كتير من الأهالي ممكن يتفاجئوا لما يلاحظوا طفلهم بيبدأ يعمل تصرفات مش مفهومة، زي إنه يلمس جسمه بشكل معين أو يكرر سلوك خاص وبيبقى فيه حرج كبير في التعامل مع الموقف.
بس الحقيقة إن العادة السرية عند الأطفال مش دايمًا معناها حاجة غلط أو تستدعي العقاب، ممكن تكون مجرد علامة على فضول طبيعي عند الطفل أو إنه بيكتشف جسمه لأول مرة.
المهم هو إننا نفهم ونتعامل من غير خوف ولا توتر، لأن الطريقة اللي بنتكلم بيها مع الطفل في المرحلة دي بتفرق جدًا في نظرته لجسمه وتقديره لنفسه بعد كدا.
في المقال دا؛ هنتكلم عن إمتى ممكن تظهر العادة السرية عند الأطفال، وليه بتحصل، وإزاي نقدر نتعامل معاها بأسلوب هادي وتربوي يطمن الطفل ويعلمه في نفس الوقت.
ما هي العادة السرية عند الأطفال؟
هي تصرف ممكن يخضّ الأهل أول ما يلاحظوه، وهو إن الطفل بيبدأ يلمس أو يحتك بأعضائه التناسلية. أحيانًا بيبان التصرف دا كأنه فقد للبراءة، بس الحقيقة إن العادة السرية عند الأطفال في السن الصغير ملهاش أي علاقة بالجنس.
الطفل بيعمل كدا لأنه لسه بيكتشف جسمه، وبيلمس أجزاء مختلفة منه زي ودانه أو صوابعه، فلو حس بإحساس مريح طبيعي يكرره.
اللمس أو الاحتكاك دا ممكن يحصل بإيده، أو عن طريق احتكاك بحاجات تانية زي المخدة أو الألعاب أو حتى السرير.
المهم إن الطفل ما يتعاقبش أو يتأنّب لو اتصرف كدا، لإن العقاب في الموقف دا ممكن يأثر على ثقته في نفسه، أو يخليه يحس إن جسمه حاجة غلط، ودا بيسبب مشاكل بعدين.
أما بالنسبة للسن، فالأطفال ممكن يلاحظوا أعضائهم التناسلية من سن صغير جدًا.
- الأولاد ساعات بيلاحظوا المنطقة دي وهم لسه بيغيروا الحفاضة في عمر 6 أو 7 شهور.
- البنات غالبًا بيبدأوا يلاحظوا التغيرات أو يحاولوا يستكشفوا جسمهم في سن 10 شهور.
وساعات التدريب على استخدام الحمام بيكون سبب في زيادة فضولهم، لأنهم بيبدأوا يلاحظوا شكل جسمهم، ويتعاملوا معاه بشكل مباشر. الطفل في المرحلة دي مش بيكون فاهم هو بيعمل إيه بالظبط، فالتعامل بهدوء هو المفتاح.
وبعض الأطفال بتظهر في سن من 5 لـ 6 سنين – سواء ولاد أو بنات – بيبدأوا يلمسوا أو يلعبوا في أعضائهم التناسلية الخارجية، ودا ممكن لأسباب معينة وأوقات بدون سبب.
بس مهم نفتكر إن الطفل في المرحلة دي مش بيربط التصرف دا بأي حاجة جنسية زي الكبار، هو غالبًا بيعمله كنوع من الراحة أو التسلية، خصوصًا لو كان لوحده أو حاسس بالملل.
ومع اقتراب سن البلوغ بتزيد النسبة دي، لدرجة إن تقريبًا كل الأولاد وحوالي ربع البنات بيوصلوا للنشوة الجنسية عن طريق العادة السرية قبل سن 15.
اتعرف على: 5 خطوات لتعديل سلوك الطفل الجنسي.
ما هي أسباب العادة السرية عند الأطفال؟
في الغالب بتظهر العادة دي صدفة نتيجة احتكاك الطفل بأعضائه الخاصة، وشعوره بالراحة والمتعة منها وبالتالي بيكررها بدون وعي، وأوقات بيكون في أسباب أدت لظهور عادة الاستمناء دي عند الأطفال، زي:
الحرمان العاطفي والشعور بالوحدة
تبعاََ لدراسة اتنشرت على موقع NIH كشفت عن ارتباط سلوك العادة السرية عند الأطفال بالحرمان العاطفي والشعور بالملل والوحدة.
بالإضافة لدراسة اتنشرت في Journal of Comprehensive Pediatrics اتنفذت على 600 طفل، ظهر إن حوالي 11% من الأطفال بيقوموا بسلوك العادة السرية بشكل مبالغ فيه، وأكتر طريقة كانوا بيستخدموها هي فرك الأعضاء التناسلية سواء بإيديهم أو بأدوات زي المخدة أو السرير.
والسبب الأساسي اللي كان بيخلّي الأطفال يعملوا كدا هو شعورهم بالملل، والحمام كان المكان اللي بيتكرر فيه السلوك دا أكتر من أي مكان تاني.
بعض الاضطرابات السلوكية
من الملاحظات المهمة اللي اتكشفت كمان في الدراسة السابقة إن أغلب الأطفال اللي مارسوا العادة السرية بشكل مرضي، كانوا بيعانوا كمان من مشاكل نفسية تانية. ومرض فرط الحركة وتشتت الانتباه (ADHD) كان أكتر اضطراب نفسي ظاهر عندهم.
العصبية والتوتر
وجود الطفل في بيئة موترة زي الخناقات والصوت العالي والعِناد من الأهل بيكون محفز له إنه يعمل العادة السرية عند الأطفال كأسلوب لتهدئة نفسه.
الالتهابات الجلدية
وجود التهابات جلدية في المنطقة الخاصة بيكون محفز للحكة ودا بيخلي الطفل يلمس المنطقة، وبمجرد شعوره بالراحة من الاحتكاك دا بيكرر التصرف تلقائي.
تعرض الطفل للتحرش الجنسي
ممكن يكون شخص قام بالفعل دا مع الطفل، ولمس أعضائه التناسلية، وبالتالي الطفل ممكن يكرر الفعل دا لشعوره بالراحة منه.
اتعرف على: علامات تعرض الطفل للتحرش الجنسي وعقوبتها | التوعية والحماية واجب على الجميع.
إمتى نقلق من العادة السرية عند الأطفال؟
في أغلب الحالات، لمس الطفل لأعضائه بيكون تصرف طبيعي ضمن مراحل النمو، لكن في شوية مواقف لو لاحظناها، من الأفضل نكلم دكتور الأطفال عشان نتأكد إن كل حاجة تمام:
- ظهور أي جروح أو علامات احتكاك في المنطقة، أو اللعب بقى مستمر لفترة طويلة من غير سبب واضح.
- وجود تلامس غير مناسب زي الفم مع المنطقة التناسلية، أو الطفل باين عليه حزين أو مش مرتاح.
- الطفل بيحاول يقلد مشاهد جنسية أو بيحاول يلمس طفل تاني بطريقة مش طبيعية.
- الموضوع زاد فجأة، ممكن يكون الطفل مضغوط نفسيًا وبيحاول يهدّي نفسه.
- التصرف بقى متكرر بشكل مبالغ فيه، ومش بيقدر يوقفه حتى لو حاولنا نلهيه.
- الطفل باين عليه فهم مبكر لحاجات تخص العلاقة الجنسية.
- ظهور احتكاك أو أي شكل من الاختراق مع طفل تاني.
- التصرف بيبان عليه إنه مؤلم أو مزعج للطفل.
في الحالات دي، لازم نبص على الظروف حواليه: هل الطفل مضغوط؟ زهقان؟ محتاج يهدأ؟ أو ممكن يكون رد فعل الكبار على التصرف هو اللي خلى الطفل يركز عليه أكتر؟
لو في أي سبب من دول، الأهم إننا نعالج السبب نفسه بهدوء ووعي.
والأهم إنك كولي أمر تفهم إن الأطفال في السن الصغير أو قبل المدرسة مش بيكون عندهم إدراك كامل للفرق بين السلوك اللي ممكن يتعمل قدام الناس والسلوك الخاص، ودا لأنهم مش بيربطوا العادة السرية عند الأطفال بأي حاجة ليها علاقة بالكبار. بالنسبة لهم، اللي بيعملوه مش مختلف عن اللعب في شعرهم أو لمس ودانهم.
عشان كدا، ماينفعش نضخّم الموقف أو نظهر رد فعل عنيف، لأن الطفل في السن دا بيحب أي نوع من الانتباه سواء إيجابي أو سلبي، ورد الفعل القوي ممكن يخلي السلوك يزيد بدل ما يختفي.
نصائح للحد من العادة السرية عند الأطفال
تبعاََ لدراسة اتنشرت على موقع Academic hospital journal فإن العلاج السلوكي كان الحل المثالي والشائع في حالات العادة السرية عند الطفل، وبيكون في الغالب عن طريق التشتيت والإلهاء وإمتاع الطفل من خلال المشاركة معه، أما العلاج بيكون الحل الأفضل في الحالات المرضية الشديدة، ودي أهم النصائح للحد منها:
التعامل بهدوء
مهم جدًا تكون هادي لو لاحظت طفلك بيعمل كدا. لإنه مش فاهم دا إيه، وممكن يكون بيتعامل مع الموضوع زي أي لعبة بتسعده.
الكلام ببساطة
قول لطفلك إن المنطقة دي خاصة جدًا ومش المفروض نلمسها، زي ما ماينفعش نلمس العين مثلًا عشان منأذيش نفسنا.
استخدام الصور التوضيحية
ممكن تعرضله رسومات بسيطة تشرح إن لمس المنطقة دي ممكن ينقل ميكروبات يسببله ألم أو حكة أو التهاب.
ربط التصرف بحاجة مش مرغوبة
فكّر في حاجة طفلك مش بيحبها وقوله إن اللعب في المنطقة دي ممكن يخليه يتعب ومش هيعرف يخرج أو يلعب ويضطر يقعد في البيت ياخد علاج.
استخدام الثواب والعقاب
لو بطل ممارسة العادة السرية عند الأطفال؛ علق لوحة واعمله نجوم يشوفها، وكل ما يلتزم، كافئه بحاجة بيحبها. ولو رجع للتصرف، احرمه من حاجة بيحبها (بس من غير ضرب أو تعنيف).
قضاء وقت أكتر مع الطفل
شاركه اللعب والكلام والأنشطة اللي بيحبها؛ وجودك حواليه بيخليه يحس بالأمان، وبيقلل احتياجه للتصرف دا تاني.
الإكثار من الحضن والمديح
كل ما يعيد التصرف دا،حاول ترجع تفهمه، واحضنه وخليك حنين معاه وامدحه، عشان يحس إنه محبوب ومقدّر، ودا بيشبع عنده الإحساس بالحب والاهتمام، فيبطل يلجأ للتصرفات دي.
معرفة مفهوم الخصوصية
اشرح له بلطف إن فيه أجزاء من الجسم خاصة، ومش المفروض نلمسها قدام الناس، ودا جزء من تعلم الخصوصية.
مراقبة المحتوى اللي بيتعرض له
اتأكد إن الطفل مش بيتعرض لمشاهد غير مناسبة في التلفزيون أو الإنترنت، لأنها ممكن تثير فضوله بشكل غير مناسب لسنه، وتحفز عنده العادة السرية عند الأطفال.
سؤال الطفل لو اتعرض للإعتداء
لو الطفل في عمر بيتكلم فيه، مهم تسأله لو حد اتعرضله أو لمس أجزائه الخاصة لسرعة التصرف السليم.
استشارة مختص لو لزم الأمر
لو لاحظت إن السلوك بيزيد أو بيأثر على حياة الطفل اليومية، ممكن تستشير أخصائي نفسي للأطفال للمساعدة.
اتعرف على: اضطرابات الأكل عند المراهقين | أهم الأسباب والأعراض وطرق العلاج.
الفرق بين العادة السرية عند الأطفال والمراهقين
وزي ما وضحنا إن العادة السرية عند الأطفال غالبًا بتكون بدافع الفضول واكتشاف الجسم، ومالهاش أي علاقة بالمفاهيم الجنسية اللي نعرفها إحنا الكبار.
لكن في سن المراهقة، الوضع بيكون مختلف، لأن المراهق بيبدأ يفهم جسمه، وبيتعرض لمؤثرات خارجية زي الإنترنت أو الأصحاب، وبيبقى عنده دوافع نفسية أو جسدية أقوى. علشان كدا طريقة التعامل بتختلف حسب السن، فلازم نراعي الفروق دي في ردود أفعالنا وتوجيهاتنا.
ودي نصايح بسيطة ومهمة عشان تقدر تتعامل مع موضوع العادة السرية عند الأطفال والمراهقين بشكل واعي وفعّال من غير توتر أو إحراج:
1. ابدأ التوعية من بدري
كل ما عرفنا الطفل بجسمه وحدود الخصوصية من سن صغير، كل ما قلّ الفضول اللي ممكن يوصله لسلوكيات هو مش فاهمها.
2. تقبّل السلوك من غير فزع
لو لاحظت السلوك دا، حاول تهدى وما تعاملوش على إنه كارثة. الطفل أو المراهق محتاج يسمع توجيه مش توبيخ.
3. احترم خصوصية ابنك
ما تراقبش بشكل مباشر أو تحسسه إنه مراقَب، لأن دا ممكن يولّد عنده إحساس بالخجل أو التمرد.
4. استخدم لغة حوار بسيطة
وقت ما تتكلم مع ابنك أو بنتك، خليك بسيط وواضح من غير تعقيد أو تخويف. الهدف إنهم يفهموا مش يخافوا.
5. اربط التوعية بالقيم والدين
الدين ممكن يكون أداة توعية عظيمة لما نستخدمه بأسلوب لطيف. وضّح لطفلك إن جسمه أمانة، وإن فيه سلوكيات بنحافظ فيها على نظافتنا الجسدية والنفسية.
6. اشغل وقته وطاقته
الرياضة والهوايات، والخروج مع أصحاب كويسين بتقلل من وقت الفراغ اللي ممكن يزود التفكير في السلوك دا، ودا مهم جداََ في الحد من العادة السرية عند المراهقين.
7. راقب المحتوى اللي بيتعرضله
الموبيل، التابلت، الإنترنت.. محتاجين نكون متابعين إيه اللي بيوصل لأولادنا من غير ما نحسسهم بالتضييق.
8. امنحه حب واهتمام أكتر
أوقات كتير السلوك دا بيكون بديل عن احتياج عاطفي ناقص؛ فلما يلاقوا الحب والدعم من البيت، احتياجهم دا بيقل.
9. استعين بطبيب لو السلوك زاد عن الحد
لو حسيت إن الطفل أو المراهق بيكرر السلوك بشكل قهري أو بيأثر على حياته، ما فيش مانع تستشير متخصص.
10. خليك مصدر أمان
خلي ابنك أو بنتك يحسوا إنهم يقدروا ييجوا يحكوا لك من غير خوف أو خجل، دا هيساعدهم يتخطوا أي سلوك سلبي بسهولة.
وافتكر إن سن المراهقة بيحتاج منك وعي وصبر وتوجيه بأسلوب فيه صداقة ودعم للمراهق، القرب لابنك أو بنتك هما كلمة سر المرحلة دي عشان تمر بسلام، وتقدر تعيد توجيه ابنك للسلوك الصحيح.
اتعرف على: أبرز مشاكل المراهقين النفسية وكيفية التعامل الصحيح معها.
في النهاية، مهم نعرف إن العادة السرية عند الأطفال مش دايمًا دليل على مشكلة كبيرة، لكنها ممكن تكون علامة على فضول طبيعي أو وسيلة للتهدئة. ومع كدا، تجاهلها أو التعامل معاها بعصبية مش هو الحل.
اللي بنحتاجه فعلاً هو الوعي والاحتواء، ومتابعة الطفل من غير تهويل أو توبيخ. وضروري نكون منتبهين لأي علامات لسلوك مبالغ فيه أو مشاكل نفسية مصاحبة، علشان نقدر نقدم الدعم المناسب في الوقت الصح، ونربي أولادنا في بيئة صحية نفسيًا وجسديًا.
المصادر
Practical approach to childhood masturbation a review.
Masturbation: Why it happens and what to do about it.
أضف تعليق