مهم لأي ولي أمر إنه يعرف إجابة سؤال “كيف تختار الرياضة المناسبة للطفل؟”؛ لإن مع تنوع الاختيارات المتاحة، واختلاف شخصية الأطفال وطبائعهم، بيحتار ولي الأمر في اختيار رياضة للطفل تساعده على تقوية بنيته الجسدية.
بالإضافة إلى إنه يستمتع بيها وبممارستها، عشان يحقق الهدف من الرياضة فعلًا، ويستفيد منها في جوانب حياته المختلفة.
وفي المقال دا هنوفر للوالدين دليل شامل عن “كيف تختار الرياضة المناسبة للطفل؟”، عشان نخليهم يختاروا الأنسب لأطفالهم بكل سهولة.
لكن في البداية محتاجين نعرف ليه مهم إن الطفل يمارس الرياضة، فخلينا نذكر الفوائد المختلفة للرياضة.
فوائد الرياضة للأطفال
الرياضة مش مجرد نشاط بيمارسه الطفل، لكنها عبارة عن مجموعة متنوعة من الفوائد اللي بتأثر على أجزاء كتير من حياته، ودا طبعًا بيتحقق لو قدرنا نجاوب على سؤال كيف تختار الرياضة المناسبة للطفل؟
وبتنقسم الفوائد إلى:
1- فوائد صحية
- الحفاظ على وزن صحي، لتقليل احتمالية إصابة الطفل بالأمراض المزمنة زي السكري وغيره.
- تحسين القدرة على التحمل، بالإضافة إلى تعزيز صحة القلب والأوعية الدموية.
- زيادة المرونة والتوازن عند الطفل.
- تقوية العضلات والعظام.
- تفريغ الطاقة الزائدة.
- تحسين النوم.
2- فوائد نفسية
- اكتساب عادة ممارسة التمارين الرياضية بانتظام.
- تكوين صورة صحية عن جسمه وصحته.
- إكساب الطفل مزيد من الثقة بالنفس.
- تعلم مهارة الانضباط وتحسينها.
- تعلم مهارات أخرى متنوعة.
3- فوائد اجتماعية
- اكتساب مهارة العمل الجماعي، وتعلم تحمل المسؤولية.
- تعلم مهارات التواصل بشكل أفضل.
- اكتساب صداقات متنوعة.
كل دي بتعد فوائد للرياضة بيحصل عليها الطفل، ومع ذلك بتأثر فيه على المدى البعيد طول حياته، المهم نساعد الطفل على اختيار الرياضة اللي توفر له كل الفوائد دي وزيادة.
كيف تختار الرياضة المناسبة للطفل؟
مهم نعرف إن إجابة السؤال دا مبنية على عدة عوامل أساسية لازم نراعيها في الاختيار، واللي منها:
1- سن الطفل
يجب مراعاة سن الطفل بحكمة، لأن لكل فئة عمرية رياضة تتناسب مع نموهم وقدراتهم.
2- مدى حب الطفل للرياضة
مهم في اختيارنا نراعي لو الطفل بيحب رياضة معينة، وعنده الشغف بممارستها، ودا ممكن نعرفه من خلال اهتمامه بمشاهدة رياضة معينة مثلًا، أو تقدر تستعين بـ اختبارات اكتشاف مواهب الأطفال.
خلي طفلك يكون عنده رأي وتحمل لبعض المسؤولية في اختيار اللعبة اللي تناسبه، حتى لو كنت شايف إنه مش هيستمتع بيها، اسمحله يجرب ويكتشف مواهبه، وحبه للرياضة، بتوجيه مناسب منك.
كمان ما تجبرش الطفل على رياضة معينة لكونك كنت بتستمتع بيها، أو شايفها الأفضل، أو لمجرد إن في أطفال كتير في نفس سنه بيلعبوها، اسمح له بحرية التعبير عن نفسه بالرياضة اللي تتوافق مع مهاراته، وشخصيته، وميوله، عشان يقدر يأديها بحب واستمتاع.
3- قدرات الطفل الجسدية
مناسبة نوع الرياضة لقدرات الطفل الجسدية هو أحد أهم عوامل دليل “كيف تختار الرياضة المناسبة للطفل؟”، وهنا بنبص لطول الطفل، ووزنه، وقوة عضلاته، لإنها بتختلف من طفل لآخر حسب بنيته وتكوينه الجسدي.
كمان لازم نراعي الفروقات في التعامل بين الأطفال، لإننا هنلاقي طفل بيحب المشاركة الجماعية، وبيستمتع بيها، وطفل تاني بيفضل يلعب بشكل فردي، وبيبدع في كدا.
4- مناسبة الرياضة لجدول طفلك
لازم تكون الرياضة متوافقة زمنيًا مع دراسة طفلك، وحياته الاجتماعية، ولعبه الحر كمان، بدون ما تلغي أي جزء من حياته، أو تحط الطفل تحت ضغط بأي شكل كان.
اقرأ أيضًا: 5 نصائح تنظيم وقت الأطفال في المنزل وجداول جاهزة للتحميل.
5- تكلفة ممارسة الرياضة
الحالة المادية للأسرة واحدة من أهم الاعتبارات اللي لازم تنتبه ليها وأنت بتختار الرياضة المناسبة لطفلك، فهتحتاج تاخد في عين الاعتبار إذا كانت الرياضة بتحتاج لبس خاص أو أدوات خاصة بيها.
بالإضافة لمصاريف الاشتراك في النادي، أو توفير مدرب خاص للطفل، وعلى أساس كل دا بتختار الأسرة اللي يتوافق مع طفلهم ومع الحالة المادية ليهم.
6- طريقة المتابعة مع الطفل
لازم تكون عارف من البداية مين اللي هيساعد طفلك على اللعب، وهيتابع معاه كل التمارين، وهل يكفي متابعته مع مدرب النادي ولا محتاج مدرب شخصي.
ولازم هنا تدور على مدرب كويس وله خبرة في التعامل مع الأطفال في سن ابنك، لإن المدرب (سواء في النادي أو المدرب الشخصي) ليه دور كبير في استمرار ابنك في ممارسة الرياضة من عدمها.
ودا اللي أشار ليه موقع “Athlete Assessments” في الإحصائية اللي نشرها عن سبب انقطاع الأطفال عن الرياضة قبل الوصول لسن الجامعة، وبنلاقي إن الرابطة الوطنية لرياضة الجامعات (NCAA) أجرت دراسة على ما يقرب من 9000 رياضي، وأجاب 23% منهم بأن سبب انقطاعهم كان سوء العلاقة مع المدرب نفسه.
7- التكلفة المادية للرياضة
هنا بتشوف لو الرياضة بتحتاج معدات معينة، وتحدد ايه اللي ممكن يناسب طفلك، ويناسب دخل الأسرة في نفس الوقت، وتحاول توفق بين الاتنين.
بالإضافة لكل النقاط السابقة، اتأكد إن مفيش أي عوائق صحية بتمنع طفلك من ممارسة الرياضة دي، واستشير دكتور متخصص.
8- استعدادك لاستثمار وقتك ومجهودك
مش بس الطفل اللي هيبذل مجهود في ممارسة الرياضة، لكن أنت كمان كولي أمر لازم تحدد هتقدر تبذل قد إيه من وقتك ومجهودك عشان الطفل يقدر يمارس الرياضة دي، وما تكونش مجرد مرة أو مرتين وبعدها ينقطع.
فـ زي ما رتبت جدول لأطفالك، رتب جدول يومك أنت كمان، وخلي في توافق بين الاتنين.
دي بعض النصائح واللي تعتبر دليل مهم في كيف تختار الرياضة المناسبة للطفل، فمهم تتبعها وتاخد بالك منها، بالإضافة إنها هتحتاج منك صبر بشكل كبير، ومساعدة منك لطفلك بشكل فعّال، بدون الضغط عليه وبدون ملل.
9- جنس الطفل
بديهي جدًا تختلف اهتمامات البنات عن الولاد في اختيار الرياضة اللي بيحبوها، فهتلاقي الولد بيميل نوعًا ما للرياضات اللي فيها عنف أو مجهود بدني كبير.
أما البنت فعلى الأغلب بتبعد عن الرياضات اللي فيها عنف زيادة، وبتتجه لرياضات زي: الباليه، والجمباز، والسباحة، وغيرهم، وبكدا هيكون معاك دليل كامل لـ كيف تختار الرياضة المناسبة للطفل.
اعرف أكتر عن: أفضل 14 رياضة مناسبة للبنات وفوائد كل منهم.
ودلوقت هنتكلم أكتر في بعض النقاط السابقة عشان نساعدك أكتر في الاختيار.
10- رأي الخبراء
من ضمن دليل كيف تختار الرياضة المناسبة للطفل، فمهم بعد ما تسمع لطفلك إنك كمان تسمع للمدرب بتاعه، وتناقشه في إمكانيات وقدرات طفلك، وإذا كانت الرياضة اللي بيلعبها الطفل حاليًا مناسبة ليه ولمهاراته ولأ، وهل محتاج يبذل مجهود بشكل تاني، ولا الرياضة غير متوافقه معاه.
اسمح لخبرة المدرب تساعدك في القرار، لإنه تعامل مع أطفال كتير بأنماط وشخصيات مختلفة، وبالتالي هتساعد طفلك للوصول للأفضل، حتى لو تطلب الأمر التوقف عن الرياضة اللي بيمارسها حاليًا.
فممكن متكونش الرياضة دي مناسبه لعضلات الطفل، وقدراته البدنية، وقدراته العقلية، بسبب صغر سنه، أو لكون الطفل ما أظهرش شغفه بيها، ومش قادر يعبر عن دا، لكن مدربه قدر يلمس دا أثناء التدريب، فخد بنصيحة المدرب وتوجيهاته، وخليها في عين الاعتبار.
اختيار الرياضة المناسبة لسن الطفل
بيكتسب الطفل المهارات والقدرات المختلفة مع مرور الزمن، وكل ما بيزيد عمر الطفل، بتزيد عنده قدرات ومهارات بتتناسب مع سنه واحتياجاته في التوقيت دا.
عشان كدا الرياضة اللي بتناسب الطفل في عمر السبع سنوات أكيد مش هتناسب طفل تاني في عمر السنتين مثلًا، لإن صاحب السبع سنوات عنده نضج جسدي وعقلي أكبر من صاحب السنتين، فمهم نراعي النقطة دي واحنا في طريقنا لـ كيف تختار الرياضة المناسبة للطفل.
ونقدر نقسم الأطفال حسب قدراتهم إلى فئات:
- أولًا: من عمر سنتين لخمس سنوات.
- ثانيًا: من عمر 6 سنوات لـ 9 سنوات.
- ثالثًا: من عمر 10 سنوات لـ 12 سنة.
- رابعًا: من عمر 12 لـ 14 سنة.
- خامسًا: من عمر 15 فيما فوق.
وتقدر كمان تقرأ أكتر بالتفصيل عن: الرياضة المناسبة للطفل حسب الفئة العمرية.
تشجيع الطفل على ممارسة رياضات مختلفة
أحد أهم النقاط في دليل كيف تختار الرياضة المناسبة للطفل إنك تسمح لطفلك بالتجربة والاستكشاف، وخليه يحدد الرياضة اللي استمتع بيها أكتر، وكشخص مسؤول عنه راقبه وساعده يوصل للرياضة اللي تناسبه.
ممكن تشجع طفلك على ممارسة الرياضة عن طريق إنك:
- جهز مع طفلك قائمة بالرياضات اللي هو حابب يجربها، واقرأوا سوا عنها.
- خليه يضيف على القائمة رياضات مختلفة حسب المعلومات اللي سمعها أو اتكلمت معاه عنها.
- حدد معاه جدول زمني عشان يبدأ يمارس الرياضات دي، لكن مهم إنه يجرب كل رياضة لوحدها.
- ما تضغطش عليه عشان يختار رياضة معينة أنت بتحبها، واسمح له بحرية الاختيار.
- اطرح عليه أسئلة زي: هل استمتع بالتمرين النهاردة، وإيه أكتر جزء بيحبه في اللعبة.
- راقب طفلك أثناء اللعب والتمرين، عشان تتأكد هل الرياضة دي بتناسبه ولا لأ.
- اتكلم معاه عن مدربه وزمايله في اللعبة، وهل واجهته مشاكل معاهم ولا لأ.
وضروري هنا إنك لو لقيت طفلك بعد مدة من التمرين في رياضة معينة حابب يوقفها، يبقى وقفها فعلًا وجربوا رياضة تانية، في النهاية طفلك اتعلم مهارات جديدة، واكتشف نفسه، وأنت كمان قدرت تفهم جزء من طفلك وشخصيته وعرفت كيف تختار الرياضة المناسبة للطفل حسب قدراته.
الرياضات الجماعية أم الفردية أنسب لطفلك؟
طبائع الطفل وشخصيته مش بس بتحدد طريقة تعليمه وتعامله، لكنها كمان مهمة في إجابة سؤال كيف تختار الرياضة المناسبة للطفل، سواء كان طفلك بيحب الاختلاط بالناس والمجتمع بشكل كبير أو بيحب يلعب بشكل فردي، فهيقدر يلاقي الرياضة اللي تناسبه.
في رياضات جماعية كتير يقدر يجربها زي: كرة القدم، وكرة السلة، وكرة اليد، والهوكي، والبيسبول، وغيرهم. وهتساعده الرياضات دي على اكتساب مهارات متنوعة زي:
- تكوين العلاقات.
- العمل الجماعي.
- القيادة.
أما لو كان طفلك بيميل للفردية، وبيستمتع بقضاء أوقات أكتر مع نفسه، وبتظهر مهاراته بشكل منفرد، فالرياضات الفردية زي: السباحة، وركوب الدراجات، والجري، والألعاب القتالية، تعد هي الخيار الأنسب له، وهتساعده في تنمية مهارات مختلفة زي:
- البراعة في صناعة واتخاذ القرارات.
- تحمل المسؤولية بشكل أكبر.
- الاعتماد على النفس.
سواء كان طفلك اجتماعي أو لأ، اسمح له بتجربة رياضات مختلفة، وممكن تخليه يمارس الرياضة مع صديق قريب منه، أو مع أحد أفراد العائلة، دا هيشجعه في البداية وهيديله حماس أكتر.
الرياضة المناسبة لكل طفل حسب قدراته الجسدية
بالإضافة لكل النقاط السابقة في كيف تختار الرياضة المناسبة للطفل، في عامل مهم لازم ننتبه ليه أثناء الاختيار، وهو قدرة الطفل الجسدية.
فممكن نلاقي طفلين نفس العمر، وعندهم قدر عالي من النمو النفسي والعقلي، لكن ما يقدروش يمارسوا نفس الرياضة، بسبب اختلاف قدراتهم الجسدية.
ومن الحاجات المهمة إنك تزور الطبيب لو كان طفلك بيعاني من مشكلة صحية، أو ضعف ما، عشان يحدد إيه الاختيارات المتاحة قدام طفلك.
كمان قوة الطفل البدنية، وقدراته الجسدية المختلفة بتساهم في اختيار نوع الرياضة، فمثلًا لو كان طفلك طويل، وبنيته الجسدية قوية، فرياضة كرة السلة اختيار مناسب ليه ولقدراته. وإذا كان الطفل عنده تناسق كبير بين حركة إيده وعينه، وانتباهه عالي، فممكن يلعب تنس أو هوكي، وهتكون اختيار مميز يتناسب مع مهارته.
أما بقى لو كان طفلك بيعاني من الوزن الزائد، يبقى ابدأ معاه الأول بحاجات بسيطة، غيّر نمط حياته لحياة فيها حركة أكتر، وأكل صحي أكتر، وتدرّج معاه لحد ما يبدأ يلعب رياضة بيحبها ويستمتع بيها.
هل تختار رياضات تتطلب الاحتكاك الجسدي أم لا؟ contact or non-contact sports
من العوامل المهمة اللي لازم ينتبه ليها الأب والأم أثناء اختيار الرياضة الأنسب للطفل، هل الرياضة دي فيها اتصال مع الغير ولا عديمة الاتصال؟، والعامل اللي بيتحكم في الاختيار هنا هو طبيعة الطفل نفسه.
في الرياضة اللي فيها اتصال بيتطلب من الطفل الاحتكاك الجسدي المباشر مع غيره، فمثلًا الشخص اللي بيحب الحركة بشكل كبير وبيحب حركات المصارعة وغيرها.
فاختيار رياضة زي كرة القدم هيكون أمر مناسب ليه جدًا، لإنها بديل جيد ومفيد لتفريغ الطاقة الزائدة، وتحويلها لطاقة مفيدة، ولعبة يستمتع بيها، ويقضي فيها وقت لطيف.
أما رياضات الدفاع عن النفس ففيها احتكاك كبير، لكنه منظم بقوانين وقواعد، ودا هيساعد الطفل على التحكم في نفسه وحركته بشكل أكبر، عشان يقدر يستغل قدراته بشكل سليم.
لكن مهم نراعي سلامة الطفل، وعدم تعرضه للأذى، واتباع الإجراءات المطلوبة للحفاظ على صحة وسلامة الجميع.
أما لو كان طفلك بيتسم بالهدوء وبيميل إلى السكون، فمهم تختار له رياضة عديمة الاتصال، بدون احتكاك جسدي مع غيره، دي هتتناسب معاه بشكل أفضل، زي مثلًا التنس، أو الهوكي، أو السباحة، دي كلها هتكون اختيارات ممتازة للطفل، ولطبيعته الهادية.
الخلاصة
مش لازم طفلك يمارس رياضة مشهورة ومعروفة عند اللي في سنه، سيبه يختار الحاجة اللي حبها طالما مناسبه ليه وبيستمتع بيها.
بس لازم الطفل يتحلى بالانضباط والالتزام، ودي مهارة هيكتسبها مع الوقت، لكن مهم كمان يكون الوالدين نفسهم عندهم الانضباط والالتزام في تعليم الطفل، والالتزام بتوصيله للتمارين، والحضور في التوقيت المناسب، وممكن كمان مساعدته على التمرين خارج وقت النادي.
وأنت بتدور على إجابة سؤال “كيف تختار الرياضة المناسبة للطفل؟”، اتأكد إن الرياضة اللي هتختارها دي هتشكل جزء كبير من شغف وحماس الطفل، وخليك فاهم إنه بالرغم من كونه مسؤول منك، لكن هو كمان ليه شخصية مستقلة ومختلفة، فما تلغيش وجودها.
أضف تعليق