7 مبادئ تعليم الكتابة للطفل من سن 3 – 5 سنوات

مبادئ تعليم الكتابة للطفل من سن 3 - 5 سنوات

مهارة الكتابة بتعد من أهم المهارات الأساسية اللي لازم نعلمها لأطفالنا قبل سن المدرسة؛ عشان يستعدوا لرحلة الدراسة، و عشان نقدر نعلمهم المهارة دي بالطريقة الصحيحة لازم نعرف الأول إزاي نأهلهم لتعلم الكتابة، ونعرف إيه المبادئ اللي المفروض نطبقها عشان نساعدهم يتقنوا المهارة دي.  

في المقال دا هنتعرف على أهم مبادئ تعليم الكتابة للطفل من سن 3 – 5 سنوات بالتفصيل، ونعرف إزاي نطبقها، عشان نوصل بأطفالنا لمستوى متميز، ونساعدهم على تطوير نفسهم.

متى أبدأ تعليم الطفل الكتابة؟

سن  من 3 – 4 سنوات هو السن اللي بيكون فيه الطفل عنده قابلية لتعلم مهارة الكتابة، وبيكون قادر على التحكم في القلم والإمساك بيه بالطريقة الصحيحة.

وبالتالي بيبقى من السهل إنه يبدأ يتعلم المهارة دي، أما لو بدأنا معاه من سن أقل فبنلاحظ إن الطفل مش بيقدر يستوعب المطلوب منه، وممكن يشعر بالضغط ويرفض إنه يمسك القلم.

محتاجين نأكد هنا إن كل طفل بيختلف عن التاني في قدراته، وبناءً عليه ممكن نلاقي طفل في سن 3 سنوات عنده قابلية للإمساك بالقلم، والبدء في تعلم الكتابة، وطفل تاني مش قادر يعمل كدا.

وبالتالي ما ينفعش نحكم على الطفل التاني بالفشل، لكن دورنا هنا إننا نبدأ معاه بالطريقة اللي تناسبه، ونأهله لتعلم أساسيات الكتابة، ومع الاستمرارية هنلاحظ تقدم كبير في مستواه.

اقرأ أيضًا: علامات ذكاء الطفل بعمر ثلاث سنوات

طيب إزاي نأهل الطفل إنه يتعلم الكتابة؟ دا اللي هنتعرف عليه حالًا.

تأهيل الطفل لتعلم الكتابة

قبل ما نبدأ مع الطفل في أساسيات الكتابة لازم يكون في تأهيل مسبق، عشان نتجنب إنه يشعر بالصعوبة أو الرهبة في الكتابة، وهنا بييجي دور ولي الأمر.

فمن الواجب على ولي الأمر إنه يكون فاهم إزاي يأهل طفله للكتابة، وإزاي يبدأ معاه بالطريقة اللي يستوعبها، عشان يقدر يوصل بيه لمستوى كويس.

ومن أهم النصائح اللي هتساعده في تأهيل الطفل لتعلم الكتابة بنلاقي:

  • التحلي بالصبر؛ لإن تعلم أي مهارة بيلزمه الاستمرارية والكثير من الوقت خصوصًا مع الأطفال
  • استخدام الألعاب التعليمية؛ ودا لإن دورها بيكون كبير في تشجيع الطفل على الكتابة
  • تعليم الطفل كيفية رسم الخطوط قبل تعليمه طريقة كتابة الأرقام والحروف
  • تجنب الضغط أو تعنيف الطفل في حالة رفضه التدريب على الكتابة
  • تشجيع الطفل في كل مرة يستخدم فيها الأقلام
  • حث الطفل على الرسم وتلوين الأشكال المختلفة
  • مساعدته على الإمساك بالأقلام بطريقة صحيحة
  • اختيار أقلام مناسبة لحجم يد الطفل
  • توفير عدة ألوان خشبية

بالإضافة لكدا ففي كمان مجموعة من مبادئ تعليم الكتابة للطفل اللي محتاجين نتبعها، عشان نقدر نوصل بالطفل لمرحلة كويسة، ونساعده يكتب لوحده. 

مبادئ تعليم الكتابة للطفل من سن 3 – 5 سنوات 

مبادئ تعليم الكتابة للطفل كتيرة، وبنبدأ نطبقها مع الطفل خطوة بخطوة على عدة مراحل مختلفة، عشان نضمن إنه هيستوعب اللي بنعمله بدون ما يحس بضغط أو إن في حاجة صعبة عليه.

ومن الضروري كمان إن ولي الأمر يكون على دراية بالمبادئ دي، وعارف الخطوات اللي هيتتبعها مع طفله، عشان يقدر يطبقها بنفسه، ويحدد مدى تطور طفله مع الوقت.

إدراك المبادئ دي غير مقتصر على أولياء الأمور، فبنلاقي إن القائمين على تعليم الطفل مهارات الكتابة في الحضانات لازم يكون عندهم الخبرة الكافية في تطبيق مبادئ تعليم الكتابة للطفل من سن 3 – 5 سنوات، عشان نضمن لأطفالنا تعليم جيد يساعدهم على تطوير مهاراتهم باستمرار.

ومن الحاجات اللي لازم ولي الأمر والمدرسين يدركوها هي 7 مبادئ أساسية لتعليم الطفل مهارة الكتابة:

المبدأ الأول: اختيار المنهج المناسب للطفل

اختيار المنهج المناسب لعقلية الطفل هو اللبنة الأولى من لبنات مبادئ تعليم الكتابة للطفل، لإن المنهج هو الأساس اللي هيعتمد عليه الطفل من بداية تعلمه مهارة الكتابة وأساسياتها لحد ما يتقنها.

ومن الطبيعي إن اختيار منهج تعليم الطفل مهارة الكتابة يكون صعب على ولي الأمر، عشان خبرته في المجال محدودة، وبالتالي تقدر هنا تستعين بمدرسين رياض الأطفال للاتفاق على منهج يناسب سن، وعقلية، ومهارات طفلك.

تطبيق المنهج دا بيتم خطوات بناءً على خطة مدروسة يمكن الاتفاق عليها بردو بمساعدة مدرسين رياض الأطفال، عشان ولي الأمر يتأكد إن الخطة دي مناسبة فعلًا لقدرات الطفل.

المبدأ الثاني: التدريب على وضعية الجلوس الصحيحة

بعد اختيار منهج تعليم الكتابة للطفل والاتفاق عليه مع المدرس بيبدأ ولي الأمر في تطبيقه مع الطفل، ولكن قبل تطبيقه بيتم تهيئة الطفل للجلوس في الوضعية الصحيحة للكتابة، عشان يقدر يتحكم في القلم، ويستخدمه بطريقة سلسة بدون ما يشعر بالصعوبة.

كمان الوضعية دي هتساعده يكون منتبه مع ولي الأمر، ويسمع التعليمات وينفذها، لإنه في أي وضعية تانية ممكن يحس بخمول وكسل، ويتهرب من التدريب على مهارة الكتابة.

هنا لازم نتأكد إن مكان جلوس الطفل مريح بالنسبة له، عشان نتجنب إنه يعاني من ألم في الرقبة أو الظهر بعد جلوسه في المكان دا لفترة. 

المبدأ الثالث: الاهتمام وضعية الصفحة المناسبة للطفل

وضعية الصفحة المناسبة للطفل

بعض أولياء الأمور بيتجاهلوا المبدأ دا من مبادئ تعليم الكتابة للطفل من سن 3 – 5 سنوات رغم سهولة تطبيقه أثناء التدريب على الكتابة، فالكتابة بتفقد انسيابيتها بالنسبة للطفل، وبنلاقي إنه بياخد وقت طويل عشان ينجز.

الوضعية الصحيحة للكتابة بيكون فيها ساعد الطفل موازي لطول الكتاب، مع وجود ميل في الكتاب بالنسبة ليد الطفل أو السطح اللي بيكتب عليه؛ عشان يحس بالراحة في الكتابة.

وبالتالي لازم نحرص إن وضعية الصفحة اللي الطفل هيكتب فيها تكون مناسبة وموجودة بالشكل اللي يساعده على الإنجاز في الكتابة.

المبدأ الرابع: الترتيب الصحيح لرسم الحروف

الترتيب الصحيح لرسم الحروف

أفضل طريقة ممكن تستخدمها لتعليم طفلك الحروف بالشكل الصحيح ليها هي إنك تفهمه طريقة رسم كل حرف لوحده بالخطوات بتاعته، يعني مثلًا في حرف الألف هنقوله إننا بنرسمه من فوق لتحت، وبعدين بنعمل الهمزة.

بعدها نوضح إزاي نرسم الهمزة بالزوايا بتاعتها لحد ما نوصل لشكلها المظبوط، ونكرر العملية دي لحد ما يعرف يرسم حرف الألف.

بعدها ننقل على الحرف اللي بعده، وهكذا لحد ما نخلص كل الحروف، ونتأكد إنه قادر يرسمها فعلًا بالطريقة الصحيحة.

المبدأ الخامس: الاعتماد على السمع في تعليم الكتابة

الاعتماد على السمع يعد من أهم مبادئ تعليم الكتابة للطفل من سن 3 – 5 سنوات، وبنلاحظ إنهم دايمًا في الحضانات والمدارس بيحفظوا الأطفال أناشيد الحروف والأرقام؛ لإنهم مدركين أهمية السماع في تعليم الكتابة.

التعود على سماع أصوات الحروف بيساعد الطفل إنه يربط بين شكل الحرف وصوته، وبالتالي بيقدر يفتكره بسهولة لما يسمع نطق الحرف، ومن هنا بيتضح أهمية الاعتماد على السمع في تعليم الكتابة.

اقرأ أيضًا: أهم 11 طريقة لتعليم الطفل القراءة ونصائح لتعلم أسهل

المبدأ السادس: الاعتماد على أنشطة مختلفة في تعليم الكتابة 

الاتجاه لاستخدام الأنشطة التعليمية والألعاب متعددة الحواس في تعلم المهارات الأساسية في الكتابة بيساعد كتير على إتقانها في وقت أقل، لإن الإنسان بطبيعته بيألف أي حاجة فيها لعب، والأمر بيكون ممتع جدًا بالنسبة للأطفال، وبيتعلموا وهما بيلعبوا بدون ما يشعروا بأي ضغط عليهم.

وبالتالي فمن مبادئ تعليم الكتابة للطفل من سن 3 – 5 سنوات إننا ننفذ بعض الأنشطة والألعاب مع الطفل، عشان نساعده يقدر يمسك القلم ويكتب بالشكل الصحيح، ومنها:

لعبة العصا الخشبية 

في اللعبة دي بنجيب علبة، ونعمل فيها ثقوب نقدر ندخل فيها عصيان خشبية صغيرة، وبنلون العصيان دي بلون الثقب ونخلي الطفل يحاول يدخل كل عصاية في مكانها الصحيح، ونلاحظ حركات إيده، ومدى مقدرته إنه يدخل كل قطعة في مكانها.

لعبة التقاط الحبات الصغيرة

هنا بنجيب مجموعة من الحبوب أو البذور ونبدأ نفردها على سطح معين، ونطلب من الطفل إنه يلتقط الحبوب دي باستخدام الـ 3 أصابع اللي ييستخدمهم في الكتابة، بس نحرص إن الحبوب تبقى قليلة عشان ما يحصلش ملل.

المبدأ السابع: تعليم ضبط حجم الخط وتناسق الحروف مع بعضها

في نهاية المطاف وبعد التأكد من تعلم الطفل المهارات الأساسية للكتابة بتيجي خطوة التحسين، وهنا بنعلم الطفل طريقة ضبط حجم الخطوط بحيث ما يبقاش في خط كبير وخط تاني صغير في نفس السطر.

كمان هنا بنحرص إنه يدرك أهمية تناسق الحروف مع بعضها، وكتابتها، ويتعود على النقطة دي، عشان مع الوقت يقدر يكتب بطريقة منسقة ومفهومة للقارئ.

وهنا نكون طبقنا مبادئ تعليم الكتابة للطفل من سن 3 – 5 سنوات بطريقة سليمة تساعد أطفالنا على إتقان الكتابة بسهولة.

الخلاصة

تعليم الطفل لمهارة جديدة بيحتاج الإلمام بمبادئ المهارة دي، وتنفيذها خطوة بخطوة، والصبر على الطفل، عشان نقدر نلمس نتائج ملحوظة. 

وبالنسبة لمهارة الكتابة ففي مجموعة من مبادئ تعليم الكتابة للطفل من سن 3 – 5 سنوات لازم عارفها كولي أمر، عشان تساعد طفلك يتعلم أسرع، وفي المقال دا ذكرنا لك أهم 7 منها. 

ابدأ في تنفيذ المبادئ دا مع طفلك، ولو قابلتك مشكلة مع الطفل ارجع لتربوي متخصص عشان يساعدك فيها.

وطبعًا لو عندك أي سؤال بخصوص المبادئ دي ما تترددش تسألنا. 

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق