10 طرق لكيفية التعامل مع الطفل المشاغب في الروضة بشكل صحيح

كيفية التعامل مع الطفل المشاغب في الروضة

أنماط شخصيات الأطفال بتختلف من طفل للتاني، فمنهم الهادي والعاقل ومنهم العنيد والجريء، ومنهم الحساس والعطوف، وغيرهم كتير، ولكن من أصعب الأنماط اللي بيتم التعامل هو الطفل المشاغب، اللي بيرفض يمشي على أي قواعد أو قوانين مهما كانت سهلة بالنسباله سواء كانت أثناء رحلته التربوية أو التعليمية

عشان كدا في المقال دا هنتعرف على كيفية التعامل مع الطفل المشاغب في الروضة بشكل فعال وصحيح للوصول معه لأفضل نتائج.

تأثير الطفل المشاغب في الروضة

وجود الطفل المشاغب في الروضة وجرأته على عدم اتباع القوانين بيأثر بشكل سلبي على عملية التعليم من أول الفوضى اللي بسببها في الفصل لحد تقليد زمايله ليه واتباع نفس سلوكياته، لأنه بكدا بيجذب الانتباه بشكل أو بآخر، ودا بدوره هيخلق حالة من العشوائية، وهيسبب تعطيل في اليوم الدراسي

ولأن نص حل المشكلة بيكمن في معرفة سببها، لازم نتساءل ونعرف إيه اللي بيخلي الطفل مشاغب.

وهل دا بيبقى غصب عنه وبيحصل بشكل غير إرادي ولا هو بيبقى فاهم وقاصد، والأسئلة دي هي اللي هتنقلنا للنقطة الجاية قبل ما نعرف طرق لكيفية التعامل مع الطفل المشاغب في الروضة.

الأسباب الشائعة للسلوك المشاغب

الأسباب الشائعة للسلوك المشاغب

أي سلوك صادر عن الطفل لازم يكون وراه سبب بيحركه، والسلوك المشاغب مبيحصلش بشكل تلقائي وعفوي، وإنما بيبقى في مبرر للي الطفل بيعمله، ومن الأسباب الشائعة للسلوكيات المشاغبة التالي:

الحاجة إلى الاستقلالية

الطفل أول ما بيبدأ يكبر بيحس إنه عاوز يطلع للحياة ويستكشف لوحده من غير ما حد يجبره على حاجة أو يلزمه باتباع قوانين معينة، وخصوصًا لو الموضوع ارتبط بأنماط الأطفال اللي بطبيعتها عنيدة، فدا بيزود عندهم الحاجة للاستقلالية، وبالتالي دا لا يتماشى مع العملية التعليمية لأن شاء الطفل أم أبى لازم يلتزم بالقواعد الموضوعة وينفذ المطلوب منه.

عدم النضج

في كتير من الأحيان بيتصرف الطفل تصرفات مشاغبة وبتظهر لينا غير منطقية تمامًا وغريبة، فنبدأ نتساءل هو فعلأً الطفل قاصد يعملها؟ ولا مش مستوعب إن التصرف دا ممكن يأذيه بشكل ما أو يأذي زمايله؟ وفي الحقيقة التصرفات دي بكل بساطة بيكون سببها عدم نضج الطفل، وإنه مش عارف يدرك إيه الصح وإيه الغلط، ويمكن حتى لو قولناله يستمر بردو عليها، عشان كدا في رحلتنا لمعرفة كيفية التعامل مع الطفل المشاغب في الروضة لازم يكون عندنا صبر وقدرة تحمل على سلوكيات الطفل، ونبدأ نعدلها بشكل تدريجي بدون كلل أو ملل لحد ما تتحسن.

مقارنة الطفل بغيره من الأطفال

مقارنة الطفل بغيره من الأطفال بتسبب ليه ضغط نفسي بشكل مؤذي، وبتبعتله رسالة غير مباشرة محتواها إنه غير مميز ومش زي غيره من الأطفال ولازم يكون زيهم وميكونش نفسه، وبالتالي دا بيخليه طول الوقت يفكر بشكل سلبي عن ذاته، فبيحتاج يفرغ الطاقة دي اللي بتترجم بشكل لا إرادي في سلوكيات مشاغبة وعدم احترام المعلم وتوجيهاته.

ودا رد فعل طبيعي من الطفل، لأنه بيخاف طول الوقت إنه يتم تجاهله، وعشان هو حاسس إنه غير مميز ومش زي غيره من الأطفال فيدور على أي وسيلة تخليه متشاف زيهم، ودا بيحصل بشكل غير واعي تمامًا فبيسلك أي سلوك سواء كان إيجابي أو سلبي بس المهم إن محدش يتجنبه أو يغفل عنه.

الاقتداء بغيره

السلوكيات المشاغبة الصادرة عن الطفل ممكن تكون صوت عالي، زعيق، ضرب، أذية غيره من الأطفال، ودا بيحصل نتيجة إنه شاف غيره سواء كان كبير أو صغير بيعمل نفس التصرفات فعاوز يجربها، فبيقتدي بالشخص اللي بيعمل التصرفات دي حتى لو كانت التصرفات دي موجهة ليه

على سبيل المثال مامته على طول بتزعقله وباباه بيضربه؛ دا بيخليه عاوز يسقط الأفعال دي على حد غيره، عشان كدا أثناء البحث عن كيفية التعامل مع الطفل المشاغب في الروضة لازم ندور كويس إذا كان بيتعرض للتعنيف في البيت أو لأ.

التدليل الزائد

من أكتر الأسباب شيوعًا للسلوكيات المشاغبة هو إن الطفل يكون مدلل بشكل مبالغ فيه، يعني كل طلباته مجابة ومفيش قواعد يمشي عليها، اللي بيحصل نتيجة لدا، هنلاقيه بيواجه مشكلة كبيرة في اتباع الإرشادات الصادرة من المعلم أو المعلمة في الروضة، وبالتالي هيكون في اعتراضات طول الوقت وعياط وتنفيس عن الغضب اللي عنده بكذا طريقة.

الحاجة إلى تفريغ الطاقة

أحيانًا بيكون في أطفال معندهمش أي مشكلة من المشاكل اللي ذكرناها فوق، لكن بيكون عندهم طاقة كبيرة عايزين يفرغوها، وأكيد قابلنا قبل كدا نوعية أطفال شاطرة ومميزة في الجانب التعليمي لكنهم مشاغبين وعلى طول بيعملوا مشاكل

والسبب الأساسي بيرجع لإن نمط الأطفال دول في الغالب بيكون نمط حركي فبيكونوا عايزين طول الوقت يتحركوا، ووجودهم في الفصل الدراسي بيقيدهم، ودا اللي بيخليهم يتصرفوا التصرفات المشاغبة، وأحيانًا العدوانية عشان يفرغوا الطاقة اللي جواهم، عشان كدا لازم ناخد بالنا في كيفية التعامل مع الطفل المشاغب في الروضة إيه نمطه وإيه سببه للسلوكيات دي.

10 طرق لكيفية التعامل مع الطفل المشاغب في الروضة

10 طرق لكيفية التعامل مع الطفل المشاغب في الروضة

مهما كان سبب الطفل في السلوكيات المشاغبة اللي بيعملها فالنتيجة واحدة وتأثيرها واحد وهو عدم سير العملية التعليمية بأفضل شكل، عشان كدا بنقدملك طرق مختلفة لكيفية التعامل مع الطفل المشاغب في الروضة، وهي كالآتي:

1- كُن حازمًا

“الانطباع الأول يدوم”

لو لأول مرة بتدخل فصل ما لازم تحط في الاعتبار إن أكيد هتقابل فيه أطفال مشاغبين، وعشان تجهز نفسك وتهيأ الفصل دا للالتزام مهم يكون الانطباع الأول اللي هياخدوه عنك إنك شخص حازم ولازم يحترموك، ودا هيحصل عن طريق نبرة الصوت والطريقة اللي بتتعامل بيها معاهم.

ولأن الطفل المشاغب طفل ذكي بيقدر يلمس ويستوعب شخصية المعلم من أول انطباع بيظهر عليه، فلازم يكون الانطباع الأول هو إنك شخص حازم وشديد بدون قسوة،ودا هيخلي الطفل يلزم حدوده ويخاف يتجرأ ويسلك السلوكيات الغلط اللي كان بيتبعها قبل كدا.

2- اترك للطفل مساحة تعبير

من الطرق اللي لازم تتبعها في كيفية التعامل مع الطفل المشاغب في الروضة هي ترك مساحة تعبير ليه، ودا لأن زي ما وضحنا إن أغلب التصرفات اللي بيعملها بتكون عشان عاوز يلفت الأنظار ، أو لأنه بيحس إنه مش مميز زي غيره من الأطفال، عشان كدا لما تشك إن الطفل حاسس إن بيتم تجاهله أو تجنبه دور على مميزاته وأظهرها وإديله مساحة يعبر عن نفسه ومشاعره وحتى أفكاره اللي ممكن تكون بسيطة جدًا، وبالتدريج هيبدأ سلوك المشاغبة يقل.

3- حمّل الطفل المسؤولية

سلوك المشاغبة في كتير من الأوقات بيبقى ناتج عن انعدام الثقة بالنفس، وعشان نحل المشكلة زي ما وضحنا لازم نحل السبب، وأفضل حل لمشكلة انعدام الثقة بالنفس هو إننا نحمل الطفل مسؤولية ما داخل الفصل، ودي من أهم الطرق في كيفية التعامل مع الطفل المشاغب في الروضة على سبيل المثال:

  • توزيع الكراسات على أصدقائه
  • مسح السبورة
  • توزيع المكافآت على الأطفال في الفصل

وغيرها من المسؤوليات اللي تقدر تحددها حسب المادة أو الأنشطة اللي بتعلمها للأطفال، كمان تقدر تخليه أشبه بمساعد ليك في الحصة اللي بتديها، ودا هيزود احترامه وتقديره لذاته، وهيتحرج يعمل أي مشاكل سلوكية عشان يفضل في المكانة أنت وضعته فيها.

4- لا تخضع لأي نوبات غضب

من طرق كيفية التعامل مع الطفل المشاغب في الروضة هي عدم الخضوع لنوبات غضبه، ودا لأن الطفل بيستخدم البكاء والصراخ كحيلة أحيانًا عشان يتم تنفيذ اللي هو عاوزه، وأثناء استخدام الحيلة بيبقى قدامنا خيارين وهما: إننا نستسلم والطفل يصعب علينا ونعمله اللي نفسه فيه، أو نتجاهل تمامًا ونخليه يمشي على القواعد برفق ولين وحزم في نفس الوقت عشان السلوك دا يتعدل فيما بعد.

5- علّم ولا تعاقب

العقاب مش دايمًا أنسب حل، وفي كيفية التعامل مع الطفل المشاغب في الروضة لازم نحط في الاعتبار إنه أغلب الأوقات بيجيب نتيجة عكسية مع الطفل، واحتمال كبير يكون سبب لعناده وزيادة سلوكياته السيئة في الفصل

التأديب والتعليم بشكل هادي وبطريقة لينة بيفرق جدًا وخصوصًا في سن الروضة، ودا عشان بيكونوا لسه في حاجة للشعور بالأمان والطمأنينة والحنان، فلما الطفل يسلك سلوكيات مشاغبة اتناقش معاه بهدوء وفهمه إن التصرف دا غلط وبيأذي زمايله ولازم يبطله، ومع تكرار التنبيه والتحذير بيزهد الطفل ويزهق من سلوكه، وبالتالي بيستسلم لإرشاداتك ويتبعها.

6- أعطِ خيارات

الطفل عايز يحس بالاستقلالية والحرية والمعلم عايز يعلمه القواعد والانضباط، ودي معادلة مش سهلة، وبيصدر عنها سلوكيات كتير مشاغبة، ومن الطرق الفعالة لكيفية التعامل مع الطفل المشاغب في الروضة هو إننا نديله خيارات، واللي تعد وسيلة مساعدة لتشتيت الطفل عن السلوكيات السيئة

على سبيل المثال نقوله عايز تشارك في النشاط المعين دا؟ ولا تشارك في دا، طب إيه رأيك تلعب اللعبة مع زميلك دا ولا دا، طب عايز تساعدني في الفصل ولا تقعد مكانك؟

كل الأسئلة دي وغيرها كتير أشبه بأوامر وتنفيذ للقواعد والالتزام بيها بطريقة غير مباشرة، وهتساعد بشكل كبير، وتعد من أكتر طرق كيفية التعامل مع الطفل المشاغب في الروضة فعالية، لإنها بتخلي الطفل يحس بكيانه وذاته في الفصل من غير ما يلجأ لطرق تانية عشان يلفت انتباه الغير أو يحس بالحرية بطريقة غلط.

7- لا توصم الطفل

الطفل بيصدق اللي بيتقاله، وخصوصًا لو من حد أكبر منه ومصدر لثقته بشكل ما أو بآخر ، فلو طول الوقت بتقوله أنت شقي، أنت وحش، أنت Naughty، هيثبت في دماغه أنه كدا فعلًا، وهيبدأ يتصرف التصرفات اللي خليتك تقول عليه كدا، كنوع من أنواع الدفاع عن النفس أو الاستسلام لإنه فعلًا وحش ومشاغب.

عشان كدا في كيفية التعامل مع الطفل المشاغب في الروضة لازم نركز كويس جدًا على الفعل ونرفضه لكن منوصمش الطفل بصفة ممكن تلازمه لفترات طويلة، وتشكّل التصرفات اللي بيسلكها فيما بعد.

8- لا تقارن الطفل بغيره

مقارنة الطفل بغيره تعد بيئة رطبة لخلق طفل غير سوي، من نواحي كتيرة ومختلفة، فلما نقارنه بزمايله هنزود السلوكيات المشاغبة عنده، ودا بيحصل لأن بيحس بالغيرة منهم وبيحتاج يعبر عنها فبتطلع بالشكل دا، وأحيانًا بتتحول لسلوكيات عدوانية وعنيفة، كمان المقارنة بتزود كرهه ليهم ونفوره منهم، وبالتالي البيئة التعليمية بتتحول لبيئة غير صحية نفسيًا.

فمهم جدًا نتبع رحلتنا لمعرفة كيفية التعامل مع الطفل المشاغب في الروضة عدم مقارنته مع غيره من الأطفال، ونقارنه بنفسه على سبيل المثال: أنت مش بتضايق زمايلك زي الأول وكلنا مبسوطين منك.

9- حدد معززات معينة

أي طفل ليه نقطة ضعف، وعشان تحل مشكلة عنده وتعدلها لازم تعرف إيه نقطة ضعفه، وفي كيفية التعامل مع الطفل المشاغب في الروضة بنلاقي إن تحديد المعززات بيساعد بشكل كبير في حل المشكلة دي، فممكن تعرف إيه اللي الطفل بيحبه وتعززه بيه، على سبيل المثال: “خلينا نتفق اتفاق لو انهاردة مضايقتش حد من صحابك هنلعب اللعبة دي” ونكون محضرين الحاجة اللي هو بيحبها.

ومع تكرار الاسلوب دا مع الطفل هنبدأ نقلل مدة التعزيز ونسحبه تدريجيًا لحد ما ينتهي من السلوك اللي عايزين نعدله.

10- تواصل مع ولي الأمر باستمرار

في أهم النقاط في كيفية التعامل مع الطفل المشاغب في الروضة هو التواصل باستمرار مع ولي الأمر، ودا عشان نعرف منه الأسباب اللي بتخلي الطفل يسلك السلوكيات دي ونمنعها تمامًا، زي الصوت العالي والزعيق وغيره، وكمان عشان نعرفه إيه الأساليب اللي المفروض يتعامل بيها مع طفله في شكل إرشادات معينة يتبعها عشان يتم حل المشكلة دي من الجهتين من البيت والروضة في نفس الوقت.

في النهاية، بعد ما عرفنا كيفية التعامل مع الطفل المشاغب في الروضة مهم جدًا ندرك إنه لسه طفل، ومحتاج مننا صبر ووقت ومجهود عشان نشكل عنده السلوكيات المقبولة اجتماعيًا، ونقلل من المشكلات السلوكية اللي بيعملها، وأكيد مع التجربة والمحاولة هنساعده يكون أفضل.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية

إقرأ أكثر..

  • No comments yet.
  • Add a comment