هنطرح بين إيديك دليل لكيفية التعامل مع الطفل المشاغب في الروضة بشكل فعال وصحيح للوصول معه لأفضل نتائج.
أنماط شخصيات الأطفال بتختلف من طفل للتاني، فمنهم الهادي والعاقل ومنهم العنيد والجريء، ومنهم الحساس والعطوف، وغيرهم كتير.
ولكن من أصعب الأنماط اللي بيتم التعامل هو الطفل المشاغب، اللي بيرفض يمشي على أي قواعد أو قوانين مهما كانت سهلة بالنسباله سواء كانت أثناء رحلته التربوية أو التعليمية.
عشان كدا في المقال دا هنتعرف على طرق التعامل مع الطفل المشاغب في الروضة، ونعرف إيه الأسباب اللي وصلته لكدا، عشان نتجنبها.
تأثير الطفل المشاغب في الروضة
وجود الطفل المشاغب في الروضة وجراءته على عدم اتباع القوانين بيأثر بشكل سلبي على عملية التعليم، من أول الفوضى اللي بيسببها في الفصل لحد تقليد زمايله ليه، واتباع نفس سلوكياته.
وفي دراسة أجرتها المجلة الدولية لعلم النفس والمعرفة لقت إن 10% من الأطفال عندهم سلوك الشغب والجرأة بغض النظر عن عوامل التربية أو الجنس أو حتى الدين.
وعشان نوصل لكيفية التعامل مع الطفل المشاغب في الروضة، لازم نفهم الأسباب اللي وصلته للتصرف بطريقة سيئة.
فهم أسباب السلوك المشاغب لدى الأطفال
أي سلوك صادر عن الطفل لازم يكون وراه سبب بيحركه، والسلوك المشاغب مبيحصلش بشكل تلقائي وعفوي، وإنما بيبقى في مبرر لتصرفات الطفل، ومن الأسباب الشائعة للسلوكيات المشاغبة:
الرغبة في جذب الانتباه
الطفل بيحتاج للشعور بالحب والاهتمام من أهله، ولو حس بالإهمال والتجاهل بيحاول يتجه للسلوك العنيد والشقاوة، علشان يجذب الانتباه بتصرفاته.
الحاجة إلى الاستقلالية
الطفل أول ما بيبدأ يكبر بيحس إنه عاوز يطلع للحياة ويستكشف لوحده من غير ما حد يجبره على حاجة، أو يلزمه باتباع قوانين معينة، وخصوصًا لو الموضوع ارتبط بأنماط الأطفال اللي بطبيعتها عنيدة.
عدم النضج
أغلب التصرفات الناتجة عن الطفل العنيد بيكون سببها إنه غير ناضح، ومش عارف يميز الصح من الغلط، ويمكن حتى لو قولناله يستمر بردو عليها.
وعشان كدا في رحلتنا لمعرفة كيفية التعامل مع الطفل المشاغب في الروضة لازم يكون عندنا صبر، وقدرة على تحمل سلوكيات الطفل، ونبدأ نعدلها بطريقة تدريجية بدون زهق وملل لحد ما يتحسن.
مقارنة الطفل بغيره من الأطفال
مقارنة الطفل بغيره بتسبب ليه ضغط نفسي بشكل مؤذي، وبتوصله رسالة ضمنية إنه غير مميز وأقل من الأطفال الآخرين، وبيبدأ يفرغ الطاقة دي في أفعال مشاغبة بتظهر في عدم الاحترام للمدرس وتوجيهاته.
الاقتداء بغيره
السلوكيات المشاغبة الصادرة عن الطفل ممكن تكون نتيجة تقليد زى الصوت العالي، والزعيق، والضرب، واللي بتكون نتيجة إنه شاف غيره سواء كان كبير أو صغير بيعمل نفس التصرفات فعاوز يجربها.
ويفضل وأنت بتبحث عن كيفية التعامل مع الطفل المشاغب في الروضة تدور كويس إذا كان بيتعرض للتعنيف في البيت أو لأ.
التدليل الزائد
من أكتر الأسباب المنتشرة عن سلوك الطفل المشاغب هي المبالغة في تدليل الطفل، وتنفيذ كل رغابته بدون توجيه وترشيد.
وبنلاقي دا بيظهر في طريقة تعامله مع المدرسين، واعتراضه على تنفيذ التعليمات بطرق مختلفة، زي العياط أو الغضب الزائد.
الحاجة إلى تفريغ الطاقة
في أطفال ما عندهمش أي مشكلة من المشاكل اللي ذكرناها فوق، لكن عندهم طاقة كبيرة عايزين يفرغوها، ودا وبيرجع لإن نمط الأطفال دول في الغالب بيكون نمط حركي.
وبيكونوا عايزين طول الوقت يتحركوا، ووجودهم في الفصل الدراسي بيقيدهم، ودا اللي بيخليهم يتصرفوا التصرفات المشاغبة، وأحيانًا العدوانية عشان يفرغوا الطاقة اللي جواهم.
التربية المتناقضة
الطفل المشاغب ذكي بالفطرة، ولما بيلاقي تناقض بين الأم والأب في توجيه الأوامر، بيحاول يستغل الموقف ويضغط على كل طرف علشان ينفذ اللي عايزه، ومن عوامل الضغط دي إنه يبدأ يضايقك بسلوك سيء ومتكرر.
التصرف الخاطئ من الآباء
تبعًا لدراسة المعهد الوطني للصحة NIH لقينا إن بعض الممارسات التربوية الخاطئة زي العقاب بالضرب، والتعنيف، وانعدام الدفء والحنان من الأهل بتتسبب في ظهور السلوك المشاغب عند الطفل اللي بيتمثل في التخريب والعدوانية، وحتى المعارضة لأي توجيه من ولي الأمر.
أمثلة على السلوكيات الشائعة للطفل المشاغب
قبل ما نتعرف على كيفية التعامل مع الطفل المشاغب في الروضة، لازم نحدد الأول سلوكياته اللي بتظهر عليه، علشان نقدر نفهمه ونتعامل معاه صح، ومنها:
- بيظهر عليه علامات زي البكاء الزايد، وصعوبة في التنفس، وتشنج في الجسم.
- بيزيد انفعاله وغضبه في أي موقف، حتى لو كان بسيط.
- بيفضل التحرك المستمر، وعدم الثبات في مكان واحد.
- بيشعر باللامبالاة والاستهتار اتجاه تنفيذ الأوامر.
- بيبدأ يهاجم الآخرين ويتكلم معاهم بشكل سلبي.
- بيحتاج وقت طويل في حل الواجبات المدرسية.
- بيتصرف بعند وسلبية للفت الانتباه ليه.
ومن السهل تعديل سلوك الطفل العنيد ومعرفة طريقة لحل مشاكله اللي بيواجهها من خلال التربية والتعليم.
10 طرق لكيفية التعامل مع الطفل المشاغب في الروضة
مهما كان السبب وراء السلوكيات المشاغبة للطفل فالنتيجة واحدة وتأثيرها هو عدم سير العملية التعليمية بأفضل شكل، عشان كدا بنقدملك طرق مختلفة للتعامل مع الطفل المشاغب في الروضة، وهي كالآتي:
1- كُن حازمًا
بما إن “الانطباع الأول يدوم”، مهم لما تتعامل أول مرة مع طفل مشاغب بالفصل، تكون مجهز نفسك في كويس، وحريص على توجيه بطريقة حازمة وواضحة، عشان ينفذ الأوامر بدون عناد.
2- اترك مساحة تعبيرية للطفل
سيب مساحة للطفل إنه يعبر عن نفسه، ويحس بالاهتمام والتمييز منك، لإن 90% من حالات العند عند الأطفال مرتبطة بنقص الحب والاهتمام الأبوي.
عشان كدا لازم تركز معاه على صفاته المميزة، وتشكره لما يعمل تصرف صحيح، ودي من الطرق المهمة في كيفية التعامل مع الطفل المشاغب في الروضة.
3- حمّل الطفل المسؤولية
سلوك الطفل المشاغب ممكن ينتج عن انعدام ثقته بنفسه، وعشان نحل المشكلة زي ما وضحنا لازم نحل السبب، وأفضل حل لمشكلة انعدام الثقة بالنفس هو إننا نحمل الطفل مسؤولية ما داخل الفصل.
ومن الحلول اللي ممكن تخلي الطفل ينفذها، ويشعر فيها بالمسؤولية:
- توزيع المكافآت على الأطفال في الفصل.
- توزيع الكراسات على أصدقائه.
- مسح السبورة.
4- لا تخضع لأي نوبات غضب
من الطرق المستخدمة في كيفية التعامل مع الطفل المشاغب في الروضة هي عدم الخضوع لنوبات غضبه، ودا لإن الطفل بيستخدم البكاء والصراخ كحيلة أحيانًا عشان يتم تنفيذ اللي هو عاوزه.
وهنا قدامك خيارين وهما: إنك تستسلم ويصعب عليك الطفل، أو تتجاهل اللي بيحصل وتخليه يمشي على القواعد بحزم ووضوح.
5- علّم ولا تعاقب
العقاب مش دايمًا أنسب حل، بالذات إذا كان بيشمل التعنيف الجسدي أو اتباع أسلوب التخويف، وفي كيفية التعامل مع الطفل المشاغب في الروضة لازم نحط في الاعتبار إنه أغلب الأوقات بيجيب نتيجة عكسية معاه.
عشان كدا التأديب والتعليم بأسلوب لين بس حازم بيفرق جدًا مع الطفل، لإنه بيكون محتاج للشعور بالأمان، ومع تكرار التنبيه والتحذير بيزهق من سلوكه، وبالتالي بيستسلم لإرشاداتك، ويتبعها.
6- قدم خيارات
الطفل عايز يحس بالاستقلالية والحرية، والمعلم عايز يعلمه القواعد والانضباط، ودي معادلة مش سهلة، وبيصدر عنها سلوكيات كتير مشاغبة.
ومن الطرق الفعالة لكيفية التعامل مع الطفل المشاغب في الروضة هو إننا نديله خيارات، واللي تعد وسيلة مساعدة لتشتيت الطفل عن السلوكيات السيئة، على سبيل المثال نقوله:
عايز تشارك في النشاط المعين دا ولا تشارك في دا؟ طب إيه رأيك تلعب اللعبة مع زميلك فلان ولا فلان؟ طب عايز تساعدني في الفصل ولا تقعد مكانك؟
كل الأسئلة دي بتخلي الطفل يحس بكيانه وذاته في الفصل من غير ما يلجأ لطرق تانية عشان يلفت انتباه الغير، أو يحس بالحرية بطريقة غلط.
7- لا توصم الطفل
الطفل بيصدق اللي بيتقاله، وخصوصًا لو من حد أكبر منه ومصدر ثقة ليه، فلو طول الوقت بتقوله أنت شقي، أنت وحش، أنت Naughty، هيثبت في دماغه إنه كدا فعلًا، ويبدأ يتصرف على أساسه بنفس الطريقة.
عشان كدا في كيفية التعامل مع الطفل المشاغب في الروضة لازم نركز كويس جدًا على الفعل، ونرفضه، لكن بلاش توصم الطفل بصفة ممكن تلازمه لفترات طويلة، وتشكّل التصرفات اللي بيسلكها فيما بعد.
8- لا تقارن الطفل بغيره
مقارنتك للطفل بغيره بتسبب ليه مشاكل نفسية، وبتزود سلوك العند والمشاغبة عنده، ودا بيكون نتيجة إحساسه المستمر بالغيرة من أصدقائه، وممكن يتحول لسلوك عدواني وعنيف معاهم.
وبالتالي البيئة التعليمية بتكون غير صحية نفسيًا، فمهم جدًا في رحلتنا لمعرفة كيفية التعامل مع الطفل المشاغب في الروضة إنك تخلي مقارنتك متعلقة بيه زي: أنت مش بتضايق زمايلك زي الأول وكلنا مبسوطين منك.
9- اربط تنفيذ الأمر بشيء محبب للطفل
عشان تحل مشكلة طفلك لازم تعرف إيه الحاجات اللي بيحبها، وتحاول تربطها بتنفيذ حاجة معينة، عشان تلاقي استجابة أفضل من الطفل في الروضة، وممكن مع الوقت تبدأ تقلل الربط دا تدريجيًا.
10- تواصل مع ولي الأمر باستمرار
من أهم النقاط في كيفية التعامل مع الطفل المشاغب في الروضة هو التواصل باستمرار مع ولي الأمر، ودا عشان نعرف منه الأسباب اللي بتخلي الطفل يسلك السلوكيات دي ونمنعها تمامًا، زي الصوت العالي والزعيق وغيره.
وكمان عشان نعرفه إيه الأساليب اللي المفروض يتعامل بيها مع طفله في شكل إرشادات معينة يتبعها عشان يتم حل المشكلة دي من الجهتين؛ البيت والروضة.
في النهاية، بعد ما عرفنا كيفية التعامل مع الطفل المشاغب في الروضة مهم جدًا ندرك إنه لسه طفل، ومحتاج صبر ووقت ومجهود عشان نشكل عنده السلوكيات المقبولة اجتماعيًا، ونقلل من المشكلات السلوكية اللي بيعملها، وأكيد مع التجربة والمحاولة هنساعده يكون أفضل.
المصادر
Behavioural and emotional disorders in childhood
How to Take Care of Naughty Kids
How to Deal with a Naughty Child
أضف تعليق