بيتساءل كتير من الأهالي عن المدارس النموذجية في مصر، وبيبحثوا دايمًا عن معلومات كافية عنها، عشان يقرروا إذا كانت مناسبة لأطفالهم أو لا. وفي المقال هنذكر أهم المعلومات عن النوع دا من المدارس، ومتطلبات التقديم فيها، فتابع معانا.
1- ما هي المدارس النموذجية؟
سنة 1985 أُنشأت المدارس النموذجية في مصر؛ بهدف محاولة تطوير التعليم. فبيتم تطبيق المناهج التعليمية الجديدة في المدارس النموذجية الأول، وإذا أثبتت نجاحها بتتعمم في مختلف المدارس للاستفادة منها، ودا في محاولة من وزارة التربية والتعليم في التحسين المستمر للتعليم بكافة الصور.
المدارس دي هي نوع من أنواع التعليم الحكومي شبه الخاص، ويوجد منها نوعين أساسيين:
المدارس النموذجية العامة
الطفل هنا بيدرس نفس مواد التعليم الحكومي العام مع إضافة اللغة الإنجليزية مستوى رفيع.
المعاهد الأزهرية النموذجية
ودي بتشمل:
- المعاهد الأزهرية النموذجية عام، وفيها بيدرس الطالب المواد الشرعية، واللغة العربية، والمواد اللي بيدرسها التعليم العام في المجمل.
- المعاهد الأزهرية النموذجية لغات، وبتختلف عن العربي في دراسة اللغة الفرنسية، والمستوى الرفيع من اللغة الإنجليزية.
2- الفرق بين المدارس النموذجية والتجريبية
بتظهر الفروقات بين المدارس في عدد الطلاب، والمواد الدراسية اللي بيتم دراستها في واحدة دون الأخرى. فبنلاقي إن المدارس التجريبية هي مدارس حكومية تابعة لوزارة التربية والتعليم، بتدرّس المناهج المعتمدة من الوزارة، عددها بيتخطى 2300 مدرسة في جميع محافظات الجمهورية. حالياً بيطلق عليها اسم المدارس الرسمية لغات.
بتتميز المدارس دي باهتمامها باللغة الإنجليزية بشكل أكبر من المدارس الحكومية العادية، ودا عن طريق تدريس بعض المواد باللغة الإنجليزية من البداية، مع وضع مناهج إضافية خاصة بالطلاب لرفع مستواهم باللغة.
وبتنقسم إلى نوعين:
- المدارس التجريبي العادية أو (الرسمية لغات عادية).
- المدارس التجريبى لغات مميزة أو (الرسمية لغات مميز).
3- أماكن المدارس النموذجية في مصر
تنحصر المدارس النموذجية في عدة أماكن على مستوى الجمهورية، وهتلاقيها في محافظات مختلفة زي: القاهرة، والجيزة، والإسكندرية، وغيرهم. ومن المدارس دي بنلاقي:
- المدرسة النموذجية للصداقة المصرية الصينية، وموجودة في محافظة الجيزة.
- مدرسة البحر الصغير الابتدائية النموذجية في المنصورة بمحافظة الدقهلية.
- مدرسة الغد النموذجية الخاصة موجودة في المرج بمحافظة القاهرة.
- معهد توكل الأزهري موجود في قسم 2 بطنطا في محافظة الغربية.
- مجمع معاهد مدينة نصر الازهر النموذجي في مدينة نصر بالقاهرة.
- مدرسة مصر الجديدة النموذجية بنات في رمسيس بالقاهرة.
- معهد أسيوط النموذجي بنين موجود في محافظة أسيوط.
- معهد قنا النموذجي الأزهري بنين في محافظة قنا.
- مدرسة العجمي النموذجية موجودة في الإسكندرية.
- مدرسة الأوائل النموذجية في 6 أكتوبر.
4- المصروفات الدراسية المطلوبة في المدارس النموذجية
المدارس النموذجية في مصر هي خليط بين المدارس الحكومية والخاصة لكن بطريقة مختلفة، ودا اللي بيخلي مصروفاتها أقل من مصروفات المدارس الخاصة، ولكن أعلى من المدارس الحكومي.
بالإضافة إلى كونها بتتميز بمستوى تعليمي وتربوي مميز، وبنلاقي إن المصروفات بتكون كالتالي:
مصروفات المدارس النموذجية العادية
تتراوح ما بين 6 إلى 10 آلاف جنيه تقريبًا، وبتختلف حسب المدرسة، واختلاف الفئة العمرية للطالب.
مصروفات المعاهد الأزهرية النموذجية
وفقًا لبيان المصروفات لعام 2023-2024، فمصاريف المعاهد الأزهرية النموذجية تنقسم حسب المرحلة العمرية. فبنلاقي:
- المرحلة التمهيدية عام بتكون في حدود 171.85 جنيه.
- المرحلة التمهيدية لغات في حدود 821.85 جنيه.
- المرحلة الابتدائية تقدر بـ 172.35 جنيه.
- المرحلة الإعدادية حوالي 206.35 جنيه.
- المرحلة الثانوية في حدود 232.35 جنيه.
5- عدد الطلاب في فصول المدارس النموذجية
وضعت وزارة التربية والتعليم حد أقصى لعدد الطلاب في المدارس النموذجية في مصر، فهنلاقي:
- الحد الأقصى لعدد الطلاب في المرحلة الابتدائية هو 40 طالب.
- الحد الأقصى لعدد الطلاب في المرحلة الإعدادية 40 طالب.
- الحد الأقصى لعدد الطلاب في المرحلة الثانوية 32 طالب.
في محاولة إن الفصل يحتوي على عدد مناسب من الطلبة، والمدارس تستقبل أكبر عدد ممكن، لكن مع الحفاظ على مستوى التعليم.
6- متطلبات التقديم في المدارس النموذجية
متطلبات التقديم في المدارس النموذجية في مصر هي نفسها المطلوبة للمدارس الحكومية، واللي هي:
- صورة من الاستمارة الإلكترونية تتضمن 3 رغبات لمدارس مختلفة.
- إيصال أحد المرافق في المنزل (كهرباء، غاز، وغيرها).
- صورة بطاقة الرقم القومي لولي أمر الطالب.
- دمغات التأمين الصحي، والمهن التعليمية.
- شهادة ميلاد كمبيوتر حديثة للطالب.
- 4 صور شخصية مقاس 4×6.
مع مراعاة حدود المربع السكني، وممكن يتم التجاوز عن النقطة دي لو مجموع الطالب أعلى من 85٪، وبيتم التقديم للمدرسة من خلال موقع وزارة التربية والتعليم – الصفحة الرئيسية (moe.gov.eg).
7- أبرز مميزات المدارس النموذجية في مصر
المدارس النموذجية زيها زي غيرها كتير من المدارس المصرية؛ ليها مميزات متنوعة، وكمان ليها عيوب، ومن أهم مميزاتها بنلاقي:
الاهتمام بالطالب ودراسته
ودا يرجع إلى التركيز على تعليم الطالب بالطرق الحديثة، وتفعيل كل الإمكانات؛ لتحسين مستوى التعليم والطلاب.
وبالإضافة إلى الجانب التعليمي، بيكون في اهتمام بالأنشطة المختلفة بهدف تحقيق التوازن في حياة الطالب. دا غير إنه بيتم تنمية مهاراته، وتعليمه بطرق مختلفة ومتنوعة تتناسب مع اهتماماته.
تعرف على أنماط التعليم الأربعة | الطريقة الأشهر لمعرفة نمط التعلم المفضل لطفلك
الاهتمام بتحسين مظهر المدرسة
في المدارس النموذجية في مصر بيكون في اهتمام كبير بالمباني والفصول، وتوفير غرف للأنشطة المختلفة، بهدف تحسين مظهرها وصورتها دايمًا.
الجمع بين مميزات المدارس الحكومية والخاصة
كل ميزة موجودة في المدارس الحكومية والخاصة هنلاقيها متجمعة في المدارس النموذجية، لأنها مدارس حكومية في الأساس، لكن فيها اهتمام زيادة بالتعليم، واللغة الأجنبية. بالتالي بتكون خيار مميز لبعض الأهالي.
الاهتمام باللغات
واحدة من أهم المميزات اللي بتخلي المدارس النموذجية خيار مناسب لعدد كبير من الأهالي هي التركيز على اللغة الأجنبية أكتر من التعليم الحكومي، وبالتالي دا بيساعد الطالب في مراحل تعليمه المختلفة، وكمان بيأثر بشكل إيجابي على مستقبله.
تعرف على أسهل خطوات تعليم الفرنسية للأطفال
تواجد الأنشطة المختلفة
بما إن فكرة المدارس النموذجية في مصر قائمة على تطبيق التحديثات التعليمية في منظومة التعليم والتطوير، فبنلاقي اهتمام كبير بالأنشطة المختلفة سواء الرياضية، أو الثقافية، أو الفنية، وغيرها من الأنشطة اللي هدفها تطوير الطالب في مختلف الجوانب.
توافر أنواع مختلفة من المدارس النموذجية
المنظومة التعليمية بتقدم نظام المدارس النموذجية في التعليم العام، والأزهري، واللغات؛ بهدف تسهيل الأمر على أولياء الأمور، وتوفير مميزات ومتطلبات أكتر للطلاب.
الاهتمام بمستوى الطالب
بيتخرج من المدارس النموذجية في مصر كل سنة عدد كبير من الطلبة، ومنهم أوائل على مستوى الجمهورية، ودا يرجع إلى الاهتمام الكبير بمستوى التعليم، ومحاولات التطوير، بجانب اجتهاد الطلبة، ودور الأهل العظيم.
8- عيوب المدارس النموذجية في مصر
على الجانب الآخر بتظهر بعض العيوب، واللي منها:
صعوبة القبول فيها
بسبب المميزات المختلفة اللي بتتمتع بيها المدارس النموذجية بتكون خيار مميز لعدد كبير من الطلاب وأهاليهم، عشان كدا بيزيد الإقبال عليها كل سنة، وبيكون في منافسة مش بسيطة عليها، بالتالي بتزيد صعوبة القبول فيها.
الكثافة العددية
تعد كثافة الفصل في المدارس النموذجية في مصر تحدي، فعلى الرغم من إن عدد الطلاب في الفصل أقل من عددهم في المدارس الحكومية إلا إن الكثافة ما زالت كبيرة.
الخلاصة
اختيار مدرسة ابنك أو بنتك قرار مهم، ومحتاج دراسة، ودا سبب عرضنا في المقال المعلومات الأساسية، والضرورية عن كل ما يخص المدارس النموذجية في مصر. وأهم المميزات والعيوب. والهدف إن كل ولي أمر يكون عنده الرؤية الواضحة اللي تساعده ياخد قرار في مصلحة طفله.
أضف تعليق