كيفية إنشاء جدول للتعليم المنزلي مع نسخة جاهزة للتحميل

إزاي تعملي جدول للتعليم المنزلي لطفلك؟ 

في الفترة الأخيرة بدأ يتحمس عدد كبير من أولياء الأمور لفكرة التعليم المنزلي، واللي بتتولى فيها الأم مهمة التدريس لأطفالها في المنزل، وتنظيم يومهم بالشكل المناسب ليهم.

التعليم المنزلي ليه مميزات كتيرة جدًا زي: حرية اختيار المواد الدراسية المناسبة للطالب، وعدم تضييع الوقت في المدرسة، ومساعدة الطفل إنه يعيش حياة طبيعية بعيدًا عن النظام التعليمي التقليدي، بالإضافة لتحقيقه نتائج مذهلة في حال تنفيذه بالطريقة الصحيحة وتبعًا لجدول تعليم منزلي مناسب لطفلك. 

وفي المقال دا هناقش إزاي تقدري تعملي الجدول المناسب لطفلك، وإزاي تلتزمي بيه، وفي النهاية هنقدملك الحل اللي هيساعدك في تنظيم الجدول دا بكل سهولة.  

ماذا قبل إنشاء جدول للتعليم المنزلي المناسب لطفلك؟

قبل ما تبدئي تنظمي الجدول الخاص بنظام التعليم المنزلي لازم تكوني ملمة ببعض النقاط اللي هتساعدك في تخطيط جدول فعال وقابل للتنفيذ بدون ما يشكل ضغوطات نفسية على الطفل، ومن أهمها:  

1- تنظيم روتين يومي

أفضل ضمان لالتزام طفلك بجدول التعليم المنزلي هو بناءه على هيئة روتين يومي ثابت، فمثلًا وضع مواعيد محددة للاستيقاظ والنوم، بالإضافة لتحديد مواعيد ثابتة كمان للدراسة، وتناول الوجبات، وممارسة الرياضة، وهكذا,

فمع اتباع أسلوب الروتين طفلك هيتعود إنه ينفذ المهام في المواعيد الخاصة بيها، وبالتالي مش هيأجلها.

في البداية ممكن الطفل يواجه صعوبة في الالتزام بجدول التعليم المنزلي، وهنا بيكون الحل إنك تضيفي كل يوم مهمة صغيرة جديدة لروتين طفلك، وتدريجيًا هيكون عندنا جدول تعليم منزلي كامل ليوم طفلك بدون ما نسبب تعب أو إرهاق للطفل.  

2- تقسيم اليوم لفترات لا مهام

أثناء ترتيب يوم طفلك يفضل إنك تقسميه لفترات بدلًا من مهام مفردة، زي تقسيم اليوم لـ 4 أو 5 فترات، كل فترة مخصصة لعمل شيء محدد؛ مثلاً الدراسة أو ممارسة الأنشطة أو القيام بالأعمال المنزلية أو غيرهم.

ولكن مع تقسيم جدول للتعليم المنزلي لمواد دراسية أو مهام، الطفل هيلاقي نفسه قدام جدول معقد ومليان بالمهام والتفاصيل، واللي هينعكس على شعوره بإنه مكلف بأشياء كثير صعب يخلصها، وبالتالي سهل جدًا إنه يتكاسل في عملها.  

3- تخصيص وقت زائد لكل مهمة

في حال كانت الواجبات مثلًا بتستغرق من الوقت 4 ساعات لإنجازها، فالأحسن وأنتي بتعملي جدول للتعليم المنزلي إنك تخصصي مدة قدرها 5 ساعات للواجب.

ودا تحسبًا لأي ظروف طارئة ممكن تعطل الطفل، وبالتالي بتقللي تأثير الظروف دي على روتين اليوم كامل، وفي نفس الوقت بتساعدي الطفل يخلص المهمة.

4- عدم تقسيم المهمة على أيام وإنجازها في فترة زمنية محددة

بدلاً من إنجاز مهمة واحدة بجانب غيرها من المهام في كذا يوم يُفضل تفريغ يوم كامل لإنجاز المهمة بإتقان، والتفرغ لباقي المهام في الأيام اللي بعد كدا.

فعلى سبيل المثال، خصصي لطفلك يوم كامل لواجب الرياضيات، وفي اليوم اللي بعده خليه يتفرغ لمادة العلوم، واليوم الثالث لمادة اللغة الإنجليزية، وهكذا. 

الطريقة دي أكثر فاعلية، وبتقلل من تشتت الطفل اللي بيحصل لما يتنقل من مادة للتانية، بالإضافة لإنها هتوفر وقت كبير للطفل، واللي تقدري تستغليه في ممارسة الأنشطة. 

5- ربط المهام الجديدة بالعادات اليومية 

من أبرز الوسائل الفعالة في إنجاز المهام الصعبة هو ربطها بعادات يومية لا بد منها، زي تخصيص نصف ساعة للقراءة بعد وجبة الغداء، أو النوم مباشرة بعد انتهاء برنامج تلفزيوني معين.

وبكدا يتعود الطفل على إنجاز المهام بعد ما كان بيميل لتأجيلها، ومع الاستمرار هيقوم بيها لوحده، وبدون إرشاد من الآباء. 

6- فهم طبيعة شخصية الطفل

كل طفل ليه ميول وتفضيلات شخصية بتخليه يختلف عن غيره من الأطفال، وواحدة من أهم مزايا التعليم المنزلي إنه بيساعدك على استيعاب شخصية طفلك، وتخصيص نظام تعليمي كامل مناسب ليه.

وعلشان كدا من المهم إنك تراعي شخصية طفلك وأنتِ بتخططي لعمل جدول للتعليم المنزلي، فلو الطفل بيكون في أعلى درجات استيعابه بعد الفجر حاولي تستغلي الوقت دا كويس في الدراسة. 

وفي حالة إن الطفل مش بينجذب لنظم التعليم التقليدية والورقية فدورك وقتها إنك تضيفي بعض الأنشطة والوسائل البصرية أثناء شرحك للدرس؛ وبكدا تساعديه يحقق أعلى استفادة ممكنة، وكمان تحببيه في التعليم. 

7- إنشاء جدول مرن

وأنتي بتخططي لجدول للتعليم المنزلي لازم تكوني متوقعة إنه ممكن ما يناسبش طفلك من أول مرة، وفي البداية هتضطري تعدلي على الجدول لحد ما توصلي لنتيجة مرضية بالنسبالك، وتكون ملائمة ومريحة لطفلك.

وللسبب دا مهم إنك تعملي جدول مرن يسمحلك بإجراء التغيرات وقت اللزوم من غير ما نفقد الروتين بشكل كامل. 

8- التخطيط للأسبوع المقبل

كم مرة نسيتي إتمام أو جدولة مهمة ضرورية؟ 

طبعًا المشكلة دي بتتكرر باستمرار، وخاصة لو كنتي بتصممي الجدول لطفلك بشكل يومي.وعشان تتفادي المشكلة دي لازم تبدئي بالتخطيط بشكل أسبوعي، لإنك بالطريقة دي هتعرفي تحددي أولوية المهام المطلوبة من طفلك، وبالتالي تنظمي مهام الأسبوع بناءً عليها، 

كمان تقدري تستعيني بمفكرة تسجلي فيها يوميًا كل الأفكار الجديدة، والمهام المطلوب إتمامها على مدار الأسبوع القادم، وبكدا تضمني إنك مش هتنسي أي مهمة أو تأجليها عن موعدها المطلوب.

9- الاستعانة بالمحتوى المرئي على الإنترنت  

المحتوى المرئي على الإنترنت بيمثل حلقة بين التعليم والترفيه، فممكن تستغلي فترات الفتور أو الملل أثناء الدراسة بفيديوهات تعليمية، واللي بيكون ليها دور كبير في توصيل المعلومة، وفي نفس الوقت الطالب مش بيحس إنه يبذل مجهود كبير لما يشوفها.

اقرئي أيضًا: مناهج التعليم المنزلي للأطفال

 10- تعويض الوقت الضائع

مش دائمًا بيكون لينا سيطرة كاملة على الأوضاع المحيطة بالطفل، والنتيجة بتكون إن أي ظرف ممكن يأخر الطفل عن إنجاز المهمة في اليوم المحدد لها.

وعلشان كدا مهم إن الطفل يتعلم إنجاز المهام المتأخرة في وقت الفراغ أو الإجازات، وإن حصوله على الإجازة بشكل كامل مرتبط بإنجازه لكل المهام.  

اقرئي أيضًا: طرق التعليم المنزلي

ما هو الجدول الأنسب لطفلك؟ 

عشان نسهل عليكي ونساعدك قدمنا لك جدول للتعليم المنزلي تقدري تطبيعه، وتنظمي يوم طفلك باستخدامه بسهولة. 

الجدول متقسم لـ 9 خانات رأسية بتشمل أيام الأسبوع، وخانة الـ Block والـ Time، ومن خلال خانة الـ Block هيكون عندك الإمكانية لتقسيم اليوم لـ 4 فترات خلال اليوم مخصصين للمذاكرة وإتمام المهام والنشاطات المختلفة.

وفي خانة الـ Time هتحددي وقت كل مهمة من المهام المطلوبة من ابنك في كل فترة، وبكدا تكوني نظمتي مهام كل أيام الأسبوع. 

حملي جدول التعليم المنزلي ونظمي وقت طفلك.

كيفية إدارة وقتك بين عملك وجدول التعليم المنزلي لأطفالك

اختيارك لنظام التعليم المنزلي لأطفالك مش معناه انقطاعك عن عملك وتفرغك بشكل كامل لمتابعتهم، وإنما هدفه في الأساس هو تخفيف العبء والضغط، وإضافة المرونة لروتين أطفالك اليومي.

ولكن أحيانًا بتظهر مشكلة عدم القدرة على الموازنة بين عملك، وتعليم أطفالك تعليم منزلي، وحياتك الاحتماعية، واللي تقدري تحليها من خلال تنظيمك لوقتك بطريقة صحيحة واتباع بعض النصائح  المهمة زي: 

حددي أوقات فراغك وانشغالك

في بداية تخطيطك للجدول لازم تحددي أوقات فراغك وانشغالك، وكمان فترات تواجدك خارج المنزل، وعلى الأساس دا تقدري تبني جدول للتعليم المنزلي مناسب ليكي ولأطفالك.

توقعي عدم تنفيذ الجدول بشكل كامل

لازم تحطي في اعتبارك احتمالية حدوث اضطرابات في الجدول، وعدم القدرة على الالتزام بيه بدقة في كل الأوقات، وحاولي إن دا ما يأثرش عليكي نفسيًا أو يصيبك بالإحباط تجاه فكرة التعليم المنزلي.  

علمي أطفالك الاعتماد على نفسهم

كلفي أطفالك في أوقات انشغالك بإنجاز الواجبات البسيطة والمهام السهلة زي: مراجعة المعلومات السابقة، أو مشاهدة بعض البرامج التعليمية.

حاولي تزودي مسؤوليتهم تدريجيًا، وتشجيعهم على الدراسة بنفسهم دون مساعدة منك، وكلفي الأطفال الأكبر سنًا بمساعدة الأطفال الأصغر مع عدم التأثير على روتينهم الخاص.

غيري تنظيم الجدول مع تغيير مواعيدك

عيدي هيكلة جدول التعليم المنزلي مع تغيير مواعيدك بشكل ما يسببش ضغط ليكي، واستمتعي بقضاء وقت أكبر مع أطفالك بعيد عن ضغوطات الحياة والشغل.

الخلاصة 

وجود طفلك في المدرسة لساعات طويلة متواصلة مش هو الحل الوحيد للتفوق، وفي السنين القادمة متوقع يتزايد عدد الطلاب الملتحقين بأنظمة التعليم المنزلي.

وعلشان تقدري تنظمي وقت طفلك بكفاءة وذكاء في البيت قدمنا لك من خلال المقال مجموعة ملاحظات هتساعدك في بناء جدول للتعليم المنزلي، ووفرنا نسخة من جدول جاهز للطباعة. 

وطبعًا لو عندك أي استفسار بخصوص الجدول ما تتردديش تسألينا.