اضطرابات الأكل عند المراهقين | أهم الأسباب والأعراض وطرق العلاج

فترة المراهقة من أصعب المراحل في تربية الأبناء، ودا لإنهم بيتغيروا على كل المستويات سواء النفسية أو البدنية.

دا غير إن تأثير المحيط الاجتماعي عليهم والصورة الخيالية لكل الأمور من السوشيال ميديا بتغير في معتقداتهم وطريقة تفكيرهم.

وبالتالي بيكون دور الأهل مهم جداً في احتواء أبنائهم في الفترة دي، وحمايتهم من أي ضرر يصيبهم، وواحدة من المشاكل اللي بيمر بيها نسبة كبيرة منهم هي اضطرابات الأكل عند المراهقين.

ودا هيكون موضوع المقال، هنتكلم عن تعريف اضطرابات الأكل وأنواعها، وأشهر أسبابها وعلاماتها، وطرق العلاج، وأهم النصائح للوقاية منها.

يعني إيه اضطرابات الأكل عند المراهقين؟

تبعاََ لإحصائية منشورة على موقع NIH بتقول إن واحد من كل 8 أطفال بيكون عنده اضطراب أكل قبل ما يوصِّل لـ 20 سنة، وفي 5 مليون أمريكي سنويًا بيعانوا من اضطرابات الأكل.

ودي بعض النتايج:

• 0.3% من البنات عندهم فقدان شهية عصبي (الأنوريكسيا).
•  1% من البنات عندهم شره عصبي (البوليميا).

لكن اضطراب الشراهة في الأكل (BED) منتشر أكتر عند الولاد والكبار.

ودا لإن في سن المراهقة، بيبدأ الشاب يهتم أكتر بشكله وجسمه ونظرته لنفسه، وهنا ممكن تظهر مشكلة “اضطرابات الأكل”. ودي مش مجرد إن حد بياكل قليل أو بيحب نوع أكل معين، دي حالة نفسية بتأثر على علاقته بالأكل وبنفسه كمان. أي مراهق ممكن يتعرض لها، ومش شرط يبقى باين عليه في الشكل أو الوزن.

ومن أشهر أنواعها فقدان الشهية العصبي، والشره العصبي، واضطراب نهم الأكل.

المشكلة إن اضطرابات الأكل عند المراهقين مش بتأثر على الجسم بس، دي كمان بتدمر النفسية، وممكن توصل لمرحلة خطيرة تهدد حياة المراهق لو ما اتلحقش.

واللي بيصعّب اكتشافها إن في مراهقين بيبقوا متعودين على عاداتهم، وبيبرروها إنها “دايت” أو “حياة صحية”، بس في الحقيقة هما جوه دايرة اضطراب أكل. ممكن يحسبوا السعرات في كل حاجة، أو يرفضوا ياكلوا نوعيات معينة، أو يحسوا بالخجل والذنب بعد الأكل.

لو ابنك أو بنتك حسيت إنهم محبوسين في الدايرة دي، لازم تعرف إن في علاج ومساعدة ممكن ترجعهم لحالتهم الطبيعية وقت ما يكونوا مستعدين.

أنواع اضطرابات الأكل عند المراهقين

اضطرابات الأكل مش نوع واحد، ولكل نوع فيهم  أعراضه وتأثيراته المختلفة. ودي أهم أنواع اضطرابات الأكل عند المراهقين والكبار المذكورة في الطبعة الخامسة من الدليل التشخيصي والإحصائي للاضطرابات العقلية (DSM-5):

1. فقدان الشهية العصبي (Anorexia)

اضطراب فقدان الشهية العصبي (الأنوريكسيا) مش مجرد “عدم رغبة في الأكل”، دا مرض نفسي خطير بيتميز بـ ٣ نقاط أساسية:

1. التقييد الشديد للأكل

الشخص بيقلل السعرات الحرارية بشكل مبالغ فيه مقارنة باحتياجات جسمه، ودا بيؤدي إلى:

• نقص شديد في الوزن (أقل من الطبيعي بكتير بالنسبة لسنه وطوله).
• هزال وضعف عام (مش قادر يمارس حياته الطبيعية).
• توقف النمو (لو كان في سن المراهقة).

2. خوف مرضي من زيادة الوزن (حتى لو الشخص نحيف جدًا)

• بيحاول يتجنب أي موقف ممكن يخلي وزنه يزيد (زي الأكل مع الناس، أو الأكلات الدسمة).
• بيكون عنده رعب من إنه يزيد حتى جرام واحد، بالرغم من النحافة الشديدة.

 3. تشوه صورة الجسم

• تقديره لذاته بيبقى مرتبط بـرقم الميزان فقط (مش إنجازاته أو شخصيته).
• المكابرة والتظاهر بإنه كويس رغم المضاعفات الصحية الخطيرة.
• الشخص بيشوف نفسه سمين رغم إنه نحيف جدًا.

ومن أنواع فقدان الشهية العصبي:

أ. النوع التقييدي (الأكثر شيوعًا)؛ ودا بيكون من خلال فقدان الوزن عن طريق:

•  تجويع النفس (الصيام لساعات طويلة).
•  تقليل الأكل لدرجة خطيرة.
•  ممارسة الرياضة بإفراط.

 ب. نوع الشراهة/التطهير: بياكل كمية كبيرة جدًا في وقت قصير (نوبة شراهة)، وبعدها بيحاول يتخلص من الأكل عن طريق:

• تمارين مفرطة عشان يحرق اللي أكله.
• استخدام ملينات أو مدرات بول.
• التقيؤ المُتعمَّد.

2. الشره العصبي (البوليميا)

من أشهر اضطرابات الأكل عند المراهقين، وبيتميز إن الشخص بتجيله نوبات من الأكل بشراهة (بياكل كمية كبيرة جدًا في وقت قصير)، وبعد ما بياكل، بيحاول يتخلص من الأكل عن طريق:

• استخدام ملينات أو مدرات البول عشان يخرج الأكل بسرعة.
• ممارسة رياضة بشكل مبالغ فيه عشان “يحرق” اللي أكله.
• التقيؤ القسري (بيحاول يطلع الأكل عمدًا).

3. اضطراب الشراهة في الأكل (Binge Eating Disorder)

زيّ الشره العصبي، فيه نوبات من الأكل بشراهة، لكن من غير ما يحاول يتخلص من الأكل بعدها؛ فبنلاقيه:

• ممكن ياكل وهو مش جعان، أو حتى وهو مش عايز ياكل.
• بياكل بسرعة كبيرة لحد ما يحس بألم في معدته.

وبعد النوبة، بيحس بالخجل والذنب والاكتئاب، لكن مش بيعمل حاجة عشان يصلح اللي عمله (مش بيتقيأ ولا بيستخدم ملينات).

4. اضطراب تناول الطعام التجنبي/المقيد (ARFID)

واحد من أشهر اضطرابات الأكل عند المراهقين فيه الشخص بيقلل كمية الأكل أو بيختار أنواع معينة جدًا، لكن مش عشان خايف وزنه يزيد (مش زيّ الأنوريكسيا).

لكن الأسباب بتكون:

• الخوف من تجربة أكل جديد (ممكن يكون عنده حساسية من روائح أو ألوان أو قوام أكلات معينة).
• فقدان الشهية بسبب مشاكل نفسية (زي القلق أو الاكتئاب).
• تجربة سيئة مع الأكل (زي الاختناق أو الترجيع في الماضي).

5. البيكا (Pica)

النوع دا من أشهر اضطرابات الأكل عند الأطفال؛ وفيه بياكل الطفل مواد مش غذائية بشكل متكرر لمدة شهر على الأقل.

المواد دي ممكن تكون الطين، التراب، الطباشير، الصابون، الشعر، البلاستيك، المعادن، وغيره.

وبالرغم إنه بيحصل أكتر عند الأطفال، لكن ممكن يصيب الكبار كمان، خصوصًا لو عندهم نقص في الفيتامينات أو مشاكل نفسية.

6. اضطراب الاجترار (Rumination Disorder)

النوع دا فيه بعد ما الشخص يبلع الأكل، بيرجع من المعدة تاني للفم من غير سبب مرضي (مش زيّ القئ العادي)، وفي الحالة دي:

• ممكن يحصل عند الأطفال أو الكبار، وبيأدي لمشاكل في التغذية ونقص الوزن.
• مش مرتبط بالغثيان أو الحرقة، لكنه سلوك لا إرادي.
• ممكن يعيد مضغه ويبلعه تاني، أو يبصقه.

اقرأ أيضاً: أبرز مشاكل المراهقين النفسية وكيفية التعامل الصحيح معها.

اضطرابات الأكل عند المراهقين -غير الشائعة-

في بعض أنواع الاضطرابات أقل في الشهرة عن غيرها، ومنها:

1. اضطرابات الأكل المحددة الأخرى (OSFED)

دي أنواع من اضطرابات الأكل مش بتوافق كل معايير الأنواع المعروفة، لكنها موجودة ومؤثرة. زيّ لما يكون عندك أعراض المرض، لكن مش كلها، أو بتكون أخف شوية. منها:

أ. فقدان الشهية العصبي غير النمطي (Atypical Anorexia)

بيكون عند الشخص كل أعراض فقدان الشهية (خوف من الوزن، تقييد الأكل، تشويه صورة الجسم)، بس وزنه طبيعي أو حتى زايد.

الناس حواليه ممكن ميشكوش إنه عنده مشكلة، لأنه مش نحيف جدًا، لكنه فعليًا عايش بنفس المعاناة النفسية والجسدية.

ب. الشره العصبي الفرعي (Subthreshold Bulimia)

بيكون عند الشخص نوبات أكل بشراهة + تصرفات تطهير (زى التقيؤ أو الملينات)، لكن بعدد مرات أقل من التشخيص الرسمي للشره العصبي.

مثلاً: بيعمل كدا مرة في الأسبوع بدل مرتين (المعيار الرسمي).

ج. اضطراب الشراهة الفرعي (Subthreshold Binge Eating)

بيتميز بنوبات أكل بشراهة، لكن مش بتكفي عشان تتوصف بالاضطراب الكامل. فممكن تكون المرات قليلة، أو مدة الاضطراب قصيرة.

2. اضطراب التطهير (Purging Disorder)

الشخص بيتقيأ أو بيستخدم ملينات عشان يتحكم في وزنه، لكن من غير ما يمر بنوبات أكل بشراهة (عكس الشره العصبي).

فبيكون عنده هوس بالوزن، وبيحاول يقلل السعرات بأي طريقة، حتى لو كان مش بياكل كتير.

 3. متلازمة الأكل الليلي (Night Eating Syndrome)

الشخص بيستيقظ من النوم عشان ياكل، أو بياكل كمية كبيرة جدًا بعد العشاء، مش بس جوع عادي، لكن أكل قهري مرتبط بالتوتر أو الأرق.

وممكن يحس بالذنب بعدها، لكن مش بيعمل حاجة عشان يتخلص من الأكل (مش زيّ الشره العصبي).

4. فقد الشهية العُصابي (Orthorexia Nervosa)

النوع دا بيتميز بهوس الأكل الصحي لدرجة وسواسية.

بيبدأ باختيار أكل صحي، لكن بيفرط في القيود لغاية ما يبعد عن أكلات كتير ضرورية (زي الدهون أو النشويات).

 النتيجة بتكون سوء تغذية، نقص فيتامينات، وانعزال اجتماعي (عشان بيخاف ياكل بره).

5. الأكل العاطفي (Emotional Overeating)

واحد من اضطرابات الأكل عند المراهقين وهي اللجوء للأكل عشان يهرب من مشاعر سلبية (زى الحزن، القلق، والملل).

مش شرط يكون في نوبات شراهة كبيرة، لكن الأكل بيبقى وسيلة للتعامل مع الضغوط، ولو استمر ممكن يتحول لـ اضطراب شراهة كامل.

اقرأ أيضاً: مشكلات الأطفال السلوكية | تعرف على أسباب وعلاج أبرز 11 مشكلة سلوكية.

علامات اضطرابات الأكل عند المراهقين

اضطرابات الأكل بتحتل المرتبة الثالثة بين الأمراض المزمنة، وشائعة بين البنات في سن المراهقة تبعاً لدراسة اتنشرت على موقع NIH.

ومن أهم العلامات اللي ممكن تنبهك إن ابنك أو بنتك بيعانوا من اضطراب أكل:

علامات جسدية

• تغير الوزن المفاجئ (نقصان أو زيادة كبيرة في وقت قصير).
• ظهور شعر ناعم على الجسم (علامة سوء تغذية).
• مشاكل في الدورة الشهرية (للبنات).
• تساقط الشعر وضعف الأظافر.
• شعور دائم بالإرهاق والدوخة.

علامات سلوكية

• ذهاب متكرر للحمام بعد الأكل (خاصةََ بعد الوجبات).
• هوس بحساب السعرات أو وزن الطعام.
• تجنب الأكل مع العائلة أو الأصدقاء.
• جمع أو تخزين الطعام بطرق غريبة.
• ممارسة رياضة بشكل مبالغ فيه.

علامات نفسية

• نظرة مشوهة للجسم (رؤية النفس “سمينة” رغم النحافة).
• قلق دائم حول موضوع الأكل والوزن.
• خوف غير منطقي من زيادة الوزن.
• فقدان المتعة في الأكل تماماً.
• الشعور بالذنب بعد الأكل.

علامات اجتماعية

• كذب حول كمية الأكل أو التمارين الرياضية.
• حساسية مفرطة لأي تعليق عن المظهر.
• ارتداء ملابس فضفاضة لإخفاء الجسم.
• انسحاب من الأنشطة الاجتماعية.

مش شرط تظهر كل العلامات مع بعض، لكن ظهور بعضها بشكل مستمر ممكن يكون إنذار بوجود مشكلة. فلو لاحظت العلامات دي على ابنك الأفضل استشارة مختص في أسرع وقت.

أسباب اضطرابات الأكل عند المراهقين

اضطرابات الأكل ملهاش سبب واحد مباشر، لكنها بتكون نتيجة خليط من عوامل كتيرة متشابكة، من أهمها:

1- الوراثة والعوامل البيولوجية

لو فرد في العيلة كان عنده اضطراب أكل، ففرص الإصابة بتزيد (زيها زي بعض الأمراض النفسية التانية).

التاريخ العائلي للسكري أو اضطرابات الهرمونات ممكن يزيد الخطر كمان.

أو خلل في كيمياء المخ (خصوصًا هرمونات السعادة زي السيروتونين والدوبامين) بيأثر على:

• القدرة على التعامل مع التوتر.
• الشعور بالرضا عن النفس.
• التحكم في الشهية.

2- ضغوط المجتمع والثقافة

• بعض الرياضات أو الوظائف اللي بتفرض معايير قاسية للجسم.
• مقارنة النفس بنماذج غير واقعية (بعد التعديل بالفلاتر).
• تعليقات مؤذية عن الوزن (حتى لو كانت “مزحة”).
• هوس النحافة في الإعلام ووسائل التواصل.

 3- الصدمات النفسية

• تجارب سيئة في الطفولة (تنمر، إهمال، تحرش).
• علاقات عائلية مضطربة (خصوصًا مع الأكل).
• ضغوط دراسية أو عاطفية مكبوتة.

 4- اضطرابات نفسية مصاحبة

• القلق والاكتئاب (55% من المصابين باضطرابات الأكل عندهم اكتئاب).
• الوسواس القهري (الهوس بالتحكم في التفاصيل).
• اضطرابات الشخصية الحدية.

5- عوامل شخصية

• استخدام الأكل كـ”مخدر” للهروب من المشاكل.
• صعوبة في التعبير عن المشاعر.
• حساسية مفرطة للنقد.
• الميل للكمالية.

مضاعفات اضطرابات الأكل عند المراهقين

اضطرابات الأكل مش مجرد هوس بالوزن، دي ممكن تدمر كل حاجة في جسم المصاب بيها، وخاصةََ لو ماتلحقش، ومن أبرز المضاعفات دي:

1. مشاكل القلب والدم

• عدم انتظام ضربات القلب: بسبب نقص البوتاسيوم والماغنسيوم (نتيجة القيء أو سوء التغذية).
• ضعف عضلة القلب: القلب بيضطر يعمل بمجهود أكبر عشان يوصل الدم لكل الجسم.
• انخفاض ضغط الدم: بيخليه دايمًا حاسس بدوخة وإرهاق.

بعض الحالات بتوصل لـ سكتة قلبية مفاجئة حتى لو الشخص صغير في السن.

 2. مشاكل الجهاز الهضمي

• ارتجاع حاد وحموضة: القيء المتعمد بيخرب صمام المعدة.
• إمساك مزمن: الأمعاء بتتقفل بسبب قلة الأكل.
• قرح المعدة: من شدة الحموضة والجوع.

3. هشاشة العظام

العظام بتتحول لـزجاج بسبب نقص الكالسيوم والفيتامينات فبيخليها سهلة الكسر.

وممكن يسبب كمان آلام ظهر ومفاصل دائمة حتى لو العمر الصغير.

4. مشاكل هرمونية وتناسلية

• انقطاع الدورة الشهرية: الجسم بيوقف الإباضة عشان يحافظ على الطاقة.
• عقم مؤقت أو دائم: لو الحالة استمرت سنين من غير علاج.

5. تلف الأسنان

• التسوس والالتهابات اللثوية بتكون مستمرة.
• القيء المستمر بيآكل مينا الأسنان.

6. مشاكل في المخ والجهاز العصبي

• تلف خلايا المخ: بسبب نقص الأكسجين، والغذاء.
• تشوش ذهني: صعوبة في التركيز أو تذكر الأشياء.

7. مضاعفات خطيرة للسكر

مرضى السكري اللي بيهملوا الأنسولين عشان ينحفوا ممكن يدخلوا في غيبوبة سكر أو يفقدوا بصرهم.

8. مشاكل نفسية

• إدمان مسكنات أو مخدرات.
• أفكار انتحارية.
• اكتئاب حاد.

علاج اضطرابات الأكل عند المراهقين

اضطرابات الأكل مش حاجة بتيجي وتروح بسرعة، لكن هي مشكلة  قابلة للعلاج لو اتخذنا الخطوات الصحيحة، ومن أهم الطرق الفعالة اللي بتساعد في التعافي:

العلاج النفسي

من أهم الخطوات لعلاج اضطرابات الأكل عند المراهقين، وليها 3 أنواع هما:

1. الجلسات الفردية

مع دكتور نفسي متخصص عشان:

•  اكتشاف الأسباب الخفية وراء الاضطراب (زي الصدمات أو القلق).
• تعلم التحكم في الأفكار الوسواسية عن الأكل والجسم.

2. العلاج السلوكي المعرفي (CBT)

 أشهر نوع في علاج اضطرابات الأكل عند المراهقين، ودا لإنه بيساعدك في تغيير الأفكار السلبية عن الجسم وتعديل سلوكيات الأكل.

3. علاج عائلي

في حالة إصابة الاضطراب عند مراهق، الأسرة بتكون جزء أساسي من العلاج.

 ودا لإنهم بيتعلموا إزاي يدعموا ابنهم من غير ما يزودوا الضغط عليه.

2. الأدوية (لو في حالات مصاحبة)

• مضادات الاكتئاب:لو كان في اكتئاب أو قلق بيساعدوا في تحسين المزاج.
• فيتامينات ومكملات غذائية: عشان تعويض النقص في الجسم.
• أدوية تنظيم الشهية: في بعض الحالات الخاصة.

وكمان الأدوية مش حل وحيد، لكنها بتبقى مساعدة مع العلاج النفسي.

 3. الاستشارة الغذائية (مع أخصائي تغذية)

من خلال وضع خطة أكل متوازنة تناسب احتياجاته، وتعلمه إزاي يتعامل مع الأكل من غير خوف أو ذنب.

نصائح لحماية الأبناء من اضطرابات الأكل عند المراهقين

الآباء ممكن يساعدوا أولادهم عشان يحموهم من اضطرابات الأكل خصوصًا في سن المراهقة، ودا عن طريق الكلام معاهم عن الأكل الصحي وشكل الجسم المثالي. دور الأب والأم والأسرة ككل بيكون من خلال:

توضيح عادات الأكل الصحية

شرح تأثير الأكل الصحي على صحتهم وشكل جسمهم وطاقتهم. ودا بيكون عن طريق تشجيع عادات زيّ الأكل مع بعض في البيت، والأكل بس لما يحسوا بالجوع.

الحذر من وسائل الإعلام

التحذير من بعض البرامج أو السوشيال ميديا اللي بتنشر أفكار غلط عن شكل الجسم المثالي، علشان كدا لازم تتناقش مع ولادك وتسمع منهم أي أفكار بتكون في دماغهم وتصححها.

تشجيع الجسم الصحي

كل واحد ليه شكل جسم مختلف المهم يكون صحي. متسمحش بالتعليقات السخيفة أو الألقاب على شكل الجسم حتى لو بتكون بهزار؛ علشان دا ممكن يأثر عليهم نفسيًا.

تقوية الثقة بالنفس

ادعم ولادك وذكّرهم بإنجازاتهم، وفهّمهم إنك بتحبهم بغض النظر عن شكل جسمهم. ودا بيساعدهم يقدروا نفسهم ويكون عندهم ثقة أكتر.

توضيح مخاطر الرجيم القاسي والأكل العاطفي

خلي ولادك يعرفوا إن الرجيم الشديد ممكن يضر صحتهم، وإن الأكل مش هو الحل لو كانوا زعلانين أو قلقانين. شجعهم يتكلموا عن مشاعرهم معاك أو مع أصحابهم بدل ما يفضّوها في الأكل.

عدم استخدام الأكل كعقاب أو مكافأة

خلي الأكل وسيلة للتغذية بس، مش وسيلة تهديد أو حافز. يعني متقولش: لو عملت كويس هاخدك مطعم، أو عقابك إنك متاكلش حلويات النهاردا.

القدوة

الآباء هما المثال الأول لأولادهم، فخليك حريص على عاداتك الغذائية قدامهم. متبالغش في الأكل أو تستخدمه كوسيلة للهروب من المشاعر السلبية، علشان ولادك هيتأثروا بيك.

وأخيراََ، اضطرابات الأكل عند المراهقين من أكتر المشاكل اللي بتصيبهم في المرحل دي، لأسباب بيولوجية ونفسية واجتماعية كتير.

ومن أهم أنواعه؛ فقدان الشهية العصبي، والشره العصبي، واضطراب الشراهة في الأكل، واضطراب تناول الطعام التجنبي/المقيد، واضطراب الاجترار، وغيرها.

وبتختلف علامات كل نوع منهم عن التاني وبيكون ليه مضاعفات كتير على المراهقين، وعشان كدا دا بيلزم الأهالي بمتابعة أبنائهم في الفترة دي وحمايتهم من أي ضرر.

وفي حالة إصابة الابن أو الابنة بواحد من الاضطرابات دي بيلزم استشارة مختص نفسي ومختص تغذية لمتابعة الحالة وعلاجها.

المصادر

Identification and Management of Eating Disorders in Children and Adolescents.

Eating disorders in teens: Warning signs and treatment options for your child.

Reducing the Impact of Eating Disorders on Adolescent Girls

National eating disorders association

Eating Disorders.