في رحلتنا كأولياء أمور، بنشارك أطفالنا الفرح والتحديات، بس في بعض الأوقات ممكن نواجه تحديات وصعوبات تعليمية غير متوقعة واللي منها صعوبات التعلم، ودا بينقلنا للسؤال الأهم وهو “كيف أعرف أن ابني لديه صعوبات تعلم؟”
لإن فهم علامات وأعراض صعوبات التعلم عند الأطفال هو أمر حيوي جداًًا، والتدخل المبكر ممكن يكون مفتاح المساعدة وتقديم الدعم اللي يغير حياة أطفالنا.
وفي المقال دا، هنحلل أنواع صعوبات التعلم المشهورة، ونعرف أعراض ظهورها، ونفهم دور أولياء الأمور في مساندة أطفالهم، وتعزيز تقدمهم.
ما هي صعوبات التعلم؟
صعوبات التعلم هو مصطلح بيُستخدم للإشارة إلى صعوبات فردية ممكن تعطل تقدم الطفل أو الشخص في اكتساب المهارات الأكاديمية والاجتماعية، على عكس الأفراد اللي في نفس سنه،
والصعوبات دي بتشمل مجموعة متنوعة من المجالات الأكاديمية زي: القراءة، والكتابة، والرياضيات، وبتشمل كمان التفاعل الاجتماعي، والاضطرابات العصبية، واضطرابات السمع والبصر.
لكن صعوبات التعلم ما لهاش علاقة بذكاء الطفل ومش بتأثر عليه، ووارد يكون الطفل ذكي جداً بس الظروف المحيطة بيه سببت له نوع من أنواع صعوبات التعلم عند الأطفال.
ما الفرق بين صعوبات التعلم والتأخر الدراسي؟
التأخر الدراسي دا مصطلح عام جداً، وملوش مفهوم أو معايير محددة تساعد في تشخيص الحالة، وبالتالي أي انخفاض في المستوى الدراسي للطفل عن المستوى المعتاد لباقي زمايله ممكن نقول عليه تأخر دراسي بغض النظر عن أسبابه.
ونفهم من كدا إن مجرد ضعف الأداء الأكاديمي للطفل مش دليل على معاناته من صعوبات التعلم، لأن ليه أسباب تانية كتير، زي:
- ضعف الرعاية الأسرية، خصوصاً في المراحل المبكرة.
- عدم رغبة الطفل في الدراسة.
- ضعف طريقة التدريس.
- ضعف السمع والبصر.
- إعاقة فكرية بسيطة.
ودي كلها أسباب تختلف عن أسباب صعوبات التعلم.
ما هي أبرز 5 صعوبات تعلم عند الأطفال؟
قبل ما نتكلم في تفاصيل أعراض صعوبات التعلم عند الأطفال، لازم نعرف الأول إيه هي أشهر صعوبات التعلم اللي ممكن يعاني منها الطفل:
- اضطراب التناسق الحركي والخلل الأدائي – Dyspraxia.
- اضطراب فرط الحركة وتشتت الانتباه – ADHD.
- عُسر الحساب – Dyscalculia.
- عُسر الكتابة – Dysgraphia.
- عُسر القراءة – Dyslexia.
وبيعد عُسر القراءة هو أكتر الأنواع انتشاراً بين أنواع صعوبات التعلم اللي ذكرناها، فحسب الدراسة المقدمة من موقع (AAP) عن “صعوبات التعلم عند الأطفال” بنلاقي إن عُسر القراءة بيمثل حوالي 80% من حالات صعوبات التعلم اللي تم تشخيصها.
وإنه كمان مبني على أساس وراثي قوي، لإن حوالي 40% من إخوات أو أطفال أو آباء المصاب بيعانوا هما كمان من عُسر القراءة.
اقرأ أكتر عن الصعوبات دي من خلال مقال: أنواع صعوبات التعلم عند الأطفال وطرق علاجها.
كيف أعرف أن ابني لديه صعوبات تعلم؟
عشان نتعرف على العلامات الواضحة اللي بتشير لوجود صعوبات تعلم عند طفلك لازم نسأل نفسنا الأول، هي صعوبات التعلم تبدأ من سن كام؟
الحقيقة إن الصعوبات دي مش مرتبطة بمرحلة عمرية محددة، ووارد جداً تكمل مع الطفل لباقي حياته، لكن التدخل المبكر بيساعد هنا في تقليل حجم الصعوبات دي بشكل كبير.
وبتظهر علامات صعوبات التعلم عند الأطفال أغلب الوقت في مرحلة ما قبل الدراسة، أو في الفترة بين الروضة والدراسة الابتدائية، بس ممكن عادي تظهر العلامات دي في المراحل العمرية اللي بعد كدا.
ومن أهم العلامات دي بنلاقي:
1- صعوبات في النطق
هنا الطفل مش بيكون قادر ينطق الحروف بشكل صحيح، ومش قادر يميز بين أصوات الحروف المختلفة، ودي حاجة بتأثر على مهاراته في القراءة فيما بعد لو استمرت معاه.
اقرأ أيضًا: كيفية تعليم النطق للأطفال ثلاث سنوات.
2- تأخر الكلام عن الطبيعي
المتعارف عليه إن الطفل في عمر سنتين بيكون قادر يتكلم حتى لو بسيط، لكن وصوله للسن دا وهو مش قادر يكون جملة مفيدة بيكون إنذار لاحتمالية معاناته من صعوبات في التعلم، ودي حاجة ممكن تأثر على مستواه الدراسي فيما بعد.
3- صعوبات في القراءة والكتابة
وهنا بتظهر أعراض كتير على الطفل بتجاوب على سؤال “كيف أعرف أن ابني لديه صعوبات تعلم؟”، زي:
- أخطاء في القراءة، وأخطاء إملائية مستمرة ومتكررة.
- صعوبة في تنظيم الأفكار والتعبير عن المشاعر.
- صعوبة في مسك القلم واستخدام الأدوات.
- صعوبة في فهم الجمل والمفردات.
- ضعف التحصيل اللغوي والنحوي.
وطبعاً دي كلها حاجات بتسبب ضعف التحصيل الدراسي عند الطفل، وابتعاده عن المذاكرة.
ووفقاً لتقرير الأكاديمية الأمريكية لطب العيون عن “صعوبات التعلم” بنلاقي إن صعوبات القراءة والكتابة مرتبطين ببعض بشكل كبير، ودا بسبب ترابط القواعد الصوتية للكلمات، فلو الطفل بيواجه صعوبة في قراءة أي كلمة يبقى غالباً هيواجه صعوبة كمان في كتابتها.
اقرأ أيضاً: أبرز 9 تمارين تعليم القراءة والكتابة لطفلك.
4- صعوبات في تعلم الرياضيات
بتظهر الأعراض هنا كلها على حاجات متعلقة بالرياضيات، ومنها:
- تأخر فهم الطفل للمفاهيم الرياضية الأساسية.
- عدم القدرة على تمييز العلامات الحسابية.
- صعوبة في تذكر قواعد الرياضيات.
- صعوبة تعلم الأرقام وحفظها.
5- ضعف التركيز والانتباه
من علامات صعوبات التعلم المشهورة هو ضعف قدرة الطفل على التركيز، وبنستدل عليه من:
- صعوبة اتباع الطفل للتعليمات والتوجيهات اللي بتتقدم ليه.
- قلة التركيز في الحصص الدراسية، وصعوبة حل الواجبات.
- صعوبة تذكر حاجة شافها أو سمعها من لحظات.
- الانشغال السريع عن أي نشاط بيعمله.
- الفوضوية وتقلب المزاج باستمرار.
- الاندفاع والتهور.
6- وجود مشاكل اجتماعية
استكمالًا للإجابة عن سؤال كيف أعرف أن ابني لديه صعوبات تعلم بنلاقي بعض العلامات المتعلقة بالجانب الاجتماعي زي:
- قلة المشاركة في الأنشطة الاجتماعية.
- مشاكل في تفاعل الطفل مع زمايله.
- العزلة، وصعوبة تكوين الصداقات.
7- الارتباك وعدم التنظيم
ودا بيظهر في:
- عدم إدراك الطفل للمحيط المادي من حوله، ودا بيخليه معرض أكتر للحوادث.
- عدم القدرة على تجهيز شنطة المدرسة.
- ضعف القدرة على تعلم مهارات جديدة.
- صعوبة إدارة الوقت، وتنفيذ المهام.
العلامات اللي ذكرناها كلها بتساعد في تشخيص صعوبات التعلم عند الطفل، وهنا التدخل المبكر بيكون ليه دور كبير في تقليل حجم الضرر اللي ممكن يتعرض له، ومن الضروري استشارة المختصين في الحالات اللي زي دي.
هل يعتبر صعوبات التعلم إعاقة؟
ما نقدرش نقول على صعوبات التعلم إنها إعاقة ذهنية، ولكن زي ما وضحنا فوق إنها عبارة عن معوقات بتسبب للطفل صعوبة في استقبال المعلومات، وفهمها بشكل صحيح.
لكن اضطرابات التعلم هي اللي نقدر نقول إنها إعاقة ذهنية بشكل واضح، ودي بتكون حصلت أثناء فترة الحمل أو بعد الولادة مباشرةً، وبالتالي بتتسبب في إعاقة للطفل تخليه غير طبيعي، وبمعدل ذكاء أقل من باقي الأطفال.
وتقدر تعرف معلومات أكتر عن الفرق بينهم من مقال: الفرق بين صعوبات التعلم واضطرابات التعلم.
كيفية التعامل مع الطفل ذي صعوبات التعلم
بعد ما جاوبنا عن سؤال كيف أعرف أن ابني لديه صعوبات التعلم خلينا نقولك إن في مجموعة من النصائح اللي لازم تاخد بالك منها لو طفلك بيعاني من صعوبات التعلم، عشان تقدر تتعامل معاه بشكل صحيح، واللي من أهمها:
- التواصل المستمر مع المعلمين، ومساعدتهم في تطوير مهارات الطفل.
- الاستعانة بالخبراء والمتخصصين في علاج حالة الطفل.
- توفير بيئة داعمة للطفل، والتعامل معاه بصبر شديد.
- تقديم المهام للطفل بشكل تدريجي، وحسب قدراته.
- تجنب الانتقادات السلبية، واستبدالها بالإيجابية.
- الاستماع بعناية لتجارب الطفل ومشاكله.
- التركيز على نقاط قوة الطفل.
الخلاصة
كدا بنكون جاوبنا على سؤال “كيف أعرف أن ابني لديه صعوبات تعلم؟”، وبنلاقي إن أهمية الكشف المبكر عن صعوبات التعلم بتكمن في قوتنا كأولياء أمور ومعلمين لتحويل التحديات إلى فرص للتعلم والنمو.
ولما بنكون على استعداد للاستماع وتقديم الدعم، بنقدر نساعد الطفل عشان يبقى نسخة أفضل من نفسه.
دا غير إن الفهم العميق لعلامات وأعراض صعوبات التعلم بيمهد الطريق للتحفيز الإيجابي، ومن خلال التعاون المستمر بين الأهل والمعلمين والمحترفين في المجال، نقدر نكوّن فريق قوي يشتغل على إظهار أقصى إمكانيات الطفل.
أضف تعليق