تربية الطفل ومتابعة سلوكياته وعلامات نموه كل يوم هو أمر مش سهل أبدًا على أولياء الأمور، وبيحتاج صبر وفهم لطبيعة المرحلة اللي بيمر بيها الطفل، وبالطبع الأمر بيزداد صعوبة لما يكون الطفل بيعاني من تأخر في علامات التطور زي ما بيحصل في مرض التوحد.
وهنا ولي الأمر بيحتاج لدليل يوضح طبيعة المرض، ويفهم من خلاله إزاي يتعامل صح مع طفله، ويتجنب تدهور حالته،
ومن خلال المقال هنتعرف بالتفصيل على الاضطراب، وأهم أعراض التوحد عند الأطفال في عمر ثلاث سنوات، ونتعرف كمان على طريقة التعامل مع الطفل في الحالة دي.
ما هو اضطراب طيف التوحد؟
هو مجموعة معقدة من الاضطرابات في السلوك، وأسلوب التواصل بتظهر علاماته على الأطفال في عمر 2 – 3 سنوات، وبيستمر الاضطراب معاهم حتى بعد انتهاء مرحلة الطفولة.
المصطلح اللي كان مستخدم من فترة للتعبير عن الاضطرابات دي هو “اضطرابات النمو المنتشرة (PDDs) ، لكن حالياً اتبدل باضطراب طيف التوحد، واتعاد ترتيب بعض المشكلات المتعلقة بتأخر علامات التطور عند الطفل، وضمها لقائمة اضطرابات طيف التوحد.
فتبعًا لمنظمة الصحة العالمية بنلاقي إن الاضطراب دا بيصيب 1 بين كل 100 طفل في الولايات المتحدة الأمريكية، وبيسيطر على مهاراته المختلفة وسلوكياته وتعاملاته مع اللي حواليه، وبالتالي يُفضل التدخل المبكر للسيطرة على الحالة.
فبنلاحظ إن عقل طفل التوحد بيعمل بطريقة مختلفة عن اللي حواليه، ودا سبب ملاحظة سلوكيات غريبة عند الطفل دا، أو وجود مشكلة معينة عنده.
اضطراب التوحد بيظهر من اسمه إنه اضطراب طيفي، بمعنى إن أعراض المرض بتختلف في طبيعتها من طفل للتاني، وبالتالي احتياجات الطفل كمان بتكون مختلفة، عشان كدا لازم نتعرف على أنواع الاضطراب دا، وبعدها نعرف أعراض التوحد عند الأطفال في عمر ثلاث سنوات بالتفصيل.
اقرأ أيضًا: متى يتكلم طفل التوحد؟
أنواع اضطراب طيف التوحد
قبل عام 2013 كان في 5 أنواع مختلفة من اضطراب طيف التوحد، وهما:
1- اضطراب التوحد
اضطراب التوحد عبارة عن بعض المشاكل المتعلقة بعلامات نمو الطفل وتطور مهاراته، فبنلاحظ إن الطفل بيعاني عشان يتفاعل مع اللي حواليه، وكمان بيلاقي صعوبة في التعلم، بالإضافة لعلامات تانية بتختلف من طفل للتاني.
2- متلازمة أسبرجر
وفقًا لأحدث دراسة اتنشرت على موقع NIH بنلاقي إن متلازمة أسبرجر هي أكتر نوع معتدل في اضطراب طيف التوحد، وبيكون فيها الطفل عنده مهارات لفظية قوية، ومش بيعاني من مشكلة تأخر الكلام، وكمان اختبارات الذكاء بتُظهر نطاق متوسط أو فوق متوسط، لكن بتظهر عليه بعض المشاكل التانية.
زي تأخر التطور الحركي، وبيلاقي صعوبة اجتماعية، فمش بيقدر يعبر عن مشاعره للآخرين أو يتفاعل مع اللي حواليه، وبنلاحظ حبه الشديد للروتين؛ فبيبدأ يتضايق لما حاجة جديدة تحصل في يومه تسبب تغيير في الروتين دا.
ومن الحاجات الملحوظة كمان إن تركيز الطفل بيكون ناحية شيء واحد بس، ومش بيقدر يركز في كذا حاجة، وبيبدأ يكرر الكلام اللي بيحكيه كل شويه.
3- اضطراب الطفولة التفككي
اضطراب الطفولة التفككي هو اضطراب في النمو العصبي للطفل بيسبب قصور في اللغة والمفردات عنده، وبيصيب الولاد أكتر من البنات، فـ لو في 10 أطفال مصابين بالاضطراب دا هنلاقي منهم 9 ولاد وبنت واحدة.
والاضطراب نادر الحدوث، ويعد من أشد أنواع اضطراب طيف التوحد اللي ممكن تصيب الطفل، لإن الطفل هنا بيفقد المهارات اللي اتعلمها، وكان بيتقنها.
4- اضطراب النمو الشامل غير المحدد بطريقة آخرى
الأطباء كانوا بيشخصوا إن الطفل بيعاني من الاضطراب دا لما يلاقوا إن المعايير اللي بيشخصوا المرض على أساسها مش موجودة كلها عند الطفل، وبالتالي بيطلقوا الاسم دا على الحالة المرضية اللي عنده.
5- متلازمة ريت
متلازمة ريت هي اضطراب في النمو العصبي وبتكون شائعة أكتر في البنات على عكس اضطراب الطفولة التفككي، ومعروفة بإن الطفل بيفقد فيها التناسق في الحركة، وبيلاقي صعوبة في الكلام والتواصل مع الآخرين، وكمان بيكون عنده صعوبة في التنفس.
وصنف العلماء متلازمة ريت ضمن أنواع اضطراب طيف التوحد اللي بتصيب الأطفال، وظلت في التصنيف دا لمدة كبيرة، ولكن بعد ما اكتشفوا إن سبب المتلازمة هو حدوث طفرة جينية استبعدوها بعد كدا من التصنيف.
ونظرًا لصعوبة الأمر على ولي الأمر، وإنه مش بيكون قادر يفرق بين الأعراض التابعة للأنواع دي أعادت الجمعية الأمريكية للطب النفسي تصنيف اضطراب التوحد عام 2013 ودخلت الاضطرابات دي تحت مظلة واحدة، واستبعدوا متلازمة ريت زي ما وضحنا.
اقرأ أيضًا: هل طفل التوحد يحب الخروج؟
أعراض التوحد عند الأطفال في عمر ثلاث سنوات
بتظهر أعراض التوحد عند الأطفال في عمر ثلاث سنوات، وبتختلف من طفل للتاني زي ما وضحنا، ومن أبرز الأعراض دي:
أولًا: أعراض المهارات الاجتماعية
الطفل الطبيعي بيبدأ يتعلم المهارات الاجتماعية، أو قواعد التفاعل مع الآخرين زي ما بيتعلم المهارات اللغوية، وبيكَوّْن في ذهنه خريطة لطريقة التعامل في المواقف المختلفة.
أما عن أعراض التوحد عند الأطفال في عمر ثلاث سنوات؛ فبنلاحظ إنه من الصعب على الطفل تعلم المهارات دي، وبالتالي بيحصل قصور في المهارات الاجتماعية؛ زي إنه مش بيقدر يشارك اهتماماته مع غيره، وبيقابل صعوبة في تكوين وتطوير العلاقات، وكمان مش بيعرف يعبر عن شعوره للي قدامه.
والطفل هنا ممكن يبقى عنده الرغبة في التفاعل، لكن مش عارف إزاي يعمل كدا، وبالتالي فهو بيحتاج لمساعدة ودعم للتعامل مع المواقف الاجتماعية.
لكن من خلال الأبحاث والدراسات وجدوا إن المهارات الاجتماعية ممكن تتحسن عند الطفل من خلال بعض التدخلات، وطرق معاملة خاصة من الوالدين.
وبيأكد الكلام دا دراسة اتنشرت في Seg Journals بتتكلم عن أهمية التدريب على المهارات الاجتماعية بمساعدة الوالدين، ووجدوا تحسن كبير في الاستجابة الاجتماعية، والإدراك الاجتماعي.
ثانيًا: أعراض المهارات اللغوية
من ضمن أعراض التوحد عند الأطفال في عمر ثلاث سنوات هو صعوبة تطور اللغة عندهم، بمعنى إن الطفل ممكن يعاني من عدم قدرته على نطق الكلمات وبيتكلم كمان بنبرة صوت غريبة وغير نمطية.
دا غير إنه بيقابل صعوبة في فهم المصطلحات اللي بيسمعها من اللي حواليه، وبيفتقد مهارة التعبير، وبالتالي بيحتاج لتنمية المهارات دي، ومساعدة في فهم المصطلحات وطريقة التعبير.
ثالثًا: أعراض مهارات التواصل
بعض أطفال التوحد مش بيعرفوا امتى وإزاي يتواصلوا بطريقة مناسبة مع الآخرين، ودا بيكون سببه مرتبط بقصور المهارات اللغوية عندهم.
كمان مهارة التواصل البصري مش بتكون موجودة، ودا ممكن يتحسن من خلال التركيز على التواصل غير اللفظي من خلال إننا نستخدام الإيماءات أثناء التعامل مع الطفل، ونفهمه كل إشارة معناها إيه.
وبنلاقي إن أعراض سوء التواصل بتزداد كل ما الطفل قضى وقت أكبر على الشاشات وفقًا لدراسة اتنشرت على موقع NIH.
رابعًا: تصرفات غير طبيعية
أعراض التوحد عند الأطفال في عمر ثلاث سنوات بتشمل السلوك المتكرر، والاهتمامات الخاصة، والسلوكيات الغريبة وغير الطبيعية زي:
- التعلق الشديد بأشياء ممكن ما تبقاش مهمة زي مفاتيح الإضاءة مثلاً.
- تكرار حركات جسدية معينة واستمراره عليها.
ومن ضمن الحاجات الغريبة كمان اللي بتبقى عند طفل التوحد هي حبه للروتين والنمطية، فبنلاحظ إنه بيتضايق جدًا لما بيحصل تغيير في الروتين اللي ماشي عليه، وعشان كدا بيحتاج ولي الأمر تهيئة الطفل قبل تغيير أي بند في روتين طفل التوحد.
خامسًا: علامات أخرى للتوحد
من علامات التوحد كمان واللي بتعد ضمن أشهر أعراض التوحد عند الأطفال في عمر ثلاث سنوات هي الاستجابة غير العادية لأي منبه حسي حوالين الطفل، يعني ممكن يتحسس بشدة من الضوضاء، ويتعامل معاها كإنها شيء مدمر لأعصابه فيحاول يتجنبها.
وفي حالات تانية بنلاقي إن الطفل بيتعامل بلا مبالاة مع الضوضاء لدرجة ممكن تخليك تعتقد إنه أصم رغم إنه سمعه كويس.
ومن الحاجات الغريبة كمان إن الطفل بيتضايق من لمسة شخص لجسده، وبيقاوم إن حد يلمسه أو يقترب من جسده.
هل علامات التوحد تختلف بين الأولاد والبنات؟
من المعروف إن معدل إصابة الأولاد بطيف التوحد أعلى بكتير من معدل إصابة البنات، والأسباب اللي بتؤدي لكدا لسه مش واضحة بالتفصيل.
لكن بعد دراسة أعراض التوحد عند البنات اتضح إن اكتشافها مش بيكون سهل، وإن ممكن تكون البنت بتعاني من التوحد لكن اللي حواليها ما يقدروش يكتشفوا الإصابة في حين إن الأعراض بتبقى واضحة جداً عند الأولاد.
وأحياناً بتُظهر البنات سلوكيات متكررة مختلفة عن سلوكيات الأولاد، وتكرارها للفعل دا ممكن يكون مقبول عند الأسرة في حين إن دي واحدة من أعراض التوحد عند الأطفال.
كمان حبها للروتين والتنظيم بشكل معين ممكن يتم التعامل معاه على إنه شيء عادي، ومن هنا بيتضح إن سمات التوحد عند البنات ممكن ما تبقاش واضحة أوي.
ولكن بشكل عام الفرق بين أعراض التوحد عند الأولاد والبنات مش بيكون واضح في مرحلة الطفولة.
وبعد ما اتعرفنا على أعراض التوحد عند الأطفال في عمر ثلاث سنوات محتاجين نعرف مين الطبيب اللي يقدر يشخص الحالة صح، ويعمل خطة علاجية مناسبة.
الطبيب المناسب لتشخيص اضطراب طيف التوحد في سن ثلاث سنوات
عند ملاحظة وجود أعراض التوحد عند الأطفال في عمر ثلاث سنوات اللي ذكرناها لازم نعرض الطفل على طبيب أطفال مختص؛ عشان يفحصه ويقيّم حالته ويحوله على الطبيب المناسب اللي هيتابع معاه باستمرار.
والطبيب المناسب هنا ممكن يكون أخصائي نفسي، أو طبيب مختص في النمو، أو طبيب أعصاب.
وبعد التعرف على حالة الطفل بالتفصيل، ومعرفة التاريخ المرضي بيبدأ الطبيب يحط خطة علاجية بتختلف من طفل للتاني تبعًا لنوع وحِدة الأعراض اللي بيعاني منها، وبيوضح لولي الامر طريقة التعامل المناسبة مع الطفل.
كيفية التعامل بعد تشخيص طفل الثلاث سنوات بالتوحد
بعد التأكد من إن السلوكيات الغريبة بتشير إلى إن الطفل بيعاني من أعراض التوحد لازم نعرف طريقة التعامل معاه بالشكل اللي يناسبه؛ عشان نتجنب إن الحالة تزاد سوء، وبالتالي لازم يكون عندنا خطة واضحة للتعامل قائمة على معرفة نقاط القوة والضعف عند الطفل، والأشياء اللي بتسبب له مشكلة.
ومن أهم النصائح اللي هتساعدك تتعامل بشكل صحيح مع طفل التوحد:
فهم طبيعة المرض
فهمك كولي أمر لطبيعة المرض هيقصر عليك المسافة، وهيخليك فاهم سبب كل سلوك بيخرج من الطفل، وكيفية التعامل الصحيح معاه، وبالتالي لازم تقرأ أكتر عن المرض، وتكون على دراية بأهم المعلومات، عشان نتجنب إساءة التعامل مع طفل التوحد.
الانتباه لإشارات الطفل لمعرفة معناها
طفل التوحد غالبًا مش بيكون قادر يستخدم الكلمات للتعبير عن شعوره، أو الحاجة اللي طالبها مثلًا أو غيره، وبالتالي بيكون في إشارات معينة بتعكس حالته، فمهم نعرفها ونفهم مدلولها عشان نعرف نلبي احتياجاته المختلفة، ونقدم له الدعم اللي محتاجه.
التطوير من مهاراته
القصور في مهارات الطفل بيحتاج لخطة تدريب مناسبة لعمر الطفل، ومجموعة من الأنشطة اللي بتساعد على للتطوير منها، وعشان كدا لازم تحرص على تنمية مهارات طفلك باستمرار.
تجنب العنف
استخدام العنف مع الأطفال سواء للعقاب، أو بسبب عدم الصبر على سلوكياتهم الصعبة بيؤثر عليهم بالسلب، وممكن يقابلوا العنف دا بعند فتزيد المشكلة، ومن هنا لازم تتحلى بالصبر أثناء تعاملك مع طفلك، وتحاول تحل مشكلاتك معاه بدون عنف.
وبالطريقة دي هتساعد في السيطرة على حالة طفلك، وهتقلل من فرصة تدهورها، أو تفاقم المشكلة.
هل يمكن التخلص من مرض التوحد؟
يمكن تحسن أعراض التوحد عند الأطفال من خلال التدخل المبكر، فوفقًا للدراسات الحديثة لقوا إن أكتر من ثلث الأطفال اللي اتشخصوا بطيف التوحد المبكر، تخلصوا من الاضطراب دا لما وصلوا لعمر 6 سنوات تقريبًا.
واحدة من الدراسات دي اتنشرت على موقع JAMA Pediatrics وأثبتت إن 37% من الأطفال اللي اتشخصوا بالتوحد في سن 3 سنوات، لما وصلوا لسن المدرسة المبكرة من 5 – 7 سنوات اختفت من عندهم أعراض التوحد.
ودا عن طريق تحليل السلوك التطبيقي، والعلاج هنا بيركز على زيادة السلوكيات المفيدة، وتقليل السلوكيات غير المفيدة، بالإضافة لتحسين مهارات الأطفال في مجالات زي: التواصل، والانتباه، والتركيز، والتواصل الاجتماعي.
وكانت النتيجة إن بعض الأطفال اتخلصت من الأعراض، واتحسنت، لكن البعض الآخر لأ، وعشان كدا لسه علاج التوحد والدراسات قيد البحث لاكتشاف علاجات أفضل.
وكل فترة بيكون في دراسات وأبحاث جديدة بتوضح فعالية وأهمية التدخل المبكر مع أطفال التوحد، ومن أحدث الدراسات على موقع ResearchGate بتتكلم عن فعالية التدخل المبكر وتغيير معاملة الوالدين في تطور المهارات، وتحسن الأعراض عن أطفال التوحد.
اعرف أكتر عن: الفرق بين سمات التوحد والتوحد عند الأطفال
الخلاصة
طيف التوحد واحدة من المشكلات الشائعة اللي بتصيب واحد من كل 100 طفل، ويمكن ظهور أعراض التوحد عند الأطفال من السن المبكر 2 – 3 سنوات.
ومن أنواع اضطرابات طيف التوحد؛ متلازمة سبرجر، واضطراب الطفولة التفككي، واضطراب النمو الشامل غير المحدد.
ومن أهم أعراضه؛ قصور المهارات اللغوية، والاجتماعية، ومهارات التواصل، وغيرها من التصرفات غير الطبيعية، وضروري بعد التعرف على الأعراض عند الطفل اللجوء للطبيب المناسب، لوضع خطة علاجية على حسب أعراض الطفل.
ودا بيكون ليه تأثير قوي في تخفيف الأعراض، وتطور مهارات الطفل، دا غير إن كل ما كان التدخل مبكر كانت نسبة التخلص من الأعراض أكبر.
أضف تعليق