في الوقت اللي بيبحث فيه بعض أولياء الأمور عن مدارس مميزة ومختلفة ومناسبة لأولادهم، بيدور أولياء أمور تانيين عن مناهج التعليم المنزلي للأطفال عشان يبدأوا سنة دراسية جديدة معاهم.
طب إيه هو التعليم المنزلي؟ وإيه مناهجه؟
هنجاوبك عن كل الأسئلة دي وأكتر من خلال المقال، تابع معانا.
ما هو التعليم المنزلي؟
التعليم المنزلي هو نظام تعليمي بيعتمد في المقام الأول على التعليم خارج البيئة المدرسية، وقوانينها، وشروطها اللي ما بتناسبش بعض الأطفال.
وهنا ولي الأمر بيتبع مناهج التعليم المنزلي للأطفال، وهي مناهج مخصصة بيختار منها اللي بيتناسب مع مستوى طفله وسنه وقدراته كمان.
والطريقة دي بتراعي بشكل كبير فروق الأطفال الفردية، على عكس اللي بيحصل في بعض المدارس من إهمالها وتجاهلها.
اقرأ أيضًا: قائمة بأبرز 10 مدارس هوم سكولينج في مصر
ما أسباب الاتجاه إلى التعليم المنزلي؟
كتير من أولياء الأمور بيشوفوا التعليم المنزلي وسيلة جديدة ومختلفة للتدريس لأولادهم، ودا لأسباب كتير من أهمها إنه:
طريقة تعليم مرنة
في النظام دا من التعليم بنلاقي أولياء الأمور بيقوموا بأدوار كتير فيه، فهما المدرسين، والمشرفين، ودا بيخلي عندهم الحرية في تكوين تجربة مدرسية خاصة بأطفالهم من الألف للياء.
فبيختاروا المنهج اللي يناسب مستواهم، وبيخصصوا جدول التدريس على حسب مواعيدهم من غير ما يتقيدوا بفترات دراسية محددة.
فرصة للتعليم الخارجي
التعليم المنزلي مش بس بيكون في البيت، العالم الخارجي كمان بيبقى ليه دور كبير فيه، ودا لأن جزء كبير من التعليم المنزلي بيتم في الخارج، فبتكون الفسح، والخروجات، والسفر بمثابة دروس غير متوقعة للطفل للاستفادة والتطوير بجانب المتعة، ودا بيحقق ليه أكبر قدر من التعلم.
فرصة لتنفيذ فكرة تخصيص التعليم
في التعليم المنزلي ممكن نعلم الطفل الحاجة اللي هو فعلًا بيحبها ومبدع فيها وبتلفت انتباهه بشكل مخصص أكتر من باقي المواد، ودا طبعًا نادرًا ما بيحصل في المدارس.
فعلى سبيل المثال لو الطفل بيحب العلوم ممكن ناخد وقت أكتر في تدريس المادة دي عن طريق أنشطة متنوعة ومختلفة تلفت انتباهه أكتر، وتخرج مهاراته، وقدراته بشكل أكبر.
اقرأ أيضًا: أهم طرق التعليم المنزلي لطفلك
مناهج التعليم المنزلي للأطفال
التعليم المنزلي منتشر في بلاد كتير مختلفة، بل وكمان معتمد في بلاد أخرى ومعترف بيه، وبسبب انتشاره بتتنوع طرقه، وأساليبه، ومناهجه اللي بيتم التدريس من خلالها، على سبيل المثال:
1- مناهج الدراسة المنزلية التقليدية
الدراسة المنزلية التقليدية هي تعليم الطفل في المنزل بالمناهج الدراسية المستخدمة في المدارس الحكومية أو الخاصة أو غيرها، وبيتم تدريسها من خلال ولي الأمر في البيت أو المعلمين سواء على أرض الواقع أو من خلال الإنترنت.
ومناهج الدراسة المنزلية التقليدية بتفيد الطفل في إنه يبقى ماشي في نفس مستوى أصحابه من غير ما يكون مختلف عنهم أو بيدرس مواد دراسية ومناهج غيرهم.
2- مناهج الوحدات الدراسية
التدريس من خلال الوحدات الدراسية عبارة عن تنظيم المعرفة والمهارات اللي الطفل مفروض يتعلمها على شكل وحدات دراسية تتناسب مع ميوله، واستعداداته، وقدراته، وكمان رغباته.
ودا عن طريق إن كل وحدة بتتناول موضوع دراسي شامل يهم الطفل، ويناسب مستواه.
ومنهج الوحدات الدراسية من مميزاته إنه غير ممل، ودا لأن تدريس المنهج بطريقة الوحدات الدراسية بيتم عن طريق دمج المواد في وحدة واحدة، على سبيل المثال لو الطفل هيدرس عن مصر القديمة بيتم ترتيب الوحدة كالتالي:
- قراءة كتاب عن مصر القديمة (التاريخ)
- رسم خريطة لمصر القديمة في العصر الفرعوني (جغرافيا)
- تحديد ارتفاع الهرم (رياضيات)
- الطب في عصر مصر القديمة (علوم)
- تعلم اللغة المصرية القديمة (فنون اللغة)
وبالشكل دا بنقدر نجمع مواد مختلفة في وحدة واحدة، ودا بدوره بيساعد الطفل على الفهم بشمولية وترابط.
وممكن يتم تحديد المناهج دي من قبل ولي الأمر أو بمساعدة مراجع ومواقع مختلفة زي:
3- منهج مونتيسوري
تحت اسم ماريا مونتيسوري تم إنشاء منهج كامل متكامل، وهو من أهم مناهج التعليم المنزلي للأطفال اللي بيعتمد على فلسفة تربوية هدفها تنمية شخصية الطفل بصورة شاملة سواء من الناحية النفسية والعقلية والروحية والجسدية وكمان الناحية الحركية عشان تتم عملية نمو الطفل بأحسن شكل.
وبينقسم منهج مونتيسوري إلى 4 مراحل كالتالي:
- المرحلة الأولى: من الولادة إلى عمر 6 سنوات
- المرحلة الثانية: من 6 سنوات إلى عمر 12 سنة
- المرحلة الثالثة: من عمر 12 سنة إلى 18 سنة
- المرحلة الرابعة: من عمر 18 سنة وحتى 24 سنة
ومن أكتر مميزات المنهج دا هو إنه بيتناسب مع كل الفئات، وقابل للتطويع، فبيُستخدم مع الموهوبين وذوي الإعاقة بكل سهولة.
ويقدر ولي الأمر يتبع فلسفة منهج المونتيسوري ويفهمها بشكل كامل وكمان يحددها لطفله من خلال:
- كتاب “كيف تربي طفلًا رائعًا بطريقة مونتيسوري”
- موقع جمعية مونتيسوري الأمريكية.
- موقع Living Montessori Now
4- منهج شارلوت ماسون Charlotte Mason
من مناهج التعليم المنزلي للأطفال المنتشرة هي منهج شارلوت ماسون اللي بيتم تدريسه بواسطة الكتب الحية، وهي كتب تفاعلية بتجذب انتباه الطفل، وبتثير حماسه لتعلم المواد.
ودا بسبب أنها بتحاوره، وبتخلق بينها وبينه تجاوب عشان يتعلم بشكل مسلي وممتع بدل الكتب المدرسية، فبيتم تعليم الطفل من خلالها العلوم الطبيعية، والأدب، والفنون الجميلة بجانب تعليمه الانضباط الذاتي والمبادئ والأخلاق كهدف أساسي في المنهج دا.
كمان منهج شارلوت ماسون بيتبع فلسفة مختلفة، وهي التدريس للطفل في فترات قصيرة عشان ميملش وميزهقش، والوقت بيتحدد على حسب المرحلة الدراسية، فبيتم التدريس من 15 لـ 20 دقيقة للمرحلة الابتدائية، و45 دقيقة كحد أقصى للمرحلة الثانوية.
وبنلاقي إن منهج شارلوت ماسون من مناهج التعليم المنزلي للأطفال اللي بتعتمد على إن الطفل يتعلم من خلال المشي في الطبيعة، والتأمل في التاريخ والقصص، والعالم من حواليه.
وبالتالي الطفل بيتعلم بطريقة جديدة يستفيد من خلالها، ويستمتع في نفس الوقت، ويقدر ولي الأمر يتعرف أكتر على منهج شارلوت ماسون عن طريق:
- كتاب أسلوب تعليم شارلوت ماسون A Charlotte Mason Education
- كتاب رفيق شارلوت ماسون A Charlotte Mason Companion
- موقع AmblesideOnline
5- منهج التعليم اللامدرسي
التعليم اللامدرسي هو التعليم المنزلي اللي بيبعٌد كل البعد عن تعليم المدرسة ومناهجها، ودا لإن ولي الأمر في نظام التعليم دا هو اللي بيحدد المنهج المتبع مع طفله، وبيبقى مهتم جدًا إنه يتعلم من خلال التجربة بعيدًا عن التلقين والحفظ
التعليم اللامدرسي بيركز على تلبية فضول الطفل، من غير فرض قيود زمنية عليه زي مثلًا إنه يتعلم مواد معينة في سن محدد، أو يخلص منهج في فترة مقررة، ويقدر ولي الأمر يختار منهج لطفله بطرق مختلفة من أهمها وأشهرها هي البحث على مواقع مناهج التعليم المنزلي للأطفال.
مواقع البحث عن مناهج التعليم اللامدرسي للأطفال
مناهج التعليم المدرسي للأطفال بقت منتشرة ومتاحة في مواقع كتيرة جدًا، على سبيل المثال:
موقع أ ب ت
وهو عبارة عن موقع بيضم كم كبير من المواد التعليمية والترفيهية والأنشطة التفاعلية اللي بيتعلم الطفل من خلالها بشكل ترفيهي، والموقع في جزء من أنشطته مجانية، وفي جزء تاني بيحتاج اشتراك عضوية.
موقع رياض الجنة
الموقع دا بيهتم بتقديم المواد التدريسية للغة العربية والنشاطات الإسلامية، فيقدر ولي الأمر يوفر من خلاله محتوى لتعليم طفله اللغة العربية والدين الإسلامي، ودا طبعًا من أهم المواقع اللي بتقدم مناهج التعليم المنزلي للأطفال في اللغة العربية والتربية الإسلامية.
موقع Arabic Playground
عبارة عن متجر إلكتروني بيشترك فيه عدد من المدرسين وأولياء الأمور اللي بيدوروا على مناهج التعليم المنزلي للأطفال، ودا لأنه بيوفر عدد كبير من خيارات المواد التعليمية اللي من خلالها يقدر ولي الأمر يختار اللي يناسب مستوى قدرات طفله ومرحلته الدراسية.
كمان بيوفر عينات مجانية عشان التجربة قبل ما ولي الأمر يشتري المواد اللي هو محتاجها، ودا بيخليه مصدر ثقة لكتير من أولياء الأمور.
موقع Evan-Moor Publications
الموقع بيوفر مناهج باللغة الإنجليزية بتعتمد على التعلم البصري، ودا لأنهم بيهتموا برسم الصور في كل المواد عشان يزودوا المدخلات عند الطفل، فيفهم ويستوعب أكتر.
ومناهج الموقع دا بتناسب فئات عمرية مختلفة، لكنها بتحتاج دعم خارجي عن طريق قراءة كتب من المكتبة أو مشاهدة أفلام وثائقية.
ومن مزايا موقع Evan Moor إنه بيوفر خيار الكتب الإلكترونية اللي بتوصل مباشرةً بعد إنهاء العملية الشرائية من غير ما تحتاج تستنى للشحن اللي ممكن يتأخر.
موقع Calvert Education
ودا بيقدم واحد من أهم مناهج التعليم المنزلي للأطفال باللغة الإنجليزية، لأنه على مدار 100 سنة قدر يقدم منهج تعليمي منزلي للأطفال على مستوى العالم من سن 3 لـ 12 سنة.
ومن مميزات المنهج دا إنه بيوفر وسائط متعددة تفاعلية زي ألعاب لتنمية المهارات، ومقاطع الفيديو، واختبارات، ومختبرات افتراضية بتساعد الطفل على التعلم بشكل مميز.
ويقدر ولي الأمر يشتري المنهج المناسب لطفله الخاص بـ Calvert Education من على موقع eBay
موقع The Complete Classroom Press
بيقدم موقع The Complete Classroom Press منهج من مناهج التعليم المنزلي للأطفال مشابه لمنهج Evan Moor لكن ما بيعتمدش على الصور زيه.
بيتبني المنهج دا نظرية Bloom المعرفية اللي بتركز على تعليم الطفل استدراك المعلومات السابقة، ويضيف ليها كمان، فبيطلب منه البحث الإضافي عن المعلومات، ودا بيزود مهارة التعلم الذاتي عند الطفل.
المنهج متوفر فيه جميع المواد لجميع المراحل، بل وكمان هو من مناهج التعليم المنزلي للأطفال اللي بتوفر مواد تعليمية جديدة ومختلفة على عالمنا العربي، وبتساهم في توسع مدارك الطفل وتعلمه حاجات جديدة.
فمثلًا في كتب التاريخ الطالب بيدرس الحروب العالمية الأولى والثانية، وفي كتب العلوم السياسية بيتعرف على الأيديولوجيات المختلفة، وكذلك أنواع الحكومات والسلطات، ومفهوم الدستور، ودي مواضيع جديدة على الطفل نادرًا ما بتكون متوفرة في التعليم المدرسي التقليدي.
الموقع بردو بيوفر خيار الكتب بصيغة الـ PDF عشان يتم الحصول عليها مباشرةً بعد العملية التعليمية.
موقع مناهج العالمية
بيقدم واحد من مناهج التعليم المنزلي للأطفال اللي تم تصميمها مخصوص للمدارس الإسلامية في الغرب، لكنها بردو بتناسب الناطقين باللغة العربية، وبيوصي بيها أولياء الأمور، لأنها مميزة جدًا، وبتغطي اللغة العربية والدراسات الإسلامية من المرحلة الابتدائية لآخر المرحلة الثانوية.
الموقع الخاص بيهم مبيوصلش المناهج لكل البلدان، فتقدروا تطلبوا منهج اللغة العربية من موقع Noorart، ومنهج التربية الإسلامية من الرابط الخاص بالتربية الإسلامية لموقع Noorart بردو.
موقع Time For learning
من أشهر المواقع اللي بتقدم مناهج التعليم المنزلي للأطفال واللي بيعتمدها كتير من أولياء الأمور، وبتوفر برنامج تعليمي كامل لكل المواد ولكل المراحل الدراسية باللغة الإنجليزية.
وعلى سبيل المثال لا الحصر بنلاقي إن المنهج بيغطي:
- الدراسات الاجتماعية
- فنون اللغة
- الرياضيات
- العلوم
كمان الموقع بيوفر كورس Time For Writing اللي مدته 8 أسابيع لتعليم الطفل الكتابة وفنونها، وبيبدأ من المرحلة الابتدائية للمرحلة الثانوية، وبيناسب الأطفال اللي اللغة الإنجليزية مش لغتهم الأم، وبيتعلموها كلغة تانية.
ولأن التعليم بيكون Online، والموقع بيوفر مدرسين لتصحيح كتابة الأطفال، ومراجعتها، وتحريرها، وفي نهاية الكورس بيتم إصدار شهادة للطفل بدرجاته النهائية وملف دراسي كامل بإنجازاته من أول الكورس لآخره.
موقع Khan Academy
من أكتر مواقع التعليم المنزلي انتشارًا، ودا لأنه بيقدم مناهج التعليم المنزلي للأطفال -بشكل مجاني- بتركز معظم برامجه على الرياضيات، والعلوم، والهندسة، والبرمجة، وقليل من التاريخ واللغة، كمان بيوفر برامج للتحضير لامتحانات الـ SAT والـ LSAT والـ MCAT وغيرها.
والأكاديمية بتوفر على الإنترنت أكتر من 3600 محاضرة صغيرة عبارة عن مقاطع فيديو مخزنة في كل المواد اللي تم ذكرها، عشان الطفل يقدر يستفيد بأكبر شكل.
وفي الأخر نقدر نشبه التعليم اللامدرسي بالتحضير الكيميائي، اللي بيجمع فيه ولي الأمر مكونات وعناصر المنهج زي ما يحب عشان يطلع الناتج النهائي اللي بيشمل فوايد وخبرات مختلفة، عشان تناسب طفله.
الخلاصة
مناهج التعليم المنزلي للأطفال مختلفة وكتيرة، والميزة فيها إنها مرنة وقابلة للتعديل حسب احتياجات الطفل وقدراته، ودا اللي بيخلي ليها دور كبير في بنائه بشكل سوي، ومراعي لإمكانياته مهما كانت بدون تقييد.
وبكدا نكون وضحنا أكتر مناهج التعليم المنزلي للأطفال شهرة وانتشارًا، عشان تكون قادر تختار منها اللي يناسب طفلك.
أضف تعليق