عيوب مدارس ستيم 2024-2025

مدارس ستيم بتهتم بتطوير مهارات طلابها في مجالات العلوم، والتكنولوجيا، والهندسة، والرياضيات، عشان يقدروا يواكبوا وظايف المستقبل. 

بس زي ما بيقول المثل المشهور “مفيش ورد من غير شوك”، فبرضو مفيش أي شيء كامل من غير عيوب، وعشان كدا هنتكلم في المقال دا عن عيوب مدارس ستيم، لكن الأول هنتعرف على نظام الدراسة فيها، والفرق بينها وبين مدارس زويل، وأخيرًا هنتكلم عن نسبة النجاح فيها. 

نبذة عن مدارس ستيم “STEM“

قبل ما نتكلم عن عيوب مدارس ستيم، فلازم الأول نعرف شوية معلومات مهمة عنها، زي إنها واحدة من أهم المدارس المصرية اللي بتهتم بالمتفوقين في مجالات العلوم، والتكنولوجيا، وإن اسم ستيم “STEM” هو اختصار لـ : 

• Science. 
• Technology. 
• Engineering. 
• Mathematics. 

المدرسة دي أُنشئت بواسطة وزارة التربية والتعليم المصرية، وبدعم من الوكالة الأمريكية للتنمية الدولية،  بهدف ضم الطلاب المتفوقين من خريجي الشهادة الإعدادية فيها، والمدرسة بدورها بتشتغل على تنمية وتحسين قدرات الطلبة دي بشكل كبير، وتطوير مهاراتهم، وتشجيعهم على التميز، والإبداع. 

تاريخ مدارس ستيم

بدأت التجربة الأولى في سنة 2011م بمدرسة 6 أكتوبر الموجودة في محافظة الجيزة، ثم بعدها مدرسة المتفوقات اللي في المعادي ودا كان سنة 2012م، ومع الوقت بدأت تظهر مميزات وعيوب مدارس ستيم بالتدريج. 

بحسب تصريحات الوزارة فحاليًا في 22 مدرسة من مدارس ستيم للمتفوقين في مختلف محافظات مصر، جاهزين لاستقبال الطلبة فيهم، وشغالين على إنشاء عدد أكبر من النوع دا من المدارس مستقبلًا. 

اعرف كمان عن: شروط مدارس ستيم للتقديم عام 2024-2025. 

نظام الدراسة في مدارس ستيم

قولنا من شوية إن المدرسة مُخصصة للمتفوقين والمتفوقات، وبالتالي طبيعي يكون نظام الدراسة مختلف عن أي مدرسة تانية، بشكل بيكون صعب على أي طالب غير متفوق، وبالتالي ما بيقدرش يدخلها لأنه هيعاني جدًا من صعوبتها، ودي حاجة ممكن نعتبرها واحدة من عيوب مدارس ستيم. 

ونظام الدراسة في المدارس دي بيكون كالتالي: 

1- التدريس باللغة الإنجليزية

لو ابنك كان طالب في مدرسة حكومية أو تجريبية، ومتعود على نظام التدريس باللغة العربية، فغالبًا الموضوع هياخد منه شوية وقت عشان يتعود على نظام الدراسة الجديد.

لكن لو كان بيدرس في مدارس لغات، يبقى الموضوع هيكون بسيط بالنسباله، لأنه متعود على كدا من الأول. 

اقرأ أيضًا: ما هي مناهج مدارس STEM في مصر؟ 

2- الاعتماد على التعليم الذاتي عبر الإنترنت – Self learning

مدارس ستيم مش زي باقي المدارس التقليدية العادية، فهي مش بتوزع على الطلاب كتب مدرسية يدرسوا منها، ولكنها بتعود الطالب يعتمد على نفسه بشكل كبير في الفهم، من غير ما ينتظر شرح المعلم في كل مرة. 

وعملية التعلم الذاتي دي بتتم بسهولة عن طريق الاستعانة بالإنترنت وبـ جوجل، أو من خلال المكتبات الإلكترونية العالمية. 

بعد كدا كل طالب بيعرض المعلومات اللي وصلها على المعلم الخاص بيه، وبيحصل نقاش بين المعلمين والطلاب لتوجيههم. 

صحيح الطريقة دي تبان مٌتعبة، بس هي مفيدة جدًا في تثبيت المعلومات بشكل أفضل، وعشان كدا في ناس بتشوفها ميزة، لكن ناس تانية بتشوفها أحد عيوب مدارس ستيم اللي بتصعّب الدراسة فيها. 

3- إلزام الطلاب بالانضمام إلى فريق عمل “Team work”

دي حاجة مفيدة جدًا لكل طلبة المدرسة، لإنها بتنمي من مهاراتهم الاجتماعية، فكل طالب مُلزم بدخول فريق مكون من 4 أو 5 أفراد حسب عدد طلاب الفصل، وأثناء الحصة كل فريق بيشرح لزمايله جزء معين، ولو غلطوا أو نسوا أي معلومة فساعتها المعلم بيصححلهم. 

4- المدرسة داخلية

المدرسة فيها مباني مُخصصة لسكن الطلاب، وفيها كمان مطاعم للأكل، وكل احتياجات الطلبة اليومية متوفرة. 

بيبدأ اليوم في حدود الساعة السابعة صباحًا، وبينتهي الساعة الثالثة أو الرابعة عصرًا، دا غير إن المدرسة بتوفر باصات لتوصيل الطلاب في أيام الإجازة. 

عيوب مدارس ستيم

زي أي مدرسة في أي مكان في العالم، هنلاقي إن ليها عيوب ممكن تسبب مشاكل كتيرة للطلاب، ولازم يشتغلوا على حلها في أقرب فرصة، لأنها من مطالب أولياء الأمور نفسهم، وبتتلخص عيوب مدارس ستيم في: 

1- اعتماد تنسيق الجامعات على نظام النسبة المرنة

مدراس STEM مش بتخضع لتنسيق الثانوية العامة بشكل كامل، بمعنى إن كل سنة بيتم توفير عدد مقاعد محدودة جدًا لطلبة STEM في الكليات المصرية؛ لإن عددهم أقل بكتير من عدد خريجي الثانوية العامة. 

وبكدا بتكون فرصة التحاق خريجي الثانوية العامة بالكليات الطبية والعلمية أكبر من فرصة خريجي STEM. 

2- الرسوب المتكرر اللي بيعاني منه بعض الطلبة

الرسوب المتكرر هو أحد أبرز عيوب مدارس ستيم، وهنا بيظهر سؤال مهم، ازاي مدرسة بتضم عدد كبير من الطلاب المتفوقين، وتبلغ نسبة الرسوب فيها 44%؟! 

وطبعًا دي حاجة دفعت الطلاب لعمل التظلمات، وطلب إعادة التصحيح، وعتاب أولياء الأمور لإدارة المدرسة، وسؤالهم لحل المشكلة دي، لإنها بتخوف الطلبة وأولياء أمورهم من الالتحاق بالمدارس دي. 

3- صعوبة تحويل الطالب لنظام تعليمي آخر

بعض الطلبة مش بتقدر تتأقلم على نظام ستيم بسهولة، ودا بيخليهم يفكروا في التحويل منها لمدراس الثانوية العامة. 

مدراس STEM بتتيح فرصة التحويل بالفعل، لكنها بتجبر أولياء الأمور على سداد رسوم إقامة الطالب خلال فترة الدراسة اللي قضاها فيها، والرسوم دي بتكون كبيرة، وبالتالي دي حاجة ممكن تصعّب من عملية التحويل. 

طبعًا كل العيوب اللي اتكلمنا فيها دي ممكن تتسبب في مشاكل كتير لمدارس ستيم، وبالتالي الإدارة مٌطالبة بسرعة تحسين العيوب دي. 

4- وقوع الطلاب تحت ضغط نفسي غير مُحتمل

كمان من عيوب مدارس ستيم المشهورة إنها بتضغط على نفسية الطلبة اللي بيدرسوا فيها بشكل كبير، ودا نتيجة زيادة المهام والأنشطة المطلوبة منه خلال الفصل الدراسي. 

وبجانب الأنشطة دي بيكون مطلوب منه يجيب درجة كبيرة في نهاية السنة، عشان يقدر يلتحق بالكلية اللي حابب يكمل فيها، في ظل تطبيق النسبة المرنة، ولو مقدرش يتأقلم على النظام الصعب دا، يبقى ملوش مكان في مدارس ستيم وهيضطر يحول منها. 

5- عدم توفير كتب مدرسية

مدارس STEM بتكتفي بتوفير لابتوب خاص لكل طالب يساعده على عمل الأبحاث المطلوبة منه، ومش بتوفرله كتب مدرسية زي ما قولنا من شوية. 

ولإن جزء كبير من الطلاب مش بيقدروا يتعلموا بالطريقة دي، وبيفضلوا وجود المعلومات المطلوب دراستها في الكتب، فبيعتبروا النقطة دي أحد عيوب مدارس ستيم.

الفرق بين مدارس ستيم وزويل

في الوقت الحالي مفيش حاجة اسمها مدارس زويل، لكنه اسم منتشر على مدارس المتفوقين “STEM”، واللي قولنا إنها اختصار لـ Science, Technology, Engineering and Mathematics. 

وتقدر تعرف أكتر عن النقطة دي من خلال مقال: 7 أسئلة يجب أن تعرفها عن مدرسة زويل للمتفوقين. 

نسبة نجاح مدارس ستيم

قبل كدا في سنة 2018م حصلت مشكلة كبيرة في نسبة النجاح في مدارس ستيم زي ما قولنا، ووقتها وصلت لحوالي 60% بس، ودا رقم قليل جدًا على مدرسة مليانة بالطلبة المتفوقين، وبالتالي الطلاب وأولياء أمورهم كانوا متضايقين، ودا دفعهم للشكاوى والتظلمات. 

وبالفعل الشكاوى دي جابت نتيجة كويسة في السنة اللي بعدها، وارتفعت نسبة النجاح ساعتها لرقم غير مسبوق وهو 99.6%، ودي حاجة قللت من قلق الطلاب، وحفزت طلبة كتير للتقديم فيها من تاني. 

الخلاصة 

عيوب مدارس ستيم بتنقسم لعدد من النقاط اللي ممكن تتعرض لها في أي مدرسة تانية، زي مثلًا إن الدراسة بالكامل باللغة الإنجليزية، لكن بمرور أول شهر أو اتنين بيتعود الطالب على دا، وبيقدر بتأقلم معاه. 

لكن الحاجة اللي فعلًا صعب التأقلم معاها هي تعرض الطلاب لضغط نفسي كبير خلال فترة الدراسة، بسبب إن المدرسة داخلية واهتمامها بحياة الطلاب الاجتماعية خارج إطار التعليم بيكون قليل، ودي حاجة ممكن تأثر بالسلب عليهم طبعاً 

لكن في النهاية المدرسة بتهتم بمجالات مهمة زي العلوم، والتكنولوجيا، والهندسة، والرياضيات، ودي كلها مجالات بتعتمد عليها مهن المستقبل، فلازم تفكر كويس وتحدد قدرات ابنك، عشان تعرف تساعده يختار الأنسب ليه.