في بداية العام الدراسي بيبدأ القلق من المناهج عند الأم، وفي بعض الأحيان بيزيد العند بينها وبين أولادها عشان المذاكرة، ومن الأسئلة اللي بتسألها الأمهات لنفسها: لحد امتى هفضل قاعدة جنبه لحد ما يخلص الواجب ويذاكر؟ أعمل إيه عشان ابني يحب المذاكرة؟
وفي المقال دا هنجاوب على أكتر الأسئلة اللي بتدور في عقلك، وهنساعدك تعرفي امتى تساعدي طفلك في المذاكرة، وإزاي تخليه يعتمد على نفسه ويذاكر لوحده، وهنعرض أفضل طرق المذاكرة للأطفال، وأهم النصائح لتشجيع طفلك على المذاكرة.
هل يجب عليَّ مساعدة طفلي في المذاكرة؟
هو امتى أساعد طفلي في المذاكرة، وامتى أسيبه يذاكر لوحده، وإيه أفضل طرق المذاكرة للأطفال؟
مبدئيًا، لازم تبقي مُدركة إن طفلك في مرحلته الأساسية محتاج تذاكري معاه أطول وقت ممكن، وهيكون صعب يعتمد على نفسه بشكل كامل في المرحلة دي، يعني بدايةً من سن الحضانة ومرورًا بالسنوات الأولى في المرحلة الابتدائية دورك مهم جدًا في المذاكرة، ودا عشان:
- تكتشفي المشاكل اللي بتقابله في التعلم، وبالتالي تقدري تحددي نوع المدرسة المناسبة ليه، أو تعرضيه على استشاري عشان تعرفي الطريقة الصح لتعليمه.
- تكوني أنتي مُعلمته الأولى اللي بتمسك إيده وتعلمه يمسك القلم إزاي، وتردد معاه عشان المعلومة تثبت.
- تتابعي طفلك، وتقيمي طريقة التعليم اللي بيتبعها صح ولا لأ، وتعرفي هل وصلتله المعلومات ولا في صعوبة.
ولو مرحلة التعليم الأساسي عدت بسلام؛ وقتها ممكن تسيبي أجزاء معينة لطفلك ينجزها لوحده؛ كمحاولة عشان يتعود على المذاكرة بشكل مستقل.
ومن بعد سن الـ 10 سنوات، في الصف الخامس والسادس هتبدأ ساعات مذاكرتك معاه تقل بالتدريج، وطفلك يبدأ يعتمد على نفسه، ويلجأ لك في شرح الأجزاء الصعبة عليه بس.
ومن المرحلة الإعدادية ممكن تخليه يعتمد تمامًا على نفسه، وتسألي المدرسين عن مستواه من وقت للتاني، وما تنسيش دايمًا تتابعيه عشان ما يحسش إن اهتمامك بيه قل، وكمان عشان لو في مشكلة تحليها معاه.
كيف أعود طفلي على المذاكرة بمفرده؟
تعود طفلك على المذاكرة لوحده معتمد عليكي لحد 6 سنوات؛ إيدك على إيده وطول الوقت بتخلصي معاه واجبه، ودي من أفضل طرق المذاكرة للأطفال في السن دا.
ومن بداية المدرسة بتبدئي تنسحبي والوقت بيقل بالتدريج، وتعوديه يذاكر ويخلص واجبه لوحده، ودا بيحصل بشوية خطوات:
- علميه يحضر شنطته لوحده على حسب الجدول اليومي للمدرسة، ويرتب مكتبه وأدواته عشان يوصل لحاجته بسهولة.
- عوديه يدور على المصطلحات اللي مش فاهمها على الإنترنت، واطلبي منه يقرأها وشوفي هيفهم منها ولا لأ.
- اسأليه على واجبه بعد ما ياخد راحة من رجوعه من المدرسة، وبلاش تضغطي عليه.
- قسمي الواجب المدرسي لأجزاء، وخليه يبدأ جزء بجزء عشان ينجزه كله.
- شجعيه على الحاجات الصح، وبلاش تنتقديه على الأخطاء.
وكل ما ساعدتيه يعتمد على نفسه في المذاكرة ويرتب أدواته، دا هيزود تحمله للمسؤولية، ويقوي شخصيته، وهيقل احتياجه ليكي في المذاكرة.
اقرئي كمان: أسباب عدم التركيز عند الأطفال وإزاي تتغلبي عليها.
متى أتوقف عن مساعدة طفلي في المذاكرة؟
مفيش سن معين توقفي فيه مساعدة لطفلك على المذاكرة، لإن دا بيعتمد على قدرات الطفل وميوله وشخصيته، على سبيل المثال:
في حالة صعوبة التعلم لازم تقفي جنب طفلك، وتتابعيه، وتدعميه نفسيًا، عشان ما يحسش إنه مختلف، ودا طول فترة دراسته.
وفي حالة قدرة طفلك على المذاكرة وإنه متميز في الدراسة، هيكون مطلوب منك تشجعيه، وكمان تتابعيه من وقت للتاني، عشان ما يحسش إنك أهملتيه.
أما في حالة الطفل العنيد أو الشقي اللي ما بيحبش المذاكرة، اتبعي معاه طريقة التشجيع المستمر والتحفيز، قدام المذاكرة هدايا بسيطة، ولو درجاته كانت كويسة كافئيه بجوايز أو أي وسائل ترفيه.
اقرئي أيضًا: كيفية التعامل مع الطفل العصبي في عمر السنتين.
أفضل طرق المذاكرة للأطفال
التعليم بشكل عام بيتطلب من طفلك مجهود عقلي؛ من فهم، وترتيب، وربط المعلومات ببعضها، وعشان يكون ذهنه صافي، وجاهز يستقبل معلومات.
لازم يكون واخد كفايته من النوم، ومرتاح جسديًا، وما يكونش مريض أو بذل مجهود كبير يرهقه ويقلل استيعابه، دا بجانب التغذية السليمة.
كل دا لو وفرتيه لطفلك استعداده هيكون أفضل للمذاكرة، أما عن أفضل طرق المذاكرة للأطفال فمن أهمها:
صنع جدول للمذاكرة
اتبعي مع طفلك نظام الجدول الزمني، وابعديه عن العشوائية، وخليه ينظم وقته ويستفيد منه؛ لإن إدارة الوقت من مهارات الدراسة الفعالة.
وحافظي إنه يقوم بالواجب المدرسي أول بأول، وقسمي معاه المحتوى الدراسي في شكل جدول زمني يمشي عليه مع مراعاة أوقات الراحة.
الابتعاد عن حشو المعلومات
من الأخطاء اللي بيقع فيها الأهل هو عدم تنظيم اليوم للطفل من مدرسة ودروس ومذاكرة، ودا بيسبب ضغط كبير على الطفل وبيرهقه، وبيقلل من تركيزه.
فالأفضل تنظمي يوم طفلك عشان يكون يومه متوازن بين الدراسة والأمور التانية، واعتمدي على الفترات القصيرة في المذاكرة، ومذاكرة أجزاء بسيطة، والاستمرار عليها؛ لإن الطفل بيزهق وبتقل رغبته في المذاكرة.
التدريب على الاختبارات
من الأساليب الفعالة للمذاكرة هو التطبيق بالأسئلة والاختبارات على الدروس، لإن دا بيحسس الطفل إنه شاطر، واستوعب المعلومات، وحل عليها، وبمرور الوقت بيديله الثقة في إنه يجاوب على الأسئلة في الفصل، وبيقلل من توتره وقلقه من الامتحانات، ودا من خلال:
- ابحثي عن أسئلة مختلفة على نفس الدرس في كتب خارجية أو من اختبارات قديمة، عشان يطبق ويكون مُلم بكل جوانب الدرس.
- اختبريه بعد كل جزء، عشان تتأكدي إنه ثبت معاه.
- سيبي جزء من الأسئلة ليه هو يحلها لوحده.
إنشاء بيئة دراسية مناسبة
من أفضل طرق المذاكرة للأطفال، هو توفير مكان هادئ بعيد عن أي مشتتات، وإضاءته تكون جيدة للمذاكرة، لإن دا بيزود التركيز في المذاكرة لمدة زمنية معينة، للاستفادة بأكبر قدر، وكمان بيقلل من وقت المذاكرة لإنه متشتتش بأي أمر تاني.
ودا بإنك تفهمي طفلك إن وقت المذاكرة هنبعد عن التليفزيون والموبايل والكمبيوتر، ونركز في الوقت دا على إنجاز الواجب والمذاكرة، وبعدين يقدر يلعب براحته.
ودا بتأكده دراسة اتنشرت على موقع ScienceDirect اتنفذت على عدد من الأطفال لمعرفة مدى استيعابهم في أماكن بها ضوضاء وملهيات بصرية كتير، ووجدوا إن الأماكن من النوع دا بتأثر بشكل سلبي على عملية التعلم.
تدوين الملاحظات
علمي طفلك يدون ملاحظات أثناء الاستماع للشرح؛ لإن دا بيساعده يحتفظ بالمعلومة أكتر.
ودا بتأكده دراسة اتنشرت على موقع Academic Journals إن كتابة الملاحظات يدويًا بتؤدي للاحتفاظ بالمعلومات بشكل أفضل من عدم التدوين، وتحسن الأداء الأكاديمي.
تنظيم المذاكرة
رتبي أولويات المذاكرة، وابدئي دايمًا معاه بالمواد اللي محتاجة منه تركيز، زي: الرياضيات والعلوم، وخلي المواد اللي محتاجة حفظ زي: الأناشيد والسور القرآنية لنهاية الجدول، هتسهل عليه الحفظ.
ودايماً قسمي معاه الدرس لأكتر من جزء، دا بيسهل عليه المذاكرة والمراجعة. وابدئي معاه بالأجزاء السهلة، وانقلي للصعب واحدة واحدة
استخدام أدوات التعلم التفاعلية
استخدمي التطبيقات التكنولوجية التعليمية لمساعدتك في مذاكرة طفلك، ودا لإنها مفيدة وبتقدم المذاكرة في شكل ممتع وغير ممل للطفل، من خلال الرسومات الجذابة والمتحركة، والاختبارات التفاعلية؛ فبيستوعب منها أفضل من المذاكرة التقليدية.
ودا أثبتته دراسة اتنشرت على موقع Future of Medical Journal إن استخدام التطبيقات التعليمية كان ليه أثر إيجابي على التحسن التعليمي للطلبة.
اعتماد نظام المراجعة
عشان تضمني إن طفلك يحصل على أعلى الدرجات، اعتمدي أسلوب المراجعة، واربطي بين المواضيع وبعضها؛ دا هيثبت معاه المعلومة، وهيزود فهمه للمواد، وهيخليه مستعد للاختبارات الدورية، ودا من خلال إنك:
- تعتمدي تلخيص المعلومات في النهاية، ومراجعتها في شكل فروع وخطوات بتسلم بعضها، أو نتايج متسلسلة.
- تراجعي معاه دروسه كل فترة عشان ما ينساش، واربطي دايمًا بين المعلومات القديمة والجديدة.
- تخليه يقرأ الأجزاء المطلوب منه حفظها قبل النوم، هتثبت معاه بشكل كويس ولفترة كبيرة.
- تساعديه في حل الأسئلة في نهاية كل درس، واختبري المعلومة وصلته بشكل كويس ولا لأ.
- تخليه يقرأ الدرس مرة واحدة في الآخر قبل ما ينتقل لدرس تاني.
- تعوديه يقوم بخطوة التثبيت أو المراجعة لوحده.
اقرئي كمان: كيفية الاستعداد للامتحانات.
التطبيق العملي
من النقاط الفعالة لفهم أي محتوى تعليمي هو التطبيق على أفكار، أو تنفيذ تجارب، أو المقارنة مع أمور مشابهة، زي إنك تشرحيله بشكل عملي في حالة صعوبة وصول معلومة ما، وخليه دايمًا يعمل تجارب مادة العلوم في البيت تحت إشرافك.
واتناقشي معاه في المواد اللي بتعتمد على نتائج زي العلوم، وعلميه ازاي يفكر بشكل متسلسل.
وساعديه يحفظ بشكل أفضل من خلال فهم المعنى أولًا، مثلًا: لو شرحتي آيات القرآن بشكل قصصي ومترابط؛ دا هيساعده يحفظها أسرع، وكمان الشعر، والأحاديث، وغيرهم.
تنفيذ استراتيجيات إدارة الوقت الفعالة
تنظيم الوقت، وتقسيم المواد أو الموضوعات للمذاكرة من النقاط الهامة جداً للمذاكرة الفعالة؛ ودا بيأكده بحث اتنشر على موقع Scientific Research أفاد بإن الطلاب اللي بيديروا وقتهم بشكل فعال اتحسنت نتائجهم الأكاديمية بشكل إيجابي.
تشجيع الاستراحات المنتظمة
الدراسة لوقت طويل في الغالب بتسبب الإرهاق والملل للطفل، وما بتكونش نتايجها إيجابية في الاستيعاب، أو الاحتفاظ بالمعلومة.
وعشان كدا الأفضل الاستمرار على فترات بسيطة للمذاكرة، وعمل الواجب بشكل يومي أفضل من الجلوس لساعات لإنجاز كل المهام مرة واحدة.
ودا اللي أثبتته دراسة اتنشرت على موقع NIH بتوضح إن أخذ فترات راحة بين أوقات المذاكرة أو العمل بتزيد من الإنتاجية، والنجاح الأكاديمي، وتعلم مهارات جديدة.
تعزيز وجهة نظر إيجابية ناحية التعلم
معظم الأطفال مش بيحبوا وقت المذاكرة، ودايمًا بيبقى في عياط وعناد عشان ميذاكروش، ودا سببه بيكون عدم مراعاة الطرق اللي فاتت لجعل وقت المذاكرة أفضل وفعال أكتر مع الطفل.
دا غير إن الطفل ما بيكونش عنده هدف أو سبب للمذاكرة، فدورك كأم إنك تفهميه أهمية التعليم، ونتايجه على مستقبله وحياته؛ عشان يكون إيجابي ويسعى للنجاح.
وأكيد في طرق تانية تقدري تبتكريها عشان تساعدي طفلك يذاكر، ويكون شاطر، ومتميز، من خلال ملاحظتك إيه اللي بيحفز طفلك وتركزي عليه، وإيه اللي بينفره وتبعدي عنه.
نصائح لتشجيع الطفل على المذاكرة والتعلم والتفوق
استخدام الهدايا لتشجيع الطفل مهم وله تأثيره، لكن غلط تستخدمي الطريقة دي طول الوقت، لازم توازني بين التشجيع المادي والمعنوي، وتبعدي عن المصطلحات السلبية.
ودي أهم النصائح اللي هتساعدك تشجعي طفلك على المذاكرة:
- استقبلي زمايله لو دا بيساعده وبيشجعه، اسمحي لأصحابه يذاكروا معاه واهتمي بيهم، لإن وجود طفل زيه هيشجعه وفترة البريك يلعبوا فيها سوا.
- خليه يشرحلك جزء من أي كتاب عنده، وحاولي تخليه يستفيض في توصيل المعلومة، فكرة إن هو اللي عنده المساحة للكلام هتشجعه يذاكر ويشرحلك.
- امدحي طفلك بشكل مستمر مش بس وقت المذاكرة، امدحيه على كل الأفعال الصح اللي يعملها، دا بيعزز صحته النفسية.
- ارفعي من روحه المعنوية لو في مادة بيلاقي صعوبة فيها، ودوري على أفضل طريقة لمساعدته، أو اربطيها بحاجة بيحبها.
- خليه يحب وقت المذاكرة؛ لإنه ممتع ومش ممل باستخدام الألوان، والأدوات، والطرق المبتكرة منك لمساعدته.
- اكتبيله ملاحظات إيجابية في كتبه، أو خلي بينكم كتاب للملاحظات اللي حابة توصليها له، وتكون موثقة بينكم.
- ابعدي عن المقارنة بينه وبين أي حد في المستوى الدراسي، واهتمي بيه، واتعاملي معاه كحالة فردية.
- ابعدي عن الصراخ والعنف لو اضطريتي تعيدي المعلومة أكتر من مرة، ابعدي لحد ما تهدي، واديله بريك وارجعي تاني.
- حفزيه من خلال الهدايا البسيطة، وخلي دايمًا عندك هدايا في حالات الزهق، أو التعب لتشجيعه وتجديد طاقته.
- استخدمي معاه ألعاب تحفز ذكائه، وتنشط العمليات العقلية عنده، عشان تساعده في الفهم بشكل أسرع.
- اسأليه دايمًا عن رأيه في المدرسة والمدرسين، وفي حالة وجود تعليق وصليه للمدرس من غير ما يعرف.
- خليه يختار شكل أدواته والألوان والكتب، لإن دا بيفرحه بيها، وبيخليه متحمس لاستخدامها.
- استخدمي منبه لكل مهمة، وقت ما يخلص ياخد بريك، ويرجع يكمل عشان ميحسش بالضغط.
- استخدمي الوقت لحل المسائل، وعلى سبيل التحدي قوليله يا ترى هتاخد قد إيه في حلها.
- احترمي اهتماماته وشجعيه عليها، زي: التمارين أو الهوايات، لإنها مهمة زي المذاكرة.
- فهميه أهمية المذاكرة، وإن في وقت للمذاكرة زي ما في وقت لأي نشاط.
- وفري كل أدواته وكتبه على المكتب وقت المذاكرة.
وأخيرًا، طفلك أمانة بين إيديكي، أنتي المحرك الأساسي ليه، واللي بيساعده يبني شخصيته، ويشكل كل الجوانب فيها، والتعليم واحد من أهم الجوانب دي. استخدمي أفضل طرق المذاكرة للأطفال، وخليكي مع طفلك خطوة بخطوة لحد ما يقدر يعتمد على نفسه.
المصادر
Study tips for school children: Skills and techniques for effective learning.
7 Tips for parents to help their child develop effective study skills.
أضف تعليق