كيفية التعامل مع الطفل سييء السلوك!
كتير من الأهالي بيبقوا مش عارفين يتصرفوا إزاي لما ابنهم أو بنتهم يبدأوا يتكلموا بأسلوب مش محترم، أو يتصرفوا بطريقة فيها قلة ذوق أو تحدّي.
وساعتها السؤال بيبدأ يلحّ:
دا سلوك طفولي طبيعي؟ ولا كدا بقِت قلة احترام بجد؟
أتصرف إزاي من غير ما أصرّخ؟ أربي ولا أضرب؟ أطنّش ولا أوجّه؟
في المقال دا، هنتكلم سوا عن كيفية التعامل مع الطفل سييء السلوك،
وإيه الأسباب اللي ممكن تخلي الطفل يتصرف بالطريقة دي من الأساس.
وكمان هنتكلم عن طرق ذكية وسليمة لتعديل السلوك، وهنختم بفقرة مهمة جدًا عن المراهق سيئ السلوك، وإزاي نتعامل معاه بحكمة من غير ما نخسره.
من هو الطفل سيئ السلوك؟
في فرق كبير بين سلوك طفل صغير لسه بيتعلم الصح من الغلط، وبين طفل سلوكه فيه قلة احترام واضحة.
السؤال اللي دايمًا بييجي من الأهالي: “هو إمتى أقول على ابني إنه سيئ السلوك، ومش مجرد طفل بيغلط؟”
الحقيقة إن من سن 4 أو 5 سنين، الطفل بيكون بدأ يكتسب قدر من الإدراك والتمييز، وبيفهم يعني إيه “عيب”، ويعني إيه “كلمة مش لطيفة”، وبيبدأ يستوعب حدود الكلام والتصرفات الصح والغلط.
معنى كدا إن الطفل حتى 3 سنوات مانقدرش نصنف سلوكياته تحت أي بند لإنه بيبقى مش مدرك لأغلب تصرفاته، ومهمتكم في الوقت دا تعديل سلوكه وتعليمه الصح وتكرار دا من غير ملل ولا عنف.
طيب إيه العلامات اللي تقول إن دا مش سلوك طفولي عادي؟
- بيقلل من احترام إخواته أو زمايله في البيت أو المدرسة.
- بيتعمد يتجاهل التعليمات أو يتصرف بعناد زائد.
- بيرفع صوته على أهله أو بيكلمهم بدون احترام.
- بيرد على الكبار بطريقة فيها تحدّي أو استهزاء.
- بيقاطع الناس وقت الكلام وبيصرّ يفرض رأيه.
- بيستخدم كلمات جارحة أو ألفاظ غير لائقة.
في المرحلة دي، مهم جدًا إننا نبدأ نفكر في كيفية التعامل مع الطفل سييء السلوك بشكل سليم، عشان مانسيبش التصرفات دي تكبر وتتحول لعادة، وفي نفس الوقت مانكسرش شخصية الطفل ولا نحسسه إنه مرفوض.
أسباب سوء السلوك عند الأطفال
قبل ما نفكر في كيفية التعامل مع الطفل سييء السلوك؛ لازم نفهم الأول ليه الطفل بيوصل للمرحلة دي؟
فيه أسباب كتير ممكن تخلي الطفل يتصرف بأسلوب مش محترم، ودي أهمها:
1. تقليد سلوك الكبار
الطفل زي الإسفنج بيمتص كل حاجة حواليه، فلو سمع حد في البيت بيتكلم بأسلوب مش كويس أو بيزعق وبيقلل من احترام الناس، طبيعي يقلده ويعتبر دا عادي.
2. البحث عن الانتباه
في أطفال بيبقوا عايزين يلفتوا نظر أهلهم بأي طريقة حتى لو هياخدوا انتباه سلبي.
فيبدأوا يتكلموا بأسلوب مش كويس عشان بس يحسوا إن في حد مهتم بيهم.
3. الدلع الزايد وعدم وجود حدود واضحة
لو الطفل اتعود إنه ياخد كل حاجة عايزها من غير حدود أو رفض، بيبدأ يحس إنه يقدر يتكلم مع الكل بالطريقة اللي تعجبه حتى لو كانت فيها قلة احترام.
4. التوتر والضغط النفسي
لو الطفل عايش وسط مشاكل أسرية أو صراعات ممكن يتوتر جدًا، ويطلع دا في شكل سلوك عدواني أو قلة احترام مع اللي حواليه.
5. نقص مهارات التعبير
أوقات الطفل مابيعرفش يعبر عن نفسه بالكلام، فيبدأ يرد بأسلوب فيه تحدي أو كلام جارح، عشان يعوض إحساسه بالعجز.
6. التشتت وضعف التركيز
لو الطفل عنده مشكلة في التركيز أو فرط حركة، دا بيأثر على انضباطه وبيخليه يرد بسرعة من غير ما يفكر.
7. تأثير الشاشات والمحتوى الغلط
كتير من الأطفال بيقضوا ساعات قدام شاشات فيها برامج وألعاب مليانة ألفاظ وتصرفات مش محترمة، ودا بيأثر عليهم جدًا.َ
8. التمييز بين الإخوة
لما الطفل يحس إنه أقل من إخواته أو دايمًا بيتقارن بيهم، ممكن يطلع غضبه في صورة قلة احترام أو سلوك عدواني.
9. غياب القدوة
لما الطفل ما يلاقيش قدوة واضحة في حياته بتتصرف بأسلوب محترم ومتوازن، بيبقى مش عارف إيه الصح وإيه الغلط في طريقة التعامل مع الناس.
10. أخطاء في أسلوب التربية
فيه شوية أخطاء شائعة في التربية ممكن تكون سبب رئيسي يخلي الطفل يتصرف بأسلوب مش محترم. قبل ما ندور على كيفية التعامل مع الطفل سييء السلوك، لازم نفكر هل إحنا بنقع في الأخطاء دي ولا لأ؟
الازدواجية في التربية
لما الأب والأم مايبقوش متفقين على طريقة واحدة للتربية، الطفل بيحتار جدًا.
تلاقي الأب مثلًا صارم والتاني متسامح، أو واحد يهتم والتاني مش فارق معاه. النتيجة؟ الطفل مش عارف حدود الصح والغلط.
التقليد السيئ
لو الطفل طول الوقت مع ولاد سلوكهم مش كويس أو بيسمع ألفاظ غلط، طبيعي يقلدهم ويشوف دا شيء عادي.
عدم التوجيه المستمر
كتير من الأهل مش بيوجهوا الطفل إلا لما يغلط؛ يعني مفيش قواعد واضحة، ولما يغلط فجأة يتعاقب. دا بيخلي الطفل مش فاهم إيه المتوقع منه.
وجود قدوة سلبية
ممكن يكون في طفل أكبر منه بيعمل تصرفات غلط، والطفل الصغير يقلده عشان يبين إنه شاطر أو قوي.
تدخل كتير من الناس
لما كل حد حوالين الطفل يدي له توجيهات مختلفة، الطفل بيتلخبط وميبقاش عارف يسمع لمين. لازم يكون في مصدر واحد واضح للتربية والتوجيه.
كيفية التعامل مع الطفل سييء السلوك
لما نلاقي الطفل بيتصرف بأسلوب مش محترم، لازم نفكر الأول إيه الأسباب اللي وصلته للمرحلة دي، وبعد كدا نبدأ بخطوات عملية عشان نعالج المشكلة.
ودي أبرز الطرق والأساليب السليمة اللي ممكن تساعدك في كيفية التعامل مع الطفل سييء السلوك:
1. مراجعة الأسباب وحلّها من جذورها
قبل أي خطوة، مهم جدًا الأهل يقعدوا مع بعض ويراجعوا الأسباب اللي اتكلمنا عنها فوق.
لو في ازدواجية في التربية مثلًا، لازم الأب والأم يتفقوا على أسلوب واحد واضح ومايتلخبطوش قدام الطفل.
ونفس الكلام لأي سبب تاني: نحاول نشوف حل جذري بدل ما نركز على التصرف بس.
2. تحديد قواعد واضحة وثابتة
اعملوا قواعد واضحة في البيت، تقول إيه المسموح وإيه الممنوع، سواء في الكلام أو التصرفات.
المهم إن القواعد دي تبقى ثابتة، وكل واحد في البيت يلتزم بيها ويتابع الطفل إنه يطبقها.
3. إبعاد الطفل عن كلام الكبار
مهم جدًا مانخليش الطفل يقعد يسمع كلام الكبار أو يشارك في أحاديث مش مناسبة لسنه، عشان مايتعلمش أسلوب أو ألفاظ غلط.
4. الحرمان كعقاب هادي
لو الطفل عمل حاجة غلط، ممكن نحرمه من حاجة بيحبها شوية، زي وقته على التابلت أو لعبة معينة.
الهدف هنا إنه يفهم إن كل تصرف ليه نتيجة، بس من غير ما نحسسه بالقسوة أو الإهانة.
5. المدح والتشجيع
ما تركزوش بس على التصرفات الغلط، لما يعمل حاجة كويسة أو يتكلم بأسلوب محترم، امدحوه وقدروا تصرفه.
الكلمة الطيبة بتفرق جدًا في تعديل السلوك.
6. إبعاد النماذج السلبية
لو في أطفال حواليه بيستخدموا كلام بذيء أو سلوكهم مش كويس، حاولوا تقللوا اختلاطه بيهم.
وفي نفس الوقت، شجعوه يقضي وقت مع ولاد محترمين وذوق.
7. التجاهل الذكي
ساعات الطفل بيتعمد يعمل تصرفات مش كويسة عشان يجذب الانتباه؛ لو كل مرة هتردوا عليه بالصريخ أو العقاب، هتأكدوا له إنه كدا بيشدكم ليه.
الأحسن في التصرفات البسيطة إنه يتجاهلها الأهل بحكمة، ومع الوقت هيفهم إن دي مش طريقة ياخد بيها اهتمام.
8. تصحيح سلوك الطفل بأسلوب محترم
من أهم خطوات كيفية التعامل مع الطفل سييء السلوك إنك تعرف تصحح سلوكه من غير عصبية أو صريخ.
الصراخ أو العصبية مش هتنفع، بالعكس هتزيد الموقف تعقيد؛ فلو خليت سلوكه السيئ يأثر عليك، هتلاقي صعب إنك تكون معلم فعال ليه.
الطريقة الصحيحة هي إنك تاخده على جنب بهدوء، وتوضح له إيه هو السلوك المقبول بطريقة صريحة؛ خليك دايمًا محترم في تصحيح السلوك حتى لو الطفل أخطأ.
9. تعليم الطفل المهارات الاجتماعية الأساسية
جزء كبير من كيفية التعامل مع الطفل سييء السلوك هو إنك تعلمه مهارات الاحترام والتواصل من بدري.
حتى لو النصيحة دي بسيطة، إلا إنها في منتهى الأهمية. علم طفلك الأساسيات زي: “من فضلك” و”شكرًا”.
المهارات دي مش بس بتساعده مع معلميه في المدرسة، لكن كمان هتساعده في حياته اليومية لما يكبر ويبدأ يتعامل مع العالم الخارجي.
فكروا في الأخلاق الحميدة كأداة للتعاطف؛ الطفل اللي يعرف يقول “من فضلك” و”شكرًا” دا طفل بيفهم احترام الآخر وتقدير مشاعره.
ببساطة، قلة الاحترام هي نقيض التعاطف وحسن الخلق، يعني لو علمناهم الأدب، هنحميهم من السلوك السيئ.
10. مواجهة قلة الاحترام بدري
أكتر حاجة هتفيدك إنك تواجه السلوك الغلط بدري قبل ما يكبر ويبقى عادة؛ فلو ابنك اتكلم بطريقة فيها قلة احترام ماينفعش تعديها.
اقف وقوله بهدوء: “احنا في البيت دا ما بنتكلمش مع بعض بالطريقة دي.”
التربية الصح بتبدأ من دلوقتي مش لما يكبر؛ لما تحط حدود وتحافظ عليها، هتلاقي نتيجة على المدى الطويل، وهتلاقي ابنك اتعود يحترمك ويحترم نفسه.
ونستنتج من دا إن كيفية التعامل مع الطفل سييء السلوك لازم تكون خليط بين الحزم والهدوء والاهتمام.
الهدف مش إننا نعاقبه لمجرد العقاب، لكن إننا نفهمه الصح ونساعده يطبقه وهو مرتاح وواثق في نفسه.
اتعرف على: الطفل المستفز بين العناد والتربية | حلول للأهالي من غير توتر.
كيفية التعامل الصحيح مع المراهق سيئ السلوك
لما نوصل لمرحلة المراهقة، كيفية التعامل مع الطفل سييء السلوك (أو المراهق تحديدًا) بتحتاج صبر ووعي أكتر، لأن دي مرحلة حساسة جدًا، فيها تحدّي واختبار للحدود.
علشان كدا، لو عايزين نغيّر سلوك المراهق للأحسن لازم نمشي بخطوات واضحة ومنظمة:
1. توقعات وحدود واضحة
- اعمل قواعد واضحة في البيت: حدد بالضبط إيه الكلام والتصرف المقبول وإيه اللي مرفوض.
- اشرح الأسباب: خلي ابنك يعرف ليه القواعد دي مهمة، وإيه العواقب لو اتعدّت الحدود هيتعاقب.
- اشركه في النقاش: لما يكون مناسب، اتكلم معاه وخليه يشارك في وضع القواعد عشان يحس إنها مسؤوليته.
2. واجه السلوك قليل الاحترام بهدوء
- اختار الوقت الصح: اتكلم معاه بعيد عن الناس، في لحظة هادية مش مليانة انفعال.
- استخدم جمل تبدأ بـ”أنا”: زي “أنا بتضايق لما بتكلمني بالطريقة دي” بدل ما توجه اتهامات مباشرة.
- ركّز على السلوك مش شخصيته: ماتقولش “أنت مش محترم”، لكن وضح التصرف اللي غلط.
- اشرح تأثير السلوك: عرفه إزاي كلامه بيأثر على اللي حواليه.
3. حط عواقب واضحة ونفذها باستمرار
- اختار عقاب مناسب للسن والسلوك: يعني يكون عقاب له علاقة بالتصرف نفسه ومش مبالغ فيه.
- تجنب الجدال والتهديد الفاضي: ماتدخلش في شد وجذب يطلعك عن هدوءك.
- التعويض: لو مناسب، خليه يصلح الغلط زي ما يعتذر أو يساعد في حاجة.
- خليك ثابت: كل مرة يحصل نفس الغلط يبقى نفس العاقبة.
4. كن قدوة في الاحترام
- اتصرف بإحترام: ابنك هيتعلم منك إزاي يتكلم ويتعامل.
- اعتذر لو غلطت: لو انفعلت أو زعقت اعتذر. دا بيعلمه إنه مفيش حد معصوم من الغلط.
5. افهم السبب اللي ورا السلوك
- انتبه لمشاعره: يمكن غضبه سببه إحباط، تعب، أو إنه عايز انتباه.
- شوف العوامل التانية: في حاجة مضايقاه في المدرسة؟ في أصحاب بيضغطوا عليه؟
- اطلب مساعدة لو الموضوع خرج عن السيطرة: لو السلوك مستمر أو عنيف، استشير متخصص.
6. شجع التعاطف وكافئ الاحترام
- علمه يتعاطف: خليه يفكر في تأثير كلامه على الناس.
- امدح السلوك الإيجابي: لما يتصرف بذوق واحترام، اثني عليه وشجعه.
- ابني علاقة قوية: اقضي وقت ممتع معاه وادعمه، عشان يحس بالأمان ويقلل العناد.
لو مشيت على الخطوات دي، هتلاقي نفسك بتطبّق كيفية التعامل مع الطفل سييء السلوك بشكل متوازن يحافظ على احترامك لنفسك وعلى علاقة صحية بينك وبين ابنك.
اقرأ أيضاََ: أبرز مشاكل المراهقين النفسية وكيفية التعامل الصحيح معها.
في النهاية، لازم نفتكر إن كيفية التعامل مع الطفل سييء السلوك أو المراهق اللي بيظهر سلوك مش محترم مش محتاجة بس عصبية أو عقاب، لكنها محتاجة وعي وصبر واتفاق بين الأب والأم.
لما تحط قواعد واضحة، وتواجه السلوك بهدوء، وتكون قدوة محترمة، هتقدر تعدل تصرفات ابنك وتساعده يتعلم يحترم نفسه ويحترم الناس حواليه.
وما تنساش، كل ما قربت من ابنك وسمعته واحتويته؛ كل ما هيبقى أسهل إنه يتغير ويحس بالأمان والثقة.
المصادر
How To Handle Your Child’s Disrespectful Behaviour in a Whole New Way.
Do Your Kids Disrespect You? 9 Ways to Change Their Attitude.
Disrespectful Child Behavior: Where to Draw the Line.
أضف تعليق