إدارة الوقت هي مهارة مهمة لازم نحرص إننا نعلمها لأطفالنا في سن صغير؛ لإن تأثيرها بيعمل فارق كبير جدًا في حياتهم، وبيساعدهم على فهم الأولويات وترتيبها، وبالتالي بيخلي عينيهم دايمًا على هدفهم.
تعلم المهارة دي بيبدأ بإننا نفهِّم أطفالنا قيمة الوقت، ونساعدهم في عمل خططهم اليومية، ونتابعها معاهم، ومن هنا هيتعلموا النظام في كل حاجة بيعملوها، ويربطوها بعامل الوقت، ولكن الأمر بيحتاج للاستمرارية.
وفي المقال دا هنفهم إزاي نعلم الطفل قيمة الوقت، ونعرف طرق تنظيم وقت الأطفال في المنزل.
أهمية تعليم الطفل قيمة الوقت
عدد كبير من الأشخاص ممكن يوصلوا لمرحلة متقدمة من العمر وهم مش قادرين يديروا وقتهم بشكل صحيح، ومش مدركين لقيمة الوقت، ودا بينعكس بالسلب على إنجازهم للمهام اليومية وبيخليهم يضيعوا وقت كبير بدون أي إنجاز.
وعشان نتجنب دا فمن المهم إننا نعلم الطفل من صغره قيمة الوقت ونساعده على إدارته.
فهم قيمة الوقت هيوفر على أولياء الأمور جهد كبير في تنظيم وقت الأطفال في المنزل؛ لإنهم هيكونوا مدركين إن الوقت مورد محدود لازم نستغله عشان ننجز المهام اللي عندنا، ودا بيخليهم ينجزوا مهام أكثر في وقت قليل، ويستجيبوا أسرع للتعليمات والإرشادات.
كمان هيخليهم حريصين على إدارة الوقت بشكل صحيح بدون ما يلتفتوا للمشتتات المغرية اللي أصبحت موجودة في كل مكان حوالينا زي وسائل التواصل الاجتماعي وغيرها، ومن هنا هنكون قدرنا نربي شخص يمكن الاعتماد عليه في إنجاز المهام المختلفة.
طيب إزاي هنعلم الطفل قيمة الوقت ونخليه يدرك أهميته؟ دا اللي هنعرفه في السطور الجاية.
نصائح لتعليم الأطفال قيمة الوقت
تنظيم وقت الأطفال في المنزل هو أمر بيشغل أولياء الأمور، لإنهم بيكونوا حريصين على تربية طفل سوي مقدر للأولويات، وفاهم إزاي يدير وقته صح.
الأمر هنا بيكون سهل يحصل لو قدرنا نفهم الطفل قيمة الوقت، ونبين له مدى انعكاس دا على حياته بالطريقة اللي يقدر يستوعبها.
ومن أهم النصائح اللي بتساعدنا على تعليم الأطفال قيمة الوقت، واللي منها بنكون قادرين على تنظيم وقت الأطفال في المنزل بنلاقي:
تدريب الطفل على إدارة الوقت
إتقان أي مهارة بيتطلب ممارستها باستمرار، ولإن إدارة الوقت مهارة فبتنطبق عليها نفس القاعدة، وبالتالي تدريب الطفل على إدارة الوقت وتقسيم المهام المطلوبة منه على أوقات مناسبة هتساعده يتعلم قيمة الوقت، وهيدرك إن كل حاجة بيعملها لازم تكون محددة بوقت معين؛ عشان يقدر ينجز، ويكون شخص ناجح عنده توازن في حياته.
استخدام ألفاظ معبرة عن الأزمنة المختلفة
الطفل ممكن ما يبقاش قادر يفهم الدقائق دي مثلًا فترة قصيرة ولا طويلة، وبالتالي مش هيكون قادر ينجز المهمة اللي كلفناه بيها في الوقت المحدد.
عشان كدا لازم نحرص على استخدام حدود زمنية وإحنا بنتكلم مع الطفل، بمعنى إننا ممكن نقوله إن وقت اللعب المسموح به 30 دقيقة لحد وقت العشاء مثلًا، أو هنقرأ القصة في 15 دقيقة لحد وقت النوم، وهكذا.
مع التكرار هيبدأ الطفل يدرك قيمة الدقائق دي ويستوعب طول الفترة الزمنية اللي بنحددها، وهنبقى قادرين على تنظيم وقت الأطفال في المنزل.
تقسيم اليوم إلى أجزاء زمنية وأحداث ملموسة
تقسيم المهام على أوقات زمنية محددة، وكتابتها في قوائم باستخدام ألوان وصور مبهجة هيفكر الطفل بمسؤولياته، وهيخليه مدرك إنه مطالب بإنهاء المهام والأنشطة دي قبل نهاية اليوم.
كمان هيزود حماسه لإنجاز المهام دي؛ لإنه بيفرح لما يخطط بالألوان على الورق في كل مرة ينجز فيها مهمة معينة.
التعامل مع الأنشطة كأنها بوابات لبداية أنشطة أخرى
تعلم النظام هو شيء مهم جدًا بالنسبة للطفل لازم نحرص إننا نعزز قيمته أثناء رحلة التركيز على قيمة الوقت.
وبالتالي لو اتعاملنا مع كل نشاط مطلوب منه على إنه بوابة لنشاط تاني هنقدر نعلمه النظام كويس، بمعنى إن لو الجدول مثلًا ماشي بالترتيب دا (فطار- مذاكرة – وجبة خفيفة – مذاكرة – لعب) فما ينفعش يبدأ مذاكرة قبل ما يخلص الفطار بتاعه، ولازم المذاكرة تخلص قبل تناول الوجبة الخفيفة وهكذا لحد نهاية الجدول.
بالطريقة دي هنكون قادرين على تنظيم وقت الأطفال في المنزل بطريقة مريحة بالنسبة لنا كأولياء أمور وبالنسبة للطفل كمان.
التأكيد على فكرة “الوقت ليس المحدد الوحيد”
أحيانًا حرصنا على إنهاء مهمة في وقت معين بيخلي الطفل مركز مع الوقت بس، بغض النظر عن جودة المهمة اللي بيعملها.
فمثلًا لو طلبنا منه يرتب غرفته في ربع ساعة ممكن يقضي جزء كبير من الوقت في البداية في عمل شيء بسيط، وفي آخر كام دقيقة يتحرك أسرع عشان يخلص، وفي الآخر المهمة مش بتكون اتنفذت بشكل كويس.
بالتالي لازم نفهمه إن الوقت مهم جدًا في حياتنا بس مش هو العامل الوحيد اللي بنحدد تنفيذ المهام على أساسه، وإننا لازم نحرص على إتقان أي شيء بنعمله سواء كان بسيط أو معقد.
تحويل الأنشطة إلى نظام تلعيب (Gamification)
تحويل المهام اللي بيعملها الطفل على مدار اليوم إلى ألعاب هيخلي الأمر ممتع أكثر، وهيساعد الطفل يندمج مع المهام دي ويؤديها بأحسن شكل يقدر يعمله.
وبالتالي عشان نفهم الطفل قيمة الوقت ممكن نحدد وقت لكل مهمة، ونقوله إنه لما ينجز المهمة دي في الوقت المحدد هياخد 5 نقاط مثلًا، ومع كل 100 نقطة يقدر يطلب حاجة معينة وننفذها.
كمان ممكن نقدم له مكافآت تناسب اهتماماته وعمره، ونعمل نظام تتبع لمدى تقدمه، ونقيسه كل أسبوع، ولو التزم خلال الأسبوع دا هيكون له جائزة بردو.
دي كلها أفكار ممكن نطبقها في رحلة تنظيم وقت الأطفال في المنزل بعد ما يفهموا قيمة الوقت.
تخصيص أماكن للأنشطة المختلفة
الطفل ممكن يكون عارف بالظبط المهام اللي مطلوبة منه في اليوم، وفاهم إزاي يعملها لكن مشكلته إن مش قادر يركز فيها، وبالتالي مش بيعرف ينجزها كلها.
وعشان نساعد طفلنا يركز أكثر ممكن نعمل علاقة بين الوقت والنشاط، بمعنى إن كل نشاط يكون له مكان مخصص، ولازم يتواجد في المكان دا أثناء ممارسة النشاط أو أداء المهمة، وما ينفعش يخرج منه قبل ما يخلص.
بالطريقة دي هنساعده يركز أكثر أثناء تنفيذ المهام بدون ما يكون في فرصة التشتت.
التحدث مع الطفل باستمرار عن إدارة الوقت
كأولياء أمور لازم وإحنا بننفذ مهمة تنظيم وقت الأطفال في المنزل نكون حريصين إننا نفهِّم الطفل الهدف من إدارة الوقت بشكل صحيح، لإنه لو مش عارف المخزى منه ممكن ما يبقاش في استجابة لخططنا.
وبالتالي مهم جدًا إننا نتكلم معاه باستمرار عن إدارة الوقت، ومدى تأثيره الوقت على حياتنا عن طريق إننا نحكي قصص مثلًا، أو نقوله إزاي حياته هتكون أفضل لو قدر يدير وقته صح.
5 نصائح مهمة لتنظيم وقت الأطفال في المنزل
تنظيم وقت الأطفال هو مهمة كل ولي أمر، عشان نتجنب الفوضى اللي ممكن تكون في حياة الطفل لو مفيش مهام في يومه أو روتين متعود عليه ومناسب لسنه وقدراته ومهاراته المختلفة.
وعشان نقدر على تنظيم وقت الأطفال في المنزل بنحتاج نطبق كذا حاجة من أهمهم:
تحديد الأولويات
تحديد أولويات المهام المطلوبة من الطفل هيسهل علينا ترتيبهم وتحديد وقت مناسب لإنجاز كل مهمة منهم بناء على قدرات الطفل ومدى صعوبة النشاط المطلوب.
وبالتالي عشان ننظم وقت الطفل لازم أول خطوة نحدد الأولويات؛ لإننا بكدا هنقصر على نفسنا الطريق في رحلة تنظيم وقت الأطفال في المنزل وإدارته، ومنها نقدر ندخل بسهولة على الخطوة الثانية.
عمل جداول مناسبة ومشاركة الطفل أثناء تصميمها
بعد معرفة الأولويات بنبدأ نكتبها في شكل جداول، ونشارك الطفل معانا أثناء كتابتها، عشان يبدأ يستعد ويعرف إن في مهام مطلوبة منه ولازم ينفذها.
يُفضل إن الجداول اللي بنعملها يكون شكلها مبهج؛ عشان نحبب الطفل فيها، ودا من خلال الألوان والصور اللي ممكن نستخدمها داخل الجداول.
وكمان يُفضل ترك مكان فاضي يقدر الطفل يعلم قصاده إنه أتم نشاط معين؛ عشان نشجعه على الإنجاز أكثر.
تخصيص وقت للعب
زي ما بنحرص إن يكون في وقت كافي في يوم الطفل للمذاكرة أو لتناول الوجبات الغذائية لازم نهتم بتخصيص وقت للعب، لإن الجانب الترفيهي شيء أساسي في يوم الطفل.
وبالطريقة دي هنقدر نتجنب شعوره بالملل من الروتين اللي بيطبقه كل يوم، وهيكون عنده استعداد لأداء المهام المختلفة بدون ما نضطر إننا نضغط عليه عشان يستجيب للطلبات.
إبعاد عوامل التشتيت
عوامل التشتيت اللي حوالينا أصبحت كتيرة جدًا، ووجودها بيؤثر بالسلب على تنظيم وقت الأطفال في المنزل فبيخليهم مش قادرين يركزوا في حاجة واحدة، وطول الوقت مشغولين بحاجات كتيرة غير ضرورية بالنسبة لهم، وفي نهاية اليوم بنلاقي المحصلة قليلة جدًا.
وبالتالي عشان نقدر ننظم وقتهم لازم نبعدهم عن كل المشتتات دي وقت أداء المهام المطلوبة، عشان نساعدهم يركزوا أكثر.
اقرأ أيضًا: 8 ألعاب لزيادة التركيز عند الأطفال في البيت والروضة والمدرسة.
حث الطفل على النوم والاستيقاظ مبكرًا
تثبيت مواعيد النوم واليقظة بيساعد بشكل كبير على تنظيم وقت الأطفال في المنزل، وبيخلي الطفل مستعد نفسيًا لتطبيق المهام المطلوبة، ولو المواعيد دي بقت بدري أكثر فإحنا كدا هنساعد في زيادة نشاطه خلال اليوم، وبالتالي إنتاجيته هتزيد.
إلى جانب أهمية الخطوة دي في تنظيم وقت الطفل بنلاقي إن النوم المبكر بيعزز مناعة الطفل، وبيقلل فرصة إصابته بالأمراض، وبيحفز هرمون النمو في جسمه.
أفكار لجداول تنظيم وقت الأطفال في المنزل
تنظيم وقت الأطفال بيكون أسهل لو حددنا المهام المطلوبة من الطفل، وكتبناها قدامه في شكل جداول؛ لإنه هيكون مستوعب كويس كمية المهام اللي المفروض يخلصها في يومه، وبناءً عليه هيبدأ ينفذ واحدة واحدة بحماس.
في أفكار كتير للجداول ممكن ننفذها لأطفالنا زي:
جدول يومي للطفل قبل سن المدرسة
في الجدول اليومي للطفل قبل سن المدرسة بنحاول نكتب كل الأنشطة اللي بيعملها خلال يومه، مع إضافة الوقت المحدد لكل نشاط، ونعرضها مع رسومات مبهجة تحفزه يعمل الأنشطة دي.
وممكن نضيف خانة للطفل يعلم قصادها علامة صح لما يخلص النشاط المطلوب زي ما هو واضح في الجدول.
تقدر تنزل الجدول من هنا وتطبعه وتبدأ تطبقه في يوم الطفل.
جدول يومي للطفل في سن المدرسة
الجدول اليومي في الحالة دي هيكون أكبر شوية من الجدول اللي فات، ودا لإن الطفل هنا يقدر يعمل أنشطة أكثر، وبيكون مطلوب منه حاجات مختلفة.
نزل نسخة من الجدول قابلة للطباعة من اللينك دا.
جدول أسبوعي قابل للطباعة
الجدول الأسبوعي هيساعدك تنظم وقت الطفل، وتقارن نشاطه في الأيام المختلفة على مدار أسبوع كامل، عشان تعرف إزاي تعدل عليه بالطريقة المناسبة لقدرات طفلك.
وأخيرًا، تنظيم وقت الطفل بيحتاج للصبر والاستمرارية؛ لإن طبيعي ما يحصلش استجابة مُرضية لنا في البداية، لكن مع الوقت هنلاقي تغيير ملحوظ في حياة طفلنا.
أضف تعليق