أطفال التوحد بيعانوا من مشكلات كتيرة، منها: الجسمية، والعقلية، واللفظية، والنفسية، والاجتماعية، ومن أولى المشكلات اللي بتظهر على طفل التوحد بوضوح عند سن السنتين -تقريبًا- مشكلة تأخر الكلام وصعوبة النطق.
ودا بيخلي الأهالي تتساءل؛ متى يتكلم طفل التوحد؟ وهل ممكن تتعالج مشكلة صعوبة النطق عند طفل التوحد بشكل تام، ولا هتفضل المشكلة مستمرة معاه مدى الحياة؟
وفي المقال دا هنشرح بالتفصيل امتى بيتكلم طفل التوحد بشكل طبيعي، ويتفاعل لغويًا مع اللي حواليه بطرق فعالة، وإزاي نقدر نشجعه على دا.
لكن قبل ما نشرح متى يتكلم طفل التوحد هنوضح الفرق بين التوحد ومشكلة صعوبة النطق والتأخر اللغوي.
الفرق بين التوحد وصعوبة النطق
رغم إن مرض طيف التوحد بينطوي على كتير من مشكلات اللغة والكلام، إلا إن في فرق كبير جدًا بين أطفال صعوبة النطق وتأخر الكلام وأطفال التوحد، ودا اللي لازم نتأكد منه قبل ما نسأل نفسنا متى يتكلم طفل التوحد.
مش شرط أبدًا أي طفل عنده تأخر في اللغة يكون مصاب بالتوحد، والعكس صحيح، لإن طيف التوحد بيشمل أعراض تانية إلى جانب التأخر اللغوي، زي:
- ضعف المهارات الاجتماعية ومهارات التواصل
- ضعف التواصل البصري
- الميل للتكرار والنمطية
- صعوبة التعلم
وغيرهم من الأعراض، واللي غالبًا مش بتكون موجودة عند الأطفال اللي بيعانوا من صعوبة النطق.
وعشان نقدر نميز طيف التوحد عن غيره من الاضطرابات التانية بشكل أسرع هنحتاج نتعرف عليه عن قرب، ونعرف أعراضه، وأسبابه، ومتى يتكلم طفل التوحد بشكل تفصيلي أكتر.
اتعرفي على: أهم 7 أسئلة شائعة عن طفل التوحد.
اضطراب طيف التوحد
طيف التوحد هو اضطراب عصبي بيأثر على نمو وتطور المخ الطبيعي، وبالتالي بيأثر على المهارات الاجتماعية والتواصل، وبيُسمى طيف لإنه بيتسبب في ظهور مجموعة من الأعراض بتتراوح من الخفيفة إلى الشديدة.
وأكتر صفة بتميز اضطراب طيف التوحد إن الطفل بيكون ضعيف جدًا في مهارات التواصل والتفاعل مع اللي حواليه.
ولإن الطفل المصاب بطيف التوحد مش بيشفى بشكل تام، فبنشتغل على تنمية مهاراته عشان يكون قريب أو شبيه بمهارات الطفل الطبيعي، ومتماشي معاه في مراحل النمو.
لكن إزاي أعرف إن الطفل مصاب باضطراب طيف التوحد؟
أعراض اضطراب طيف التوحد المتعلقة بالتواصل والكلام
تتنوع أعراض طيف التوحد ما بين أعراض سلوكية واجتماعية ولغوية، وأبرزها:
- اتّباعه سلوك متكرر ونمطي، زي: إنه يفضل رايح جاي في نفس المكان لفترة ملحوظة، أو يفضل يلف حوالين نفسه.
- مواجهة صعوبة في تكوين صداقات والمشاركة في أنشطة جماعية مع باقي الأطفال.
- الإصابة بنوبات غضب شديدة لو حد بوظ روتينه اليومي، أو غير ترتيب ألعابه.
- تكرار الكلمات أو الجمل القصيرة لفترة مش قليلة (Echolalia).
- عدم استجابته للكلام الموجه ليه، وعدم إجابته عن الأسئلة.
- ميل الطفل المصاب للجلوس وحده في عزلة عن الناس.
- إصدار أصوات متكررة من الحنجرة أو ترنيمات موسيقية.
- عدم الاستجابة لو ناديتي عليه باسمه في عامه الأول.
- عدم قدرته على الإشارة على الحاجات المفضلة ليه.
- مواجهة صعوبة في فهم مشاعر الآخرين.
- استخدامه لوسائل اتصالات غير الكلام.
- عدم قدرته على تركيب جمل ليها معنى.
- تأخر في اللغة والكلام.
- تجنب الاتصال البصري.
دا غير علامات تانية ممكن تكون خاصة بحالة الطفل نفسه، عشان كدا لو لقينا علامات تأخر كلام أو صعوبة نطق على طفلنا من غير ما نلاحظ الأعراض الواضحة للتوحد اللي ذكرناها فوق، فـ دا دليل على إن الطفل بيعاني فقط من اضطرابات تأخر الكلام وصعوبة النطق، لكن بردو مهم نرجع لمتخصص للتشخيص.
ودا ممكن يرجع لأسباب كتير نفسية، أو عضوية، زي: ضعف السمع أو التهابات الأذن، أو غيرهم.
أسباب اضطراب طيف التوحد
تختلف أسباب الإصابة بالتوحد من طفل لآخر، والأبحاث الموجودة في الجانب دا قليلة نوعًا ما، رغم كدا في بعض التفسيرات الشائعة لأسباب الإصابة، زي:
- العوامل الوراثية، وبتمثل حوالي 40-80% من أسباب الإصابة بالتوحد بترجع للجينات والعوامل الوراثية، ووجود تاريخ عائلي.
- وجود تاريخ من العدوى والفيروسات عند الأم.
- حدوث مضاعفات للأم أثناء الحمل.
- تعرض الأم أثناء الحمل لبيئة سامة.
- الولادة قبل الميعاد المتوقع.
- السن الكبير للأم.
- مرض الأم.
والتفسيرات دي مش شرط في كل مرة تكون صائبة، يعني مثلًا: ممكن أم كبيرة في السن تنجب طفل سليم، وأم صغيرة -من غير أي سبب- تنجب طفل مصاب بالتوحد، ودا لإن الدراسات في الجانب دا لسه قليلة نوعًا ما، ومعظم الحالات بتكون أسباب الإصابة عندها غامضة وغير معروفة.
اتعرفي على: الفرق بين سمات التوحد والتوحد عند الأطفال
لكن هل جميع أطفال التوحد بيعانوا من مشاكل في التطور اللغوي وصعوبات الكلام؟
ما هي أسباب تأخر الكلام عند الطفل التوحدي؟
طيب إيه ممكن يأثر على تطور الحالة وتأخر الكلام عند طفل التوحد، في أسباب زي:
- تعذر الأداء اللفظي “Apraxia of Speech” ودا بدوره بيأثر على وظائف دماغ الطفل، وبالتالي بيقلل من قدرته على التعبير عن نفسه.
- الإصابة بتكرار الكلمات المعروفة بـ Echolalia ودي بتزود من صعوبة التواصل عنده.
- ضعف مهارات التواصل الخاصة بيه، ودا بيأثر بالسلب على مهارات التكلم.
هل كل أطفال التوحد غير لفظيين؟
وفقًا لدراسة اتنشرت على موقع NIH أثبتت إن حوالي 25-35% من أطفال التوحد بيكونوا غير لفظيين أو قدراتهم اللغوية محدودة جدًا، ومعظم الحالات التانية القادرة على الكلام بيتأخروا في الكلام عن المعدل الطبيعي.
وأطفال التوحد غير اللفظي بيكونوا غير قادرين على الكلام على الإطلاق، وحتى لو الطفل بدأ يتكلم بكلمات بسيطة زي بابا وماما -وعادةً في عمر 12 لـ 18 شهر تقريبًا-، ومع ذلك بيتراجع لما بتزيد شدة أعراض التوحد عليه لما ما بيكونش في تدخل علاجي وسلوكي.
رغم كدا ما نقدرش نقول إن أطفال اضطراب طيف التوحد كلهم غير لفظيين، ودا لإن في أمثلة كتيرة لأطفال التوحد بيقدروا يتكلموا بشكل طبيعي جدًا.
لكن بنسبة كبيرة اللي بيسبب تأخر الكلام عند أطفال التوحد تبعًا لدراسة اتنشرت على موقع NIH بنلاقي إن إدارة التواصل والاهتمام بشكل كبير مع طفل التوحد بتحسن من إدراكه اللغوي والعكس صحيح، ومع ذلك بعض الحالات بتعاني من تأخر النطق رغم اهتمام الوالدين بإدارة مشاعرهم بشكل جيد.
وعشان نعرف إزاي أطفال التوحد يقدروا يوصلوا للمستوى دا لازم الأول نجاوب عن سؤالنا “امتى ممكن يتكلم طفل التوحد؟”
متى يتكلم طفل التوحد؟
أطفال التوحد زي كل الأطفال في بينهم فروق فردية كتيرة، سواءً في مستوى التطور أو في القدرة العقلية أو في المشكلات الجسمية والنفسية، وبالتالي دا بيخلي في فروق في الوقت اللي بيبدأ الطفل يقول فيه أول كلمة.
وعلى الرغم من نتائج الدراسة الصادمة اللي ذكرناها فوق عن الوقت اللي ممكن طفل التوحد يتكلم فيه، واللي بتثبت إن حوالي 35% من أطفال اضطراب طيف التوحد يعتبروا غير لفظيين، إلا إن تبعًا لدراسة اتنشرت على موقع pediatrics بتناقش مدى التحصيل اللغوي لأطفال التوحد غير اللفظي بعد التدخل العلاجي بنلاقي إن النتائج كانت إيجابية وبتثبت قدرة الأطفال دي علي التطور لغويًا مرة تانية، والنتائج كانت بتجاوب عن سؤال متى يتكلم طفل التوحد.
ومن ضمن النتائج إن:
- متوسط الوقت اللي بيستغرقه طفل التوحد عشان يبدأ ينطق كلمات رئيسية مفردة حوالي 36 إلى 48 شهر، يعني ما بين 3 و 4 سنوات، مع الأخذ في الاعتبار الفروق الفردية لكل طفل طبعًا.
- حوالي 47% من الأطفال غير اللفظيين بعد تنمية مهاراتهم أصبحوا قادرين على الكلام بطلاقة في سن 4 سنوات أو بعدها بشكل طبيعي.
- معظم الأطفال المصابين بالتوحد ذكاءهم كان أعلى من المتوقع، وبالتالي في إمكانية لتطور الكلام عندهم.
- السلوكيات النمطية المحددة والاهتمامات الخاصة ما أثرتش على تطور اللغة بشكل كبير.
- حوالي 70% قدروا يتكلموا بجمل بسيطة.
ليه مهم نعالج أعراض تأخر الكلام عند طفل التوحد؟
وبعد ما جاوبنا عن سؤال متى يتكلم طفل التوحد؛ لازم نعرف ليه مهم نعالج الأعراض دي وإزاي هتأثر على حياته بشكل إيجابي؛ فبنلاقي إنه بيؤدي لـ :
- تعليمه الطريقة الصحيحة والوقت المناسب للكلام.
- تعزيز ثقته بنفسه ومهاراته اللغوية لإجراء نقاشات.
- قدرته على تكوين الصداقات وتبادل الآراء مع الآخرين.
- مساعدة الطفل إنه يعبر عن نفسه بالكلام.
نصائح لمساعدة طفل التوحد اللالفظي على الكلام
بعد ما وضحنا متى يتكلم طفل التوحد، لازم نعرف إن تنمية المهارات اللغوية للطفل التوحدي بتحتاج مجهود من الأهل، لإنه في الغالب بيكون مش قادر يتطور مهاراته بنفسه، وهنا بنقدملك 7 نصائح هتساعدك على تنمية مهارات طفلك اللغوية.
1- شجّعي طفلك على اللعب والتفاعل الاجتماعي مع الآخرين
أثناء رحلة بحثك عن إجابة لسؤال متى يتكلم طفل التوحد أكيد هيظهر قدامك دور اللعب في تنمية لغة الطفل، ودا لإنه وسيلة مثالية لتعليم الأطفال مهارات جديدة،
ودا أثبتته دراسة اتنشرت على موقع NIH بتتكلم عن مدى فعالية اللعب في تطوير مهارات التواصل والكلام لأطفال التوحد، فلازم تستغلي دا في إنك تطوري المهارات اللغوية لطفلك من خلال استخدام الأنشطة والألعاب التفاعلية المختلفة عشان تساعدي طفلك على الكلام، ودا زي:
- الكروت والمجسمات، مع ذكر أسمائها باستمرار أمام الطفل.
- الأجهزة الإلكترونية اللي بتصدر أصوات مختلفة.
- الألعاب الغنائية.
وحاولي دايمًا وسط اللعب تكوني متواجدة قدام الطفل، عشان يكون سهل عليه يشوفك، ويسمعك بشكل أفضل، ودا بتدعمه دراسة اتنشرت على موقع NIH اللي أثبتت فعالية ودور التفاعل الاجتماعي من الأهل وتأثيره الإيجابي في إعادة التأهيل اللغوي لأطفال التوحد .
2- قلّدي طفلك
ادعمي كلام طفلك الإيجابي الصحيح بإنك تكرريه مرة تانية، دا هيخليه يحس إنك مركزة معاه، وهيشد انتباهه أكتر، دا غير إنه هيخليه كمان يقلد كلامك المنطوق بشكل صحيح، ويكون الموضوع متبادل بينكم، وبالتالي تفاعله هيزيد.
ممكن تطبقي الطريقة دي في اللعب كمان، مش بس الكلام، يعني وأنتي بتلعبي معاه حاولي تقلدي حركاته وسلوكياته الإيجابية، دا هيثبتها أكتر عنده.
3- ركزي على التواصل غير اللفظي
من السلوكيات اللي ممكن تساعدك في التوصل لإجابة عن سؤال متى يتكلم طفل التوحد هي إنك تبالغي في استخدام الإيماءات ولغة جسمك ووشك معاه، على سبيل المثال: لو عاوزة تلفتي انتباهه لحاجة شاوري بإيدك عليها بشكل واضح ليه، وبعدين قولي له: شوف، بص.
أو إنك تبيني له إعجابك بسلوك عمله، فتُبرزي علامات الإعجاب على وشك، وتصقفي بإيدك وتقولي: واو، برافو، شاطر، وهكذا.
كمان لما الطفل يستخدم الإيماءات والإشارات حاولي تستجيبي ليها، زي: إنه لو شاور على لعبه تروحي تجيبيها له، وتقولي له أي كلمة بحيث يتفاعل معاكي.
4- سيبي مساحة لطفلك عشان يتكلم
لما نسأل أخصائيين التخاطب “متى يتكلم طفل التوحد”، فبكل تأكيد إجابتهم هتشمل إنه عشان يتكلم لازم نسيب له مساحة إنه يتكلم.
كتير لما بتسألي طفلك أو بتتكلمي معاه وما يردش عليكي، بتحسي وقتها إنك محتاجة تملي فترة السكوت دي فتبدئي تلحي عليه.
لكن الأصح إنك تسيبيه فترة بعد ما تتكلمي، وتلاحظي إذا كان هيتكلم أو حاول يتواصل معاكي مثلًا، وبعد كدا ممكن تكلميه تاني، أو تستخدمي إيماءات وحركات تشد انتباهه ليكي، وخلي بالك إن سرعة استجابتك لطفلك بتخليه يتفاعل أكتر.
وعشان تساعديه أكتر دلكي له عضلات الفك والشفاه، لتعزيز قدرته على الكلام.
5- بسّطي لغتك
عشان تجاوبي عن سؤال متى يتكلم طفل التوحد؛ لازم قبلها تاخدي خطوة إنك تبسطي لغتك معاه، لإن مهم جدًا وأنتي بتتعاملي مع طفلك ما تستخدميش جمل طويلة ولغة معقدة، ولا تديله أوامر مُركبة، لإن دا بيشتت انتباهه بشكل كبير.
وحاولي دايمًا تخلي أي كلام موجه ليه مكوَّن من كلمات فردية، أو على الأقل جملة من كلمتين، زي: ارمي الكورة، ارسم بالقلم، وهكذا.
وتقدري كمان تعبري عن الجمل على شكل أغاني باستخدام موسيقى.
6- شاركي طفلك اهتماماته
لما يكون طفلك مهتم بشيء معين حاولي بدل ما تقطعي انتباهه تشاركيه في اهتماماته، وتستخدمي كلمات معينة مرتبطة بيها.
مثلًا: لو هو بيحب لعبة الأشكال الهندسية العبي معاه، ولو حط المربع في المكان المخصص لوضعه قوليله: دا مربع، وهكذا مع باقي الأشكال، وكدا هيكتسب مفردات أكتر، وبالتالي هينمي عنده اللغة.
7- استخدمي أجهزة مساعدة ووسائل مرئية
قبل السؤال بمتى يتكلم طفل التوحد، ضروري تهتمي بالوسائل المرئية بكل أنواعها، ودا لإنها بتشد انتباه الطفل بشكل كبير، لكن لازم تكون تحت ضوابط وأوقات محددة، وتأكدي دايمًا إن تواصل الطفل معاكي أفضل مليون مرة من تواصله مع الشاشات، وما تقلقيش بخصوص الوقت اللي ممكن يتكلم فيه طفل التوحد، لإن الأهم من الكلام إنه يتواصل معاكي صح، وإدراكه يزيد أكتر.
وأخيرًا، نسبة إصابة الأطفال بطيف التوحد مش قليلة، ومعظم الأبحاث اتكلمت عن أسباب ممكن تكون سبب في الإصابة بيه، زي العوامل الوراثية، أو كبر سن الأم، أو تعرض الأم لضغط شديد في فترة الحمل، أو تعرضها لمادة كيميائية خطيرة.
ومع ذلك نسبة كبيرة من الأسباب مش مؤكدة، لكن طيف التوحد من الاضطرابات اللي ليها أعراض مميزة زي قلة التواصل الاجتماعي واللغوي عند الأطفال، وبنلاقي نسبة من الأطفال دول عندهم مشكلة تأخر النطق.
وبترتبط المشكلة دي بنسبة عند بعض أطفال التوحد بسبب قلة التواصل مغاهم بشكل كافي فبتطور أكتر، لكن ممكن المشكلة تتحل عن طريق استخدام بعض الأنشطة لمساعدة الطفل علي الكلام، زي استخدام الإشارة واللعب وتبسيط اللغة مع الطفل وغيرها.
وبكدا نكون عرفنا متى يتكلم طفل التوحد، وإزاي نساعده في رحلة تطوير وتنمية المهارات اللغوية عنده من خلال بذل أقصى جهد عندنا، بجانب استخدام التقنيات الصحيحة واحتواء أطفالنا، لإن دي من أفضل الوسائل اللي نقدر ننمي بيها مهاراته.
المصادر
Will my autistic child ever be able to talk?
أضف تعليق