حركة الطفل ولعبه علامة قوية على صحته، ونشاطه، وتمتعه بجسم وعقل خالي من الأمراض، لكن لو زادت الحركة وظهر عليه علامات تانية فدا بيكون مؤشر مش صحي.
وبالتالي بتحتاج تتعامل معاه بصورة خاصة عشان تقدر تحافظ عليه وتوجهه توجيه سليم، وتستفيد بالـ 11 نصيحة فعّالة لتعديل سلوك الطفل كثير الحركة اللي بنقدمهم لك في المقال دا.
كمان الطفل كثير الحركة بيكون تركيزه ضعيف وسهل تشتت انتباهه، والأشخاص المحيطين بيه بيعانوا من صعوبة في التعامل معاه، ودا لإنهم بيلاقوا الطفل بيتصرف بسلوك عدواني ودايمًا في حالة حركة مستمرة.
عشان كدا في المقال دا هنتكلم عن أسباب فرط الحركة عند الأطفال، وكيفية تحديد سلوك الطفل إذا كان طبيعي ولا لأ، وازاي تنجح في تعديل سلوك الطفل كثير الحركة.
ما هو فرط الحركة عند الأطفال؟
في البداية عشان نعرف مدى أهمية النصائح اللي هنقولها لتعديل سلوك الطفل كثير الحركة، خلينا نعرف ايه هو اضطراب فرط الحركة.
ودا اضطراب في النمو العصبي، بينتج عن نقص كمية الموصلات الكيميائية في قشرة الجزء الأمامي من الدماغ، وبتبدأ الأعراض غالبًا في الظهور من أول 6 سنوات ولحد 12 سنة، وأوقات بتستمر لأكتر من كدا.
أسباب فرط الحركة عند الأطفال
خلينا نقول إن بعض الظروف العقلية والجسدية بتأدي لظهور النوع دا من الاضطرابات، ونقدر نحصر بعض الأسباب دي، زي:
1- اضطراب في الدماغ وتغيير في بنيته
من الحاجات اللي بنلاحظها كتير هنا إن الطفل المصاب بالاضطراب دا بيكون عنده انخفاض في نشاط المنطقة الدماغية المسؤولة عن النشاط والانتباه، ودي حاجة ممكن تحصل نتيجة مثلًا تعرض الطفل لارتجاج في المخ يأثر عليه.
2- الوراثة
لو ظهر في تاريخ العائلة المرضي شخص كان مصاب بالاضطراب دا، فاحتمال وارد يكون انتقل إلى الطفل بصفة وراثية.
3- تعرض الجنين للتدخين والملوثات
أسباب اضطراب فرط الحركة ممكن تتواجد من قبل ما يتولد الطفل، ودا لما بتكون الأم مُدخنة أو بتتعاطى أي نوع من أنواع المخدرات.
أو إذا تعرضت الأم لمواد سامة وملوثات طول فترة الحمل، دي كلها حاجات ممكن تأثر على نشاط الخلايا العصبية للجنين، ودا يخليه مُعرض أكتر للإصابة.
كمان تعرض الأم للإصابات في فترة الحمل، أو تعرض الطفل للإصابات في الشهور الأولى ممكن يأثر عليه.
متى تدرك أن طفلك كثير الحركة ويحتاج للعلاج؟
خطوة التشخيص دي هي أول خطوة مهمة بتحتاج ليها قبل البداية في تعديل سلوك الطفل كثير الحركة، وبنقدر نحدد إذا كان الطفل مريض أو لأ من خلال تطابق سلوكياته مع السلوكيات دي:
- بيظهر سلوك حاد جدًا ومبالغ فيه، ودا بيحصل في أماكن كتير زي البيت، والمدرسة، وغيرهم.
- مش بيسمع للأوامر والطلبات، حتى لو كانت موجهة ليه بشكل مباشر.
- بيقاطع اللي قدامه، ومش بيسمح له بالكلام.
- بيعاند في كل حاجة، ومندفع بشكل ملحوظ.
- بيتكلم كتير، وأوقات بشكل غير مفهوم.
- بيصعب السيطرة عليه، وتركيزه قليل.
- بيتحرك طول اليوم بشكل مستمر.
- بينسى باستمرار.
وعشان نتأكد لازم نعمل الفحص من خلال متخصص، وبيكون التشخيص من خلال الفحص السريري، وبنستبعد أي احتمالات تانية ممكن تظهر لأمور مختلفة عن الاضطراب دا.
وبعدها بيجي التأكد من تاريخ العائلة المرضي، واستخدام مقياس “Conners” لتقدير اضطراب فرط الحركة وتشتت الانتباه.
وذكر موقع “WebMD” إن المقياس دا عبارة عن استبيان بيسأل عن تفاصيل تخص سلوك الفرد، وعن الشغل، والدراسة، والحياة الاجتماعية، ومن الإجابات بيبدأ الطبيب المختص بتحديد إذا كان الشخص مصاب بالاضطراب دا فعلًا أو لأ، ولو مصاب فبيحدد الأعراض اللي بيعاني منها، ومدى خطورتها.
وفي حالة الأطفال بتكون أسئلة الاستبيان على الحاجات اللي تخص سنهم بس، وبيجاوب عليها ولي أمر الطفل أو المدرس بتاعه.
اقرأ أيضًا: كيف أعرف أن ابني لديه صعوبات تعلم؟
نصائح فعالة لتعديل سلوك الطفل كثير الحركة
الطفل اللي بيعاني من اضطراب فرط الحركة مش طفل سيء، لكنه طفل محتاج رعاية واهتمام خاص، ومحتاج حكمة وصبر من الوالدين، ومن كل الأشخاص اللي بتتعامل معاه.
يعني حاول توفر له جو هادي ومستقر، وتفهم حالته، وتراقب سلوكياته، وتعرّف الأشخاص اللي حواليه بيها، عشان تقدروا تتعاملوا معاه بأفضل شكل ممكن لحالته، وبجانب كل دا، فدي 11 نصيحة فعالة لتعديل سلوك الطفل كثير الحركة، واللي هتساعده بشكل أكبر:
1- وفّر أنشطة مختلفة ومنظمة لتوجيه طاقة الطفل كثير الحركة
ما تحاولش تكبت طاقة طفلك، وبدل ما تطلب منه يلتزم بالهدوء ويفضل في مكانه، وفر له نشاط تاني يقدر يفرغ فيه طاقته وفي نفس الوقت يستفيد منه، لأنه على الأغلب فمستحيل الطفل يقعد ثابت وهادي.
ومن الأنشطة اللي ممكن تساعد في تعديل سلوك الطفل كثير الحركة بنلاقي:
فنون الدفاع عن النفس
الكاراتيه، والجودو، وغيرهم من الفنون القتالية، بتساعد الطفل على التركيز، وبناء الثقة بالنفس، والتحرك في حركات منضبطة، وتوجيه طاقتهم بشكل سليم ومفيد يعود بالنفع عليهم وعلى صحتهم.
ممارسة الرياضة في الهواء الطلق والمساحات الواسعة
جرب تخلي طفلك يجري في حديقة، أو يبدأ يتمرن في النادي على كرة القدم، أو السلة، أو أي رياضة تخليه يبذل مجهود ويحرك عضلاته، وفي نفس الوقت هتعلمه المنافسة واللعب مع غيره بروح رياضية.
السباحة
هيحتاج ابنك يبذل مجهود كبير في السباحة وتعلمها، ودي حاجة كويسة لأنه هيستغل نشاطه، ويبذل طاقته فيها، دا غير كمان إنها بتعلمه الانضباط.
ألعاب التفكير
في الألعاب دي هيتعود طفلك على مهارة التركيز، ودماغه هتتمرن بشكل فعال، ومن الألعاب اللي ممكن يلعبها الشطرنج، والأوراق المتطابقة، وغيرهم.
تقدر تعرف أكتر عن الألعاب دي من مقال: أنشطة وألعاب ذكاء للأطفال في البيت من عمر 1 إلى 15 سنة.
النشاط الإبداعي
ممكن نحاول نسجل الطفل في أنشطة مسرحية أو تمثيلية لو لقينا عنده ميول للحاجات دي، بحيث يقدر يستغل طاقته، ويتدرب على التركيز، وزيادة الثقة بالنفس، والكلام أمام الجمهور، ودي كلها مهارات بتفيد جداً في تعديل سلوك الطفل كثير الحركة.
2- اعرف هتبذل جهد فين
في حاجات في سلوك الطفل أو متطلباته تقدر تتغاضى عنها، وما تستهلكش فيها طاقتك ولا طاقة طفلك، وعشان كدا بتكون محتاج تحدد الأولويات، وتخلي ليها كل طاقتك ومجهودك، وتعمل كل اللي تقدر عليه لتعديل سلوكه.
3- حدد نظام لأسرتك
بيواجه الأطفال اللي بيعانوا من فرط الحركة صعوبة في التعامل مع الحاجات غير الواضحة بشكل عام، عشان كدا الأحسن يكون في نظام واضح وسهل يمشي عليه الطفل في البيت، ويكون الكل بيتعاون لتطبيقه.
4- قدمله أوامر واضحة وبسيطة
الطفل اللي بيعاني من اضطراب فرط الحركة بيكون تركيزه ضعيف، وصعب ينتبه لحاجات كتير في وقت واحد، عشان كدا من ضمن الـ 11 نصيحة فعالة لتعديل سلوك الطفل كثير الحركة جرب لما تطلب من ابنك مُهمة تكلمه بشكل مباشر.
ووضح القواعد بشكل بسيط جدًا، واتأكد إنه فاهم كل جزء، وجرب تكتب الخطوات أو المهام دي على ورقة ومع كل خطوة بيعملها خليه يحذفها من القائمة ويشطبها.
5- قلل المشتتات
خلي المكان اللي بيذاكر فيه الطفل بسيط وهادي، وقلل منه المشتتات اللي ممكن تسحب تركيز الطفل زي التلفزيون، والكمبيوتر، وغيرهم، وخليه يساعد في تأسيس مكان مذاكرته بحيث يكون جذّاب ومريح ليه.
اقرأ أيضًا: أسباب عدم التركيز في المذاكرة عند الأطفال وكيفية التغلب عليها.
6- عزز فعله الإيجابي
جرب تخلي طفلك هو اللي يكتب قائمة بالمهام المطلوبة منه عشان تعلمه الاستقلالية والاعتماد على الذات، وبعد ما ينتهي من مهامه اليومية شجعه، وعزز فعله، وقدم له مكافأة.
7- ما تلجأش للأدوية كحل أول
على الرغم من إن حالة الطفل هي اللي بتحدد احتياجه لجرعات أدوية أو لأ، لكن واحدة من أهم النصائح لتعديل سلوك الطفل كثير الحركة إنك ما تتسرعش، وتستسهل، وتخلي طفلك ياخد أدوية كأول حل لعلاج الأمر، لكن اتناقش مع طبيبه وحدد الأفضل لحالة الطفل.
وممكن تشوف مراكز تأهيل متخصصة في حالته، واللي تقدر تعرف عنهم أكتر من خلال مقال: 7 من أشهر مراكز صعوبات التعلم في مصر.
8- ما تعاقبش الطفل على المهام اللي معملهاش
لو تكاسل في تنفيذ مهمة من مهامه فبلاش توبخه عليها، لإن تنفيذ المهام بالنسبة للأطفال اللي بيعانوا من الاضطراب دا أمر شاق عليهم، فمن الأفضل تساعده مرة تانية في إتمام المهمة.
9- خليه بحريته
زي ما بننصح إن يكون في نظام للطفل والأسرة، كمان بننصح إن يكون في وقت حر للطفل غير منظم، يقدر يلعب فيه ألعاب بدون قيود عشان يفرغ طاقته، والأفضل تكون في الطبيعة بقدر الإمكان.
10- كُن خبير طفلك الأول
من المهم في رحلة تعديل سلوك الطفل كثير الحركة إنك تعرف إن مهما قدم لك الأطباء والمربين وغيرهم نصائح لمعالجة طفلك، محدش هيكون عارف وفاهم طفلك أكتر منك.
وعشان كدا اتعاون مع الطبيب أو المعلم أو أي شخص بيتعامل معاه الطفل، عشان توصلوا لأفضل طريقة للتعامل معاه.
11- ما توقفش قراءة
اتعلم دايمًا عن الاضطراب دا، واقرأ في الكتب والأبحاث اللي بتتكلم عن أفضل الطرق للتعامل مع الطفل المصاب بيه، عشان تتعامل مع طفلك بطريقة علمية سليمة، وما تترددش إنك تسأل طبيب طفلك عن كل شيء يخصه.
وبكدا هيكون معاك 11 نصيحة فعالة لتعديل سلوك الطفل كثير الحركة نفذ منها مع طفلك اللي تقدر عليه.
وخلينا نتفق إن طرق علاج الطفل اللي بيعاني من اضطراب الحركة المفرط كتيرة، وبتنقسم إلى علاج دوائي، أو علاج وظيفي، وعلاج سلوكي لمساعدة الطفل على ممارسة حياته، ودول اللي هنتكلم عنهم دلوقت.
العلاج الوظيفي والسلوكي لتعديل سلوك الطفل كثير الحركة (Occupational therapy & behavioral therapy)
بيتضمن العلاج غير الدوائي نوعين مهمين، وهما:
العلاج الوظيفي
مهمة العلاج الوظيفي هي التدخل وإعادة تأهيل الطفل، عشان يكتسب مهارات ويتعامل مع فرط الحركة بشكل سليم.
فعلى الرغم من الصعوبات اللي ممكن يواجهها الطفل المصاب باضطراب فرط الحركة في التعلم، إلا إن بمساعدة العلاج الوظيفي هيقدر الطفل يتغلب على صعوبات مختلفة بتواجهه، مش بس في الجانب التعليمي.
وأول حاجة بتتم في العلاج الوظيفي هي التقييم، فبيتم تقييم سلوك الطفل في البيئات المختلفة عشان نحدد مدى الصعوبات اللي بتواجهه.
وبعدين بيتم اقتراح البرنامج اللي هيساعد الطفل وأهدافه، وبعدين بيستخدم التكامل الحسي لتحسين البيئة وتقليل المشتتات.
دا بيتم من خلال بعض السلوكيات، اللي منها اتباع روتين محدد، ولما بنكلم الطفل بنتأكد إن في تواصل بصري معاه، وكمان بنوفر له بعض الألعاب زي الشطرنج، والمكعبات، وبناء الأشكال الهندسية، وغيرها.
كمان مهم نبحث عن مهارات الطفل، ونسعى إننا نعززها بالألعاب المناسبة، بالإضافة لتوفير النشاط لزيادة العلاقات الاجتماعية، ومحاولة ضبط النفس والسلوك.
العلاج السلوكي
بيهدف إلى تطوير السلوك، والتحكم في الذات، وتقدير واحترام الشخص لنفسه، وفي نوعين للعلاج السلوكي:
- التركيز على بعض السلوكيات، والاستراتيجيات اللي بتخلي سلوك الطفل مُنظم.
- التركيز على تقليل السلوكيات اللي بتسبب المشاكل.
وهنا التركيز بيكون على الأفعال والسلوكيات مش العواطف، وتشجيع السلوك الحسن، والتقليل من السلوك السيئ، وبيشمل:
- اتباع أنظمة التشجيع المختلفة، زي نظام المكافأة، لتحفيز الطفل على التحكم في انفعالاته وسلوكه.
- العلاج السلوكي المعرفي، ودي طريقة علاج حديثة بتركز على تغيير مشاعره تجاه المواقف المختلفة.
- تدريب الوالدين لمساعدة الطفل في تنفيذ استراتيجيات العلاج، والمتابعة مع الأخصائي.
- تدريب الطفل على المهارات الاجتماعية، عشان يعرف يتعامل مع غيره، ومع المجتمع.
الخلاصة
على الرغم من صعوبة حماية الطفل وتجنب اضطراب فرط الحركة، إلا إن في أمور بتساعد على التقليل من نسب الإصابة بيه، زي ابتعاد الأهل عن التدخين، والمواد السامة، والمخدرات، سواء إذا كان جنين أو في سنواته الأولى.
لازم كمان نعرف إن الأدوية اللي بياخدها الطفل بوصفة الطبيب أدوية آمنة نسبيًا، ومش بتسبب الإدمان، ولازم يتم إيقافها باستشارة الطبيب، لأنها بتتوقف بشكل تدريجي وحسب احتياج الحالة.
راعي طفلك واقرأ أكتر عن الاضطراب دا، وخليه يتعايش معاه بشكل سليم، وادعمه وخليه واثق في نفسه، وطبق الـ 11 نصيحة فعالة لتعديل سلوك الطفل كثير الحركة، وما تترددش إنك تروح لطبيب وأخصائي العلاج الوظيفي أو العلاج السلوكي عشان تتلقى الدعم.
أضف تعليق