أنماط التعليم وكيفية معرفة النمط المفضل لطفلك

أنماط التعليم بتختلف من طفل للتاني، فمثلًا لو جبنا أربع أطفال، وسألنا كل واحد فيهم عن معنى كلمة “قطة” باللغة الإنجليزية؛ هل بتتكتب Cat ولا Kat؟ 

• الأول هيحاول يتخيل الكلمة في عقله، ويختار الكلمة الأصح حسب الشكل اللي تخيّله. 
• التاني هيبحث عنها في القاموس، عشان يتأكد من الكلمة الصحيحة. 
• التالت هيفكر بصوت عالي، وينطق كل كلمة، ويختار الأقرب منها. 
• الرابع قرر يكتب الكلمتين على الورقة، عشان يختار ما بينهم. 

برغم إن السؤال كان موحد على الأطفال الأربعة، إلا إن الطريقة اللي استخدمها كل طفل كانت مختلفة عن التاني! ودا لإن كل فرد فيهم له طريقة مختلفة في استقبال المعلومات والأسئلة، وكمان الإجابة عليها، فيما يعرف بأنماط التعلم. 

من خلال المقال دا، هنعرف إيه هي أنماط التعليم المختلفة، وهل هما 4 بس ولا أكتر، وهنوضح ازاي تعرف النمط الخاص بطفلك، وهل معرفة نمط تعليمه هيكون مفيد في عملية التعليم المنزلي؟ 

ما هو النمط التعليمي؟ 

قبل ما نتكلم عن أنماط التعليم المختلفة، خلينا الأول نعرف معنى النمط التعليمي، وهو الطريقة اللي بنستخدمها في استقبال المعلومات، وطريقة تخزينها في دماغنا، وازاي بنتفاعل مع كل معلومة، وازاي بنوصلها لشخص تاني. 

وذكر موقع “Sage Journals” مراجعة عملها “Howard-Jones” في 2014 بتبين آراء المعلمين في 5 بلاد مختلفة، فكانت النتيجة إن من 93 لـ 97% من المعلمين شايفين إن الناس بتتعلم بشكل أفضل لما بنقدم لهم المعلومات بنمط التعلم المفضل عندهم.  

أشهر نظريات تقسيم أنماط التعلم 

الأنماط دي ليها أكتر من نموذج بيقسمها لعدد من الأنواع، ففي البداية ظهر نموذج “VAK” اللي بيقسم أنماط التعليم عند الأطفال لـ 3 أنماط بس، لكن بعدها في أوائل التسعينات قدر “Neil Fleming“ إنه يطوّره، وعمل اختبار “نموذج VARK” اللي بيقسمها لأربع أنواع، وبيحدد صفات الشخص اللي بينتمي لكل نوع منهم. 

ثم ظهر نموذج أكبر اسمه “Memletics” معتمد في أساسه على نموذج “VARK”، بس بيضيف عليه أنواع جديدة، وبيقسم الأنماط لـ 7 أنواع مختلفة، وهنتكلم عن كل نموذج منهم بالتفصيل. 

1- نموذج “VARK” وأنماط التعليم الأربعة 

نموذج Vark هو واحد من أشهر الطرق اللي بنقدر من خلالها نقيّم الطفل، ونعرف الطريقة المناسبة له في الحصول على المعلومة، وسُمي النموذج بالاسم دا لأن كل حرف من الحروف الأربعة بيعبر عن واحد من أنماط التعليم المختلفة، واللي هما: 

نمط التعلم البصري – Visual 

المتعلم البصري بيحب يكون طريقة الشرح وتوصيل المعلومة له في صورة مرئية، يقدر يشوفها بعينه، زي الصور والألوان والفيديوهات، لأن دا بيساعده يستوعب المعلومة بشكل أفضل. 

مثال: لو هنتكلم عن إن مساحة الصحراء في مصر كبيرة جدًا، يبقى ممكن نستخدم صورة توضح دا. 

علامات دالة على المتعلم البصري 

• بيحب يكون الشرح عن طريق الصور والفيديوهات. 
• يقدر يفتكر وجه الأشخاص أكتر من أسمائهم. 
• بيحب النظام، وبيتخيل أي حاجة بسهولة. 
• بيميل أكتر للرسومات والألوان. 
• بيملّ ويزهق من الاستماع. 

الوظائف المناسبة للمتعلم البصري 

بينجذب المتعلم البصري لمجالات العلوم، والتكنولوجيا، والهندسة، والرياضيات بشكل كبير، وعشان كدا النوع دا من أنماط التعليم بيتناسب معاه وظائف زي: 

• التصميم الجرافيكي، وتصميم المواقع الإلكترونية. 
• الهندسة المعمارية، والإنشائية، وتصميم الديكور. 
• تسويق المحتوى بكل أنواعه. 
• التصوير الفوتوغرافي.
• تصميم الألعاب.
• الدعاية والإعلان. 
• تصميم الأزياء. 
• الإخراج الفني. 
• الجراحة. 

نمط التعلم السمعي – Auditory 

تاني نمط من أنماط التعلم وهو عكس المتعلم البصري، فالمتعلم السمعي يقدر يستوعب المعلومات والشروحات في شكل صوتي، سواء كان في الراديو، أو تسجيل صوتي، أو حتى سماع أصوات الطبيعة. 

مثال: بدل ما تقوله إن العصفور دا هو طائر صوته جميل؛ خليه يسمع بنفسه صوت العصفور في الصبح، أو سجّل صوت العصفور وخليه يسمعه. 

علامات دالة على المتعلم السمعي 

• بيجيد الامتحانات الشفوية أكتر من التحريرية. 
• بيحب الاستماع للدروس أكتر من قراءتها. 
• بيحب رواية القصص، والعمل في فريق. 
• بيسمع الناس أكتر ما بيتكلم. 
• بيذاكر بصوت عالي. 

الوظائف المناسبة للمتعلم السمعي 

أغلب الوظائف اللي بتتطلب محادثات واستماع كبير هتكون مناسبة للنوع دا من أنماط التعليم، واللي فيه بيهتم الشخص بمجالات زي: 

• تحليل النصوص الصوتية. 
• التدريس، والاستشارات. 
• علاج مشاكل التخاطب. 
• خدمات الدعم الفني. 
• الإذاعة، والتلفزيون. 
• الإعلام، والصحافة. 
• الحقوق، والقانون. 
• الطب النفسي. 

نمط التعلم القرائي والكتابي – Read & Write 

النوع دا ممكن نعتبره خليط ما بين النوع السمعي والبصري، لأنه بيميل أكتر لتدوين وكتابة المعلومات اللي بيشوفها أو بيسمعها، لأن دا بيساعد أكتر في الفهم، والاستيعاب بشكل أفضل. 

مثال: لو هنشرح للطفل أسماء الحيوانات نخليه يقرأها بصوت عالي، وبعدين يبدأ يكتب الأسماء دي على الورق، دا هيخلي المعلومة تثبت أكتر في دماغه. 

علامات دالة على المتعلم القرائي والكتابي 

• بيميل لكتابة المعلومات اللي بيتلقاها. 
• بيميل أكتر إلى الهدوء والعزلة. 
• بيحب القراءة.  

الوظائف المناسبة للمتعلم القرائي والكتابي 

أكتر خيار شائع ومنتشر للأشخاص أصحاب النوع دا من أنماط التعليم هو الكتابة، ودي بيندرج تحتها، وظايف كتير تناسبه، واللي منها: 

• محلل بيانات، أو محلل أبحاث. 
• كاتب صحفي، أو كاتب فني. 
• محرر، أو مصحح لغوي. 
• كاتب محتوى تسويقي. 
• مترجم كتابي. 

اقرأ أيضًا | أبرز 9 تمارين تعليم القراءة والكتابة لطفلك. 

نمط التعلم الحركي – Kinesthetic 

آخر نمط من أنماط التعلم في نموذج “VARK” هو نمط التعليم الحركي، والطفل هنا بيحب تكون المعلومات والشروحات بشكل عملي وملموس، ويقدر يجربه بنفسه، لأن التدريب العملي هو أكتر حاجة بتثبّت المعلومة في دماغه. 

مثال: لو هنتكلم عن ازاي المياه ممكن تأثر على معادن زي الحديد، فممكن نخليه هو بنفسه يضع قطعة معدنية في المياه ونسيبها فترة، وبعدين نرجع لها تاني، وهيشوف بنفسه عملية الصدأ اللي هتحصل للمعدن، دا هيخليه يقتنع أكتر بالمعلومة. 

علامات دالة على المتعلم الحركي 

• بيمتلك تنسيق قوي بين إيده وعينه، وبيمتلك مستويات عالية من الطاقة. 
• بيحب الألعاب الرياضية اللي فيها حركة، وبيحب الفن والدراما. 
• بيحب يجرب كل حاجة بنفسه. 
• بيميل للحركة أثناء المذاكرة. 

الوظائف المناسبة للمتعلم الحركي 

الوظائف المكتبية مش بتناسب النوع دا من الأشخاص، فعلى العكس تمامًا بيميلوا أكتر إن وظايفهم يكون فيها حركة ونشاط بدني، ومن الوظايف اللي بتناسبهم على سبيل المثال: 

• النجارة، والسباكة، وأي أعمال حرفية حسب ميوله. 
• الأعمال الميكانيكية، سواء مهندس أو حرفي. 
• الإعداد البدني، والعلاج الطبيعي. 
• تصوير وتصميم الفيديوهات. 
• تصميم التأثيرات البصرية. 
• الخياطة، وتصميم الأزياء. 

المتعلم الحركي يقدر يحقق نجاحات كتير في حياته، لكن لو زاد الموضوع عن الطبيعي، هتحتاج تلجأ لتعديل سلوكه عشان ميتأثرش بالسلب، وتقدر تعرف أكتر عن دا من خلال مقال: 11 نصيحة فعالة لتعديل سلوك الطفل كثير الحركة. 

وذكر معهد “NIH” إحصائية تمت على طلاب السنة الأولى لكلية الطب في أحد الجامعات، وكانت نتيجتها إن النمط البصري حصل على أقل نسبة تفضيل، بينما أنماط زي الحركي والسمعي حققوا أعلى نسبة تفضيل بين الطلاب. 

2- نموذج “Memletics” وأنماط التعلم السبعة 

كلمة Memletics هي مزيج بين كلمة “الذاكرة – Memory”، وكلمة “ألعاب القوى – Athletics”، وعشان كدا أكد “Sean Whiteley” اللي أنشأ النموذج دا على إن البرنامج بيركز على مساعدة الأشخاص في تحسين قدراتهم على التعلم من خلال نفس الطريقة اللي بيستخدمها الرياضيون لبناء العضلات واللياقة البدنية.

لكن الفرق هنا طبعًا إن التمرين في المقام الأول بيتم في دماغك، بس بالرغم من كدا فبرضو بيهتم النموذج دا بالحفاظ على صحة بدنية جيدة، وبينصح بممارسة الرياضة وتناول الطعام الصحي. 

بيشترك النموذج دا في تقسيمته لأنماط التعلم مع نموذج “VARK” في 3 أنماط وهما: البصري، والسمعي، والحركي، وبيضيف عليهم الأنواع التالية: 

نمط التعلم الاجتماعي – Social 

النوع دا من الناس بيتعلم بشكل أفضل لما يشتغل في مجموعات، لأنه بيمتلك قدرات شفوية وكتابية عالية، وبيقدروا يتناقشوا بأريحية مع زمايلهم، ويفهموا وجهات نظر بعض. 

نمط التعلم الفردي – Solitary 

على عكس النوع السابق، بنلاقي إن النوع دا بيحب يعمل كل حاجة لوحده، وبيفيده جدًا تدوين الملاحظات أثناء الدراسة، وقراءتها مرة تانية عند المذاكرة والمراجعة، لكن بسبب شخصيتهم دي، فغالبًا بيضيعوا وقت كبير في البداية قبل ما يطلبوا المساعدة من حد تاني. 

نمط التعلم المنطقي – Logical 

الأشخاص اللي بيفضلوا النوع دا من أنماط التعلم بيستخدموا المنطق، والأرقام، والإحصائيات في التعلم بفاعلية أكبر، وبيتذكروا المعلومات أسرع عن طريق رسم روابط بين الأفكار المختلفة. 

نمط التعلم الشفهي – Verbal 

بيستجيب المتعلم الشفهي للكلمات المنطوقة أو المكتوبة بشكل جيد، وبيساعد في دا بشكل كبير استخدام القوافي والسجع.

أهمية التعرف على نمط تعلم الطفل

قدراتنا كبشر بتختلف من شخص للتاني. من حيث الفهم والاستيعاب، وكمان استقبال وتوصيل المعلومة، ومعرفتنا بأنماط التعلم المناسبة لأطفالنا هتساعدنا في تحديد الطريقة الأنسب لهم عشان يحققوا نتائج عالية، خاصةً في نظام التعليم المنزلي أو ما يعرف بالهوم سكولينج. 

ومن فوائد التعرف على نمط تعلم طفلك بنلاقي: 

1- تنمية مهارات الطفل ومواهبه 

معرفتك النمط المناسب للطفل هيخلي عملية التعلم تمشي بطريقة ممتعة، لأنك تقدر تصمم نموذج مناسب له من التعلم والترفيه، يساعده يذاكر من غير ما يشعر بالملل، وكمان هتعرف الوظايف اللي ممكن يميل ليها لما يكبر، وتساعده يجهز ليها من بدري. 

2- استغلال الوقت 

هتقدر تخلي طفلك يحصل على أكبر قدر من المعلومات في وقت قليل، بدلًا من إهدار وقتك ووقته في تعليمه بطريقة خاطئة مش بتتناسب مع قدراته، وممكن تطلع على مقال 5 نصائح تنظيم وقت الأطفال في المنزل، عشان تحقق أقصى استفادة لطفلك. 

3- علاقة سوية مع طفلك 

علاقتك بطفلك هتكون مترابطة أكتر، لانه هيحس إنك فاهم دماغه، وعارف هو بيحب إيه وبيكره إيه، وإيه أفضل طريقة مناسبة له. 

4- نتائج أفضل 

بناءً على رقم 1,2,3 النتيجة النهائية لطفلك هتكون في أعلى مستوى، مش بس من الناحية الدراسية؛ لأ دا كمان على مستوى صحته النفسية، وكمان صحته الجسدية لو هو من النوع الحركي. 

وبعد معرفتنا بأهمية تحديد أنماط التعليم لأطفالنا، دلوقتي هتعرف ازاي تحدد نمط طفلك من بين الأنماط الأربعة. 

كيف تعرف نمط تعلم طفلك؟ 

من خلال الـ 3 خطوات دول، هتقدر تعرف أنماط التعليم الخاصة بأطفالك، وتحدد الطريقة المناسبة لكل طفل فيهم. 

1- المتابعة 

في الخطوة دي هتكون بتراقب تصرفاته، وبتشوف إيه هي الحاجات اللي بيكون مهتم بيها. وفي حالة صعوبة الحصول على معلومات دقيقة تساعدك في معرفة أنماط التعليم المفضلة لكل واحد، دا هيخلينا نلجأ للخطوة التانية. 

2- الاستبيان 

في الخطوة دي ممكن نستخدم نموذج VARK، وهو عبارة عن استبيان بيحتوي على بعض الأسئلة اللي من خلالها تقدر تقيّم الطفل، وتعرف هو بيهتم بأي طريقة في التعلم، بناءً على الإجابات بتاعته. 

3- التنفيذ 

بعد ما عرفنا الطريقة المناسبة للطفل، في التعلم ولنفترض هنا إن طفلك كان من النوع البصري -Visual، هيكون دورك هنا هو تنفيذ وبناء منهج وأسلوب يخدم الطريقة بتاعته، زي: 

• الشروحات التوضيحية. 
• الفيديوهات. 
• الرسومات. 
• الصور. 

وغيرهم من الأمور المرئية اللي تساعده في الفهم والاستيعاب بشكل أفضل. 

5 نصائح لكل أم 

أغلب مشاكل التعليم المنزلي عند الأطفال بيكون السبب فيها إننا مش عارفين النمط المناسب لطفلنا، وإيه أفضل طريقة بيحبها في التعلم، ولكن بناءً على استبيان أو نموذج VARK اللي عملناه الخاص بأنماط التعليم، هتقدر من خلاله تعرف النمط الخاص بطفلك. 

وعشان عملية التعليم المنزلي – Homeschooling تكون ممتعة، دي 5 نصائح لكل أم في تعاملها مع طفلها: 

1. اقرئي باستمرار في الكتب الخاصة بعلم النفس التربوي، والأبحاث العلمية عن أنماط التعلم. 
2. دخّلي نظام الـ Gamification في المذاكرة عشان الطفل يتعلم أسرع من غير زهق. 
3. ادعميه وشجعيه كل يوم ، لأن دا بيحفزه أكتر على النجاح والاستمرار. 
4. شاركي معاه في التعلم واللعب، عشان ميحسش بالوحدة والملل. 
5. خليكي متابعة ليه ولسلوكياته أول بأول. 

الخلاصة 

عملية التعليم ممكن تكون معقدة للغاية، وممكن تكون ممتعة للغاية. الموضوع بيتوقف على الطرق والأساليب اللي ناوي تستخدمها مع طفلك. 

وزي ما عرفنا أنماط التعليم، والفروقات المختلفة بين كل شخص فيهم بناءً على نمط شخصيته، فدورك كأم أو أب هو متابعة ومراقبة سلوكيات طفلك، بغرض التحسين من عملية التعلم، عشان يكون أطفالنا في أفضل حال. 

أطفالنا هما حياتنا، واستثمارنا في تعليمهم وتربيتهم هو استثمار لينا قبل ما يكون استثمار ليهم.