كل مرحلة في حياة الطفل بيكون لها خصائصها المختلفة، ودورنا كمربين وأولياء أمور إننا نعرف خصائص كل مرحلة منهم ونفهم إزاي نتعامل مع الطفل في المرحلة دي بطريقة صحيحة؛ عشان نقدر نربي طفل سوي قادر على تحمل المسئولية وعنده القدرة على فهم اللي بيدور حواليه ومواجهة العالم الخارجي، وكمان فاهم نفسه كويس وعارف قدراته ومدرك إزاي يطورها.
فهمك لطبيعة المرحلة هيوفر عليك وقت وجهد كبير، وهيخليك فاهم سبب كل تصرف بيصدر من طفلك، وهل التصرف دا طبيعي ولا محتاج طريقة تعامل خاصة عشان تعالجه.
وعشان الأنشطة دايما بتكون فارقة في سلوكيات ومهارات الطفل، فهنتكلم عن أنشطة للأطفال سن 10 سنوات اللي هتساعدك في تعديل سلوكيات طفلك الخاطئة، بالإضافة إلى إنها هتكون أداة مميزة لتنمية ذكاء طفلك وتطوير مهاراته.
هنبدأ الأول بخصائص المرحلة عشان نقدر نحدد الأنشطة والألعاب المناسبة للمرحلة دي، وبعدها هنتطرق لمجموعة أنشطة للأطفال سن 10 سنوات لتنمية المهارات.
أهمية سن 10 سنوات في حياة الطفل
سن 10 سنوات يعتبر سن مهم جدًا في حياة الطفل؛ لإن دا السن اللي بتتكون فيه شخصيته بناءً على المواقف اللي بيمر بيها في يومه، فبيبدأ يكتسب صفات وعادات جديدة، وبيكون من السهل في الوقت دا إنه يتعلم مهارات مختلفة.
سمات المرحلة:
إن الطفل بيكون فيها هادئ، ومحتاج يشعر بمستوى عالي من الاطمئنان، عشان كدا بنلاحظ إنه بيكون قريب جدا من الوالدين وبيستجيب لهم بسرعة.
بالتالي هنا لازم ولي الأمر يحرص إنه يوصل إحساس الاطمئنان دا للطفل، ويزرع فيه الصفات اللي حابب تبقى موجودة في شخصيته مع الحرص على التوجيه الدائم للطفل.
الطفل في سن 10 سنوات بيكون عنده اتساع في المعرفة، ونمو في جميع جوانب حياته، فمثلًا في الجانب الفسيولوجي بيحصل طفرة في نمو الطفل فبنلاحظ تغيرات واضحة في ملامح الطفل ووزنه.
وفي الاجتماعي بنلاقي إن الطفل بدأ يكون عنده حياة اجتماعية خارج نطاق الأسرة، وبقى عنده قدرة على تكوين علاقات اجتماعية جديدة مع أصدقائه في المدرسة.
النمو الحركي:
يتميز الأولاد بالمهارات العضلية واستخدام العضلات، أما البنات فبتزيد قدرتهم على الحركات الدقيقة.
من هنا بيتضح إن سن 10 سنوات هو سن فارق في حياة الطفل، واللي بنزرعه فيه في السن دا بنحصد ثماره على مدار حياته كلها فيما بعد، وبالتالي لازم يكون في توجيه من ولي الأمر باستمرار وتعديل السلوكيات اللي بيشوف إنها خاطئة؛ عشان يقدر يربي الطفل تربية سليمة.
ملحوظة: الأنشطة المختلفة بتساعدنا كتير في تعديل السلوكيات وتنمية مهارات الطفل، وهل في أنشطة للأطفال سن 10 سنوات تقدر تساعد فعلًا في تنمية المهارات؟ وإزاي ممكن نختار النشاط المناسب لطفلي؟ دا اللي هنتعرف عليه في السطور القادمة.
أولًا: أنشطة للأطفال سن 10 سنوات لتنمية الذكاء
الأنشطة والألعاب بيمثلوا دور حيوي جدًا في تنمية ذكاء الطفل، ودايما بنلاحظ ارتفاع معدل ذكاء الأطفال اللي بيمارسوا الأنشطة دي، من أهمهم:
1_ لعبة السودوكو
لعبة السودوكو هي لعبة مهمة لتنمية الذكاء؛ لإنها بتجبر الطفل إنه يفكر كل مرة بطريقة مختلفة عشان يقدر يوصل للحل الصحيح ليها، وممكن في البداية يكون في مساعدة وتوجيه من ولي الأمر في حل اللعبة، وبعدها يلاحظ تعاملاته من بعيد ويشوف بيفكر إزاي، ومع الوقت هيلاحظ تطور كبير في معدل ذكاء طفله.
2_ لعبة الذاكرة
لعبة الذاكرة بتكون عبارة عن بطاقات بتظهر وتختفي، والطفل يبدأ يضغط عليهم عشان يظهروا تاني بس لازم يضغط على بطاقتين شبه بعض عشان يظهروا، ولو أخطأ بيعيد تاني، وبالتالي بيكون حريص إنه يركز جدًا أول ما البطاقات تظهر عشان يلحق يشوفها ويقدر يضغط على البطاقات اللي شبه بعض، فأساس اللعبة بيركز بشكل كلي على تنمية ذكاء الطفل.
3_ لعبة المربعات
اللعبة مكونة من مجموعة من المربعات المرسومة على الورق المقوى، وكل مربع موجود فيه قطعة هندسية على شكل مربع أصغر ما عدا مربع واحد فاضي، والقطع الهندسية دي بيكون لها لونين، والمطلوب من الطفل إنه ينقل الأشكال دي من خلال حركات بسيطة ويجمع كل لون في منطقة واحدة، ودا بيحتاج لمجهود ذهني وتفكير بذكاء.
4_ الشطرنج
الشطرنج من أهم الأنشطة للأطفال سن 10 سنوات وبتساعد بشكل كبير في تعزيز الذكاء والتفكير الاستراتيجي والتحليلي، وبتدرب عقلية الطفل على القدرة على وضع الخطط وتنفيذها والتعامل مع التغيرات المختلفة. ينصح بطاولات الشطرنج والقطع الفعلية، ويقدر الطفل يشاركها مع والديه أو طفل آخر، أما تطبيقات الشطرنج على الهواتف الذكية ممكن تكون بديل جيد وبتمكن الطفل إنه يطور مستواه باستمرار.
ثانيًا: أنشطة للأطفال سن 10 سنوات لتنمية القدرات الجسدية
تنمية القدرات الجسدية لطفلك بممارسة أنشطة مناسبة لسنه أمر مهم جدًا، وبالنسبة لسن 10 سنوات بنلاقي إن من أفضل الأنشطة اللي بتساعد على كدا:
5_ الألعاب الرياضية
الألعاب الرياضية زي كرة القدم والتنس وغيرهما يعتبروا من الأنشطة المهمة جدا لتنمية القدرات الجسدية للأطفال خصوصا في سن 10 سنوات؛ لإنها بتشجع الطفل إنه يتحرك أكثر ويقوي عضلات مختلفة عنده.
6_ ألعاب الدفاع عن النفس
ألعاب القوى والدفاع عن النفس مثل الكاراتيه، التايكوندو، ميوي تاي muay thai التايلاندية، الجو جوتسو اليابانية، أو الكونغ فو والجودو كلها أنشطة مناسبة للأطفال سن 10 سنوات، وبتنمي المهارات الجسدية وسرعة ردود الأفعال، وكمان بتزيد ثقة الطفل بنفسه وبتحميه من محاولات التنمر الجسدي.
7_ ركوب الدراجات
نشاط ركوب الدراجات بيساعد أيضًا على تقوية عضلات الطفل بشكل كبير، وممكن نحفز الطفل على ممارسة النشاط دا بإننا نعمل معاه سباق، وندخله في مسابقات باستمرار، وهنلاحظ تغير كبير في قدرات الطفل الجسدية للأفضل.
8_ الباليه والجمباز
أنشطة الأطفال سن 10 سنوات الرياضية والمناسبة للبنات بالأخص أهمها الباليه والجمباز، الإتنين بيساعدوا على تقوية العضلات بالإضافة إلى زيادة مرونة الجسم وبيشجعوا الأطفال بالذات البنات على المشاركة في النشاطات والمسابقات ودا بيعزز مهاراتهم الاجتماعية بالإضافة للقدرات الجسدية.
9_ ركوب الخيل
سن 10 سنوات بداية مناسبة لتعلم ركوب الخيل والفروسية، بما أنها رياضة بتعزز القوة العضلية وتحكم الطفل في تحركاته بالإضافة إلى تفاعل الطفل مع الخيل اللي بيعلمه تحمل المسئولية والرفق بالحيوان.
ثالثًا: أنشطة للأطفال سن 10 سنوات لتنمية المهارات الفنية
ممارسة أنشطة للأطفال سن 10 سنوات لتنمية الجانب الفني تعتبر من الأشياء المهمة اللي لازم كل ولي أمر يحرص عليها؛ لإنها بتساعد الطفل يعبر عن اللي جواه بدون تعقيد، وبتخليه عنده القدرة أكثر على التخيل والإبداع.
من أشهر الأنشطة دي:
10_ أنشطة الرسم والتلوين
أنشطة الرسم والتلوين بتحفز الطفل على الإبداع بشكل دائم، ومع استمرارية الممارسة بتتطور مهارات الطفل الفنية بشكل ملحوظ جدا من اللي حواليه.
11_ الإلقاء
يعد الإلقاء أحد أبرز الأنشطة الفنية اللي بيكون لها دور كبير في تطوير المهارات الفنية للطفل، بجانب إنها بتنمي عنده الشعور بثقة بالنفس وبتحفزه إنه يتكلم ويتناقش مع الآخرين ويوضح وجهة نظره، وكمان بتزود عنده الحصيلة اللغوية، وبالتالي ممكن من خلال الإلقاء بس ننمي عند طفلنا أكثر من مهارة.
12_ ألعاب التمثيل
ألعاب التمثيل من الألعاب اللي بيفضلها الأطفال سن 10 سنوات؛ لإنهم بيقدروا من خلالها يعبروا عن اللي جواهم وكمان وقت اللعبة بيكون مسلي جدا بالنسبة لهم، وبنلاقي إن المسرح وألعاب التمثيل بتنمي أطفالنا في كثير من الجوانب زي الجانب الفني واللغوي والفكري وغيرهم.
رابعا: ألعاب لزيادة التركيز عند الأطفال في سن 10 سنوات
توجد أنشطة للأطفال من سن 10 سنوات ومجموعة من الألعاب المختلفة اللي بيكون هدفها زيادة تركيز وانتباه الطفل، ومع الممارسة بيقل تشتت الطفل تدريجيا، وبالتالي فهي بتكون مفيدة جدا للأطفال اللي بيعانوا من تشتت الانتباه.
من الأنشطة والألعاب دي بنلاقي:
13_ لعبة البازل
لعبة البازل تعتبر لعبة شهيرة جدا عند الأطفال، وبجانب إن الطفل بيشعر بمتعة وهو بيلعبها وبيحاول فيها لحد ما يعرف يكونها صح فهي كمان بتنمي ذكائه وتساعده يكون مركز لوقت طويل عشان يقدر يوصل لهدفه، للأطفال في عمر 10 سنوات ينصح إن البازل يكون لأشكال معقدة وعدد القطع كبير وحجمها أصغر من قطع البازل الموجهة للأطفال في سن أصغر.
14_ لعبة الأرقام
في اللعبة دي ولي الأمر بيقول مجموعة من الأرقام المتسلسلة بسرعة ويتخطى رقم منهم بقصد، ومطلوب من الطفل إنه يقول الرقم دا بسرعة، وبالتالي فالطفل هيكون مركز طول الوقت عشان يلاحظ الرقم الناقص ويقوله.
15_ حفظ القرآن الكريم
مداومة الأطفال على حفظ القرآن الكريم بتزود مستوى التركيز عندهم بشكل ملحوظ وبتحسن قدرتهم على النطق والحفظ، بالإضافة إلى إنها بتقوي الذاكرة وبتزود حصيلتهم اللغوية بتزيد بمعدل كبير بالنسبة لباقي الأطفال، وبالتالي من الضروري جدا إننا نبدأ نحفظ أطفالنا القرآن الكريم ونساعدهم إن يكون لهم ورد يومي من الحفظ ولو بسيط.
خامسًا: أنشطة للأطفال سن 10 سنوات لتنمية المهارات الاجتماعية
الأنشطة والألعاب الجماعية تعتبر أقصر الطرق لتنمية مهارات الطفل الاجتماعية، بنلاقي إن أفضل أنشطة للأطفال سن 10 سنوات لتنمية المهارات دي هي:
16_ نشاط تكوين الكلمات
النشاط عبارة عن مجموعة من الحروف المحدودة وبنجمع منها كلمات لها معنى، وبيمارسه طفلين على الأقل، فخلال النشاط لازم يكون في مناقشة بين الطفلين عشان يقدروا يكونوا الكلمات، وبالتالي فالنشاط دا بيفرق جدا في مهارات الطفل الاجتماعية.
17_ الرياضات الجماعية
أي رياضة جماعية مثل كرة القدم، السلة، الكرة الطائرة بتساعد في تنمية المهارات الاجتماعية للأطفال وتعليمهم التعاون والتواصل مع أفراد الفريق، وكمان مهارات القيادة لو الطفل وصل إنه يكون كابتن فريق، الرياضات الجماعية كمان بتعززحس الأطفال بالمسئولية عن طريق كونه فرد فعال في الفريق.
18_ المعسكرات الصيفية
من الأنشطة المناسبة لسن 10 سنوات هي المعسكرات الصيفية اللي بتنظمها بعض المدارس والمؤسسات وغالبا بتتضمن سفر ومبيت لمدة عدة أيام لشهر، خلالها الطفل بيتفاعل مع كل الأفراد المشاركين في المعسكر من المشرفين والأطفال في سنه وأعمار مختلفة، وكمان المعسكرات بتجعل الطفل يعتمد على نفسه وبتعزز مهارات اجتماعية زي الاستقلالية والقيادية.
ملحوطة: اختيار المعسكر الصيفي المناسب مهم ولازم يتأكد أولياء الأمور من وجود مشرفين يمكنهم التواصل معهم في أي وقت بالإضافة إلى مرافقين من أولياء الأمور الموثوق فيهم لضمان أمان الطفل.
19_ الرحلات المدرسية
بعض أولياء الأمور بيعترضوا على مشاركة أطفالهم في الرحلات المدرسية؛ لكنها من أهم أنشطة للأطفال في سن 10 سنوات، لأنها بتعزز ثقته في نفسه وقدرته على الاعتماد على قدراته أثناء التنقل أو السفر، وكمان بتتيح ليه فرصة التعامل مع أطفال في أعمار مختلفة خارج المدرسة والبيت، وبتعزز عنده مهارات التواصل والتعاون.
سادسا: أنشطة لتعزيز تحمل المسئولية
توجد أنشطة للأطفال سن 10 سنوات لتعزيز مبدأ تحمل المسئولية لديهم، والانشطة دي بتكون ضرورية جدًا لتربية طفل عنده قدرة على مواجهة مشاكله والتفكير في حلها، وتحمل عواقب قراراته، بالطبع الأنشطة دي لازم تكون بسيطة في البداية وبنبدأ مع الوقت نزودها؛ عشان نتجنب إن الطفل يشعر بالصعوبة أو الضيق من منها.
بنلاقي إن أفضل أنشطة للأطفال سن 10 سنوات هي:
20_ نشاط كروت المهام
في النشاط دا بيطلب ولي الأمر من الطفل إنه يقوم ببعض المهام زي التعاون مع أخواته في اللعب مثلا، والمشاركة في أعمال خيرية أو أنشطة مختلفة خارج المنزل وغيرهم، والمهام دي بتكون مكتوبة على كروت ملونة وبيتم وضعها في مكان واضح ومعروف بالنسبة للطفل.
النشاط دا بيخلي الطفل مدرك دايما إن في مسئولية جديدة كل يوم، ولازم يتعامل مع المسئولية دي بجدية؛ عشان يكسب ثقة اللي حواليه، وبالتالي بيكون حريص على أداء المهام المطلوبة منه.
21_ المشاركة في الأعمال المنزلية
مشاركة الطفل في الأعمال المنزلية بتكسبه ثقة كبيرة في نفسه، وبتخليه يتعامل كشخص مسئول يمكن الاعتماد عليه، ودا بيكون واضح جدا من خلال تصرفاته مع الآخرين.
دور أولياء الأمور هنا خصوصًا الأمهات إنهم يوزعوا المهام دي حسب قدرة الطفل ويكون في توجيه باستمرار وتشجيع يحسس الطفل بمدى أهمية الحاجة اللي بيقوم بيها، ومنها بيتضح إن المشاركة دي تعتبر أفضل أنشطة للأطفال سن 10 سنوات لتعزيز الشعور بالمسئولية.
سابعا: أنشطة خاصة للطفل الحركي
الطفل الحركي هو طفل بيعتبر الحركة هي وسيلته لاكتشاف العالم حواليه، وبيكون محتاج مننا نوجه طاقته وحركته المفرطة دي في حاجة مفيدة، عشان كدا بلنجأ لمجموعة من الأنشطة اللي من خلالها بنسيطر على الحركة المفرطة وبنوجه حركة الطفل صح.
بنلاقي إن أهم أنشطة للأطفال سن 10 سنوات ممكن نلجأ لها في الحالة دي هي:
22_ السباحة
السباحة بتعطي الطفل فرصة كبيرة لإنه يتحرك بحرية وبشكل دائم، بالإضافة إلى إنها بتكسبه العديد من المهارات الآخرى، وبالتالي فهي تعتبر نشاط فعال جدا في السيطرة على الحركة المفرطة لدى الطفل وتوجيه مجهوده نحو شئ مفيد.
23_ لعبة الكاراتيه
لعبة الكاراتيه والألعاب القتالية المناسبة للأطفال بتساعد بشكل كبير في توجيه النشاط الحركي الزائد لدى الطفل؛ لإنها بتخليه دائما مستعد للحركة، وموجه طاقته كلها لحاجة معينة.
وأخيرًا، أفضل أنشطة للأطفال سن 10 سنوات هي الأنشطة اللي بتركز على تطوير مهارة معينة عند الطفل، ومع استمرارية ممارسة الأنشطة دي هنلاحظ تطور كبير في مهارات أطفالنا، عشان كدا لازم كل ولي أمر يعرف إيه المهارات اللي طفله محتاج يطورها ويختار النشاط المناسب على أساسها؛ عشان يوصل بمهارات طفله للمستوى المطلوب.
24_ اشغال الطفل في المشاركة في الأعمال المنزلية
انشغال الأمهات عن الطفل الحركي أثناء تأدية الأعمال المنزلية اليومية ممكن يخليه يوجه حركته في نشاطات خطرة عليه، فالأفضل جعل الطفل الحركي يشارك في الأعمال المنزلية اللي بتتطلب مجهود بدني وحركة كتيرة، مع محاولة تحويل الأعمال المنزلية لألعاب أو مسابقات يستمتع بيها الطفل في نفس الوقت.
تقدر تعرف كيفية التعامل مع الطفل اللي بيعاني من اضطراب فرط الحركة من هنا.
كيفية اختيار النشاط والألعاب المناسبة لطفلي؟
بعد ما عرضنا أنسب أنشطة للأطفال سن 10 سنوات لازن ننوه اختيار النشاط واللعبة المناسبة لكل طفلأحيانا بيكون أمر صعب على ولي الأمر؛ لإنه مش بيكون قادر يحدد هو الطفل ممكن يكون محتاج إيه في اللعبة، وبناءً عليه قد يقع اختياره على لعبة مش مناسبة أو مش مفيدة للطفل رغم جودتها. وعشان نعرف نختار نشاط أو لعبة مناسبة لكل طفل لازم نحط في اعتبارنا كذا نقطة وهم:
عمر الطفل
عمر الطفل هو أول عامل بنختار على أساسه اللعبة أو النشاط؛ لإن أغلب الألعاب والأنشطة بتكون مناسبة لسن معين فقط، يعني في أنشطة للأطفال سن 10 سنوات ما ينفعش نستخدمها مع سن 3 سنوات مثلا؛ لإن الطفل مش هيكون قادر يفهمها أو يستمتع بيها، ووضحنا أكتر الأنشطة المناسبة لطفل العشر سنوات اللي ممكن تساعد أولياء الأمور في الاختيار.
الجنس
ألعاب الأولاد بتختلف عن ألعاب البنات، فمثلًا بنلاقي إن الأولاد بيحبوا أكثر ألعاب الحركة والإثارة، أما البنات فبيحبوا أكثر للألعاب اللي بتركز على غريزة الأمومة عندهم زي العرائس وألعاب الطبخ وكمان بتناسبهم أنشطة رياضية خاصه.
الميول والاهتمامات
ميول الطفل بيلعب دور مهم في اختيار اللعبة أو النشاط المناسبين له، فبعض الأطفال بيميلوا إلى الأنشطة الحركية أكتر، وبعضهم ممكن يفضل أنشطة في البيت، وبالتالي لازم نحدد ميول الطفل قبل ما نحدد النشاط المناسب ليه؛ لإننا ممكن نكون شايفين مثلا إن اللعبة مناسبة للطفل ونتفاجئ إنه مش حابب يلعب بيها.
الغرض من النشاط
قبل ما نشتري لعبة أو نشترك لأبناءنا في نشاط معين لازم نكون عارفين إيه غرضنا منها، بمعنى هل اللعبة محتاجينها للترفية بس ولا لتنمية مهارة معينة مثلا زي المهارات الحسية والحركية وغيرهما، وبناءً على غرضنا دا هنقدر نختار المناسب لأطفالنا، وبنلاحظ أغلب أولياء الأمور بيشتروا أنشطة للأطفال سن 10 سنوات بغرض تنمية المهارات المختلفة.
سلوكيات ومهارات الطفل
بما أن الأنشطة المختلفة بتساعد في تعديل سلوك الأطفال وتنمية مهارات، لازم يكون عندنا فكرة جيدة عن السلوكيات اللي محتاجين نعدلها عند الطفل، وكذلك الإشارات اللي بتدل على مهاراته علشان نساعده ينميها من خلال الأنشطة.
أضف تعليق