرها.
- الابتعاد عن فرض أنشطة معينة على الطفل، والأخذ برأيه في الأنشطة اللي يحبها والوقت اللي يفضله.
- تنوع الأنشطة مهم جدًا للأطفال، يعني ما تثبتيش حاجة واحدة بس.
- زيادة وعي الطفل على إن في وقت خاص بيه، ووقت للعيلة، ولازم يحترمه.
وأخيراً، وقت الدراسة بيكون ضغط على الأطفال بشكل كبير لانشغالهم بالمدرسة والمذاكرة، وبالتالي بيقل الوقت الترفيهي للطفل.
عشان كدا مهم نوظف أنشطة ترفيهية وتعليمية لاستغلال العطلة الصيفية للأطفال بشكل مفيد، ومن أهمها: ممارسة الرياضة، وورش العمل، والأشغال اليدوية، والزراعة، والمعسكرات الصيفية، والأعمال التطوعية، وغيرها.
وبكدا الطفل يستفيد من الإجازة، وينمي مهاراته، ويجدد نشاطه لاستقبال عام دراسي جديد.
المصادر
Summer activities for children: benefits and opportunities.
أضف تعليق