حلم كل أب وأم إن أطفالهم يكونوا الأفضل في الدراسة، وعلى خُلُق، وأذكياء، ويوصلوا لأعلى المناصب، ويحققوا كل أحلامهم، ودا بيخلق تحدي إنهم يلاقوا النموذج الصحيح للتربية الإيجابية اللي يوصّل أطفالهم لدا.
وبتكون البداية من عمر 3 سنوات، اللي يقدروا يعلموا الطفل كل القيم اللي محتاج تكون عنده.
هنعرض لك من خلال المقال مراحل تطور الطفل في عمر 3 سنوات، وأهم 10 طرق التربية الإيجابية للطفل 3 سنوات، تابع معنا.
مراحل تطور الطفل في عمر 3 سنوات
الطفل في السن دا بيتطور بشكل كبير، والتطور دا بيتمثل في:
تطور اللغة والتواصل
الطفل في السن دا بيتعلم مصطلحات كتيرة يوميًا من خلال الاستماع لوالديه وكل اللي حواليه، وبيقدر يتواصل مع الآخرين، ويخلق حديث معاهم، أو يحكي قصة من خياله.
فمهم نركز في تطبيق طرق تطوير مهارة التواصل عنده؛ من خلال قراءة القصص، والحديث معاه.
الجانب البدني
بيكتسب الطفل حوالي 2 كجم عن السنة السابقة، وما يقرب من 7.5 سم في الطول، وبيبدأ شكل جسمه يكون منسق.
وبيبدأ يتحرك بشكل أفضل، ويمسك القلم ويكتب بتحكم عن قبل كدا، وبيقدر يلعب من خلال القفز والجري والمشي بشكل متزن كمان.
نقدر هنا ندخل كل الأنشطة الحركية اللي تربط بين عقله وجسمه، وتملى وقته أكتر من الجلوس أمام الشاشات لفترة طويلة.
الجانب العاطفي
قبل ما نتكلم عن طرق التربية الإيجابية للطفل 3 سنوات لازم تعرف إن الطفل بيبقى واعي أكتر لمشاعره المختلفة في السن دا، وقادر على فهم مشاعر الآخرين والتفاعل معاها، فيبدأ يهتم بأصدقائه لو حد فيهم بيبكي.
وممكن ننمي الجانب دا من خلال كتب مصورة لرسومات بتعبر عن مشاعر مختلفة، ونسأل الطفل الشكل دا بيعبر عن إيه؟ وإيه التصرف السليم لما نشوف حد كدا؟.
لكن بتستمر معاه نوبات الغضب والحزن اللي ما بيقدرش يسيطر عليها، وبتحتاج تعامل خاص.
تقدر تشوف طريقة التعامل الخاص للطفل العصبي من خلال: كيفية التعامل مع الطفل العصبي.
الجانب المعرفي
بتتحسن الوظائف الإدراكية عند الطفل في عمر 3 سنوات، فبيبدأ يفكر في اللي بيحصل حواليه بشكل مختلف، وممكن ينفذ حاجات مختلفة ومبتكرة في وقت الأنشطة والمهام، وفي نهاية السنة الثالثة، بيكون الطفل قادر على:
- فهم الأوقات المختلفة من اليوم الصبح والليل، وتمييز أيام الأسبوع.
- اتباع التعليمات اليومية البسيطة، زي: اغسل وجهك، ونظف أسنانك.
- تذكر القصص المفضلة ليه ويقدر يعيدها تاني.
اقرأ أيضًا: 7 مبادئ تعليم الكتابة للطفل من سن 3 – 5 سنوات.
أهم طرق التربية الإيجابية للطفل 3 سنوات
بعد ما عرفنا أهم التغيرات اللي بتحصل للطفل في عمر 3 سنوات في شخصيته، وتفكيره، وقدرته البدنية، دا بيتطلب منك تغيير في معاملة الطفل بمنطق جديد، وأسلوب تربية مناسب لعمره.
ودا بتأيده دراسة اتنشرت على موقع ResearchGate عن أهمية التربية الإيجابية للأطفال في عمر ما قبل المدرسة، ووجدوا إن الأطفال اللي اتربوا واتعلموا بشكل إيجابي كان عندهم مؤشرات عالية من الرفاهية الذاتية، والصحة العقلية عن الأطفال اللي اتربوا بشكل تقليدي.
ومن أهم طرق التربية الإيجابية للطفل 3 سنوات:
1- الاستماع إلى الطفل
محتاج تحسس طفلك إن مشاعره مهمة، ولازم يعبر عنها، ودا من خلال إن التعامل في الأسرة يكون قائم على المحبة، والعطف، واهتمام الأفراد ببعضهم، ولكن مع وضع حدود ثابتة للطفل.
لإن الاستماع أمر مهم لفهم الأسباب وراء أي سلوك للطفل سواء إيجابي أو سلبي، دا غير إنك بتعرف مخاوف طفلك ورغباته، فتقدر وقتها تطمنه، وتوفر له الدعم.
2- وضع القوانين وتوضيح العواقب
صعب تتحكم في تصرفات طفلك طول الوقت، وبيكون مطلوب منك مجهود كبير جدًا لتغيير سلوك معين عند الطفل.
عشان كدا الأفضل هو وضع قوانين واضحة وثابتة للطفل، زي: ممنوع الشتم لأي سبب، وما ينفعش تمشي مع حد غريب، والخروج من البيت لازم يكون معاك حد كبير، وممنوع التنطيط على السرير، أو تاخد حاجة مش بتاعتك، وهكذا.
واشرح للطفل كل قاعدة فيهم واتأكد إنه فهمها، ووضحله إيه السلوك الصحيح البديل، زي: لو حد ضايقك تعالى قولي، الكتابة بتكون على الورق، والتنطيط واللعب مش في أوضة النوم.
وبعدين وضح عواقب أي تصرف هيقوم بيه، وإنك مش هتتنازل عنه، ودا أفضل بكتير من أساليب العقاب اللي كلها تأثيرها سلبي على الطفل.
ولو الطفل بدأ يعمل سلوك خطأ قدامك حذره بلطف وقوله “افتكر إنك لو ضربت أخوك، هتتحرم من اللعب”، ومتاخدش موقف على طول.
3- إعطاء الطفل خيارات
من أفضل طرق التربية الإيجابية للطفل 3 سنوات؛ هو إعطائه خيارات، دا بيمنحه شعور بالاستقلالية، والسيطرة على بعض الأمور، وبالتالي دا هيقلل من نوبات الغضب والعند عنده.
زي إنك تخليه يشارك في اختيار الملابس، أو نوع الخضار اللي ياكله، وهكذا.
4- تشجيع الطفل
خلق بيئة محفزة للطفل بتساعده على الإبداع والتحدي في تنفيذ الأفضل، ودا من خلال الأنشطة والألعاب اللي بتخليه مشغول، وفي نفس الوقت بتنمي مهاراته.
فعلى سبيل المثال أفضل من إنك تقوله “شاطر حليت البازل”، قوله “حليت البازل المرة دي أسرع من المرة اللي فاتت، أنت بتتحسن بشكل كبير”.
والطريقة دي ليها أثر كبير على الطفل،ودا اللي وضحته دراسة اتعملت في جامعة رادبود في هولندا لاكتشاف مدى تأثير الممارسات التربوية الإيجابية من الوالدين على الطفل، زي (الدعم، والتحفيز، والانضباط الإيجابي).
ووجدوا إن الأطفال اللي حصلوا من أهلهم على الدعم والتشجيع كانوا أفضل في تخطي الصعوبات الاجتماعية والعاطفية عن غيرهم من الأطفال.
5- احترام الطفل
لما بتهتم بإنك تمنح طفلك خيارات لبعض الأمور الخاصة بيه، وتناقشه في أمور خاصة بأسرته زي هتقضوا الإجازة فين، أو تمهد له إنكم هتنقلوا من البيت لأسباب معينة، وتسأله عن رأيه، كل دا بيزيد من ثقة الطفل في نفسه، وبيحترم الآخرين وبيتعامل معاهم بطريقة تعاملك معاه.
دا غير إنك لازم تمدحه على تصرفاته الجيدة، زي: إنه بيلبس لوحده، أو بينظم أوضته، أو بيجمع ألعابه.
6- الاهتمام بإتقان مهارات جديدة
أوقات كتير بترتبط سعادة الطفل بمهارة معينة أو ممارسة رياضة زي كرة القدم أو السباحة، لإن دا بيحسسه بنوع من السيطرة على حياته، وبيطور مهارات التواصل الاجتماعي عنده، وبيخلق نوع من المثابرة والتحدي للتحسن.
دا غير إن تقدير الآخرين للجهد اللي بيبذله والنتايج اللي بيحققها بيديله شعور بالنجاح والتميز.
7- السماح للطفل بالتعبير عن مشاعره
اسمح لطفلك بالتعبير عن أي شعور بيحس بيه، واسمع السبب ورا شعوره دا، وما تحاولش تجبره يغيره أو تقلل منه، وتلقي عليه ألقاب سلبية زي “جبان، خواف، نكدي”.
والأفضل تسيب لطفلك فرصة يعبر عن مشاعره، وتدعمه لو عنده حق فاللي حاسس بيه، وتفهمه إن طبيعي نحس بالحزن أوقات.
8- إشباع الفضول
الطفل في عمر 3 سنوات بيكون عنده روح المستكشف عاوز يعرف كل حاجة حواليه، ومن أكتر الحاجات الغلط اللي الأهل بيعملوها، إنهم بيمنعوه منها من غير ما يفهموا سبب فضوله ناحية الأمر دا، أو هو كان ناوي يعمل إيه.
يعني لو كسر بيضة، فهمه أولاً إنها مش للعب، ووضحله إيه مكونات البيض، وإزاي ممكن يطلع منه كتكوت.
شرحك للطفل الأمور اللي ما يعرفهاش بينشيء طفل ذكي ومبدع.
تعرف على: أهم 8 علامات ذكاء الطفل بعمر الثلاث سنوات.
9- التركيز على المشاركة
التربية الإيجابية قايمة على مشاركة الوالدين للطفل، في كل جوانب حياته، الدراسة، واللعب، والنقاش، وأعمال البيت اللي تتناسب معاه.
لإن المشاركة من أهم المبادئ اللي لازم تغرسها في طفلك من عمر 3 سنوات، لإنها بتعلمه ما يكونش أناني، ويساعد اللي حواليه.
10- تعليم الطفل الفرق بين الصواب والخطأ
في رحلتك لتطبيق طرق التربية الإيجابية للطفل 3 سنوات لازم توضح لطفلك الفرق بين السلوكيات الصحيحة والسلوكيات الخاطئة، وتفهمه الآداب العامة، زي: إزاي يتكلم مع الأكبر منه، يشكر لو حد إداله حاجة، يتكلم بشكل كويس، يخبط على الباب قبل ما يفتح وهكذا.
نصائح لتدعيم التربية الإيجابية عند الوالدين
وضحنا في الفقرة السابقة أهم طرق التربية الإيجابية للطفل 3 سنوات، وعشان الطرق دي تتحقق بيتطلب من الأهل بعض السلوكيات، زي:
اتباع أسلوب الحزم
في حال وضعك للقوانين وشرحك ليها وتوضيح العواقب، خليك حازم جدًا في تنفيذ العقاب من غير تراجع، لإن دا بيفهم الطفل إنه هيتحاسب على سلوكياته الخاطئة، وبالتالي مش هيرجع يعملها تاني، وهيولد عنده شعور الالتزام.
معرفة أساس السلوك
قبل ما تعاقب طفلك على فعله الخطأ، اسأله عن سبب سلوكه، لإن دايمًا هيكون عنده حافز لدا، ممكن يكون زعلان من حاجة معينة، أو عاوز يلفت انتباه الأب والأم.
فلو عرفت السبب وعالجته؛ هتتجنب حدوث السلوك السيئ.
إنشاء روتين منتظم
الطفل بيتعلم بالمحاكاة يعنى لو شاف أهله كل يوم بيصلوا، وكل فرد بينظم غرفته، وفي اهتمام بغسل الإيد وتنظيف الأسنان قبل الفطار كل يوم، الطفل هيتعود على دا، وهينفذه بشكل تلقائي، وهيكون عنده توقع لسلوكيات البيت.
ضبط المكافآت
بعض الأهالي بيقعوا في خطأ إن كل فعل إيجابي للطفل يكون عليه مكافآة، أو عشان يتصرف بشكل طبيعي أو حتى يعمل حاجة أساسي يكون في اتفاق على هدية، ودا خطأ كبير.
يعني ما ينفعش لو روحت التمرين هجبلك كذا، لو روحنا عند حد وفضلت هادي هتاخد كذا، سيب دا عشان تاخد دا، لإن دي كلها أمور طبيعية لازم يعملها.
التربية سلوك هدفه على المدى البعيد، وأهميته بترجع لغرس القيم والمبادئ عند الطفل لإن دا الطبيعي مش عشان هيكون في مقابل لو دا حصل.
إعادة النظر
مش معنى إن الطفل اتصرف بشكل مش كويس يكون هو طفل سيئ، أو عنيد، أو غبي، ممكن يكون الطفل مفهمش إن تصرفه دا غلط، وإنك ما فهمتوش يتصرف إزاي بشكل سليم كفاية، فحاول تعيد عليه تاني وفهمه صح، وما تتسرعش في ردة فعلك.
اقرأ أيضًا: 7 أضرار ضرب الطفل في عمر الثلاث سنوات وطرق العقاب البديلة.
وأخيرًا، الطفل في عمر 3 سنوات بتتطور عنده جوانب كتير زي مهاراته اللغوية، والحركية، والبدنية، والعاطفية، وبيبدأ يستوعب التعليمات بشكل أفضل.
وهنا بييجي دور الوالدين في فهم التغيرات اللي بتحصل لطفلهم، وبيبدأوا رحلة التربية وغرس القيم فيه.
ومن أفضل طرق التربية الإيجابية للطفل 3 سنوات هي الاستماع للطفل وتفهم مشاعره، والكلام معاه بلطف، وتوضيح قوانين لسلوكياته والعواقب بحزم، والتشجيع والمدح؛ ودا بينعكس على صحته العقلية بشكل إيجابي في المستقبل، وعلى قيمه في الحياة.
المصادر
16 simple positive parenting tips for your 3 year old
أضف تعليق