10 معلومات عن اضطراب فرط الحركة وتشتت الانتباه| طفلك يعاني منه؟

اضطراب فرط الحركة وتشتت الانتباه عند الأطفال

معدل انتشار اضطراب فرط الحركة وتشتت الانتباه بين الأطفال وصل إلى حوالي 9% تبعًا لأحدث الدراسات العلمية، وبنلاحظ إن كتير من أولياء الأمور بيغفلوا أو بيتغافلوا عنه، وبيعتقدوا أحيانًا إن سلوك الطفل وتصرفاته مجرد مشاكسة عادية بتحصل بشكل طبيعي في السن دا، ونتيجة لكدا بتبدأ الحالة تتطور والأعراض تتفاقم عند الطفل.

على الجانب الآخر بنلاقي بعض الأولياء الأمور بيربطوا بين حركات الطفل الطبيعية وفرط الحركة؛ ودا بيرجع لعدم وعيهم الكافي بطبيعة المرض وأعراضه.

عشان كده في المقال دا هنتكلم بشكل مفصل عن اضطراب فرط الحركة وتشتت الانتباه، وهنتعرف على أعراض المرض بالتفصيل، وأهم التمارين اللي بتساعد في العلاج، وكمان هنوضح مدى الارتباط بين فرط الحركة عند الأطفال وتأخر الكلام اللي بيحصل كتير.

1. ما هو اضطراب فرط الحركة وتشتت الانتباه؟

اضطراب فرط الحركة وتشتت الانتباه هو مرض عصبي بيحصل نتيجة خلل في النواقل العصبية الموجودة في المخ، وبيظهر عليهم قبل سن 12 سنة وبيستمر لفترة طويلة، وفرط الحركة هنا بيكون خارج عن إرادة الطفل.

أسباب حدوث المرض دا مش بتكون مباشرة، وعلى حسب الدراسات الأخيرة بيتضح إن الأسباب دي بتنقسم إلى قسمين أساسيين:
أسباب بيئية نتيجة تعرض الأم إلى ضغط نفسي شديد أو مشاكل نفسية صعبة أثناء فترة الحمل.
أسباب جينية، وهنا نسبة حدوث المرض بتتراوح بين 60 – 90%

اضطراب فرط الحركة بيأثر بشكل كبير على حياة الطفل؛ فبيخليه مش قادر يركز أو يتعامل كويس مع اللي حواليه، والتأثير دا بيكون واضح جدًا لما يوصل لسن المدرسة؛ لإن الأعراض المرتبطة بفرط الحركة وتشتت الانتباه زي ضعف التركيز والتشتت المستمر وغيرهم بيكون سهل اكتشافها أثناء الدراسة.

أما عن باقي أعراض فرط الحركة وتشتت الانتباه فهنتعرف عليهم حالا بالتفصيل.

2. أعراض اضطراب فرط الحركة عند الأطفال وتشتت الانتباه

أعراض اضطراب فرط الحركة وتشتت الانتباه بتختلف في شدتها من طفل للتاني، وكمان مش دايما كلها بتحصل مرة واحدة، بمعنى إن أعراض فرط الحركة ممكن تحصل لوحدها، ودا بيكون أكثر عند الولاد، وأحيانا أعراض تشتت الانتباه هي بس اللي بتظهر، وبتكون عند البنات أكثر.

أعراض فرط الحركة

بنلاحظ إن الأعراض اللي بتظهر على الطفل نتيجة فرط الحركة بتكون كالآتي:

  • عدم الثبات في المكان
  • التسرع الدائم في القرارات
  • كثرة الكلام ومقاطعة المتحدث
  • ترك المقعد بشكل مستمر سواء في البيت أو المدرسة أو غيرهم

أعراض تشتت الانتباه

من أعراض تشتت الانتباه اللي بتحصل بنسبة أكبر عند البنات زي ما وضحنا:

  • عدم قدرة الطفل على تنظيم مهامه
  • تراجع ثقة الطفل بنفسه
  • عدم القدرة على إدارة الوقت
  • التعامل بشكل فوضوي مع الأشياء
  • عدم اهتمام الطفل بالتفاصيل
  • عدم القدرة على التركيز أثناء الاستماع إلى الحديث
  • النسيان المتكرر

أعراض عامة للاضطراب

بيرتبط باضطراب فرط الحركة وتشتت الانتباه مجموعة من الأعراض العامة ومنها:

  • التقلبات المزاجية
  • القلق
  • نوبات فزع

ملحوظة: جميع الأعراض المذكورة مش مرتبطة بأماكن أو أشخاص، بمعنى إن الأعراض دي ممكن تظهر على الطفل في أي مكان وبغض النظر عن الأشخاص الموجودة في المكان دا.

النقطة من أهم النقاط اللي بنقدر نفرق بيها بين فرط الحركة وتشتت الانتباه والمشاكسة الطبيعية عند الأطفال؛ لإن سلوك الطفل الطبيعي دايما بيتغير مع تغير المكان والأشخاص.

وبالتالي، في حالة ظهور الأعراض دي على الطفل واستمرارها لمدة 6 شهور بدون تحسن بيكون من اللازم عرض الطفل على طبيب مختص؛ عشان يفحص الطفل كويس ويحدد المشكلة بالظبط.

الطبيب هنا بيقيم حالته وبيقدر يختار طريقة العلاج المناسبة للطفل؛ لإنها بتختلف من حالة للثانية، وبعدها بيكون في برنامج تدريبي للوالدين عشان يقدروا يتصرفوا بشكل سليم مع الطفل بدون ما يأثروا بالسلب على حالته المرضية.

3. العلاقة بين فرط الحركة عند الأطفال وتأخر الكلام

العلاقة بين فرط الحركة وتأخر الكلام

فرط الحركة عند الأطفال وتأخر الكلام بيكونوا مرتبطين ببعض في الغالب؛ ودا نتيجة لبعض الأسباب النفسية اللي ممكن تواجه الطفل، بالإضافة إلى ضعف انتباهه السمعي؛ لإن الطفل المصاب بالاضطراب دا مش بيركز أبدا مع أي صوت حواليه، وبيطلع أغلب طاقته في الحركة.

وبالتالي العلاج في الحالة دي بينقسم إلى شقين، فلازم نحرص على علاج فرط الحركة إلى جانب علاج تأخر الكلام، وما ينفعش نعالج خلل واحد ونتغافل عن التاني؛ عشان نساعد الطفل إنه يرجع للحالة الطبيعية.

تأخر الكلام ممكن يحصل عادي جدا في عدم وجود اضطراب فرط الحركة وتشتت الانتباه اللي بيصيب الأطفال، وبيحصل أكثر عند الأطفال اللي بيكونوا مشاكسين دايما وبيتحركوا كتير؛ لإن أيضًا تركيزهم على الحركة بيكون أكثر من التركيز السمعي.

وهنا بيكون الحل هو عرض الطفل على أخصائي تخاطب؛ عشان يبدأ معاه بالجلسات المناسبة لحالته، ويعوده إزاي ينطق الكلمة ويخرج الأصوات صح.

دور الأم هنا مكمل لدور أخصائي التخاطب، فلازم تدرب الطفل بشكل مستمر على نطق الكلمات المختلفة اللي تناسب سنه، والدور دا لازم يكون موجود في حالة فرط الحركة عند الأطفال وتأخر الكلام كمان.

4. اختبار فرط الحركة وتشتت الانتباه

التأكد من إصابة الطفل باضطراب فرط الحركة وتشتت الانتباه مش بيكون سهل رغم المعرفة الكاملة بالأعراض اللي ممكن تحصل، عشان كده الطبيب بيعتمد أثناء التشخيص على معرفة العديد من المعلومات عن الطفل زي إنه يسأل عن مدة ظهور الأعراض، والتاريخ المرضي للعائلة، وغيرهم.

وبعد ما ياخد كل المعلومات اللي محتاج يعرفها عن الطفل بيعمل إجراء اختبار فرط الحركة وتشتت الانتباه، والاختبار دا ببساطة بيبدأ بتدريب الطفل على الأنشطة لوقت معين -حوالي 3 دقائق- وبعدها بيظهر قدام الطفل على شاشة الكمبيوتر شكل هندسي ثابت، وشكل هندسي تاني متحرك ممكن يظهر في الأعلى أو الأسفل، ودور الطفل هنا إنه يضغط على الزر وقت ما الشكل يظهر في الأعلى فقط.

الطفل بيخلص التدريب على الكمبيوتر وياخد دوا لعلاج فرط الحركة وتشتت الانتباه بجرعة معينة بيحسبها الطبيب، وبينتظر فترة ويرجع يعيد الاختبار تاني، والطبيب بيبدأ يقيم الحالة حسب نتائج الاختبار.

ملحوظة: الطفل لازم يكون لوحده أثناء الاختبار؛ عشان يقدر يحافظ على تركيزه بدون ما يتشتت باللي حواليه.

الاختبار لواحده مش بيكون كافي عشان الطبيب يقدر يوصل للتشخيص السليم، عشان كدا الطبيب بيكون حريص دايما على معرفة تفاصيل الحالة من الوالدين زي ما ذكرنا.

5. تمارين لعلاج فرط الحركة

اضطراب فرط الحركة وتشتت الانتباه بيتم علاجه من خلال 3 محاور أساسية وهم:

  • علاج طبي
  • علاج سلوكي
  • علاج بالأنشطة والتمارين

العلاج بالأنشطة لا يقل أهمية عن باقي المحاور؛ ودا لإن توجيه طاقة الطفل ناحية ممارسة نشاط رياضي بيحسن من مهاراته، وكمان بيساعد على شفاء الحالة بشكل أسرع.

من أشهر التمارين دي:

  • تمارين الأيروبيك
  • جلوس الطفل على كرسي وتحريك إيده بدون ما يحرك جسمه من على الكرسي لوقت معين.

كمان لازم نهتم بتخصيص أنشطة ومهام معينة للطفل، ونفهمه إن هو المسئول عن إنهاء المهام دي لواحده، ويكون في تشجيع وقت ما يخلص الأنشطة، ولو رفض يكون في عقاب مناسب غير مضر لحالته، ومن هنا هيبدأ يحس بالمسئولية وثقته في نفسه هتزيد.

6. تمارين لعلاج تشتت الانتباه

تمارين لعلاج تشتت الانتباه

علاج تشتت الانتباه عن طريق الأنشطة المختلفة والتمارين بيحسن كتير من حالة الطفل، ومع استمراره على ممارسة التمارين دي هيبدأ تشتت الانتباه يتلاشى تدريجيا.

من التمارين دي بنلاقي:

  • تدريبات اليوجا؛ ودا لإنها بتخلي الطفل يسترخي ومنها تحسن الذاكرة ومهارات التعلم عنده.
  • تجميع كرات بألوان مختلفة، ونهتم بإنه يميز بين الألوان دي.
  • لعب الألغاز -Puzzle- ومحاولة تجميع اللعبة بالشكل الصحيح
  • الاستعانة بالصور أو العملات المعدنية ونغير ترتيبها ونطلب من الطفل إنه يرجعها زي ما كانت أول مرة
  • رسم خط مستقيم ونساعد الطفل يمشي عليه.
  • لعبة البولينج
  • تدريبات الأيروبيك

7. تمارين لعلاج تأخر الكلام

تمارين لعلاج تأخر الكلام

مشكلة تأخر الكلام عند الأطفال بنقدر نتخلص منها أسرع عن طريق بعض التمارين اللي بنخلي الطفل يعملها في البيت، ولكن التمارين دي مش هتكون كافية في الغالب.

عشان كده من الأفضل إنه يتابع مع أخصائي تخاطب، وتكون التمارين المنزلية مكملة لجسات التخاطب مش هي الأساسية.

من أفضل التمارين اللي ممكن يعملها الطفل في البيت وتساعد في علاج تأخر الكلام عنده:

تمرين المرآة

بعض الأطفال مش بيكونوا قادرين يتخيلوا شكل الفم لما يحركوه عشان ينطقوا كلمة معينة، وبالتالي المرآة بتعلمهم يلاحظوا طريقة تحريك الفم وهما بينطقوا الصوت ومنها هيتدربوا كويس على الصوت دا.

تمرين تحريك اللسان

هنا الأم أو الأب بيخلوا الطفل يخرج لسانه لما ينطق بعض الأصوات، وكمان بيطلبوا منه إنه يحرك لسانه في شكل دائري عشان يتعود على نطق الحروف المختلفة.

تمرين حركات الشفتين

التمارين دي بتساعد بشكل كبير في علاج تأخر النطق عند الأطفال، وهنا بنطلب من الطفل إنه يحرك شفتينه بإنه يبتسم مثلًا ويرجعها تاني ويكرر الحركة دي، أو إنه ينفخ بالونة أو غيرها.

التدريب على الصور والبطاقات التعليمية

في التمرين دا بنخلي الطفل يميز بين الصور المختلفة وينطق اسم الحيوان أو الشيء اللي موجود عليها ونتابع مدى استجابته، وكمان ممكن نستعين ببعض البطاقات التعليمية اللي بيكون عليها مجموعة من الحروف أو الأرقام اللي بننطقها ونخلي الطفل ينطق ورانا.

9. متى يزول فرط الحركة؟

أغلب الآباء والأمهات بيعتقدوا إن مع تقدم سن الطفل ووصوله إلى مرحلة المراهقة هتبدأ أعراض اضطراب فرط الحركة وتشتت الانتباه تختفي بشكل نهائي، وإن حالة ابنهم هتكون طبيعية في الوقت دا، لكن الدراسات بتثبت عكس اعتقادهم.

الدراسات بتقول إن حوالي 60% من الأطفال المصابين باضطراب فرط الحركة وتشتت الانتباه بيكمل معاهم المرض إلى مرحلة الشباب، وبالتالي لازم توعية الآباء والأمهات بالدراسة دي؛ عشان يقدروا يستوعبوا طبيعة مرض ابنهم.

ومن هنا لازم يكون في متابعة مع الطبيب المعالج بشكل مستمر؛ لتقييم الحالة ومعرفة مدى ملائمة العلاج لعمر الابن، وكمان عشان تجنب حدوث المضاعفات اللي ممكن تحصل نتيجة إهمال المتابعة.

10. تشتت الانتباه عند الكبار

تشتت الانتباه مش بيقتصر بس على مرحلة الطفولة زي ما وضحنا، فبنلاقي إن بعض البالغين بيحصلهم تشتت انتباه، ولكن بتظهر عندهم أعراض مختلفة عن الأطفال.

من أشهر الأعراض دي:
  • القلق المستمر
  • نسيان أماكن الأشياء المتعلقة به
  • عدم التركيز في تفاصيل الأحداث من حوله
  • تجنب دخول الاجتماعات أثناء العمل
  • التصرف باندفاع في أغلب المواقف

الأعراض قد تبدو غير مميزة للمرض، ولكن من الواجب التوجه إلى الطبيب المختص في حالة ملاحظة ظهور تلك الأعراض عشان يعمل الفحوصات اللازمة ومنها يقدر يحدد هل الشخص فعلا مصاب بتشتت الانتباه ولا الأعراض بسيطة.

وأخيرًا، لازم نتعامل مع فرط الحركة وتشتت الانتباه كمرض وليس مجرد اضطراب سلوكي ونعرض الطفل المصاب بأعراض المرض دا على طبيب مختص؛ عشان نقدر نسيطر على الحالة بسهولة ونتجنب حدوث المضاعفات.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

ورك شيت للاطفال Worksheet For Kids

ماث شيت – Math Worksheet 2

ماث شيت – Math Worksheet 2 يحتوي  علي الارقام و الاعداد للاطفال في مرحلة الكي جي للتدريبات علي توصيل الارقام و كتابتها و المراجعة عليها

كي جي 1 انترفيو – KG 1 Interview Worksheet

كي جي 1 انترفيو – KG 1 Interview Worksheet بيساعدك تدرب طفلك علي اسئلة اللي بيتعرض ليها اثناء التقديم لاي مدرسة لمرحلة الحضانة تدريبات اخري

انضم إلي جروب دليل المدارس المصرية

إقرأ أكثر..

mood_bad
  • لا توجد تقييمات/تعليقات.
  • اضف تعليق