تعليم الأطفال الألوان الأساسية والثانوية باستخدام 7 طرق فعالة

طرق تعليم الأطفال الألوان

تعليم الأطفال الألوان هو واحدة من المهارات الأساسية اللي بيتعلمها الطفل من عمر السنتين، واللي بتساعد بشكل كبير في نجاحه في المدرسة بعد كدا. 

فبنلاقي إن الطفل بيبدأ يتعرف على الفرق بين الشيء الملون، والأبيض والأسود بعد شهور من ولادته، ولما بيوصل لعمر سنتين بيكون مستعد يتعلم أسماء الأشكال والألوان، ودي بتكون مهمة الأم والأب. 

عشان كدا موضوع مقالنا هيكون عن كيفية تعليم الطفل الألوان المختلفة، وإيه هي أنواع الألوان، وأهمية تعليم الألوان للأطفال من عمر صغير، تابع معنا. 

ما هو السن المناسب لتعليم الأطفال الألوان؟

وفقاً لما نشره موقع PubMed Central عن التطور الإدراكي للألوان بنلاقي إن الطفل بيقدر يميز بين الألوان في السنة الأولى من عمره، خاصةً الألوان الزاهية، ودا لإن قدرة الطفل بتتطور على رؤية الألوان في سن 4 – 6 شهور تقريبًا.

فبنلاقي إن الطفل بيقدر يميز بين النور والظلام قبل الولادة، وبيكون حساس للضوء ويقدر يميز بين الأبيض والأسود عند الولادة، مع تمييزه للون الأحمر.

ومن سن 3 – 4 شهور بيتعرف تدريجياً على الألوان، وبيميز بين اللون الأحمر والأخضر، وبدخوله للشهر الخامس بيكون عنده إدراك لمجموعة من الألوان، لكن مش بدرجة تمييز البالغ لحد ما يتم السنة الأولى.

وعشان كدا بيُنصح إنك تعرضي لطفلك بطاقات بين اللون الأبيض والأسود من سن شهر، لإن دا بينمي عنده الوظائف البصرية والإدراكية. 

وبمرور الوقت هتبدئي تدخلي ألوان تانية، وهتحسي إن الطفل بيلفت انتباهه الألوان الزاهية وبيحبها، ودا بيوضحلك إن طفلك قادر يفرق بين الأبيض والأسود، وباقي الألوان، ودي بتكون علامة جيدة لنمو وتطور حواس الطفل بشكل سليم. 

ومن عمر 18 شهر لسنتين بتبدئي تنطقي قدامه الألوان وتمييزيها، وبتكون دي نقطة بداية تعليم الأطفال الألوان اللي هتطور بعد كدا، لكن بنلاقي إن بعض الأطفال استجابتهم بتكون بشكل كويس، والبعض التاني بيحتاج طرق مختلفة.

ففي حالة إن الطفل قدر يتعرف على لونين أو ثلاثة على الأقل، فهو كدا على المسار الصحيح، وبيفضل يتطور في معرفة الألوان، وظلالها المختلفة لحد ما يعرفها كويس وعمره 7 سنوات. 

اقرأ أيضًا: مناهج التعليم المبكر | تعرف على أشهر 7 مناهج تطبق في الحضانات.

أهمية تعليم الأطفال الألوان في سن مبكر

  • تساعد الطفل في تواصله مع العالم الخارجي؛ من خلال وصف الأشخاص، ووصف الطبيعة بألوانها الرائعة.
  • يساعد تعلم أسماء الألوان على تطوير مفردات الطفل، وتعلم فرز الأشياء على حسب لونها.
  • تفيد معرفة الألوان للإشارة للخطر، زي اللون الأحمر في إشارة المرور للتوقف.
  • تساعد على تطوير عقل الطفل من خلال التنظيم، والتصنيف، والمقارنة.
  • تساعد في تطور مهارات الطفل من خلال تعلم العد والأرقام. 

كيفية تعليم الأطفال الألوان

كيفية تعليم الأطفال الألوان

الأطفال فضوليين بطبعهم، وبيستمتعوا باستكشاف الألوان والحاجات الجديدة، وعشان تساعدي طفلك يتعلم الألوان، فممكن تعملي دا من خلال أنشطة مسلية، ومنها:

1- مطابقة الألوان

من أبسط طرق تعليم الأطفال الألوان هي المطابقة، ودي ممكن تكون عن طريق عدد من الأشكال المختلفة لكل لون على حدة، وتجربي قدام الطفل إنك تجمعي الألوان المتطابقة في طبق واحد، وتخليه يحاول لوحده. 

وممكن تستخدمي ورق على حسب المتاح، وبتقدُم الوقت هتبدئي تقولي اسم اللون، وتردديه أكتر من مرة قدام الطفل، وتبدئي تطلبي منه يسلمك القطعة بلونها، وتسأليه عن لونها كمان. 

2- إعداد طبق طعام ملون

من الأنشطة المهمة لتدعيم تعليم الأطفال الألوان هي مشاركته في إعداد الطعام، والتسوق ومحاولة ذكر اسم الفاكهة أو الخضار بلونها. 

وأثناء الطبخ من الطبيعي إن الطفل هيسألك عن الخضروات، فحاولي تردي عليه باسم ولون الخضار، زي: الطماطم الحمراء، والبسلة الخضراء، وهنحط الجزر البرتقالي، وهكذا.

3- إحضار كتب ملونة 

كتب التلوين من الأدوات المهمة لتعليم الأطفال الألوان، من خلال تقليد الصورة الملونة، وذكر اسم اللون، والشيء اللي بيلونه، دا هيثبت المعلومة في عقله، وكل دا بيكون باستخدام الأقلام الملونة. 

4- تعليم الأطفال الألوان بالملابس المفضلة

تقدري كمان تدعمي رحلة تعلم الطفل للألوان من خلال لبسه، وذكر لون القطعة اللي لابسها، ونركز دايماً في الألوان الأساسية: الأبيض، والأسود، والأخضر، والأحمر. 

5- ربط الأشياء بالألوان

أثناء تعليم طفلك الألوان هيبدأ يربط ألوان معينة بأشياء معينة، زي ربط اللون الأحمر بالتفاح والطماطم، وقميصه المفضل بلونه، وهكذا، وبالتالي دا هيسهل عليه حفظ الألوان، وثباتها في عقله بسهولة. 

6- القراءة

القراءة من الأمور المهمة في تعلم الطفل، فبتحاولي أثناء قرائتك لكتاب الأطفال وصف الصور الملونة، وسؤال الطفل أنت شايف أي حاجة لونها أصفر؟ طب يا ترى الأرنب لابس قميص لونه إيه؟ 

7- ألعاب السيارات

لعبة السيارات من الألعاب المفيدة لتعليم الأطفال الألوان والأرقام، من خلال إننا نختار لون معين من السيارات، نطلب من الطفل تجميعهم وعدهم. 

دا هيساعد الطفل في تثبيت اللون، وتطوير مهارة العد.

اقرأ أيضًا: 10 ألعاب لزيادة التركيز عند الأطفال في البيت والروضة والمدرسة.

أنواع الألوان وتعليمها للأطفال

يجب تعليم الألوان للأطفال، ودا عشان الطفل يقدر يميز بين الألوان، وبالتالي يكون متفاعل أكتر مع الأشياء اللي بيتعامل معاها سواء في البيت أو خارجه، وعشان كدا لازم الطفل يتعلم الفرق بين أنواع الألوان الأساسية والفرعية. 

تعليم الأطفال الألوان الأساسية

الألوان الأساسية، هي: الأحمر، والأزرق، والأصفر، وسميت الأساسية لإن عند مزجها بلون تاني بنحصل على ألوان فرعية، لكن الألوان الأساسية ما بنقدرش نحصل عليها من المزج بين ألوان تانية.

الألوان الثانوية

تسمى الثانوية أو الفرعية، وهي ألوان نقدر نحصل عليها عن طريق مزج لونين أو أكتر من الألوان الأساسية مع بعضها، فمثلاً:

  • أحمر + أزرق = بنفسجي.
  • أزرق + أصفر = أخضر. 
  • أصفر + أحمر = برتقالي.

نصائح لتعليم الأطفال الألوان

نصائح لتعليم الأطفال الألوان

ودي أهم النصائح اللي هتساعدك تعلمي طفلك الألوان بشكل صحيح:

  • البدء بالألوان الأساسية عشان مايكونش الطفل تحت ضغط وتشتت، وبعدين الألوان الفرعية، وغالباً بيكون عند سن 3 سنوات.
  • الربط بين اللون اللي هيتعلمه الطفل، وكل اللي حواليه في البيت، ومن خلال الألعاب عشان يثبت معاه.
  • البدء مع الطفل بلون واحد، والتركيز عليه طول الأسبوع، والأسبوع التاني لون جديد وهكذا.
  • سؤال الطفل عن لون الأشياء حواليه، زي إيه لون البحر؟ أو السحاب وهكذا.
  • تكرار اسم اللون على سمع الطفل، وبنطق صحيح عشان يتعلم نطقه.
  • استخدام الألعاب للتركيز على لون معين، لترسيخه في عقل الطفل.
  • استخدام نفس الطرق لتعليم الطفل الألوان باللغة الإنجليزية.
  • التأكد من استعداده لتقبل معلومات جديدة.

الخلاصة

بيبدأ تعليم الأطفال الألوان من عمر سنتين، بداية من الألوان الأساسية، وبعد كدا الألوان الفرعية في سن أكبر لحد ما يوصل لسن 7 سنوات.

ومن أهم طرق تعليم طفلك الألوان هي الأنشطة والألعاب، زي: مطابقة الألوان، وإعداد طبق طعام ملون، وإحضار كتب ملونة، وغيرها زي ما ذكرنا. 

ومن الأمور المهمة اللي لازم كل أم تاخد بالها منها أثناء تعليم الطفل الألوان هو التركيز على لون واحد لفترة لحد ما يثبت في عقل الطفل، ومهم نحاوطه بكل الألعاب المميزة للون دا، ونعتمد في تعليمه على اللغة الأم في الأول، وممكن نستعين بالبيئة المحيطة لتعليم الطفل.

المراجع

How to Teach the Names of Colors to Toddlers

When Do Kids Learn Colors?

9 Simple Ways to Get Your Toddler to Learn Colors

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق