علامات ضعف الشخصية عند الطفل | إزاي تلاحظها وتساعد ابنك يتخطاها؟

هل لاحظت إن ابنك دايمًا ساكت وسط الناس؟ أو بيخاف يرد حتى لو حد ظلمه؟ ممكن يكون بيتنازل عن رأيه بسهولة أو بيخجل يتكلم قدام الآخرين؟ كتير من الأهل بيفتكروا إن دي حاجات طبيعية، لكن الحقيقة إن التصرفات دي ممكن تكون علامات ضعف الشخصية عند الطفل، ولو اتسابت من غير تدخل، ممكن تأثر على ثقته بنفسه وعلى مستقبله كمان.

في المقال دا، هنتكلم عن معنى ضعف الشخصية عند الأطفال، وأهم العلامات اللي لازم ناخد بالنا منها، وهنوضح الفرق بين الخجل الطبيعي والضعف، وكمان الأسباب اللي ممكن توصل الطفل للحالة دي. والأهم هنقدملك خطوات عملية تساعدك تدعم ابنك وتبني معاه شخصية قوية وواثقة بنفسها.

يلا نبدأ ونفهم أكتر إزاي نحمي ولادنا من ضعف الشخصية ونقويهم من جواهم.

يعني إيه ضعف الشخصية عند الطفل؟

قبل ما نتكلم عن علامات ضعف الشخصية عند الطفل؛ مهم نعرف يعني إيه شخصية؛ بنلاقي إن علماء النفس بيعرفوها إنها الطريقة اللي بيتصرف بيها الطفل وبيتفاعل بيها مع اللي حواليه، ودي بتتشكل من صفات ثابتة زَي الاهتمامات، الدوافع، القيم، الصورة اللي شايف بيها نفسه، وقدراته، وحتى ردود فعله العاطفية. مفيش شخصية واحدة صح أو غلط، كل طفل بيكون له تركيبة خاصة.

بس فيه علامات ضعف الشخصية عند الطفل وفي علامات للقوة كمان؛ وعلشان كدا مهم جدًا إنك تتقبل شخصية ابنك زي ما هي، وتشتغل على تنميتها وتطويرها بشكل مستمر من غير ما تقارنه بحد.

ومن المهم توضح الفرق بين بعض الأنماط اللي ممكن تظهر في شخصية الطفل، زي الطفل الهادي، الخجول، أو اللي بيظهر عليه علامات ضعف الشخصية. عشان نفهم كويس الاختلافات، هنتكلم عن:

• الطفل الهادي: دا مش بالضرورة يكون عنده مشكلة في شخصيته، الهدوء ممكن يكون مجرد جزء من طبيعته، لكنه بيكون قادر على التفاعل مع الآخرين وعنده ثقة في نفسه.
• الطفل الخجول: بيكون متردد في التفاعل الاجتماعي، بس مش معناه إنه ضعيف الشخصية. الخجل في بعض الأحيان بيكون رد فعل مؤقت أو نتيجة لعدم الثقة بالنفس في مواقف معينة.
• الطفل ضعيف الشخصية: دا عادةً بيكون طفل عنده صعوبة في اتخاذ قراراته، بيحس بالعجز، وبيخاف من التفاعل مع الآخرين أو اتخاذ المخاطر. ودا بيأثر على ثقته في نفسه وبيخليه يعاني في المواقف الاجتماعية.

اتعرف على: كيفية التعامل مع الطفل الخجول في الروضة بشكل سليم في 6 طرق.

أهم علامات ضعف الشخصية عند الطفل

سلوكيات الطفل وأقواله بتعبر كتير عن شخصيته، ولإن الطفل ضعيف الشخصية بيميل أكتر للانسحاب والهدوء، فدي أبرز علامات ضعف الشخصية عند الطفل اللي لو اجتمعت عند طفلك بتفهم إن عنده خلل في شخصيته، ومحتاج منك مجهود لتقويته وزيادة ثقته بنفسه:

التردد المستمر

لما تسأل الطفل سؤال بسيط زي: “تحب تلعب إيه؟” تلاقيه بسرعة بص لمامته أو باباه عشان يجاوبه أو ياخد رأيهم الأول، كأنه مش قادر يقرر لوحده أو خايف يقول رأيه.

الخوف من التعبير عن مشاعره

بيخاف يقول هو حاسس بإيه، فلو زعلان أو متضايق أو حتى فرحان مش بيعرف يعبر. بيقعد ساكت أو يرد بكلمة واحدة، وممكن يحس إنه لو اتكلم هيتهاجم أو هيتقال عليه “كبير بزيادة”.

عدم المبادرة والخوف من إتخاذ قرار

عمره ما ياخد خطوة لوحده، فبتلاقيه مش بيبادر ولا بيحاول يجرب حاجة جديدة، سواء لعبة، نشاط، أو حتى يطلب حاجة هو محتاجها. دايمًا مستني حد يقوله يعمل إيه.

الخمول وضعف الهمة لأداء أي نشاط

دايمًا حاسس إنه تعبان ومفيش طاقة، فتيجي تطلب منه يرتب أوضته أو يساعد في حاجة بسيطة، تلاقيه بيتهرب أو يقول “مش قادر”، مفيش حماس أو نشاط، وكأن الدنيا كلها عليه.

التهرب من المسؤولية

التهرب من مسؤولية أي حاجة من أبرز علامات ضعف الشخصية عند الطفل؛ لو كسر حاجة أو غلط بتلاقيه على طول يقول “مش أنا” أو “فلان هو السبب”. مش بيعترف بغلطه وبيخاف يواجه العواقب، وبيلقي اللوم على غيره.

الميل للانعزال والانطواء

مش بيحب يندمج مع الناس في أي تجمع أو خروجة تلاقيه قاعد لوحده، مش بيتكلم مع حد، أو حتى ممكن يطلب يرجع البيت بدري. بيفضل العزلة وبيبعد عن أي تفاعل اجتماعي.

انعدام الثقة بالنفس

لو قلتله “برافو” أو شجعته، ممكن يرد بـ “أنا مش كويس”، “أنا معرفش أعمل كدا”، دايمًا شايف نفسه أقل من غيره.

السلبية والتشاؤم باستمرار

السلبية من أبرز علامات ضعف الشخصية عند الطفل؛ فبتلاقي نظرته للحياة كلها سلبية مهما حصل حواليه حاجات حلوة، دايمًا يلاقي سبب للتشاؤم. يقول “أكيد هيبوظ”، أو “أنا عمري ما هنجح”.

التشتت الفكري والبكاء على أتفه الأسباب

بيتشتت بسرعة وبيبكي من أقل حاجة، فلو في شوية دوشة حواليه، يضيع تركيزه، ولو حد زعقله بصوت عالي شوية ممكن تلاقيه عيط فورًا، حتى لو السبب بسيط جدًا.

اتعرف على: 10 طرق لكيفية التعامل مع الطفل المشاغب في الروضة بشكل صحيح.

أسباب ضعف الشخصية عند الطفل

ظهور علامات ضعف الشخصية عند الطفل بيكون في الغالب ناتج عن تصرفات الأب والأم، علشان كدا علاج المشكلة دي بيبدأ من عندهم هما الأول، وبالذات لما يوقفوا شوية تصرفات معينة زي:

المقارنة بين الطفل وبين إخوته أو صحابه

كل طفل عنده حاجات بيتميز بيها، ولو الأب والأم ما ركزوش على الحاجات دي، غالبًا هيفضلوا يقارنوا بينهم وبين أطفال تانيين أو حتى بينه وبين إخواته.

والمقارنة دي – سواء كانت بغرض التوبيخ أو حتى من باب النصيحة – بتأثر جدًا على نفسية الطفل، وبتخليه مع الوقت يسيب رأيه ويمشي ورا اللي يرضي أهله بس.

تحميل الطفل مسؤوليات أكبر من سنه

ساعات بنطلب من الطفل يعمل حاجات صعبة عليه أو أكبر من قدراته، ولما ما يعرفش يعملها زي ما احنا متوقعين نلومه ونتخانق معاه أو حتى نعاقبه.

ودا بيخليه يحس إنه مش نافع أو ملوش قيمة، وبتبدأ تظهر عليه علامات ضعف الشخصية عند الطفل مع إن الغلط مش منه، لكن من التوقعات العالية اللي اتفرضت عليه.

الحماية الزيادة عن اللزوم

لما الأب أو الأم يفضلوا يحموا طفلهم زيادة عن الطبيعي، بيمنعوه من إنه يكتشف العالم اللي حواليه أو يجرب حاجات جديدة بنفسه، مع إن دا شيء طبيعي وجواه بالفطرة.

علشان كدا مهم جدًا نسيب له مساحة يتحرك فيها، يغلط ويتعلم، وإنت دورك تكون جنبه وتوجهه إزاي يتصرف ويحل مشاكله بطريقة صح.

وصف الطفل بكلام سلبي طول الوقت

لما الطفل يسمع كلام زي: “إنت غبي” أو “ضعيف” أو “مش نافع”، أو حتى يسمع إحباط مستمر من أهله، دا بيأثر عليه جامد جدًا.

لأن الطفل بيتبرمج بالكلام اللي بيسمعه، وبيصدق إنه فعلًا كدا، ويعيش طول حياته شايل الصورة السلبية دي عن نفسه، وبتظهر عليه أغلب علامات ضعف الشخصية عند الطفل اللي ذكرناها.

التربية بالعنف والشدة

لما تضرب ابنك أو تزعق له على طول، دا مش بيعدّله سلوكه زي ما البعض فاكر… دا بيكسره من جواه.

الخوف الشديد اللي بيعيشه بيخليه مهزوز وضعيف، وشخصيته تبقى هشة قدام أي موقف أو تحدي.

الصدمة النفسية

في مواقف صعبة ممكن تكسر الطفل وتفضل مأثرة عليه لفترة طويلة… زي مثلًا انفصال الأب والأم، أو المشاكل والخناقات المستمرة في البيت.

الحاجات دي بتخلي الطفل يحس بعدم الأمان، ودا بينعكس على ثقته في نفسه وشخصيته عمومًا.

اتعرف على: طريقة التعامل مع الطفل العنيد وشديد الذكاء في 5 خطوات.

طرق علاج ضعف الشخصية عند الطفل

بعد تأكدك من ظهور علامات ضعف الشخصية عند الطفل، ولاقيت إن في سلوكيات بتعملها قدامه آثرت عليه بييجي وقت العلاج عن طريق دعم السلوكيات المعاكسة وتقوية شخصية الطفل وزيادة ثقته بنفسه عن طريق إنك تـ:

1- شجّعه يختلط بالناس

ساعد ابنك إنه يبقى وسط الناس، يتكلم معاهم، ويتعود على وجوده في التجمعات. كل ما يواجه خوفه من الكلام أو التعامل مع غيره، ثقته بنفسه هتزيد.

2- خليه يشارك في الأنشطة العائلية

لما الطفل يشارك في خروجات العيلة أو تجمعات الأصدقاء، هيبدأ يتعرف على شخصيات مختلفة، ويقارن نفسه بيهم، ودا بيساعده يكوّن صداقات شبهه.

3- خلّيه يحب يقرأ ويعرف معلومات جديدة

القراءة بتقوي شخصيته وبتزوّده معرفة. كل ما يعرف أكتر، هيحس إنه يقدر يتكلم مع الناس ويشارك في المجتمع.

4- شجّعه يجرب ويغلط

خليه يجرب حاجات جديدة، ولو غلط ما تزعقش. بالعكس، فهمه إن الغلط دا جزء من التعلُّم، وإنه مش لازم يخاف من اللوم.

5- درّبه يبتسم للناس

شجّعه دايمًا يبتسم لما يقابل حد، لأن الابتسامة بتقرّب بين الناس، وبتساعده يتعامل مع غيره براحة.

6- اصبر عليه وصدق في تغيّره

التغيير بياخد وقت، بس لازم تصبر وتؤمن إن فيه أمل دايمًا. كل ما تديله فرص أكتر، هيتغيّر للأحسن.

7- ابعده عن الناس السلبية

الناس اللي دايمًا بتشتكي أو متشائمة بتأثر عليه بالسلب. خليه دايمًا وسط ناس بتتكلم بطريقة إيجابية ومشجعة.

8- علمه يعبّر عن مشاعره

ما تخلهوش يكتم جواه، اسمعه، وفهّمه إن التعبير عن اللي حاسس بيه مش ضعف، بالعكس دا بيقوي شخصيته.

9- خلي قدراته البسيطة تبان مفيدة

أي حاجة بيعرف يعملها حتى لو بسيطة، حاول تبرزها وتوريله إنها حاجة مهمة ومفيدة.

10- وفّر له راحة نفسية

حاول تهيّئ له جو مريح، وابعِده عن العزلة. شجّعه يخرج ويشارك في الحياة، خطوة بخطوة، واحميه من ظهور علامات ضعف الشخصية عند الطفل.

11- عرفه على الناس الإيجابية

الناس المتفائلة واللي دايمًا بتقول كلام حلو بتأثر جدًا في الطفل. خليه يقضي وقت مع أصحاب وأهل إيجابيين، علشان يتعود على التفكير الإيجابي.

12- امدحه وشجّعه بكلمة حلوة

كلمة بسيطة زي “برافو عليك” أو “أنا فخور بيك” ممكن تغيّر حاله وتديله طاقة وحماس. الكلمة ليها مفعول السحر مع الأطفال.

13- احترمه قدام الناس

بلاش تقلل من قيمته أو تزعقله قدام حد حتى لو غلط. اتكلم عن الحاجات الكويسة اللي فيه من غير مبالغة، وغمّض عن عيوبه شوية.

14- حمّله مسؤوليات بسيطة

اديله مهام على قده، زي إنه يرتب سريره أو يساعد في حاجة صغيرة. كدا هيحس إنه قادر وهيكتشف جوانب حلوة في نفسه.

15- ادعمه وبيّن له حبك

الطفل اللي حاسس إن أهله بيحبوه بجد، بيبقى مرتاح وواثق في نفسه أكتر. فطبطب عليه، شجّعه، واحتويه دايمًا.

16- غيّر من سلوكيات اللي حواليه

البيئة من أهم الأسباب لظهور علامات ضعف الشخصية عند الطفل، يعني لو إخواته بقوا يقلدوا أخطائك معاه زي إنهم يشتموه بإنت غبي إنت مش نافع، اقعد معاهم وفهمهم إن دا كان سلوك غلط منك واعتذرلهم ودلهم على التعامل الصحيح لأخوهم.

ولو حد من أصحابه اتصرف بأي طريقة ضايقته اتواصل معاه أو أهله وفهمهم الطريقة الصحيحة للتعامل بهدوء، حتى الأهل الأجداد الأعمام وغيرهم لو لاقيتهم بيعملوا سلوك غلط وبيحفز الضعف والسلبية عند طفلك، اتواصل معاهم وقولهم على الطريقة الصح للتعامل.

إزاي تقوي شخصية طفلك من الصغر؟

من أهم الأسئلة اللي ممكن تراودك عشان تتلاشى الأخطاء اللي ممكن تسبب ظهور علامات ضعف الشخصية عند الطفل ويكبر بيها، وفي الغالب بيكون من خلال بيئة أسرية داعمة وسوية، ودي أهم النقاط اللي مهم تشتغل عليها:

كونوا قدوة حسنة ليه

لو الطفل شاف أبوه أو أمه عندهم شخصية قوية، بيعرفوا ياخدوا قراراتهم بنفسهم، وبيتحملوا المسؤولية، هيبدأ يقلدهم بشكل تلقائي.

كل ما شاف تصرفات فيها ثقة وقوة، هيتعلمها وياخدها منهُم.

حافظوا على توازن العلاقة قدامه

ماينفعش يبقى في سيطرة طرف على التاني قدام الطفل، يعني مثلًا مايبقاش الأب دايمًا مسيطر والأم مالهاش رأي، أو العكس.

الطفل في الحالة دي هيتلخبط، وممكن يتأثر وتبدأ تظهر علامات ضعف الشخصية عند الطفل زيهُم أو ياخد طبع سلبي من اللي حاسس إنه “الأضعف”.

امدحوا الطفل لما يعمل حاجة كويسة (من غير مبالغة)

مدح الطفل لما يعمل حاجة كويسة، زي إنه يرتب أوضته أو يذاكر من نفسه، دا بيقوي ثقته بنفسه.
بس لازم نقول له إحنا بنمدحه على إيه بالضبط، علشان يفهم التصرف الصح ويكرره.

والمهم كمان إن المدح مايكونش بشكل مبالغ فيه، ومايبقاش على حساب أخواته أو أطفال تانيين، علشان مايتحولش للغرور.

كافئوه لما يثبت نفسه

لما تلاحظ إن ابنك بدأ يثبت نفسه أو يكرر السلوكيات الكويسة، كافئه بحاجة حلوة يحبها… ممكن تكون لعبة جديدة، أو خروجة لمدينة ملاهي.

بس أهم حاجة، قوله إن المكافأة دي علشان تصرف معين عمله… علشان يربط التصرف الكويس بالمكافأة.

دخّلوه رياضة هو بيحبها

الرياضة من أقوى الحاجات اللي بتأثر في شخصية الطفل، والدراسات بتقول إن الطفل الرياضي بيبقى عنده ثقة بنفسه، وبيتعلم يتحكم في تصرفاته، وبيواجه التحديات.

بس المهم تسيبه يختار اللعبة اللي بيرتاح فيها… ماتجبرهوش على رياضة معينة.

اتكلموا معاه باستمرار

خليكم دايمًا مهتمين برأيه، اسمعوا أحلامه وأفكاره، واطرحوا عليه أسئلة تخليه يعبر عن نفسه… كدا هيحس إن ليه قيمة وإن رأيه مهم.

جربوا أسئلة زي:

مين أكتر أصحابك اللي بتحب تقضي وقتك معاهم؟ وإيه اللي بتحبه فيهم؟

• إيه أكتر مادة بتحبها في المدرسة؟ وليه؟
• شايف إننا ممكن نساعدك إزاي أكتر؟
• نفسك تشتغل إيه لما تكبر؟ وليه؟
• إيه أكتر حاجة بتفرحك فعلًا؟

الأسئلة دي بتخلي الطفل يفكر، ويعرف نفسه أكتر، ويبدأ يحس إن ليه كيان ورأي، ودا بيساعده يبني شخصية قوية وواثقة.

في النهاية، علامات ضعف الشخصية عند الطفل مبتظهرش بس في الخجل أو الانطواء، لكن كمان في عدم القدرة على اتخاذ قرارات أو التعبير عن النفس. ودا بيكون سببه الأساسي في كتير من الحالات هو أسلوب التربية، زي المقارنة، الحماية الزايدة، أو التوبيخ المستمر.

وعلشان نقدر نساعد أطفالنا يبنوا شخصية قوية وواثقة، محتاجين نكون قدوة ليهم، نديهم مساحات للتعبير، ونشجعهم على الاعتماد على النفس وتحمل المسؤولية.

كمان مهم نستخدم الحوار ونقوي علاقتنا بيهم بالكلام والسؤال عن أفكارهم وأحلامهم.

وخليك فاكر دايمًا إن بناء الشخصية بيبدأ من البيت، وبإيد أهله وسلوكياتهم قدامه، فاحرص إنك تكون أفضل صورة من نفسك عشان هو يكون في أحسن صورة ليه.

المصادر

Working with Weakness: 3 Ways to Effectively Confront Your Child’s Weak Spots
7 ways parents can help boost their child’s personality development
Types of strengths in kids
How to Find your Child’s Strengths and Weaknesses