تربية الطفل مسؤولية كبيرة على أي أم، وبتكون أكبر لو الطفل دا مصاب بمرض التوحد أو بسمات التوحد، وعنده مشكلة في التواصل، ومش بيعرف يعبر عن نفسه!
لو ما تعرفيش إيه الفرق بين سمات التوحد والتوحد، المقال دا هيوضحلك الفرق بينهم في الأعراض، والأسباب، وطرق العلاج، وأفضل الطرق للتعامل مع الحالتين بشكل صحيح.
ما هو اضطراب طيف التوحد؟
اضطراب طيف التوحد هو مرض عصبي عقلي، بينشأ نتيجة لعيب في النمو الدماغي للشخص المصاب، وبتظهر أعراضه في فترة الطفولة المبكرة، وبيأثر عليه طوال حياته.
وبيواجه الأشخاص المصابين بطيف التوحد مشاكل في التواصل الاجتماعي والتفاعل مع الآخرين، دا غير إنهم بيتبعوا أنماط سلوكية غير معتادة ومتكررة.
وبنلاقي إن طيف التوحد له أنواع مختلفة، وبتختلف شدة الأعراض من نوع لآخر ومن شخص للتاني، واحتمالات التحسن لكل حالة، ورغم صعوبة الشفاء التام من أعراضه؛ إلا إن الاكتشاف المبكر ليه، وبداية العلاج بيساهم في تحسن حالة المصاب بشكل كبير.
اقرئي أيضاً: متى يتكلم طفل التوحد
أنواع اضطرابات التوحد المختلفة
وزي ما ذكرنا إن طيف التوحد له أنواع، وبتختلف حدة أعراضها من شخص للتانى، وبتتنوع الأعراض دي بين مشاكل لغوية، وسلوكية، واجتماعية، وحركية.
بعكس سمات التوحد واللي بتأثر على التطور اللغوي والاجتماعي بس، ودا بيوضح الفرق بين سمات التوحد والتوحد.
ومن أشهر اضطرابات التوحد:
متلازمة أسبرجر
وفقًا لدراسة اتنشرت على موقع NIH لتعريف متلازمة أسبرجر، وسماتها؛ فهي أقل حدة من باقي الأنواع، وبيتسم الطفل المصاب بالمتلازمة دي إنه:
- بيعرف يتكلم بس عنده مشكلة في تصريف الجمل، لغته بتكون متأخرة، وأحيانًا بتاخد نمط واحد زي الرسمية، أو الهدوء.
- بيواجه أحيانًا مشاكل في المهارات الحركية الأساسية، زي: الجري، والمهارات الحركية الدقيقة.
- بيكون معدل ذكائه شبه طبيعي، وأحيانًا أعلى من الطبيعي، عشان كدا هو أخف درجات التوحد.
- مش بيعرف يُظهر للناس مشاعره، بمعنى إنه مش بيقدر يعبر عن السعادة والحزن.
- بيهتم بموضوع معين، وممكن يوصل لحد الهوس، زي إنه يكون مهتم بالصخور مثلًا.
- مش بيعرف يستخدم لغة جسده بشكل صحيح، ولا بيميز الإيماءات أو السخرية.
- مش بيقدر يتواصل معاهم بصريًا، أو يحدق (يركز بصره) على الأشخاص حواليه.
- بيحب ينضم لنوع واحد بس من المحادثات تكون معبرة عنه وعن ذاته.
- بيحب يكون ليه روتين معين صارم ما يتغيرش، وبيتضايق جدًا لو اتغير.
- بيركز جدًا في التفاصيل، وبينسى الـصورة الكاملة أو الموضوع الأكبر.
- بيعرف يتواصل لغويًا، على عكس أنواع التوحد التانية.
- بيكون شاطر جدًا في حفظ المعلومات، وتذكرها.
ورغم وجود تشابه في الحالة دي مع سمات التوحد في بعض الأعراض، إلا إن الفرق بين سمات التوحد والتوحد بيظهر هنا في اتباع الطفل للروتين الصارم، وضعف مهاراته الحركية.
التوحد الكلاسيكي (متلازمة كانر)
النوع دا مرحلة أبعد وأعراضه بتكون أكتر حدة من متلازمة أسبرجر، وبيظهر على الطفل من سن 3 سنين، وبتتنوع أعراضه بين إنه:
- بيكون حساس تجاه المدخلات الحسية، بمعنى إنه حساس لأي مؤثر خارجي هيخليه يستخدم حواسه زي: الإضاءة، واللمس، وبيكّون تجاهها سلوك عدواني.
- ممكن يأذي نفسه عن طريق الضرب مثلاً، ودا بيوضح الفرق بين سمات التوحد والتوحد، ودا لإن سمات التوحد مش بتسبب العدوانية تجاه النفس أو الغير.
- ما بيقدرش المشاعر أو المساحات الشخصية للمحيطين بيه، بيتدخل وبيتعامل معاهم لتحقيق الهدف اللي في دماغه وبس.
- بينحدر مستوى اللغة عنده تمامًا لحد ما يوصل لدرجة إنه مش قادر يعبر بالكلمات واللغة، وبيكتفي بالإشارة بس.
- بيكون عنده وسواس قهري أحيانًا، زي: إنه يرتب الحاجة بترتيب معين، أو بيغسل إيده كتير.
- بيكرر بعض الحركات زي: تكرار حركة الرفرفة باليد، وهز الرأس أو الجسم، وبيكرر الكلام.
- بيرفض أي تغيير، زي: تغيير الروتين اليومي، أو تغيير أماكن الأثاث، أو أماكن ألعابه مثلًا.
- بيرفض تمامًا حد يحضنه، أو يلمسه بأي شكل من الأشكال.
- ما بيحبش الاجتماعيات، وبينسحب منها ويتجنبها.
- بيكون مستوى ذكائه طبيعي أو أقل من الطبيعي.
- بيتجنب التواصل البصري تمامًا,
متلازمة هيلر (اضطراب الطفولة التفكيري)
تُعد متلازمة هيلر حالة نادرة من اضطرابات طيف التوحد، ونسبة حدوثها بتكون حوالي 1 لكل 100 ألف، وسببها غير محدد، وبينمو فيها الطفل ويتطور بشكل طبيعي، وفجأة مهاراته بتبدأ تنحدر وتتراجع، ودا ممكن ياخد أيام أو تدريجي بمرور الوقت.
وبتظهر أعراض المتلازمة في السنة الرابعة للطفل، وبتتسبب في فقده لبعض المهارات، وأبرزها:
- المهارات الاجتماعية والتكيف مع الآخرين.
- مهارات التعبير عن النفس والنطق.
- مهارات استقبال الكلام واللغة.
- مهارات اللعب.
دا غير إنها بتأثر على التطور الحركي والسلوكي للطفل المصاب بيها، وبتتسبب أحيانًا في تكراره لحركات، وسلوكيات معينة.
وهنا بيوضح الفرق بين سمات التوحد والتوحد، فرغم إن الظاهرة دي بتحصل بعد ما الطفل يبدأ يتطور بشكل طبيعي، لكن اختلاف أعراضها وأسبابها بيجعلها ضمن أنواع التوحد فقط.
التوحد غير النمطي (اضطراب النمو الشامل)
يعد التوحد غير النمطي نوع خفيف من أنواع التوحد، وبيظهر في الطفولة المبكرة قبل 3 سنين، وأبرز أعراضه:
- ضعف التطور اللغوي للطفل بالدرجة اللي تخليه مش فاهم اللي بيتقاله، فيواجه صعوبة في التواصل مع أقرانه,
- مواجهة الطفل لتغيرات ومشاكل في عمل الحواس، زي: التذوق، والبصر، والصوت، والشم، واللمس.
- ميل الطفل للروتين الثابت، ورفض تغيير أي روتين في يومه أو في البيئة المحيطة بيه.
- قيام الطفل بسلوكيات غير لائقة اجتماعيًا.
- تكرار بعض الحركات والسلوكيات.
تعرفي أيضًا على: هل طفل التوحد يحب الخروج؟
الفرق بين سمات التوحد والتوحد
اضطرابات طيف التوحد هي الاسم العلمي للتوحد، وبتحصل الاضطرابات دي نتيجة لخلل في نمو الدماغ، لكن سمات التوحد مختلفة عنهم، لإنها مرتبطة بالبيئة المحيطة بالطفل، ونمط تربيته، واللي بيأثروا على شخصيته وسماتها بشكل كبير، ودا بتأكده دراسة اتنشرت على موقع BMC.
وسمات التوحد عبارة عن حالة عصبية ونفسية بتصيب الطفل، وبتسببله بعض الأعراض، ولا تعد مشكلة عقلية، يعني عقل الطفل المصاب بسمات التوحد بيكون سليم تمامًا.
الفرق بين سمات التوحد والتوحد في الأعراض
أعراض التوحد ذكرناها سابقًا، وبتختلف حسب نوع المرض بين الأعراض السلوكية، واللغوية، والاجتماعية، لكن أعراض سمات التوحد بتنشأ على شكل قصور في اللغة التعبيرية، ومشاكل في مهارات التواصل الاجتماعية للطفل، يعني هي عبارة عن وجه واحد من أوجه التوحد.
ودا بتثبته دراسة اتنشرت على موقع Scientific Reports إن الطفل المصاب فقط بسمات التوحد بيعاني من مشاكل في التواصل الاجتماعي، وخاصةً النظر وجهًا لوجه، أو النظر للعين مباشرةً، ووجدوا إنه في الأغلب مش بيعاني من أي أعراض تانية.
ومن أهم النقط اللي بتوضح الفرق بين سمات التوحد والتوحد:
- عدم التفات الرضيع لصوت الأم. أو لما يتنادى باسمه. وعدم النظر بعينيه لمن حوله.
- عدم ابتسام الطفل الرضيع عند مداعبته. وعدم قدرته على الإشارة بيديه بعمر السنة.
- عدم اهتمام الطفل لإشارة شخص كبير لحاجة معينة (زي بص الطيارة فوق…).
- عدم نطق الطفل لكلمة واحدة حتى عمر سنة و 4 شهور.
- عدم نطق الطفل جملة من كلمتين حتى عمر سنتين.
- عدم تظاهر الطفل باللعب حتى عمر سنة ونصف,
- عدم اكتساب الطفل المهارة اللغوية.
اقرئي أيضًا: أعراض التوحد عند الأطفال في عمر 3 سنوات
الفرق بين سمات التوحد والتوحد في أسباب الحدوث
وفقاً لدراسة اتنشرت على موقع NIH فإن أسباب مرض التوحد متنوعة، فأحياناً بيكون السبب عضوي أو خلل في الجينات أو وراثي، لكن سمات التوحد بتنشأ بسبب البيئة المحيطة بالطفل ونمط تربيته، زي:
- التعرض المفرط للشاشات في السن الصغير.
- الاستهزاء بالطفل، ومقاطعته وهو بيتكلم.
- الزعيق الكتير أو الصوت العالي.
- تعرض الطفل لصدمة نفسية.
ومش شرط الصدمات النفسية تؤثر على الطفل وهو كبير، لكن ممكن تأثر عليه في الأشهر الأولى من عمره، وبالتالي بتظهر عليه سمات التوحد.
كيفية تشخيص كل من سمات التوحد والتوحد
التشخيص الدقيق للتوحد أو سمات التوحد بيتطلب تقييم متخصص وشامل من أخصائيين في الصحة النفسية والعصبية، لإنه بيشمل مجموعة واسعة من التقييمات زي:
- ملاحظة السلوك في مواقف مختلفة،
- مراجعة تاريخ النمو والتطور للطفل.
- الاختبارات النفسية
وبالتالي لو لاحظتي أي سلوكيات غريبة على طفلك زي اللي ذكرناها فوق فاحرصي إنك تعرضي طفلك على متخصص، عشان يقيم حالته، ويحدد طرق العلاج المناسبة.
كيفية علاج سمات التوحد والتوحد
بيسهُل معالجة سمات التوحد من خلال تهيئة بيئة مناسبة للطفل، واتباع الأسرة لتوجيهات المختصين في طريقة التعامل معاه، ودا الفرق بين سمات التوحد والتوحد في طريقة العلاج.
أما التوحد بيكون ليه طرق مختلفة ومخصصة تبعًا لنوعه ودرجته، وبتتنوع أساليب علاجه كالتالي:
العلاج السلوكي
أثبتت دراسة اتنشرت على موقع NIH فعالية العلاج السلوكي مع مرضى التوحد، وكانت عن طريق تحفيز الشخص المصاب على ممارسة السلوكيات الإيجابية مع الأشخاص حواليه، والبعد عن أي سلوك سلبي، وبيتنفذ أغلب الوقت في المدارس والعيادات.
العلاج التربوي
طريقة العلاج التربوي بتكون من خلال دمج الطفل المصاب بالتوحد أنشطة جديدة بتعمل على زيادة مهاراته الاجتماعية، ومهارات الاتصال.
العلاج بجلسات التخاطب
الجلسات بتكون من خلال مختصين، وبتساهم في تنمية قدرات مريض التوحد اللغوية والاجتماعية، زي: زيادة قدرته على الاستماع، وفهم الكلام، والتفكير في الجملة وتحليلها قبل ما يجاوب عليها.
العلاج بجلسات اللعب
وفقًا لدراسة اتنشرت على موقع NIH أثبتت إن جلسات اللعب واحدة من طرق العلاج المبتكرة، واللي بتدفع الطفل المصاب بالتوحد لمواجهة تجربة وتحدي جديد، وبالتالي تنمية قدراته تحت مراقبة الطبيب.
العلاج بالأدوية
الأدوية هنا مش بتعالج مرض التوحد نفسه، لكنها بتساعد على تهدئة بعض سلوكيات التوحد، زي: فرط الحركة، والقلق، وقلة التركيز، والاندفاع، عشان يقدر المريض يمارس حياته بشكل طبيعي وسوي أكتر.
بالإضافة إن للأسرة دورها كبير في علاج ودعم الطفل التوحدي من خلال طريقة تعاملهم معاه.
اقرئي أيضًا: الجديد في علاج التوحد
كيفية التعامل مع الطفل التوحدي
التعامل مع الطفل التوحدي مش سهل، لإنه للأسف مش بيقدر يعبر عن مشاعره واحتياجاته، وما بيعرفش يتفاعل مع أفراد أسرته بالشكل الصحيح.
وممكن مواقف ومؤثرات طبيعية للناس العادية تسبب له هياج عصبي زي ما شرحنا قبل كدا، فإذا كان عندك طفل مصاب بالتوحد دي نصايح هتساعدك تتعاملي معاه:
1- افهمي حالة طفلك وحساسيته
كل ما فهمتي وضع مرض طفلك و تصنيفه تحت أي نوع من أنواع التوحد هتعرفي تتعاملي معاه أكتر، وتقدري تفهمي حالته من خلال:
- التعرف على المحفزات اللي بتثيره وتضايقه، عشان تتجنبيها وتتعاملي معاها بشكل صحيح.
- التعرف على أمهات الأطفال المصابين بنفس نوع المرض، ومشاركة الخبرات معاهم.
- سؤال الطبيب المعالج عن التشخيص الدقيق لطفلك.
- القراءة أكتر عن نوع مرضه، وطرق التعامل معاه.
دا هيساهم في معرفة السلوكيات المفيدة والصحيحة، بالإضافة لمشاركتك مع أمهات بتمر بنفس تعب الرحلة هتهونها عليكي.
2- كوني صبورة واستخدمي كلمات واضحة
الطفل المصاب بمرض التوحد استيعابه بيكون أبطأ من الأطفال العادية، وأحيانًا مش بيفهم بعض المواقف البديهية، عشان كدا لازم تكوني صبورة على طفلك، واختاري كلمات مباشرة وسهلة، واتكلمي بهدوء وبطء، وبمخارج حروف واضحة، عشان يقدر يستوعب الكلام.
3- قدري حالة طفلك النفسية
الطفل التوحدي عادي بيحس بالسعادة والحزن والاكتئاب، ساعات هتلاقيه حابب يتفاعل ويتعاون مع الأشخاص حواليه، وساعات مش هيكون حابب يتعامل مع حد خالص، وعشان كدا لازم تقدري حالة طفلك النفسية وما تجبريهوش ياخد أي تصرف هو مش حابه.
4- ساعدي طفلك يعبر عن مشاعره
طفل التوحد بيواجه صعوبة في التعبير عن مشاعره، وعشان كدا ساعات كتير بيصاب بنوبة هياج عصبي، وبيعبر عنها بطريقة غلط.
سيبيه يعبر عن مشاعره، المهم تعلميه يعبر عنها بطريقة صحيحة بدون عدوانية، فممكن مثلًا تشرحيله معاني المشاعر عن طريق كروت المشاعر، وتخليه يستخدمها لما يحب يعبر عن اللي حاسس بيه.
5- شجعي طفلك وامدحيه
الطفل التوحدي زي أي طفل بيحب المدح والتشجيع، شجعيه لما يعمل تصرف صحيح، لكن بطريقة صحيحة، وامدحيه بتوضيح إيه بالظبط في أفعاله اللي صحيح ويستاهل عليه المدح، وكافئيه بحاجة صغيرة زي ستيكر تشجيعي.
6- نمي ثقته بنفسه واستقلاليته
عودي طفلك على الاعتماد على نفسه في تنفيذ الأشياء، وعدم الاعتماد على الأشخاص حواليه، وابعدي عن الزعيق والصراخ في وشه لو عمل حاجة غلط أو ما عملش الحاجة بشكل صحيح، خلي نفسك طويل وما تنفذيش ليه كل اللي بيطلبه من غير ما يبذل فيه جهد.
7- تجاهلي سلوكياته الخاطئة ولا تواجهيه
أحيانًا ممكن الطفل التوحدي يعمل الغلط بغرض جذب انتباهك ليه، والتصرف الصحيح هنا هو تجاهل السلوك دا وتوضيح إنه غلط بالكلام من غير زعيق، وكافئيه لما يصلح غلطه وما يكررهوش تاني.
8- انضبطي في المواعيد
زي ما وضحنا فوق طفل التوحد بيحب الروتين جدًا، عشان كدا بعد استشارة الطبيب حاولي تثبتي وتنسقي المواعيد بينك وبينه، بحيث تساعديه على زيادة تعلم المهارات والسلوكيات الجديدة.
9- ما تطلبيش أكتر من طلب مرة واحدة
طفل التوحد بيحتاج وقت أطول عشان يستوعب الكلام والأوامر المطلوبة منه، فلما تطلبي منه حاجة ويسكت ما تطلبيش منه طلب تاني مختلف، زي: شيل الكتب من على الأرض حطها على الترابيزة، وهات أقلام التلوين من الدرج.
لإنه وقتها هيقف، ومخه مش هيستوعب الطلبات الكتير، عشان كدا اطلبي منه حاجة واحدة بس غير مركبة، ولو وقف ما نفذهاش اطلبيها تاني بتوضيح أكتر، وبشكل أهدى وأبطأ.
10- اشغلي طفلك عن حركاته النمطية والمتكررة
الطفل التوحدي أحيانًا بيكون ليه حركات لازمة يكررها، وبيتضايق جدًا لو قولتيله ما تعملهاش أو تدخلتي بنفسك ومنعتيه عنها، وبيكون التصرف الأصح هنا هو إنك تشغليه، وتمنعيه عن تكرار الحركات دي بشكل غير مباشر.
11- ادمجي طفلك في أنشطتك اليومية
دمج طفلك في أنشطتك اليومية زي إنكم تروحوا السوبر ماركت سوا مثلًا بيساعده يفضل متفاعل مع البيئة حواليه، وما ينطويش لعالمه الداخلي المريح.
كمان الجري، واللعب، والتفاعل بره البيت هيهون عليه خروجه من البيت كمنطقة راحة، وهيحسسه بالهدوء، ويخليه يفضل متفاعل.
12- خليكي مرنة ومتاخديش الأمور على محمل شخصي
ممكن تكوني بتكلمي طفلك المصاب بالتوحد وفجأة يسيبك ويمشي في نص الكلام، وما يكونش عايز يتواصل معاكى، أو يتكلم بطريقة فذة وغير مهذبة، وممكن يبدأ يعيط ويدخل في نوبة صراخ غريبة.
ما تاخديش الأمور على محمل شخصي وخليكي مرنة، هو مابيكونش قاصد يأذيكي بأي طريقة، لكن ما بيعرفش يعبر عن مشاعره بالطريقة الصحيحة.
13- اتركي مساحة شخصية لطفلك
طفل التوحد ممكن يفضل التواصل الجسدي مع الأم زي: العناق والقبلات، ولكن زي ما ذكرنا في بعض أنواع التوحد بيرفض المريض فيها اللمس بكل أشكاله.
فلو كان طفلك بيرفض اللمس اتركي له مساحته الشخصية، وما تلمسيهوش أبدًا غصب عنه، لإن دا ممكن يدخله في نوبة غضب وبكاء عنيفة.
14- وحدي طريقة التعامل
زي ما بنتعامل في البيت تحت تعليمات المختص، وحدي طريقة التعامل مع طفلك بنفس الأسلوب والطريقة في المدرسة أو أى مكان يروحه.
15- اطلبي الدعم النفسي
التعامل مع طفل التوحد مرهق بطبيعة الحال، ما تتردديش في طلب الدعم النفسي عشان مرض الطفل ما يأثرش عليكي بالسلب، وكمان تقدري تتعرفي على أمهات أطفال بنفس المرض، عشان يشاركوكي، وتحسي إنك مش لوحدك.
الفرق بين سمات التوحد والتوحد في التعامل كبير، وطريقة التعامل مع سمات التوحد أسهل بكتير، وسهل الحالة دي تتلحق من خلال الأهل تحت إشراف مختص.
كيفية التعامل مع الطفل الذي يعاني من سمات التوحد
الفرق بين سمات التوحد والتوحد، إن سمات التوحد بتأثر على التطور اللغوي والتواصل فقط، عشان كدا تقدري بعد إشراف المختص، تطبقي النصايح دي للتعامل مع طفلك المصاب:
- اخرجي مع الطفل في الطبيعة، واتفرجوا سوا على البيئة حواليكم، وكلميه طول الرحلة.
- امنعي التليفزيون والشاشات نهائيًا خلال فترة العلاج لحد ما حالته تتحسن.
- اتكلمي كتير مع الطفل، كلميه زيه زي الكبار، وشاركيه تفاصيل اليوم بالكلام.
- سيبي للطفل مساحة يعبر عن نفسه، وعن الأشياء المحيطة حواليه.
- تابعي مع المختص، وشوفي معاه طرق تفاعل ابتكارية لتنمية مهاراته.
- وقفي أي رد فعل سلبي، زي: الزعيق، أو مقاطعة الطفل وهو بيتكلم.
- اقرئي قصص للطفل، القصص بتوسع مداركه وتنمي مخيلته.
وختامًا، مهم تتعرفي على الفرق بين سمات التوحد والتوحد عشان تقدري تعالجي طفلك صح وتلحقيه، فمرض التوحد هو مرض عقلي، وله أنواع، وبيأثر على جوانب كتير زي التواصل، والحسية، والاجتماعيات، والفهم، وغيرها.
فبيكون طرق العلاج ليه عن طريق التعامل معاه بطريقة معينة، وتحت إشراف مختصين لتخفيف حدة الأعراض.
أما سمات التوحد فهي مشاكل نفسية وعصبية ناتجة من البيئة المحيطة للطفل، زي: التعرض للزعيق، والشاشات لفترة طويلة، والصدمات النفسية.
فبيتأثر في التواصل والاجتماعيات بس، ويمكن علاجه عن طريق التعامل السليم، واتباع تعليمات المختصين عشان يكون طفل طبيعي.
فكوني صبورة على طفلك وحاولي تتفهمي طبيعة اللي بيمر بيه، لكن ما تجيش على نفسك أغلب الوقت، وما تتردديش في طلب المساعدة من الأهل، والمختصين، والأشخاص المحيطين بيكي، وممكن تنضمي لجروبات دعم الأمهات، ودايمًا افتكري: إن الله لا يعطي أصعب المعارك إلا لأقوى جنوده.
المصادر
Five ways someone can have autistic traits, but not actually autistic.
أضف تعليق