في العصر الحالي انتشرت عوامل التشتت بشكل كبير جدًا، وأصبح من الصعب على أطفالنا التركيز على شيء واحد لفترة طويلة، خاصةً لو كانوا معتادين على استخدام الأجهزة الإلكترونية بشكل متكرر.
عدم التركيز والتشتت بيضيع على أطفالنا كتير من فرص التعلم، وبيأخرهم عن مواكبة زملائهم في الفصل، وبالتالي بيسبب لهم مشاكل كبيرة على المدى الطويل.
ولإن اللعب هو الوسيلة الأفضل لتعليم الطفل وبناء عاداته، وتنمية مهاراته، هنشارك معاك في المقال أبرز 8 ألعاب لزيادة التركيز عند الأطفال.
لكن الأول خلينا نعرف إيه هو المعدل الطبيعي لتركيز الطفل؟
معدل انتباه الطفل – Attention Span
المقصود بمعدل انتباه الطفل هو المدة اللي يقدر يركز خلالها على مهمة محددة، وكل ما كان معدل الانتباه دا أكبر؛ زادت فرص الطفل في التفوق، والتحصيل الدراسي.
والطفل بيحتاج للتركيز بشكل متكرر على مهام مختلفة خلال اليوم الدراسي، عشان كدا مهم تراقب مدى تركيز طفلك خلال سنوات ما قبل المدرسة، وتتأكد من إنه بيتزايد تدريجيًا مع الوقت، ولو لاحظت أي مشكلة حاول تعالجها في وقت مبكر، لإن فرصتك في معالجتها هتكون أكبر وقتها.
فوفقاً لدراسة انتشرت في مجلة Springer بنلاقي إن انتباه الطفل المستمر بيتطور بطريقة خطية لحد سن 4 سنوات، وبعدها بيزيد بشكل كبير ما بين 4 – 6 سنوات.
و بيرجع يستقر ما بين 7 – 8 سنوات مقارنةً بالأطفال الأكبر في السن، ودي الفترة اللي ممكن يظهر فيها مشاكل اضطرابات الانتباه زي ADHD، لإن واحد من معايير التشخيص هو إن بعض الأعراض لازم تكون موجودة قبل ما الطفل يوصل لـ 7 سنين.
أما في سن 9 – 11 سنة بيتزايد مرة تانية ولكن بشكل أقل كفاءة من البالغين، وبيتحسن تدريجياً حتى سن 16 سنة، والتطورات دي كلها بترتبط بتطور الفص الجبهي للدماغ.
كمان بنلاقي إن متوسط انتباه الطفل بيتراوح بين 2 إلى 3 دقائق تقريبًا لكل عام من عمره لحد 4 سنوات، على سبيل المثال:
- لو عمر الطفل 3 سنوات فمعدل انتباهه الطبيعي هيكون من 6 إلى 9 دقائق تقريبًا
- لو عمره 4 سنوات فهيكون معدل انتباهه من 8 إلى 12 دقيقة.
فوائد استخدام ألعاب لزيادة التركيز عند الأطفال
ودلوقتي هنتكلم عن أهمية اللعب لتنمية مهارة طفلك وزيادة تركيزه وذكائه، من خلال استخدام اللعبة المناسبة ليه، وأهمها:
تحسين قدراته المعرفية
بيعتمد حل بعض الألعاب على الحصيلة المعرفية للطفل، وفي الحالة دي الإجابة الصحيحة هتثبت المعلومات أكتر في ذهن الطفل، والإجابة الخاطئة وتصحيحها هيزود معلوماته، وبالتالي قدراته المعرفية هتتحسن بمرور الوقت.
تقدر تقرأ: طرق وأساليب تنمية مهارات الأطفال 5 سنوات.
تعزيز الذاكرة العاملة
بيقوم حل بعض ألعاب زيادة التركيز عند الأطفال على استدعاء الطفل لمعلومات، أو أشكال، أو أحداث اتعرض لها على المدى القصير، وبالتالي بتعزز الذاكرة العاملة أو قصيرة المدى عنده، وبتنمي قدراته الذهنية.
التقليل من أعراض ADHD
ألعاب العقل والتركيز بتقلل من أعراض تشتت الانتباه عند الأطفال، وبتزود مدى تركيزهم، وانتباههم لمدة أطول، وبتساعدهم على الإحساس بالهدوء، والاسترخاء، والشعور بالإنجاز.
لكن مش أي لعبة هتقدم الفوايد دي لطفلك، عشان كدا مهم تختار ألعاب زيادة التركيز عند الأطفال بعناية حسب احتياجات طفلك وميوله.
ألعاب لزيادة التركيز عند الأطفال
في مجموعة كبيرة جدًا من الألعاب اللي بتساعد على زيادة تركيز الطفل، وأبرزها:
ألعاب الألغاز – Puzzle
ألعاب الـ Puzzle مفيدة جدًا لنمو عقل طفلك، وزيادة تطوره المعرفي، بالإضافة لتطوير المهارات الحركية الدقيقة عنده، لإنها بتحسن التنسيق بين اليد والعين، وبتعتمد على التفكير بطريقة منطقية لحلها، وبتحسن الذاكرة، والتركيز، ومدى الانتباه عند الطفل.
دا غير إنك ممكن تستخدمها كوسيلة تعليمية لزيادة التحصيل الدراسي عند طفلك، على سبيل المثال ممكن تستخدمها في مواد زي:
- الجغرافيا، من خلال لعبة بازل لتجميع بعض الأنهار أو الغابات الشهيرة.
- التاريخ، عن طريق شراء بازل لمباني أثرية وتجمعها مع طفلك.
كل اللي أنت محتاجه هو تحديد هدفك من اللعبة؛ تعليمي ولا ترفيهي، واختيار اللعبة المناسبة.
الأنشطة المحددة بوقت
بتعد أحد أبرز الألعاب لزيادة التركيز عند الأطفال، وفكرتها قائمة على طلب مهمة معينة من الطفل ينفذها خلال وقت محدد، على سبيل المثال:
عن طريق وضع عدد من البطاقات مختلفة الألوان، والطلب من الطفل تجميع البطاقات اللي لونها أحمر فقط خلال 30 ثانية، أو تكليف الطفل بكتابة 10 كلمات بتبدأ بحرف الألف خلال دقيقة.
الألعاب دي مش بس من أهم ألعاب التركيز عند الأطفال؛ دي كمان ألعاب تحفيزية جدًا ليه لارتباطها بالإنجاز والتحدي، بالإضافة إلى إنها بتعلمه فهم وإدارة الوقت واحترامه.
أنشطة ترتيب التسلسل
أي قصة أو حدث أو نتيجة بنوصلها بيبقى لها تسلسل تدريجي، حتى الأمور الروتينية والأحداث الطبيعية، زي: تعاقب الليل والنهار، وتغير فصول السنة، وغيرهم.
وبنلاقي إن نشاط ترتيب التسلسل بيعتمد على توظيف الفكرة دي لتنشيط عقل الطفل، وتنمية مهارات التفكير عنده، عشان كدا لازم نذكرها ضمن قائمة ألعاب لزيادة التركيز عند الأطفال، ودا ممكن يتنفذ عن طريق:
- كتابة أحداث قصة بشكل متفرق في أكتر من بطاقة، وتكليف الطفل بترتيب أحداثها.
- تكليف الطفل بشرح تسلسل روتينه اليومي منذ الاستيقاظ وحتى النوم.
- سؤال الطفل عن تسلسل أيام الأسبوع.
اقرأ أيضاً: أنشطة وألعاب ذكاء للأطفال في البيت من عمر 1 إلى 15 سنة.
أنشطة البناء
تعد أنشطة البناء واحدة من أسهل الألعاب لزيادة التركيز عند الأطفال وأكترها شعبية، وفكرتها قائمة على بناء الطفل للمجسمات بأي وسيلة متاحة، زي:
- المجسمات الخشبية
- أوراق الكرتون
- المكعبات
- الرمال
والنشاط بينمي مهارة التركيز عند الطفل، وبيزود عنده الإبداع، لإن الطفل بيصنع مجسم كامل من البداية، وبيحط ليه التصورات داخل عقله قبل ما يبدأ مرحلة البناء، وممكن الطفل يمارسه بشكل جماعي، ودا بينمي من مهارات التعاون، والعمل الجماعي عند الأطفال.
كمان ألعاب البناء بتحسن أعراض اضطراب فرط الحركة وتشتت الانتباه، فتبعًا للدراسة اللي اتنشرت على بوابة المجلات العلمية والمهنية الكرواتية لقوا إن بعد 8 أسابيع من استخدام ألعاب البناء مع مجموعة من الأطفال كانت درجات الأعراض أقل مقارنة بباقي الأطفال اللي أجروا عليهم الدراسة.
ودا بسبب إن ألعاب البناء بتتطلب التركيز، والملاحظة، ودا طبعُا يساعد على تحسين الانتباه.
ألعاب الذاكرة
ألعاب الذاكرة تعد من أفضل الألعاب لزيادة التركيز عند الأطفال، وأكترها فعالية، وفكرتها قائمة على عرض شكل معين أمام الطفل لمدة ثواني معدودة، وبعدين إخفاء الصورة أو الشكل، وسؤال الطفل عن بعض التفاصيل فيه.
على سبيل المثال:
- عرض لوحة لحيوانات الغابة، وبعدين إخفائها، وسؤال الطفل عن مكان الفيل داخل اللوحة.
- استخدام مكعب متعدد الألوان، وسؤال الطفل: هل اللون الأصفر كان موجود ضمن الألوان؟
دي مراحل بسيطة من لعبة الذاكرة، وممكن نستخدم أشكال أكتر تعقيدًا، ونسأل على تفاصيل دقيقة أكتر، ودا بناءً على عمر الطفل وقدراته الذهنية.
لعبة الشطرنج
هي واحدة من أقدم وأفضل الألعاب لزيادة التركيز عند الأطفال، وتطوير المهارات العقلية عندهم، ودا لإنها قائمة على التفكير الاستراتيجي، والتخطيط، والقدرة على توقع تحركات الخصم، واتخاذ فعل استباقي للتغلب عليه.
لعبة الشطرنج مش بس هتطور مهارات التركيز عند طفلك؛ لكنها هتساعده في تطوير مهارات حياتية أخرى، زي:
- الروح الرياضية، لإن أحد الأطراف بيفوز والتاني بيخسر، وبالتالي هيتعلم التصرف الصح في حالة الفوز أو الخسارة.
- التعاون، ودا لإنها لعبة جماعية ما ينفعش الطفل يلعبها لوحده.
لعبة X & O
واحدة من أفضل الألعاب لزيادة التركيز عند الأطفال، ودا لإنها بتعد من الألعاب الاستراتيجية اللي بتتطلب من الطفل التركيز على مكانه الحالي، والتفكير، والتخطيط لتحركاته اللي هياخدها في المستقبل.
وهي مشابهة للعبة الشطرنج في النقطة دي، لكنها أسهل وأبسط منها.
كمان اللعبة تصنف جماعية، وما ينفعش الطفل يلعبها لوحده، وبالتالي بتنمي عنده روح التعاون، واللعب الجماعي، وبتزيد من مهاراته الاجتماعية ودائرة صداقاته.
الكلمات المتقاطعة
بتعد الكلمات المتقاطعة من أهم الألعاب لزيادة التركيز عند الأطفال، بالإضافة إلى إنها بتساعده ينمي مهاراته اللغوية.
اللعبة بتتكون من عدد من الصفوف البيضاء والسوداء، مع وجود لغز لكل صف منهم، وعشان تنهي اللعبة لازم تحل جميع الألغاز.
الألغاز دي بتنشط دماغ الطفل، وبتنمي حصيلته اللغوية، وبتزود معارفه ومعلوماته.
واللعبة يمكن لعبها بشكل جماعي أو فردي، وليها مستويات مختلفة، وتقدر تختار لطفلك المستوى اللي يناسب سنه وقدراته.
رواية القصص
من أهم الألعاب لزيادة التركيز عند الأطفال، وهي لعبة سهلة؛ مشاركة الطفل فيها بيساعده على الانتباه والتركيز، عشان يقدر يكمل، واللي بينسى عنصر أو مابيكونش مركز بيطلع من الدور.
وبتبدأ بإن شخص بيقول جملة زي “النهارده الصبح روحت المدرسة الساعة 8”، والشخص اللي بعده يكمل بجملة كإنها تسلسل وهكذا.
تقليد الصور
من الألعاب السهلة والمفيدة لتنشيط الذاكرة والانتباه، وبتكون عبارة عن إننا بنوري الطفل صورة يركز فيها، وبعد كدا بنطلب منه يقلدها بأغلب التفاصيل اللي فاكرها.
الرسم هيحفز جزء الذاكرة التصويرية عنده، وتكرار اللعبة هيخليه ينتبه أكتر، وتركيزه هيتحسن بمرور الوقت.
بعد ما ذكرنا أبرز 10 ألعاب لزيادة التركيز عند الأطفال يمكن تنفيذهم في البيت، هنعرض لك أهم النصايح لزيادة التركيز عند الأطفال.
اقرأ أيضاً: ألعاب ذكاء للأطفال 9 سنوات فقط.
نصائح مهمة لزيادة التركيز عند الأطفال
ودلوقتي هنقدملك بعض النصايح اللي هتضمن لك تركيز أفضل لأطفالك:
ممارسة الرياضة
الرياضة مهمة جداً لزيادة التركيز عند الأطفال، لإنها بتزيد من كمية الأكسجين لكل أجزاء الجسم المختلفة، وأولها دماغ الطفل، وبالتالي بتحسن تركيز الطفل.
التغذية السليمة
من خلال الحفاظ على نظام غذائي صحي، وتناول الأطعمة الغنية بالأوميجا 3 والأحماض الدهنية؛ زي: الأسماك الدهنية، والمكسرات، والفواكه، والخضروات؛ لزيادة التركيز والانتباه عند الأطفال.
تنمية مهارات الطفل
الاهتمام بتنمية مهارات الطفل المختلفة من سن صغير بتساهم في زيادة تركيزه، بالإضافة لاختيار ألعاب لزيادة التركيز عند الأطفال تناسب كل مرحلة عمرية للطفل.
تقليل مصادر التشتت
تقليل وقت تعرض الطفل لشاشات الموبايل والكمبيوتر قدر الإمكان، وخاصةً وقت القيام بالواجب المدرسي والمذاكرة، وعدم الرد على الرسائل النصية أو متابعة مواقع التواصل الاجتماعي؛ لإن ده بيقلل الانتباه والتركيز، والأفضل تحديد مدة زمنية لها.
ومن الحيل الإيجابية كمان هي تحديد ساعة معينة للمذاكرة، ودا لإن العقل بيحفظ الوقت وبيستعد للدراسة.
النوم الجيد
النوم ليلاً واحد من العوامل الأساسية للتركيز والانتباه عند الطفل، فمهم يكون معدل نوم الطفل يومياً من 8 – 9 ساعات ليلاً، والبعد قدر المستطاع عن السهر.
في النهاية، اللعب هو وظيفة الطفل الأولى، وهو الوسيلة الأفضل لتعليمه وتنمية مهاراته لو استغلناه صح!
ساعد طفلك على التخلص من التشتت وعدم التركيز الناتجين عن التكنولوجيا، وقلل من أوقات التعرض للشاشات، واستبدلها باستخدام الألعاب لزيادة التركيز عند الأطفال.
المصادر
Fun Activities to Improve Attention and Concentration in Toddlers
أضف تعليق