أفضل طرق المذاكرة للأطفال ونصائح للتشجيع على التفوق

أفضل طرق المذاكرة للأطفال ونصائح للتشجيع على التفوق.

في بداية العام الدراسي بيبدأ القلق من المناهج عند الأم، وبيزيد العند بينها وبين أولادها عشان المذاكرة، ودي أكتر الأسئلة اللي بتسألها الأمهات لنفسها: لحد امتى هفضل قاعدة جنبه لحد ما يخلص الواجب ويذاكر؟ أعمل إيه عشان ابني يحب المذاكرة؟

في المقال دا هنجاوب على أكتر الأسئلة اللي بتدور في عقلك، وهنساعدك تعرفي امتى تساعدي طفلك في المذاكرة، وازاي تخليه يعتمد على نفسه ويذاكر لوحده، وهنعرض أفضل طرق المذاكرة للأطفال، وأهم النصائح لتشجيع طفلك على المذاكرة والنجاح.

هل يجب علي مساعدة طفلي في المذاكرة؟

سؤال يهم كل الأمهات، هو امتى أساعد طفلي في المذاكرة، وامتى أسيبه يذاكر لوحده، وإيه أفضل طرق المذاكرة للأطفال؟

مبدئياً، لازم تبقي مُدركة إن طفلك في مرحلته الأساسية محتاج تذاكري معاه أطول وقت ممكن، وهيكون صعب يعتمد على نفسه بشكل كامل في المرحلة دي، يعني بدايةً من سن الحضانة ومرورًا بالسنوات الأولى في المرحلة الابتدائية دورك مهم جداً في المذاكرة، ودا عشان:

  • تكوني أنتي مُعلمته الأولى اللي بتمسك إيده وتعلمه يمسك القلم إزاي، وتردد معاه عشان المعلومة تثبت.
  • تتابعي طفلك، وتقيمي طريقة التعليم اللي بيتبعها صح ولا لأ، وتعرفي هل وصله المعلومات ولا في صعوبة.
  • تكتشفي المشاكل اللي بتقابله في التعلم أسرع، وبالتالي تقرري نوع المدرسة المناسبة ليه، أو تعرضيه على استشاري عشان تعرفي الطريقة الصح لتعليمه.

لو مرحلة التعليم الأساسي عدت بسلام؛ وقتها ممكن تسيبي أجزاء معينة لطفلك ينجزها لوحده كمحاولة لتعويده على المذاكرة بشكل مستقل.

من بعد سن الـ 10 سنوات، في الصف الخامس والسادس هتبدأ ساعات مذاكرتك معاه تقل بالتدريج، وطفلك يبدأ يعتمد على نفسه، ويلجأ لك في شرح الأجزاء الصعبة عليه بس، ومن المرحلة الإعدادية ممكن تتركيه تمامًا يعتمد على نفسه، وتسألي المدرسين على مستواه من وقت للتاني، وما تنسيش دايمًا تتابعيه عشان ما يحسش إن اهتمامك بيه قل، وكمان عشان لو في مشكلة تحليها معاه.

كيف أعود طفلي على المذاكرة بمفرده؟

كيف أعود طفلي على المذاكرة بمفرده؟تعود طفلك على المذاكرة لوحده معتمد عليكي، لحد 6 سنوات إيدك على إيده وطول الوقت بتخلصي معاه واجبه، ودي من أفضل طرق المذاكرة للأطفال في السن دا، ومن بداية المدرسة بتبدئي تنسحبي والوقت بيقل بالتدريج، وتعوديه يذاكر ويخلص واجبه لوحده، ودا بيحصل بشوية خطوات:

  • عودي طفلك يحضر شنطته على حسب الجدول اليومي للمدرسة، ويرتب مكتبه وأدواته عشان يوصل لحاجته بسهولة.
  • اسأليه على واجبه بعد ما ياخد راحة من رجوعه من المدرسة، وبلاش تضغطي عليه.
  • قسمي الواجب المدرسي لأجزاء، وخليه يبدأ جزء بجزء عشان ينجزه كله.
  • شجعيه على الحاجات الصح، وبلاش تنتقديه على الأخطاء.
  • عوديه يدور على المصطلحات اللي مش فاهمها على الإنترنت، واطلبي منه يقرأها وشوفي هيفهم منها ولا لأ، دا هيحسن مستواه في القراءة، ويسهل عليه الوصول للمعلومة باستخدام الإنترنت.

وكل ما ساعدتيه يعتمد على نفسه في المذاكرة ويرتب أدواته، دا هيزود تحمله للمسؤولية ويقوي شخصيته.

متى أتوقف عن مساعدة طفلي في المذاكرة؟

مفيش سن معين توقفي فيه مساعدة طفلك على المذاكرة، لأن دا بيعتمد على قدرات الطفل وميوله وشخصيته، على سبيل المثال:

في حالة صعوبة التعلم لازم تقفي جنب طفلك وتتابعيه وتدعميه نفسيًا، عشان ما يحسش إنه مختلف، ودا طول فترة دراسته.
في حالة قدرة طفلك على المذاكرة وإنه متميز في الدراسة، هيكون مطلوب منك تشجعيه، وكمان تتابعيه من وقت للتاني، عشان ما يحسش إنك أهملتيه.
في حالة الطفل العنيد أو الشقي اللي ما بيحبش المذاكرة، اتبعي معاه طريقة التشجيع المستمر والتحفيز، قدام المذاكرة هدايا بسيطة، ولو درجاته كانت كويسة كافئيه بجوايز أو أي وسائل ترفيه.

أفضل طرق المذاكرة للأطفال

التعليم بشكل عام بيتطلب من طفلك مجهود عقلي من فهم وترتيب وربط المعلومات ببعضها، وعشان يكون ذهنه صافي وجاهز يستقبل معلومات، لازم يكون واخد كفايته من النوم، ومرتاح جسديًا، وما يكونش مريض أو بذل مجهود كبير يرهقه ويقلل استيعابه، دا بجانب التغذية السليمة.

كل دا لو وفرتيه لطفلك استعداده هيكون أفضل للمذاكرة، أما عن أفضل طرق المذاكرة للأطفال فمن أهمها الأتي:

  • اتبعي معاه نظام الجدول للمذاكرة، وابعديه عن العشوائية، وخليه ينظم وقته ويستفيد منه.
  • قسمي معاه الدرس لأكتر من جزء، دا بيسهل عليه المذاكرة والمراجعة.
  • ابدئي معاه بالأجزاء السهلة، وتدرجي معاه للصعب واحدة واحدة.
  • ابدئي دايمًا معاه بالمواد اللي محتاجه منه تركيز، زي: الرياضيات والعلوم، وخلي المواد اللي محتاجة حفظ زي: الأناشيد والسور القرآنية لنهاية الجدول، هتسهل عليه الحفظ.
  • اختبريه اختبار جزئي بعد كل جزء، عشان تتأكدي إنه ثبت معاه.
  • خليه يقرأ الدرس مرة واحدة في الآخر قبل ما ينتقل لدرس تاني.
  • ساعديه في حل الأسئلة في نهاية كل درس، واختبري المعلومة وصلته بشكل كويس ولا لأ.
  • سيبي جزء من الأسئلة ليه هو يحلها لوحده.
  • اتناقشي معاه في المواد اللي بتعتمد على نتائج زي العلوم، وعلميه ازاي يفكر بشكل متسلسل.
  • ابحثي عن أسئلة مختلفة على نفس الدرس في كتب خارجية أو على النت أو من اختبارات قديمة، عشان يكون مُلم بكل جوانب الدرس، ودي من أفضل طرق المذاكرة للأطفال لتثبيت المعلومة وتطبيقها بشكل مختلف.
  • عوديه يقوم بخطوة التثبيت أو المراجعة لوحده.
  • خليه يقرأ الأجزاء المطلوب منه حفظها قبل النوم، هتثبت معاه بشكل كويس ولفترة كبيرة.
  • استخدمي الوقت لحل المسائل، وعلى سبيل التحدي قوليله يا ترى هتاخد قد إيه في حلها، ودي من أفضل طرق المذاكرة للأطفال، لأنها بتنمي عنده روح التحدي والتسابق إنه يبقى أفضل.
  • اشرحي بشكل عملي في حالة صعوبة وصول معلومة ما، وخليه دايمًا يعمل تجارب مادة العلوم في البيت تحت إشرافك، التدريب العملي بيعد من أفضل طرق المذاكرة للأطفال، وبيساعد في تطبيق وفهم المعلومات أكتر.
  • راجعي معاه دروسه كل فترة عشان ما ينساش، واربطي دايمًا بين المعلومات القديمة والجديدة.
  • ساعديه يحفظ بشكل أفضل من خلال فهم المعنى أولًا، مثلًا: لو شرحتي آيات القرآن بشكل قصصي ومترابط دا هيساعده يحفظها أسرع، وكذلك الشعر والأحاديث وغيرهم.
  • اعتمدي تلخيص المعلومات في النهاية ومراجعتها في شكل فروع وخطوات بتسلم بعضها، أو نتايج متسلسلة لحدوث عملية معينة، ودي من أفضل طرق المذاكرة للأطفال اللي بتنسى، أو التركيز عندها قليل، أو ما بتقدرش تستقبل معلومات كتير.
  • استخدمي معاه ألعاب تحفز ذكائه، وتنشط العمليات العقلية عنده، عشان تساعده في الفهم بشكل أسرع.

وأكيد في طرق تانية ممكن تبقى أفضل طرق المذاكرة للأطفال تقدري تبتكريها عشان تساعدي طفلك يذاكر ويكون شاطر ومتميز. لازم تلاحظي إيه اللي بيحفز طفلك وتركزي عليه، وإيه اللي بينفره وتبعدي عنه.

نصائح لتشجيع الطفل على المذاكرة والتعلم والتفوق

نصائح لتشجيع الطفل على المذاكرة والتعلم والتفوق.استخدام الهدايا لتشجيع الطفل مهم وله تأثيره، لكن غلط تستخدمي الطريقة دي طول الوقت عشان ما تطلعيش طفلك متطلب، لازم توازني بين التشجيع المادي والمعنوي، وتبعدي عن المصطلحات السلبية طول الوقت.

ودي أهم النصائح اللي هتساعدك تشجعي طفلك على المذاكرة:

  • ابعدي عن المقارنة بينه وبين أي حد في المستوى الدراسي، واهتمي بطفلك، واتعاملي معاه كحالة فردية، واتبعي أفضل طرق المذاكرة للأطفال اللي ذكرناها في الفقرة السابقة لتحسين مستواه.
  • احترمي اهتماماته وشجعيه عليها، زي: التمارين أو الهوايات، ودي مهمة زي المذاكرة، وقتها هتلاقيه بيتشجع معاكي للمذاكرة أكتر.
  • ارفعي من روحه المعنوية لو في مادة بيلاقي صعوبة فيها، ودوري على أفضل طريقة لمساعدته، أو اربطيها بحاجة بيحبها، دا هيحفزه لمذاكرتها.
  • اكتبيله ملاحظات إيجابية في كتبه، أو خلي بينكم كتاب للملاحظات اللي حابه توصليها له، وتكون موثقة بينكم.
    خليه يختار شكل أدواته والألوان والكتب، اختياره لأدواته بيفرحه بيها، وبيخليه متحمس لاستخدامها.
  • اسأليه دايمًا عن رأيه في المدرسة والمدرسين، وفي حالة وجود تعليق وصليه للمدرس من غير ما يعرف. تغيير أسلوب المدرس معاه هيشجعه على المذاكرة والتفوق.
  • استقبلي زمايله لو دا بيساعده وبيشجعه، اسمحي لأصحابه يذاكروا معاه واهتمي بيهم، لأن وجود طفل زيه هيشجعه وفترة البريك يلعبوا فيها سوا.
  • خليه يشرحلك جزء من أي كتاب عنده، وحاولي تخليه يستفيض في توصيل المعلومة، فكرة إن هو اللي عنده المساحة للكلام هتشجعه يذاكر ويشرحلك، ودي من أفضل طرق المذاكرة للأطفال وأكترها فعالية.
  • خليه يحب وقت المذاكرة لأنه ممتع ومش ممل باستخدام الألوان والأدوات والطرق المبتكرة منك لمساعدته.
  • امدحي طفلك بشكل مستمر مش بس وقت المذاكرة، امدحيه على كل الأفعال الصح اللي يعملها، دا بيساعد في تعزيز صحته النفسية بشكل سليم.
  • فهميه أهمية المذاكرة، وإن في وقت للمذاكرة زي ما في وقت لأي نشاط.
  • ابعدي عن الصراخ والعنف لو قمتي بإعادة المعلومة أكتر من مرة، ابعدي لحد ما تهدي، واديله بريك وارجعي تاني.
  • حفزيه من خلال الهدايا البسيطة، وخلي دايمًا عندك هدايا في حالات الزهق أو التعب لتشجيعه وتجديد طاقته.
  • ابعدي عن طفلك أي وسائل تشتيت لا تلفزيون ولا موبايل ولا ألعاب قبل بداية المذاكرة، ووفري غرفة فيها إضاءة كويسة يذاكر فيها.
  • وفري كل أدواته والكتب على المكتب، عشان ميدورش على حاجة وقت المذاكرة.
  • ساعديه في عمل جدول لتقسيم المهام المطلوبة منه، وكل ما ينجز جزء يعلم عليه، دا بيعد من أفضل طرق المذاكرة للأطفال، لأنه هيحفزه ويحسسه إنه بينجز.
  • استخدمي منبه لكل مهمة، وقت ما يخلص ياخد بريك ويرجع يكمل عشان ميحسش بالضغط.

وأخيراً، طفلك أمانة بين إيديكي، أنتي المحرك الأساسي ليه، واللي بيساعده يبني شخصيته، ويشكل كل الجوانب فيها، والتعليم واحد من أهم الجوانب دي. استخدمي أفضل طرق المذاكرة للأطفال، وخليكي مع طفلك خطوة بخطوة لحد ما يقدر يعتمد على نفسه.

يمكنك أيضًا قراءة: أنماط التعليم الأربعة | الطريقة الأشهر لمعرفة نمط التعلم المفضل لطفلك

 

 

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق