طريقة التعامل مع الطفل العنيد وشديد الذكاء في 5 خطوات

طريقة التعامل مع الطفل العنيد بصورة صحيحة هي تحدي كبير بيواجه أي ولي أمر بيعاني من المشكلة دي مع طفله، خصوصاً وإن الأطفال دلوقت بقى ليهم متطلبات مختلفة عن قبل كدا.

وممكن مشكلة العند دي تظهر عند الطفل في عمر مبكر، أو تظهر في مرحلة الكلام أو في مرحلة المراهقة، ولكل عمر منهم طريقة مثالية للتعامل معاه، ودا عشان تتجنب مستوى العناد الكبير عند الطفل وفي نفس الوقت تحافظ على شخصيته. 

عشان كدا في المقال دا هنتكلم عن أسباب عناد الأطفال، وطريقة التعامل معاهم، وإدارة سلوكياتهم بأفضل شكل ممكن. 

أسباب العناد عند الأطفال 

سلوك العناد عند الأطفال هو ظاهرة طبيعية ومنتشرة بتندرج ضمن عملية نضوجهم النفسي والاجتماعي، وقبل ما نتعرف على طريقة التعامل مع الطفل العنيد من الضروري نفهم سبب عناده، واللي بيتمثل في: 

• المشاكل الأسرية، ودي بتعد العامل الأكبر في أي اضطرابات نفسية بيتعرض لها الطفل. 
• ظهور عناده كرد فعل على أي تغيُرات حياتية تحصله، سواء تغُيرات اجتماعية أو أسرية. 
• مقارنة الطفل بغيره، لإنه بيفقد ثقته بنفسه، وبيرد بفعل عكسي غير اللي عاوزينه منه.
• مقابلة عناد الأهل بالعناد من الطفل، للتعبير عن رغبته في فرض شخصيته ورأيه. 
• الرغبة في استكشاف وفهم حدوده في الحياة، والقواعد اللي هو مُلزم بيها. 
• رغبة الطفل في الاستقلال عن أهله، واتخاذ قراراته بنفسه. 
• الدلع والدلال المُفرط من الوالدين. 

طريقة التعامل مع الطفل العنيد 

لكل عمر المتطلبات الخاصة بيه، ودي حاجة ممكن تختلف من طفل للتاني حتى في نفس السن، وعشان كدا بنلاقي خبراء التربية الحديثة حطوا أمثلة كتيرة لطريقة التعامل مع الطفل العنيد والشقي في نفس الوقت، واللي بتتمثل في: 

تحويل الأمر إلى تحدي 

لو كان الطفل عنيد وشقي في نفس الوقت، يبقى أفضل طريقة للتعامل معاه هو تحويل كل الأمور الخاصة بيه إلى تحدي، لإنه مش هيقبل ياخد أوامر من الوالدين، بس ممكن تقدمله الموضوع على شكل تحدي، وتحط وقت محدد لإنجاز الأمر، وفي حالة إنجازه تديله مكافأة على دا. 

دعوة الطفل للمساعدة في الأعمال 

وهنا بيتبع الوالدين طرق ترغيب الطفل في المساعدة في البيت، ودا من خلال استخدام كلمات التشجيع اللي بتأكد للطفل إنه كويس.

فعلى سبيل المثال، لو عاوز ابنك يرتب غرفته، يبقى بدل ما تديله دا في شكل أمر، قوله أنت شخص مميز في ترتيب غرفتك، وعارف كويس الأماكن الخاصة بالألعاب بتاعتك، ودي طريقة التعامل مع الطفل العنيد اللي ليها فعالية كبيرة. 

الابتعاد عن أساليب التهديد المختلفة 

الطفل العنيد بطبعه مش بيقبل فكرة التهديد، بالعكس دي حاجة بتزود من عناده، فبدل ما تقوله إنك هتحرمه من الألعاب اللي بيحبها لو ما رتبش غرفته، قوله إنك ممكن تطلع له الألعاب بتاعته بس بعد ما يرتب غرفته الأول.

اقرأ أيضًا: مشكلات الأطفال السلوكية | تعرف على أسباب وعلاج أبرز 11 مشكلة سلوكية.

التشجيع 

واحد من أكتر الأساليب المميزة في طريقة التعامل مع الطفل العنيد هو التشجيع، وهنا أفراد الأسرة أو المدرسين أو قرايب الطفل ضروري يشجعوه على كل الحاجات الإيجابية اللي بيعملها. 

ووفقاً للدراسة المقدمة من جمعية علم النفس الأمريكية (APA) بعنوان “لماذا يصبح الأطفال العنيدون أكثر عرضة للنجاح؟” بنلاقي إنه تم متابعة حوالي 700 شخص لفترة من الزمن من سن 12 إلى 52 سنة، وركز فريق البحث على شخصية كل فرد منهم من حيث الاجتهاد، والضمير، والميل للتحديات. 

وأظهرت النتائج إن الأطفال أصحاب صفة العناد كانوا هما أصحاب الرواتب الأعلى، والنجاح المهني الأكبر في المستقبل بعد كدا، فبلاش تيأس من سلوك طفلك وحاول تشجعه على الإيجابيات. 

الاهتمام بتقوية العلاقة مع الطفل

أحياناً بيكون الاحتجاج والعناد هو وسيلة من الطفل للتعبير عن مشاعره واحتياجاته، وفي الوقت دا بيكون محتاج منك تقرب منه، وتفهم موقفه، مش إنك تصدر عليه أحكام سريعة وخلاص. 

وفي الوثيقة المقدمة من “جامعة Harvard” عن “تطور الأطفال في بيئة العلاقات العاملة” بنقدر نستنتج إن جودة العلاقات والتفاعلات اللي بيقدمها الوالدين وغيرهم من البالغين اللي حوالين الطفل بتلعب دور أساسي في تشكيل سلوكه.

وإن العلاقات الإيجابية الداعمة ليه بتساعده على تطوير مهاراته، وقدرته على التعاون مع الآخرين، وعلى العكس هنلاقي إن العلاقات السلبية بتأثر على سلوكيات الطفل، بما فيها زيادة عناده. 

طريقة التعامل مع الطفل العنيد والعصبي 

العناد عند الأطفال مش سلوك مكتسب، لإنه مجرد مرحلة لازم يعدي بيها كل الأطفال، لكن العصبية هي أسلوب مكتسب من المحيطين بالطفل، وفي حالة إن الطفل عنيد وعصبي في نفس الوقت يبقى التعامل محتاج مجموعة من الخطوات، زي:  

إتباع أسلوب التفاوض 

بيحتاج بعض الأطفال للشعور بالسيطرة على حياتهم من غير ما ياخدوا أوامر من الناس حواليهم، ودي حاجة بتحصل في كل الأعمار، فمهما كان عمر الطفل ممكن تتبع معاه أسلوب التفاوض والنقاش عشان يحس بالسيطرة على حياته. 

احترام الطفل خاصة أمام الآخرين 

احترام الطفل هو واحد من أفضل أساليب التربية الحديثة، وطريقة التعامل مع الطفل العنيد لازم يسيطر عليها الأسلوب دا، خصوصاً لما ييجي الطفل ياخد قرار معين. 

وفي حالة إن القرار كان غلط، يبقى ممكن تناقش الطفل فيه بس من غير ما تقلل منه، ومن طريقة تفكيره، خصوصاً لو المناقشة دي بيحضرها حد تاني معاكم.  

إلهاء الطفل 

وهنا واجب على الوالدين أو الأشخاص اللي حوالين الطفل يعرفوا إيه هي الحاجات اللي بيحبها الطفل وبتلهيه عن إنه يعمل حاجات غلط.

فبدل ما تلومه على فعله لحاجات غير مرغوب فيها، ممكن توجهه للعب بلعبته المفضلة، أو مشاهدة الكارتون المفضل، وبكدا تكون بتشتت انتباهه عن الغلط. 

تقسيم المهام الخاصة به 

تقسيم المهام بيعد أداة فعّالة جداً لتعزيز التعاون والشعور بالمسئولية عند الطفل، وعشان كدا الأحسن إنك تقسم له المهام اليومية الخاصة بيه، سواء كانت المهام دي تخص الأعمال المنزلية في البيت، أو الواجبات المدرسية. 

اقرأ أيضًا: 5 نصائح تنظيم وقت الأطفال في المنزل وجداول جاهزة للتحميل. 

كيفية التعامل مع الطفل العنيد وكثير البكاء 

طريقة التعامل مع الطفل العنيد اللي بيعيط كتير هي واحدة من الطرق اللي بيحسها بعض أولياء الأمور إنها صعبة، خصوصاً وإن الطفل في عمره الصغير دا مش بيكون مدرك لحاجات كتير، ودا بيخليه يعيط لما يحتاج حاجة.

لكن من خلال بعض الخطوات بيتمكن الوالدين من السيطرة على عِند وبكاء الطفل، واللي بتتمثل في: 

1. الاتفاق بين الوالدين على التصرفات والسلوكيات اللي بتظهر منهم قدام الطفل. 
2. الحرص على إظهار مشاعر الحب والاحترام للطفل في كل مراحله العمرية. 
3. حكاية القصص البطولية اللي تحسسه بأهمية إنه يكون إنسان كويس. 
4. مدح الطفل على أي حاجة كويسة يعملها، وتجنب الصراخ أمام بكائه. 
5. عدم الإنصات للطفل في حالة إنه بيعيط لمجرد لفت الانتباه بس. 

طريقة التعامل مع الطفل العنيد في المدرسة 

كيفية التعامل مع الطفل العنيد اللي مش بيسمع الكلام هو واحد من بين التساؤلات اللي بتتردد على لسان أولياء الأمور، خصوصاً لو كان في المدرسة. 

فممكن ما يقدرش الوالدين يسيطروا على الطفل على مدار اليوم، ومن الأفضل في الحالة دي التعرف على طريقة التعامل مع الطفل العنيد والمشاغب، واللي منها: 

• التشاور مع الطفل في كل الحاجات اللي بتغضبه خصوصاً لو كان سنه كبير. 
• مشاركة الطفل في كل اهتماماته، سواء الدراسة أو اللعب أو الفسح.. إلخ. 
• تقديم النصائح للطفل عن الدراسة أو عن طريقة التعامل مع الآخرين. 
• مكافأة الطفل على الحاجات الكويسة اللي بيعملها بشكل عام.
• تجنب ضرب أو تعنيف الطفل قدام الناس حتى لو كان غلطان. 
• عدم مقارنة الطفل بصحابه أو إخواته في البيت. 
• إشراك الطفل في الألعاب وتمارين التأمل.  

اقرأ أيضًا: 7 أضرار ضرب الطفل في عمر الثلاث سنوات وطرق العقاب البديلة. 

طريقة التعامل مع الطفل العنيد في عمر 11 سنة

معظم أولياء الأمور بيدوروا على الطريقة الصحيحة للتعامل مع الطفل العنيد في الفترة بين 4 إلى 11 سنة، لإنها أكتر مراحل العند عند الأطفال.

وضروري إن ولي الأمر يعرف يتعامل مع طفله صح في الفترة دي، عشان ما يخسرش ثقته مدى الحياة، ودي شوية نصائح تخص الموضوع دا: 

• اتكلم معاه عن خطورة أصدقاء السوء، وأضرار التدخين، وأضرار أي فعل سيء ممكن يعمله. 
• كلمه عن الإنجازات الدراسية اللي ممكن يحققها، وعن التحديات اللي ممكن يتغلب عليها. 
• فهمه مميزات التعامل بشكل كويس مع صحابه، ومع الناس عموماً. 
• شاركه في بعض المهام اليومية في البيت عشان يحس بأهميتها.
• وجّه طفلك للصح أفضل من عقابه على الغلط بشكل مستمر. 
• افهم وجهة نظره في أي موضوع يخصه، وتجنب الضغط عليه. 
• ما تتكلمش قدامه بسلبية عشان تحفزه يكون شخص إيجابي. 
• شاركه في كل حاجة تخص مدرسته، وحسسه بوجودك جنبه. 
• خليك هادي في التعامل معاه، خصوصاً لو كان بيعيط كتير. 

الخلاصة

في رحلة التربية بتظهر تحديات التعامل مع الأطفال العنيدين كلغز بيتطلب فهم عميق واستراتيجيات فعّالة، لإن التمرد والعناد مش مجرد سلوك بيحتاج لإدارة، لكنه بوابة للتفاهم العميق وتعزيز العلاقة مع أطفالنا الصغار.

ومن خلال تحديد أسباب العناد وفهم طريقة تطور الأطفال، وصلنا للشكل الأفضل لطريقة التعامل مع الطفل العنيد بكل صفاته، سواء كان عصبي أو شقي أو بيعيط كتير. 

في النهاية خلينا نقولك إنه من خلال تقديم الاهتمام والحب، وتقسيم المهام، وفهم تحديات الطفل وطريقة تفكيره، وتشجيعه على تخطي الصعاب بنقدر نحول العناد والتمرد لفرصة قوية عشان نبني ذكريات مع أطفالنا، وعلاقات تدوم مدى الحياة.