إيه هي طرق زيادة الثقة بالنفس عند الأطفال؟
طفلك مُحاط بعوامل كتير بتأثر على صحته النفسية، وتركيبة شخصيته، وصعب تتحكمي فاللي ممكن يقابله طول الوقت. والحل هنا بيكمن في إعداد طفلك بشكل صحيح عشان يقدر يواجه العالم،
ومن أهم الصفات اللي لازم تغرسيها في طفلك هي الثقة بالنفس، لإن الطفل الواثق من نفسه هيكون جاهز للتعامل بشكل أفضل مع الضغوطات والمشاعر السلبية اللي هتقابله في الحياة.
عشان كدا في المقال دا هنوضحلك أهم الطرق اللي ممكن تطبقيها عشان تزودي ثقة طفلك في نفسه.
علامات عدم الثقة بالنفس عند الأطفال
ممكن يواجهك أوقات متعرفيش تحددي فيها إذا كان طفلك بيثق في نفسه ولا لأ، وعشان كدا قبل ما تبحثي عن طرق زيادة الثقة بالنفس عند الأطفال، لازم تعرفي الأول هل طفلك بيعاني من عدم الثقة في نفسه فعلًا ولا دي مجرد حالة عرضية.
ودي مجموعة من العلامات اللي هتساعدك في دا:
- بيتجنب الطفل أي مهام أو تحديات جديدة، ودا مؤشر قوي لخوفه من الفشل، أو إحساسه بالعجز.
- بيعاني من تغيُّرات كبيرة في الروتين اليومي، زي: اضطرابات الأكل، واضطرابات النوم.
- بيعاني من تغُّير سريع في الحالة المزاجية، والانفعال السريع.
- بيفقد اهتمامه بأنشطته المعتادة، ودرجاته الدراسية بتقل.
- بيبعد عن صحابه، وبيرفض تكوين صداقات جديدة.
- بيكذب أو بيلقي اللوم على الآخرين عند الخسارة.
- بيعلق على نفسه بشكل سلبي.
وجود العلامات دي عند طفلك أو حتى جزء منها بشكل مستمر، بيكون مؤشر لمعاناته من عدم الثقة في النفس، وبالتالي لازم تساعديه يخرج من الحالة النفسية دي، عن طريق إنك تعرفي أكتر عن طرق زيادة الثقة بالنفس عند الأطفال، واللي هنتكلم عن أهم 16 طريقة منها.
أبرز 16 طريقة لزيادة الثقة بالنفس عند الأطفال
الثقة بالنفس واحدة من أبرز صفات الناجحين، ولازم نزرعها في أطفالنا في سن صغير، عشان يكبروا وهما واثقين من نفسهم، ويقدروا يحققوا إنجازات، ويوصلوا لأحلامهم وأهدافهم، ومن أهم طرق زيادة الثقة بالنفس عند الأطفال بنلاقي:
1- اعتذري لطفلك لو أخطأتي
كل الآباء والأمهات ممكن يتصرفوا بطريقة غلط مع أطفالهم، ودا بيكون نتيجة لخوفهم عليهم أو عدم معرفتهم لطريقة التعامل المظبوطة أو غيره، وبعض السلوكيات دي بتأثر على ثقة الطفل في نفسه، وبتزود الخوف عنده، وبتحسسه إنه مش مهم، وبتلغي شخصيته.
وعشان تتخطي دا مع طفلك ممكن تستخدمي ثقافة الاعتذار، لإنها من أهم طرق زيادة الثقة بالنفس عند الأطفال، ودا عن طريق إنك تقولي “أنا أسفة، أنا اتبعت معاك أساليب مش صح، ومن غير قصد، لكن أنا بحاول أحسّن من سلوكياتي، عشان نعيش أنا وأنت في سلام”.
وبالتالي الطفل بيحس بأهميته وبتزيد ثقته في نفسه، وكمان دا بيطلّع من جواه أي حزن أو غضب مكبوت من أمه أو أبوه نتيجة لأي تصرف خاطيء، زي إنك تعلي صوتك عليه، أو تضربيه قدام حد، أو تحرجيه.
اقرئي عن: أهم 10 طرق التربية الإيجابية للطفل 3 سنوات
2- خليه يمارس الرياضة
عودي طفلك على ممارسة الرياضة، لأنها بتساعده يخرّج الطاقة السلبية، وبتزود الطاقة الإيجابية، خاصةً الرياضات الجماعية اللي بتساعده يكون اجتماعي، ويكوّن صداقات، ويتفاعل مع أطفال من سنه أو ناس أكبر منه سواء مدربينه أو أهالي أصحابه.
دا غير إن ممارسة الرياضة هتزود عنده الحماس والشجاعة على دخول أي تحدي مع أصحابه أو مع الفريق المنافس، وبالتالي لما يكسب هيحس إنه عمل إنجاز، ودا بالتأكيد بيزود ثقته في نفسه.
اعرفي: كيف تختار الرياضة المناسبة للطفل
3- اغمري طفلك بالحب والرعاية والاهتمام
من أهم طرق زيادة الثقة بالنفس عند الأطفال هي تشبُّع الطفل بحنان الأم والأب. فمهم جدًا تغمري طفلك بالحب والحنان، وتحسسيه إنه محبوب من غير شروط.
لإن دا بينعكس على شخصيته وزيادة ثقته بنفسه، فبيشجعه يعبر عن مشاعره، ويتكلم براحته بدون انتقاد، أو أوامر، أو تصرف يقلل من شأنه، وبيخلي الطفل يفهم إنه محبوب من أجل ذاته، مش من أجل تصرفاته.
4- اصنعي لطفلك دفتر إنجازات
اعملي دفتر إنجازات لطفلك يكتب فيه أي إنجاز بيحققه، زي: أنا نجحت في العربي، طلعت الأول على المدرسة، أخدت شهادة تقدير، حفظت سورة جديدة من القرآن، وهكذا.
بمرور الوقت هيكون عنده دفاتر إنجازات كتيرة، ودا هيحسسه بإنه ناجح، وهيزود من ثقته في نفسه.
5- كلميه عن نفسه
كلمي طفلك عن عدل ربنا، وإن ربنا خلق كل شيء بهدف، وإنه خلقه في أحسن صورة، وأنعم عليه بقدرات خاصة بيه هو، ويقدر ينميها بمرور الوقت، وإنه ليه دور في الدنيا.
وإن ربنا بيحبه، وعشان كدا إداله إمكانيات وقدرات، سواء عقلية، أو بدنية، والتصرف دا بيعد من أهم طرق زيادة الثقة بالنفس عند الأطفال الفعّالة بشكل كبير.
6- اكتبي صفات طفلك الإيجابية في لوحة
علقي لوحة لطفلك وسجلي فيها صفاته الإيجابية، كتحفيز ليه على التصرفات والأفعال الإيجابية، وشجعيه عليها.
خليه يعلق شهاداته في غرفته، أو امتحان نجح فيه والمدرس كتبله كلمة كويسة، كل دا بيخليه يركز على الإيجابيات اللي عنده، ويزود ثقته في نفسه.
7- خلي طفلك يتكلم مع نفسه بشكل إيجابي
من أهم طرق زيادة الثقة بالنفس عند الأطفال وأكثرها فعالية، إنك تخليه يردد كلام إيجابي عن نفسه. خلينا نقولك إن دماغ الطفل بتعيد الانتقادات اللي بتتقال له، وبيكوّن عن نفسه فكرة سلبية، زي: أنا شقي، أنا غبي، أنا مبعرفش اتصرف، وكلام تاني مش صح.
ودا ممكن تعالجيه عن طريق إنك تخلي طفلك يقف قدام المراية، ويركز في عينيه، ويقول كلام إيجابي، زي: أنا شاطر، أنا كويس، ماما بتحبني، أنا متقبل نفسي، أنا هنجح، وهكذا.
بمرور الوقت؛ الطفل هيتعامل مع نفسه بإيجابية، وهيحمّس نفسه، عشان اتكون جواه إيمان داخلي بنفسه إنه كويس، وإنه قادر يحقق أي حاجة بيحلم بيها.
8- كلفي طفلك بمسؤوليات صغيرة
من أبرز طرق زيادة الثقة بالنفس عند الأطفال إنك تبدئي تكلفيهم بمسؤوليات صغيرة في البيت، دا بيحسسهم بالمسؤولية والانتماء، وإنهم أشخاص يُعتمد عليهم في أداء المهام، زيهم زي الكبار.
كلفي طفلك بالتدريج بمهام بره البيت، زي:
- يشتري حاجة للبيت من السوبر ماركت.
- يختار اللبس الجديد.
- يحاسب الكاشير.
دا هيديله إحساس بالمسؤولية والاستقلالية، وهيخليه يفهم إن له رأي، وإن رأيه مهم بالنسبة لك.
9- شجعي طفلك على تكوين صداقات
تكوين الصداقات مهم للطفل؛ إنه يكون مُحاط بأطفال كويسين وبيشجعوه على الأفعال الإيجابية، دا هيحسسه بالأمان، والإقبال على الحياة، وهيزود كمان مرونته في التعامل مع الآخرين، وبالتالي ثقته بنفسه هتزيد.
10- شجعي طفلك على اكتساب مهارات جديدة
شجعي طفلك على تجربة مهارات جديدة، بدل التركيز طول الوقت على الحاجات المتفوق فيها، لإن التنويع مهم، والتشجيع بالطريقة دي من أنجح طرق زيادة الثقة بالنفس عند الأطفال، لإنه بيحسسهم إن عندهم إمكانيات بيقدروا يستغلوها وينجحوا في أكتر من شيء.
وتقدري تطلعي على أهم 24 أنشطة للأطفال سن 10 سنوات، عشان تعرفي أكتر عن الأنشطة المختلفة اللي ممكن طفلك يهتم بيها.
11- شجعي طفلك على المخاطرة بخطوات بسيطة
الخوف والخجل من المشاعر اللي ممكن تسيطر على طفلك؛ الخوف من الاختلاط، والخوف من الدخول في فريق واللعب، وأبسطها إنه ما يرفعش إيده للإجابة على سؤال خوفًا من الانتقاد أو الفشل.
كل دي مشاعر طبيعية، لكن أفضل شيء إنك تساعدي طفلك ياخد الخطوات الأولى، ويقبل بالنتيجة، ويتعلم من أخطائه، ويعرف إنه بمرور الوقت هيتعلم، ويتطور، ويكون أفضل.
12- امنعي طفلك من مقارنة نفسه بالآخرين
النقطة دي بتعتمد عليكي بشكل كبير، متقارنيش بين طفلك وأي طفل تاني في أي شيء، سواء في مستوى دراسي أو رياضي، أو صفة أو تصرف، لإن دا بيحسسه بالنقص، وبيهز ثقته في نفسه.
لازم الطفل يفهم إن مفيش حد كويس في كل حاجة، والأفضل يقارن بين نفسه حاليًا ونسخته القديمة، إيه الفرق بين دلوقتي وقبل كدا، ودي من أهم طرق زيادة الثقة بالنفس عند الأطفال.
13- اسمحي لطفلك بالفشل
ابعدي عن فكرة الانتقاد والتركيز على سلبيات طفلك، واسمحي لطفلك بالفشل والخطأ، عشان يتعلم من أخطائه، ويعرف نتيجتها إيه.
علمي طفلك ازاي يتخطى أي فشل، ويكون دافع ليه ينجح ويتعلم، دا هيزود من ثقته في نفسه وفيكي، وهيشجعه يبذل مجهود عشان ينجح، وما يقعش في نفس الخطأ مرة تانية.
14- شجعي طفلك يكون عنده أهداف
من أهم طرق زيادة الثقة بالنفس عند الأطفال هي إنك تشجعي طفلك على تحديد أهداف يوصلها، وتعلميه ازاي يقسم الهدف الكبير لأهداف صغيرة، وازاي يحققها، دا هيحسس طفلك بالقوة، ونجاحه في تحقيق الأهداف الصغيرة هيشجعه، ويزود ثقته في نفسه للنجاح في الأهداف الأكبر.
ضروري كمان تساعديه يتعلم ازاي ينظم وقته بين كل المهام اللي عنده، وتقدري تعرفي أكتر عن دا من خلال مقال: 5 نصائح تنظيم وقت الأطفال في المنزل وجداول جاهزة للتحميل.
15- اهتمي بالتشجيع الوصفي
أمهات كتير بتعاني من إن ممارسة التربية الإيجابية وتشجيع الطفل جايب نتايج عكسية، ودا لإن ببساطة بيتم استخدام أداة التشجيع بشكل خاطيء، فالأم بتشجع الطفل على كل شيء، ودا بيترجم للطفل إنه شاطر من غير ما يبذل مجهود، لكن التشجيع الوصفي بيكون مختلف.
التشجيع الوصفي دا يعني أبرر تشجيعي زي: أنا مبسوطة منك لإنك سمعت الكلام وعملت اللي اتفقنا عليه.
وبالتالي ربطنا التشجيع بالتصرفات الصح، دا مش معناه إننا ما نشجعش أطفالنا في وقت الفشل أو الخطأ، لكن معناه إن التوسط في المدح مهم، وإن لازم نستخدم أداة التشجيع بشكل صحيح، لأن دا:
- بيعالج عند الطفل مشاكل الخوف، وفقدان الثقة بالنفس.
- بيتعلم يقدر نفسه، وما يستناش التقدير من حد.
- بيعلمه يجرب تجارب جديدة وميخافش منها.
اهتمي بالتشجيع الوصفي، لإنه من أهم طرق زيادة الثقة بالنفس عند الأطفال.
16- تجنبي استخدام الكلمات التقييمية
حاولي تتجنبي الكلمات التقييمية زي: أنت شاطر وأنت مش شاطر، أنت حلو وأنت مش حلو، لإن الطفل بيربط بين ردة فعلك وتقييمك للفعل اللي بيعمله، فلو مرة عمل نفس الفعل وما أخدش نفس رد الفعل ممكن يتوقف عنه.
الصح إنك تعلمي طفلك ازاي يقيم نفسه ويقدرها، مثال: رسم حاجة، وبيسألك عن رأيك فيها، اتبعي الطريقة دي:
- قوليله إنك أخدتي بالك إنه كان مندمج ومبسوط وهو بيرسم.
- اسأليه أنت رأيك فيها إيه؟ وإيه أكتر لون حبيته؟
بكدا تكوني استخدمتي واحدة من طرق زيادة الثقة بالنفس عند الأطفال، وهي إنك سمحتي له يقيم نفسه، وكمان فهمتيه إنك واخدة بالك منه، ومهتمة بيه.
ووفقًا لدراسة شملت رأي ألف من الآباء، وألف من المعلمين، للإجابة عن سؤال “من المسؤول عن تنمية ثقة الطفل بنفسه؟”، واللي ذكرها موقع “The Extreme Academy“، فبنلاقي إن 72% من أولياء الأمور قالوا إن المعلم هو المسؤول، في حين إن 78% من المعلمين قالوا إن ولي الأمر هو اللي بيتحمل المسئولية دي.
لكن خلينا نتفق إن المسؤولية المشتركة بين الآباء والمعلمين هتحقق نتايج أفضل بكل تأكيد.
الخلاصة
الوالدين ليهم دور أساسي في بناء ثقة الطفل بنفسه، وتوجيه الاهتمام للتفاصيل الصغيرة المتعلقة بيه، وفهم كل مراحل تطوره، وتقديم الدعم المستمر لغرس أساس قوي لتكوين شخصيته، وزيادة ثقته بنفسه.
وخليكي متأكدة إن التربية مش مستحيلة، لكن محتاجة منك مجهود، وقراءة كتير عن أساليب التربية الصحيحة، وسمات كل مرحلة بيمر بيها الطفل، وكيفية التصرف فيها، وازاي نغرس في أطفالنا صفات مهمة واللي أهمها هي الثقة بالنفس، واللي تقدري تنميها في طفلك بطرق زيادة الثقة بالنفس عند الأطفال المذكورة.
المصادر
9 Ways to Boost Your Child’s Self-Esteem.
أضف تعليق