أهم 7 معلومات عن المدارس النموذجية في مصر

أهم 7 معلومات عن المدارس النموذجية في مصر

بيتساءل كتير من الأهالي عن المدارس النموذجية في مصر، وبيبحثوا عن معلومات كافية عن النوع دا من المدارس، عشان يقدروا يقرروا إذا كانت مناسبة لأطفالهم أو لا، وفي المقال دا هنذكر أهم المعلومات عنها.

1- ما هي المدارس النموذجية؟

سنة 1985 أُنشأت المدارس النموذجية في مصر بهدف محاولة تطوير التعليم، فيتم تطبيق كل التجارب التعليمية الجديدة في المدارس النموذجية الأول، وإذا أثبتت نجاحها بتتعمم الطرق التعليمية دي على مختلف المدارس للاستفادة منها، ومحاولة التحسين المستمر للتعليم بكافة الصور.

المدارس دي هي نوع من أنواع التعليم الحكومي شبه خاص، ونوع من أنواع المدارس التجريبة بالتحديد، لإن المدارس التجريبية بتنقسم إلى نوعين أساسيين:

المدارس النموذجية العامة

الطفل هنا بيدرس نفس مواد التعليم الحكومي العام مع إضافة اللغة الإنجليزية مستوى رفيع.

المعاهد النموذجية

ودي بتشمل:

  • المعاهد النموذجية العربية، وفيها بيدرس الطفل المواد الشرعية الخاصة بالمعاهد الأزهرية، واللغة العربية، والمواد اللي بيدرسها التعليم العام.
  • المعاهد النموذجية اللغات، وبتختلف عن العربي بزيادة دراسة اللغات زي: اللغة الإنجليزية، والفرنسية مستوى رفيع.

2- أماكن المدارس النموذجية في مصر

بتنتشر المدارس النموذجية في أماكن كتيرة في الجمهورية، وهنلاقيها في محافظات زي: القاهرة، والجيزة، والإسكندرية، والدقهلية، والشرقية، والغربية، وأسيوط، وغيرهم، ومن المدارس دي بنلاقي:

  • المدرسة النموذجية للصداقة المصرية اليابانية، وموجودة في محافظة الجيزة، وتتميز بدراسة الطلاب فيها باللغة اليابانية.
  • مدرسة الغد النموذجية الخاصة موجودة في المرج بمحافظة القاهرة.
  • مدرسة الأوائل النموذجية في 6 أكتوبر.
  • مدرسة العجمي النموذجية موجودة في إسكندرية.
  • معهد أسيوط النموذجي بنين موجود في محافظ أسيوط
  • مدرسة البحر الصغير الإبتدائية النموذجية في المنصورة بمحافظة الدقهلية
  • معهد توكل الأزهري موجود في قسم 2 بطنطا في محافظة الغربية
  • مجمع معاهد مدينة نصر الازهر النموذجي في مدينة نصر بالقاهرة
  • مدرسة مصر الجديدة النموذجية بنات في رمسيس بالقاهرة
  • معهد بنين قنا النموذجي الأزهري في محافظة قنا

3- المصروفات الدراسية المطلوبة في المدارس النموذجية

المدارس النموذجية في مصر هي خليط بين المدارس الحكومية والخاصة لكن بطريقة مختلفة، ودا اللي بيخلي مصروفاتها أقل من مصروفات المدارس الخاصة، ولكن أعلى من المدارس الحكومي.

تتراوح المصروفات الدراسية في المدارس النموذجية والمعاهد النموذجية ما بين 600 جنيه إلى 2000 جنيه تقريبًا، وبتختلف بحسب اختلاف الفئة العمرية للطالب.

4- عدد الطلاب في فصول المدارس النموذجية

وضعت وزارة التربية والتعليم حد أقصى لعدد الطلاب في المدارس النموذجية في مصر، فهنلاقي:

  • الحد الأقصى لعدد الطلاب في المرحلة الابتدائية هو 45 طالب.
  • الحد الأقصى لعدد الطلاب في المرحلة الإعدادية 40 طالب.
  • الحد الأقصى لعدد الطلاب في المرحلة الثانوية 32 طالب.

في محاولة إن الفصل يحتوي على عدد مناسب من الطلبة، والمدارس تستقبل أكبر عدد ممكن، لكن مع الحفاظ على مستوى التعليم.

5- متطلبات التقديم في المدرسة

متطلبات التقديم في المدارس النموذجية في مصر هي نفسها المطلوبة للمدارس الحكومية، واللي هي:

  • شهادة ميلاد كمبيوتر حديثة للطالب.
  • 4 صور شخصية مقاس 4×6.
  • صورة بطاقة الرقم القومي لولي أمر الطالب.
  • إيصال أحد المرافق في المنزل (كهرباء، غاز، وغيرهما).
  • دمغات التأمين الصحي، والمهن التعليمية.
  • صورة من الاستمارة الإلكترونية تتضمن تضم 3 رغبات لمدارس مختلفة.

مع مراعاة حدود المربع السكني، وممكن يتم التجاوز عن النقطة دي لو مجموع الطالب أعلى من 85٪، وبيتم التقديم للمدرسة من خلال موقع وزارة التربية والتعليم.

6- مميزات المدارس النموذجية في مصر

المدارس النموذجية في مصر

المدارس النموذجية زيها زي غيرها كتير من المدارس المصرية؛ ليها مميزات متنوعة، وكمان ليها عيوب، ومن أهم مميزاتها هنلاقي:

الاهتمام بالطالب ودراسته

من أبرز مميزات المدارس النموذجية التركيز على تعليم الطالب بالطرق الحديثة، وتفعيل كل حاجة ممكن تحسن من مستوى التعليم والطلبة.

بجانب الجانب التعليمي كمان بيكون في اهتمام بالأنشطة المختلفة، وبكدا يكون في توازن في حياة الطالب، وبيتم تنمية مهاراته وتعليمه بطرق مختلفة ومتنوعة تتناسب مع مختلف اهتمامات الطلاب.

تحسين مظهر المدرسة

في المدارس النموذجية بيكون في اهتمام كبير بالمباني والفصول، وتوفير غرف للأنشطة المختلفة، بجانب تحسين مظهرها وصورتها دايمًا.

الجمع بين مميزات المدارس الحكومية والخاصة

كل ميزة موجودة في المدارس الحكومية والخاصة هنلاقيها متجمعة في المدارس النموذجية، لأنها مدارس حكومية في الأساس، لكن فيها اهتمام زيادة بالتعليم واللغة الأجنبية، وبالتالي بتكون خيار مميز للأهالي أصحاب الدخل المتوسط.

الاهتمام باللغات

واحدة من أهم المميزات اللي بتخلي المدارس النموذجية خيار مناسب لكثير من الأهالي هي التركيز على اللغة الأجنبية أكتر من التعليم الحكومي، وبالتالي دا هيساعد للطالب في مراحل تعليمه المختلفة، وكمان هيأثر بشكل إيجابي على مستقبله.

تواجد الأنشطة المختلفة

بما إن فكرة المدارس النموذجية في مصر قائمة على تطبيق الجديد في منظومة التعليم والتطوير منها فهنلاقي في النوع دا من المدارس اهتمام كبير بالأنشطة المختلفة سواء الرياضية أو الثقافية أو الفنية، وغيرها من الأنشطة اللي الهدف منها تطوير الطالب في جوانب مختلفة.

توافر الإمكانيات اللازمة

عشان المدرسة تقدر تحقق الهدف منها بتنمية التعليم فبتوفر أحدث الإمكانيات المتاحة، عشان تساهم في خلق بيئة تعليم أفضل، وتسمح للطلبة يطبقوا ويجربوا بنفسهم.

توافر أنواع مختلفة من المدارس النموذجية

المدرسة النموذجية في منها أكتر من نوع، عشان الأهل يقدروا يلاقوا المميزات اللي بيبحثوا عنها لابنهم، فلو حابين التعليم العام أو التعليم الأزهر العربي أو اللغات هيقدروا بسهولة يدخلوها، ويجمعوا المميزات والمتطلبات اللي عاوزين يوفروها في مدرسة واحدة.

مستوى عالي للطلبة

بيتخرج من المدارس النموذجية في مصر كل سنة عدد كبير من الطلبة، وبيطلع منهم أوائل على مستوى الجمهورية، ودا بسبب الاهتمام الكبير بمستوى التعليم، ومحاولات التطوير، بجانب اجتهاد الطلبة ومجهود أهاليهم.

7- أبرز عيوب المدارس النموذجية في مصر

أبرز عيوب المدارس النموذجية

على الجانب الآخر بتظهر عيوب المدارس النموذجية في مصر واللي منها:

صعوبة القبول فيها

بسبب المميزات المختلفة اللي بتتمتع بيها المدارس النموذجية بتكون خيار مميز لعدد كبير من الطلاب وأهاليهم، عشان كدا بيزيد الإقبال عليها كل سنة، وبيكون في منافسة مش بسيطة عليها، فالتالي بتزيد صعوبة القبول فيها.

الكثافة العددية

زي ما المدارس النموذجية بتجمع كل مميزات المدارس الحكومي والمدارس الخاصة الوجه الآخر للأمر إنها بتجمع كمان العيوب المختلفة لنوعين المدارس واللي منها الكثافة العددية، فعلى الرغم من عدد الطلاب في فصول المدارس دي أقل من المدارس الحكومية إلا إنها ما زالت تعد كثافة مرتفعة نسبيًا مقارنة بالمدارس الخاصة.

نقص كفاءة بعض المعلمين

الأساس اللي قامت عليه المدارس النموذجية في مصر هو تطوير التعليم، ورغم كدا هنلاقي كفاءة بعض المعلمين قليلة، وما عندهمش الخبرة ولا المعرفة الكافية لتعليم الطلاب، ودا بيأثر على مستوى الطلاب بشكل كبير.

وبالتالي هيحتاج الأهل يدرسوا الأمر كويس، ويحطوا المميزات مقابل العيوب للنوعين، ويقارنوا بينها، ويحددوا إذا كانت مناسبة لابنهم وظروفهم أو لا.

عرضنا في المقال المعلومات الأساسية والضرورية اللي اللازم الأهل يعرفوها عن المدارس النموذجية في مصر، وعرفنا أهم المميزات والعيوب، وهنا بييجي دور الأهل عشان ياخدوا القرار بناءً على علم كافي، ويكونوا واثقين في اختيارهم.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية

إقرأ أكثر..

  • No comments yet.
  • Add a comment