الفترة الحالية هي الفترة الانتقالية بين زمن الثورة الصناعية لزمن الثورة المعرفية، وبالتالي تعليم ابنك اللغات الأجنبية بقى شيء ضروري، لتنمية مهاراته، وتحسين فرصه الوظيفية لما يكبر.
عشان كدا تعليم اللغات للأطفال أصبح من أهم الأنشطة اللي بتسعى ليها كل أم, ومن أهم اللغات دي، هي اللغة الفرنسية، واللي بيتكلم بيها أكتر من 300 مليون شخص حول العالم، لإنها تاني أكتر اللغات تعلمًا بعد الإنجليزية، وخامس أكتر اللغات انتشارًا في العالم.
في المقال دا، هتكتشفي ليه تعليم الفرنسية للأطفال مهم، وهتعرفي أسهل الخطوات اللي تساعدك في تعلميها لطفلك في البيت.
أهمية تعليم طفلك اللغات
فوائد تعليم اللغات لطفلك كتيرة، وتستحق المحاولة، فالأطفال اللي بيتكلموا لغتين بيكون عندهم قدرة كبيرة على الإبداع، وبيكتسبوا مهارة حل المشكلات، ودايمًا عقلهم بيكون واعي ومُنتج بشكل أكبر من غيرهم.
كمان العلماء أكدوا إن تعليم الأطفال أكتر من لغة بيعزز المرونة العقلية، والمهارات اللغوية، والنمو الفكري الشامل، وبيحسن مهارات الطفل في التفكير وحل المشكلات.
ودا تبعًا للي اتقال في ورقة بحثية ضمن سلسلة “التقدم في أبحاث العلوم الاجتماعية والتعليم والعلوم الإنسانية“، هي ورقة من المؤتمر الدولي السادس للتعليم والتكنولوجيا (ICET 2020)، وبتركز على فوائد تدريس اللغات الأجنبية لمرحلة الطفولة المبكرة.
دا غير إن تعليم اللغات لطفلك هيحسن من فرصه الوظيفية لما يكبر، عشان كدا بننصح بتعليم الفرنسية للأطفال، لإن إتقانها هيكون أسهل وأسرع في سن صغير، بس ليه تختاري تعلمي ابنك أو بنتك اللغة الفرنسية بالذات؟
لماذا اللغة الفرنسية؟
اللغة الفرنسية بيتم تدريسها في كل بلاد العالم كلغة ثانية بعد اللغة الإنجليزية، وبتدخل فيها معظم المواضيع الخاصة بالفنون زي: الموضة، والمسرح، والطبخ، وغيرهم، وتعليم الفرنسية للأطفال ليه فوائد كتير، منها:
- بيسهل على الطفل تعلم باقي اللغات اللاتينية زي: الإنجليزية، والإسبانية، والإيطالية، وغيرهم.
- بيعد فرصة لاستكشاف ثقافات جديدة، بحيث يطور أفكار الطفل، ويوسع مداركه.
- بيزود من قدرة طفلك المعرفية، وبيعلي ثقته بنفسه.
يمكنك أيضًا قراءة: كيفية تعليم اللغة الإنجليزية للأطفال من 2 إلى 5 سنوات.
أسهل الخطوات لتعليم الفرنسية للأطفال
أسهل طرق تعليم اللغة الفرنسية للأطفال هي إن الطفل يتعايش مع اللغة، عشان كدا دايمًا هتلاقي الحلول كلها بتتمحور حول تحويل محيط طفلك من ألعاب، وهوايات، واهتمامات إلى اللغة الفرنسية.
بمعنى إن بعد تعليم أساسيات اللغة والحروف للطفل، يبدأ يتعرف على العالم حواليه بالفرنسية، ودا أحسن حل لتعلم الفرنسية في أسرع وقت. وتقدري تبدئي مع طفلك بخطوات مرتبة وبسيطة، واللي بتتمثل في:
1- معرفة أساسيات اللغة الفرنسية
أساسيات تعليم الفرنسية للأطفال بتنحصر في تعلم الحروف وأصواتها بشكل جيد جدًا، لأنها الأساس لكل كلمة وجملة هيقولهم الطفل، وتقدري تدربيه على النطق الصح عن طريق فيديوهات اليوتيوب.
لكن مش هتقفي عند الحروف، فمهم جدًا إن مع كل حرف بيتعلمه يكون موجود كلمتين أو أكتر بيبدؤوا بنفس الحرف، وقتها هتلاقيه مع انتهاء فترة الأساسيات بيكون خارج بحصيلة كلمات كبيرة تساعده في مرحلة تكوين الجمل، وممكن تبدئي بمواضيع بسيطة، زي: الألوان، والأرقام، والأشكال.
وتقدري تستخدمي كروت ملونة، وقص ولزق عشان المعلومات تثبت في دماغه، مثال:
- اطبعي صور ملونة بالحروف في البيت، عشان تلفت انتباهه، وتخليه يستمتع بالتعلم.
- خلي في صور للحروف أو الأشكال بالأبيض والأسود، ويبدأ هو ينطق ويلون.
وفي الآخر اتأكدي إن المعلومات ثبتت في دماغه بالفعل عن طريق طباعة نفس الصور، بس تكون الكلمة مش كاملة، أو الحروف مكتوبة على شكل نقط، ويبدأ الطفل يكملها بنفسه. ودي كلها ممارسات هتساعدك في تعليم الفرنسية لطفلك بطريقة صحيحة، وسهلة في نفس الوقت.
2- ممارسة الطفل للفرنسية بشكل روتيني
بييجي بعد رحلة أساسيات تعليم الفرنسية للأطفال مرحلة تكوين الجمل مع الممارسة. واللي بتشجعي فيها طفلك على إنه:
- يبدأ يعبر عن جمال الأشياء فيتعلم يقول (C’est une belle fleur) بدل ما يقول دي وردة جميلة.
- يعبر عن جوعه بالفرنسية، فيقول (j’ai faim) بدل ماما أنا جعان.
- يقولك صباح الخير بالفرنسية (Bonjour).
حاولي تحافظي على الممارسات دي بشكل روتيني، وابدئي في الأول بجلسات قصيرة لمدة 15 دقيقة يوميًا مثلًا، ومع الوقت كل ما طفلك يكبر وتحسي إن إستيعابه زاد، ابدئي زودي في الوقت.
ومن هنا تقدري تخلي طفلك يعيش مع اللغة الفرنسية، وممارستها في البيت بالشكل دا هي أفضل وأسرع طريقة لتعليم الفرنسية للأطفال، لكن لو هتستني لحد ما يتقن اللغة، وبعدها يبدأ يتكلم ويمارس فدا أكبر خطأ.
3- تعليم الأطفال بعض قواعد اللغة البسيطة
من أهم خطوات تعليم الفرنسية للأطفال هي تعليمهم قواعد اللغة، عشان يقدر يتكلم صح، بس هنا بتحصل مشكلة مشهورة، وهي عدم تقدير الوقت المناسب لتعليم الطفل حاجة زي كدا، لإن لو دا حصل بدري هيكون الموضوع أكبر من استيعابه، وبالتالي الطفل ممكن يتعقد من اللغة بدل ما كان حاببها.
ويفضل إن مرحلة تعليم الطفل للقواعد دي تبدأ بعد دخوله المدرسة بكذا سنة، عشان يكون بدأ يتعلم قواعد العربي والإنجليزي في المدرسة، وبالتالي لما تيجي تكلميه عن قواعد اللغة الفرنسية يكون فاهم الموضوع حتى ولو بشكل بسيط.
4- تعليم الفرنسية للأطفال من خلال المرح
أكتر إحساس بيواجهه الطفل هو الملل، ودايمًا بيحب يلعب أكتر من إنه يتعلم أو يذاكر. ومن هنا ظهرت فكرة تعليم الفرنسية للأطفال عن طريق المرح، واللي بتسمح لهم يحتفظوا بنفس مستوى المهارات اللغوية في اللغة على مدار سنين.
ولكن السؤال المهم، هو إزاي تدمجي بين تعلم الفرنسية والمرح في البيت؟
الرسم هو أحد ألطف طرق المرحة دي، لإنك تقدري مع كل رسمة بيرسمها طفلك تعلميه كلمة جديدة، يعني لو رسم أسد يقول اسمه (le lion)، أما لو رسم قطة يعرف إن معناها (le chat)، والكلب بنقول عليه بالفرنسية (le chien)، وهكذا.
كمان لو طفلتك بتحب الطبخ والوصفات، تقدري تشجيعها عن طريق البحث عن وصفة سهلة وبسيطة في المطبخ الفرنسي، وتبدئي تنفذيها معاها، وقتها هتدرب على معنى ونطق كل مكون من الطبخة.
5- مشاهدة فيديوهات وقصص قصيرة باللغة الفرنسية
الانغماس والتعايش مع اللغة من أكتر الطرق فعالية في تعلم اللغات، من هنا، فاندماج طفلك مع اللغة الفرنسية من خلال الفيديوهات والقصص هيساعده في تعلمها بشكل أسرع. ولكن إزاي الفيديوهات والقصص يقدروا يساعدوكي في تعليم الفرنسية للأطفال؟
الفيديوهات
الفيديوهات هي أدوات تعليمية سهلة، ومن أكتر الحاجات اللي بينجذب ليها الأطفال. تقدري تستغلي دا في تعليم الفرنسية للأطفال عن طريق إنك تختاري موضوع معين بيحبه طفلك، وتبدئي في تجميع فيديوهات مبتدئين عنه.
سماع فيديو كبير كل يومين هيفرق جدًا في مستوى طفلك في تعلم اللغة الفرنسية، دا غير إنه هيزود عنده حصيلة لغوية كبيرة، وهينمي مهارة التحدث.
القصص
تقدري تساعدي طفلك على قراءة كتب للأطفال مكتوبة باللغة الفرنسية كل يوم قبل النوم. وتساعديه في التعرف على الثقافة الفرنسية، وتنمية مهاراته اللغوية، لإن القصص بتعزز خيال الطفل، وبتساعده على تخيل الكلمات المنطوقة، وتحسين المفردات,
ودا تبعًا للي قاله NIH عن تأثير روابة القصص على الطفل، وممكن مثلًا تبدئي بقصص زي:
- قصة “Mon père est femme de ménage” لصفية عز الدين.
- قصة “Le Petit Prince” لـ Antoine de Saint-Exupéry.
- قصة “Le Petit Nicolas” لـ René Goscinny.
اقرأي أيضًا: أهم معايير اختيار قصص الأطفال.
6- تعليم الفرنسية للأطفال من خلال اهتماماتهم
كل آراء الخبراء والمختصين في تعليم اللغة، اجتمعت على إن تعليم اللغة الفرنسية للأطفال عن طريق ربطها باهتماماتهم ليه نتائج عظيمة. على سبيل المثال:
إذا كان طفلك مهتم بالسفر، والسياحة، ومعرفة معلومات عن البلاد، تقدري تعلميه الكلمات الخاصة بالسفر، والمعالم الأثرية باللغة الفرنسية.
ولو كان مهتم بالرسم والفنون، تقدري تبحثي عن معلومات بسيطة بالفرنسية عن اللوحات الفنية والرسامين، وعن متحف اللوفر، وأسماء اللوحات العالمية جواه.
توظيف اهتمامات طفلك لتعلم اللغة الفرنسية هيفرق معاه، وهيعلي مستواه في اللغة في وقت أسرع.
وأخيرًا، تعليم الفرنسية للأطفال شيء ممتع وبسيط جدًا، خصوصًا والطفل لسه صغير، لإن تأثير اللغة عليه بيكون كبير جدًا، فبتوسع مداركه، وبتزود ذكائه. كمان بتفرق معاه سواء في دراسته في الجامعة، أو في حياته العملية بعد كدا، فـ ليه ما تكونش دي البداية لتعليم الفرنسية لطفلك؟
ابدئي مع رحلة تعليم الفرنسية للأطفال، واستثمري فيها، ونتيجة الاستثمار دا هتبقى واضحة جدًا لما طفلك يكبر.
أضف تعليق