تعديل سلوك الطفل العنيد والعصبي | 10 نصائح مجربة

تعديل سلوك الطفل العنيد والعصبي

 

تعديل سلوك الطفل العنيد والعصبي هو أمر بيهم عدد كبير من أولياء الأمور والمربين؛ لإن السلوك دا بيخليهم مش قادرين يتعاملوا بشكل كويس مع أطفالهم، ومع كل حاجة بيطلبوها منهم ممكن تحصل معركة داخل البيت.

وعشان يقدروا يتغلبوا على المشكلة دي ويتخلصوا من سلوكيات أطفالهم الخاطئة لازم يعرفوا الأول طبيعة السلوكيات دي وسبب حدوثها، وبالتالي هيعرفوا يحطوا خطة مناسبة للتعامل معاها.

في المقال دا هنتعرف بالتفصيل على طبيعة السلوكيات دي ونعرف طريقة تعديل سلوك الطفل العنيد والعصبي وإزاي نتعامل بطريقة صحيحة معاه.

مواصفات العند كمشكلة سلوكية | من هو الطفل العنيد

يعد العند أحد أشهر مشكلات الأطفال السلوكية اللي بتخليهم ياخدوا قرارات خاطئة نتيجة إصرارهم الشديد على ارتكاب فعل معين، والفعل دا ممكن يكون بسيط في البداية ومش بيسيب مشاكل كبيرة، لكنه في بعض الأحيان مش بيكون بسيط وبيأثر بشكل واضح في حياة الطفل.

العند بيتطور عند الطفل لو تجاهلنا علاجه، وبيصبح سلوك واضح جدا في تعاملاته مع غيره، وبالتالي ممكن يصبح الشخص دا منبوذ بسبب تصرفاته غير المقبولة.

ومن هنا بيتضح إن تعديل سلوك الطفل العنيد والعصبي هو دور كل ولي أمر ومربي، والأمر بيكون سهل لما نوصل للأسباب اللي أدت لحدوث المشكلة ونحاول نتجنبها قدر الإمكان.

طيب إيه أسباب مشكلة العند السلوكية عند الأطفال؟ دا اللي هنعرفه حالًا.

نفسية الطفل العنيد | أسباب العند الشائعة

أسباب العند الشائعة عند الأطفال

خطوة تعديل سلوك الطفل العنيد والعصبي بتأتي بعد التعرف على أسباب حدوث المشكلة؛ عشان نقدر نحط خطوات واضحة وفعالة للتخلص من السلوك دا.

من أكثر أسباب العند شيوعا بنلاقي:

تأثير البيئة المحيطة

العوامل البيئية المحيطة بالطفل بتمثل دور كبير جدا في تكوين شخصيته، فالطفل بطبيعته بيميل إلى تقليد من حوله ومحاكاة سلوكياتهم، وبناءً عليه بيكتسب العديد من السلوكيات بالطريقة دي.

وبالتالي إذا كان سلوك العند موجود عند الأشخاص المحيطين بالطفل فمن الطبيعي إنه يكتسب السلوك دا ويطوره ويتأثر بالسلب، وهنا تعديل سلوك الطفل العنيد والعصبي بيبدأ من تعديل السلوكيات الموجودة في البيئة المحيطة به.

عدم نضج الطفل

الأطفال دايما بيحبوا يعرفوا ويستكشفوا اللي حواليهم من خلال تجاربهم الشخصية، وبيكون عندهم رغبة إنهم يجربوا أي حاجة جديدة رغم عدم امتلاكهم للمهارات اللي تؤهلهم لذلك، فبيرفض ولي الأمر أحيانا الرغبة دي؛ نظرا لخوفه على الطفل لإن أحيانا بيكون في خطورة عليه، وبالتالي بيشعر الطفل بالغضب ويقابل قرارات ولي الأمر بالعند والإصرار على رأيه لعدم نضجه.

في الحالة دي بيكون تعديل سلوك الطفل العنيد والعصبي أمر هين، ومع تقدم الطفل في العمر هتختفي المشكلة.

التطلع إلى الاستقلال

الرغبة في الاستقلال هو شعور بيراود الطفل منذ الصغر، وبيبدأ يزيد عنده مع التقدم في العمر إلى أن يصل إلى الذروة في مرحلة المراهقة، ودا بيكون أمر طبيعي، لكن الشعور دا في بعض الأحيان بيسيطر على الطفل وبيظهر بشكل كبير في سلوكياته وبيتسبب في بعض المشكلات السلوكية اللي على رأسهم العند.

الطفل بيعتبر العند وسيلته للتعبير عن رفض الأوامر الموجهة له أو رفضه لسلوك معين، فبتحصل معركة في البيت مع كل أمر أو قرار جديد يصدره ولي الأمر.

السر اللي بيساعد في تعديل سلوك الطفل العنيد والعصبي في الحالة دي هو توضيح ولي الأمر لوجهة نظره وعرضها على الطفل بالطريقة اللي يقدر يستوعبها؛ عشان يقصر على نفسه الطريق ويتجنب عملية الشد والجذب المستمرة مع الطفل.

عدم اهتمام الأسرة بالطفل

إهمال الأسرة أحيانا بيكون سبب جوهري لوجود سلوك العند عند الطفل؛ لإن الطفل بيستغل السلوك دا لجذب انتباه اللي حواليه وإجبارهم على الاهتمام به، وبالتالي لازم يكون في قدر كافي من الاهتمام بالطفل والحرص على توصيل شعور الأمان إليه، وهنا هنكون أخدنا أول خطوة في رحلة تعديل سلوك الطفل العنيد والعصبي الناتج عن الإهمال.

التدليل الزائد للطفل

زي ما عدم الاهتمام بالطفل بيسبب مشاكل سلوكية فبنلاقي أيضًا إن التدليل الزائد له والاستجابة لكل طلباته بينمي عنده العند؛ لإنه بيتوقع إن كل طلباته قابلة للتنفيذ، ومع حدوث أول رفض لأي طلب من طلباته بيبدأ يتعامل بعند مع اللي حواليه كوسيلة للضغط عليهم، ولكن هنا ما ينفعش ولي الأمر يستجيب للضغط دا؛ لإنه هيخلي الطفل يتمادى في العند.

أسباب العصبية عند الأطفال حسب العمر

العصبية المفرطة عند الطفل هي مشكلة بيعاني منها أولياء الأمور والمربين، وأحيانا مش بيكونوا قادرين يحددوا سبب عصبية الطفل وبالتالي السيطرة على الأمر بتكون صعبة.

بنلاحظ إن أسباب العصبية عند الأطفال بتختلف باختلاف عمر الطفل، وفي السطور الجاية هنعدي على الأسباب دي بالتفصيل.

من سن سنتين إلى 5 سنوات

في الفترة دي من حياة الطفل بنلاقي إن العصبية ممكن تحصل نتيجة:

عدم قدرة الطفل على التعبير عن مشاعره بوضوح

في بداية مرحلة الطفولة مش بيكون الطفل قادر على التعبير عن مشاعره الداخلية للي حواليه بوضوح، وبالتالي مع حدوث أي مشكلة بيبدأ يدخل في نوبات الغضب والعصبية، لكن مع تنمية قدرته على التعبير هتبدأ المشكلة تتحل مع الوقت.
سوء التعامل مع الطفل سواء من داخل الأسرة أو خارجها

التعامل بطريقة سيئة مع الطفل واستخدام أساليب

العقاب القاسية بيزود عند الطفل العصبية وبيخليه يتعامل بعنف مع اللي حواليه وممكن يسبب لهم أذى بوعي أو بدون وعي.

عدم تلبية مطلب من مطالب الطفل

الطفل بيحب دايما إن طلباته تكون مجابة، وبيتبسط لما يشعر بكدا، ومع تعوده على الوضع دا بيبدأ يتعصب لما حد يرفض أي طلب له، والنقطة دي بتحصل لما ولي الأمر يلبي كل احتياجات الطفل باستمرار.

وبالتالي لازم ولي الأمر يحرص إن تلبية متطلبات الطفل تكون بحدود، ويوصل الأمر دا للطفل عشان يتجنب عصبية الطفل نتيجة لرفض الاستجابة لطلباته.

من سن 6 إلى 9 سنوات

أسباب العصبية عند الطفل في الفترة بين 6 – 9 سنوات بتكمن في:

تطلع الطفل إلى الاستقلال

الأطفال بيكون عندهم دايما رغبة في الاستقلال والشعور بالحرية، ودا بينعكس على تصرفاتهم اليومية زي ما وضحنا سابقًا، وإذا لاحظ الطفل أي سلوك خارجي بيضاد الرغبة دي سواء كان فهمه صحيح أو خاطئ بيبدأ يتعامل بعصبية مع اللي حواليه، وممكن السلوك دا يتطور ويوصل لمشكلة كبيرة تؤثر على حياته فيما بعد.

مقارنة الطفل بغيره

المقارنة بتولد عند الطفل شعور سلبي؛ لإنها بتوصل رسالة معناها إنه شخص سيئ وغير مرغوب فيه من اللي حواليه لإن غيره اللي في نفس سنه قدر يتفوق عليه في نقطة معينة، وهنا الطفل بيقابل الأحداث دي بعصبية بتختلف في حدتها من موقف لآخر.

مشاكل نفسية

أحيانا بتكون المشاكل النفسية عامل رئيسي في العصبية عند الطفل، فبتكون جواه طاقة غضب أو حزن كبيرة بيبتدي يخرجها في شكل سلوكيات عصبية شديدة.

من سن 10 سنوات لمرحلة المراهقة

العصبية في سن 10 سنوات إلى مرحلة المراهقة ممكن تكون ناتجة عن:

الرغبة في جذب الانتباه

بعض الأطفال بيكون عندهم رغبة في جذب انتباه اللي حواليهم، والرغبة دي بتزيد في فترة المراهقة؛ لإنهم بيكونوا عايزين يثبتوا للي حواليهم إنهم أشخاص كبار مش أطفال وبيتصرفوا بناءً على ذلك، وبالتالي بيعتبروا العصبية الزائدة طريقة للتعبير عن الرغبة دي.

عدم القدرة على إدارة الوقت

في المرحلة الأخيرة من الطفولة وبداية فترة المراهقة بيكون الطفل لسه مش قادر يدير الوقت بشكل كويس، فبيبتدي يرسم خطط لنفسه وبيكون عايز ينجز الخطط دي في فترة معينة، وفي حالة عدم إنجازه لخططه بتظهر عليه العصبية وبيتعامل مع اللي حواليه

إصرار ولي الأمر على فعل معين دون توضيح وجهة نظره

بعض أولياء الأمور بيغفلوا عن إنهم يشرحوا لأولادهم وجهة نظرهم وبيصروا يجبروهم على فعل معين، وبالتالي بيشعر الطفل إن حريته مكبوتة وبيبدأ شعوره دا يتترجم على هيئة عصبية مفرطة.

ممكن ولي الأمر يتلاشى حدوث السلوك دا عن طريق إنه يشرح لابنه تفاصيل الأمر بالطريقة اللي يقدر يستوعبها ويفهمه وجهة نظره ويتقبل نقاش ابنه معاه، وممكن يكون في تفاوض لو الأمر استدعى ذلك، ومن هنا هنقضي على العصبية وفي نفس الوقت هنشجع الطفل يبدي رأيه في الأمور اللي بتدور حواليه.

ملحوظة: لازم ولي الأمر يدرك إن تعديل سلوك الطفل العنيد والعصبي في المرحلة بيكون أصعب شويه من قبل كدا، وبالتالي الأمر بيحتاج إلى الصبر.

في السطور الجاية هنتعرف على أهم النصائح اللي بتساعد في تعديل سلوك الطفل العنيد والعصبي بشكل كبير لو التزمنا بتطبيقها مع الطفل.

10 نصائح لتعديل سلوك الطفل العنيد

نصائح لتعديل سلوك الطفل العنيد

تعديل مشكلة العند عند الأطفال بتحتاج إلى الاستمرارية والمثابرة، ومع الوقت بنقدر نلاحظ التغير الإيجابي في سلوك الطفل، لكن في مجموعة نصائح هتساعدنا نوصل للمرحلة دي أسرع.

من أهم النصائح دي:

1- الإصغاء إلى الطفل

الطفل بيحب يشعر إن اللي حواليه مهتمين بكلامه ويسمعوا للي بيقوله، ولو لاحظ غير كدا بيبدأ يتحدى ويعند أكثر، ومش بيستجيب لتعليماتهم، وبالتالي الإصغاء وإظهار الاهتمام بالكلام هيساعد في تعديل سلوك الطفل العنيد والعصبي.

2- احترام رأيه

احترام رأي الطفل هيخليه متقبل لاختلاف وجهات النظر، وبالتالي هيتقبل تعليمات ولي الأمر له بدون عند أو سلوكيات خاطئة.
كمان الطريقة دي هتشجعه يشارك دايما بوجهة نظره ويحسن من المهارات الاجتماعية عنده.

3- إظهار الاهتمام

شعور الطفل بعدم اكتراث الأسرة به بيولد عنده العديد من المشكلات السلوكية اللي على رأسها العند، وبالتالي إظهار الاهتمام بالطفل يعد عامل ضروري لتعديل سلوك الطفل العنيد والعصبي.

4- عرض الاختيارات بدلًا من التوجيهات

الطفل بيميل دائما إلى الحرية والاستقلال وبيظهر دا في تصرفاته، وبالتالي لازم نكون مدركين دا وإحنا بنتعامل معاه وما نحاولش نجبره على أفعال معينة، وعشان نعمل كدا ممكن نعرض عليه مجموعة من الخيارات البسيطة بدلًا من التوجيهات، وهنا هيستجيب الطفل لكلامنا وهنكون عملنا على تعديل سلوك الطفل العنيد والعصبي بطريقة سهلة.

5- تجنب العند مع الطفل

عناد ولي الأمر مع الطفل بيخلق نوع من التحدي وبيخليه يتمادى في العند دا وبيزود المشكلة عنده، وبالتالي لازم ولي الأمر يحرص إنه يتجنب السلوك دا مع الطفل ويتعامل بأسلوب لين مع الطفل عشان يستجيب لتوجيهاته.

6- التفاوض في القرارات

أحيانا التفاوض في القرارات اللي بيصدرها ولي الأمر بيكون الحل الأمثل لتعديل سلوك العند عند الطفل، وبيزود من معدل استجابته للكلام، لكن لازم ندرك إننا ما ينفعش نخضع لرأي الطفل باستمرار؛ لإننا بالطريقة دي هنزود المشكلة عنده.

7- التعاطف مع الطفل

تعاطف ولي الأمر مع الطفل بيولد نوع من الألفة بينهم وبيخلي الطفل عنده استعداد لتقبل الأوامر والتوجيهات بدون ما يستخدم العند في تعاملاته.

8- التحدث بصيغة الجمع

في حديثنا مع الطفل ممكن نقول: “إحنا هنعمل كذا” بدل ما نستخدم طريقة التوجيه التقليدية ونقوله اعمل، وهنا هوا هيشعر إننا متعاونين معاه مش بنتحداه مثلا أو بنوجه حاجات إجبارية عليه لواحده فهيبدأ يستجيب.

9- عرض وجهة نظرك

عرض وجهة النظر زي ما ذكرنا بتقصر على ولي الأمر الطريق في تعامله مع ابنه، وبتساعد في تعديل سلوك الطفل العنيد والعصبي بشكل واضح؛ لإن الطفل بيبقى مدرك ضرورة اللي بيعمله وفاهم كويس السبب اللي خلى ولي الأمر يطلبه منه، وبالتالي هيتجنب إنه يستخدم العند في تعاملاته.

10- التحلي بالصبر

تعديل أي مشكلة سلوكية عند الطفل بيحتاج لوقت طويل عشان يكون في نتائج مرضية، وبالتالي الصبر في التعامل وتطبيق النصائح اللي بتساعد في حل المشكلة بيكون ضروري، ولازم ولي الأمر يدرك النقطة دي.

نصائح لتعديل سلوك الطفل العصبي في كل مرحلة عمرية

تعديل سلوك الطفل العصبي بيتطلب معرفة الأسباب اللي بتؤدي للمشكلة ومحاولة تجنبها قدر الإمكان، مع تطبيق بعض النصائح اللي بتختلف من مرحلة عمرية للثانية.

في المرحلة العمرية بين 2 – 5 سنوات لازم نهتم بتطوير مهارات الطفل ونساعده يعبر عن اللي جواه بطريقة مفهومة عشان ما يلجأش للعصبية، وضروري إن التعامل معاه يكون باللين حتى وقت العقاب ونتجنب الأساليب القاسية.

كمان من المهم إننا نعرف امتى نستجيب لطلبات الطفل وامتى نرفضها، وما ينفعش يكون في استجابة لطلباته بشكل مستمر، لإن لو كان في استجابة دائمة هيبدأ يتعصب بشدة مع أول رفض.

أما في الفترة بين 6 – 9 سنوات فلازم نتجنب مقارنة الطفل بباقي الأطفال اللي في نفس عمره؛ لإن الطريقة دي بتحسسه إنه شخص سيء وبتزود عنده سلوك العصبية.

بالإضافة إننا ضروري نتأكد إن الطفل مش بيعاني من أي مشكلة نفسية؛ لإن المشاكل النفسية ممكن تكون هي السبب الأساسي للعصبية.

مع وصول الطفل لسن 10 سنوات إلى مرحلة المراهقة لازم نفهم كويس طبيعة المرحلة والتغيرات اللي بيمر بيها الطفل ونتعاطف معاه قدر الإمكان، ونساعده يتعلم إزاي يدير وقته ويتخلص من الحاجات اللي بتسبب له مشاكل نفسية.

في الفترة دي الطفل بيكون قادر يستوعب كويس اللي قدامه وبالتالي نقدر نوضح له وجهة نظرنا ونتفاهم معاه بدون قسوة أو أوامر إجبارية شديدة عشان يستجيب معانا.

وهنا نكون قدرنا نتجنب عصبية الطفل، أما عن خطة التخلص من العند والتحدي فهنتعرف عليها حالًا.

خطة لتعديل سلوك الطفل العنيد

تعديل سلوك الطفل العنيد والعصبي بيحتاج لخطة مدروسة مناسبة لحالة الطفل وشدة السلوك بتاعه؛ عشان نقدر نوصل لنتيجة مُرضية في أقرب وقت.

من أهم الحاجات اللي لازم نحطها في خطتنا هي تجنب أسباب العند عند الأطفال ومحاولة توضيح إن أسلوب الطفل غير مجدي؛ عشان نساعده يتوقف عن ارتكاب السلوك دا.

كمان نقدر تستعين بمجموعة النصائح اللي ذكرناها قبل كدا؛ لإنها هتقصر علينا الطريق وهتساعد في تعديل سلوك الطفل العنيد والعصبي مع الوقت.

أحيانا بنحتاج إننا نعرض الطفل على طبيب نفسي لتعديل سلوكه، لكن امتى نعمل كدا؟ دا اللي هنتعرف عليه.

متى ألجأ لمعالج نفسي للتعامل مع الطفل العنيد والعصبي

متى ألجأ لمعالج نفسي للتعامل مع الطفل العنيد والعصبي

في رحلة تعديل سلوك الطفل العنيد والعصبي أحيانا بنكتفي بس بخططنا وتطبيق بعض النصائح اللي بتساعد في حل المشكلة، وبتكون النتيجة كويسة، لكن في بعض الأحيان الأخرى بيتطلب الأمر عرض الطفل على طبيب مختص لتقييم حالته، ودا بيحصل لما مش بنكون قادرين نحدد السبب الأساسي وراء سلوك العند والعصبية عند الطفل.

وهنا بنلجأ للطبيب عشان نتأكد إن الطفل مش بيعاني من أي مشكلة نفسية أو جسدية مسببة السلوك دا، وعلى أساس الحالة بيبدأ الطبيب يعلم الخطة العلاجية المناسبة للطفل.

وأخيرًا، تعديل سلوك الطفل العنيد والعصبي هو مسئولية كل ولي أمر، فلازم نهتم بسلوكيات الطفل ونحرص دايما على تعديلها، ونبدأ نعالج المشكلة في بداية ظهورها؛ لإن التأخر في علاج مشاكل الطفل السلوكية بيزود المشكلة وبيخلي الأمر أصعب.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق