مدرسة زويل للمتفوقين (س و ج) | 7 أسئلة يجب أن تعرفها

من أنواع المدارس المميزة في مصر واللي بتكون متاحة للطالب خريج المرحلة الإعدادية هي “مدارس المتفوقين”  المعروفة سابقا باسم “مدرسة زويل للمتفوقين” وهي من الأنواع اللي بيوفرها نظام التعليم المصري، وهنتكلم عن التفاصيل الخاصة بيها في المقال دا.

1. ما هي مدرسة زويل للمتفوقين

هي مدارس تابعة لإشراف وتوجيه وزارة التربية والتعليم بيتوفر منها 11 مدرسة قائمة بالفعل على مستوى الجمهورية.

انتشر إن الاسم الأساسي ليها هو مدرسة زويل للمتفوقين لكن مش دا مسماها الحقيقي ولكن بيطلق عليها مدارس المتفوقين في العلوم والتكنولوجيا STEM “Science Technology Engineering Mathematics” ومش تابعة لمدينة زويل للعلوم والتكنولوجيا إنما هي تابعة لوزارة التربية والتعليم.

هدف المدارس تقديم أسلوب تعليمي مختلف يطلع طالب بعقلية واعية مختلفة بعد ما بيخلص المرحلة الإعدادية وينتقل للمرحلة الثانوية هتتيح ليه المدرسة التوسع في مجالات العلوم المختلفة.

بتعتمد الدراسة في مدارس المتفوقين على اللغة الإنجليزية بشكل أساسي وهي اللغة اللي الطالب بيدرس بيها كل المواد بتاعته.

المدرسة مش مجرد دراسة وبس لكنها عبارة عن نظام حياة متكاملة، لإن الطالب بيدرس وبيكون ليه إقامة تابعة للمدرسة في أيام الدراسة.

النظام المتبع في المدرسة هو النظام الأمريكي اللي مبني على البحث العلمي وإن الطالب بيكون عبارة عن باحث وجامع للمعلومة ومش محدد بنطاق أو منهج معين مجرد موضوعات أساسية بيبحث فيها ويستكشفها بنفسه وبعد ما بينتهي من البحث بيبدأ يشارك مع زملائه والمعلم اللي وصله ولو في جزء مش واضح أو محتاج تعديل المعلم بيوجهه وبيصحح له، وتقييمه بيكون جزء على capstone كابستون” مشروع الطالب مطالب بيه”
وجزء على المواد اللي بيدرسها
وجزء على الحضور والغياب والسلوك
وبتختلف تقسيم النسب على الأجزاء حسب السنة الدراسية.

بيدفع الطالب رسوم مقابل دراسته في المدرسة بتوصل لألف جنية تقريبًا، بالإضافة لرسوم تأمين ألفين جنية تقريبًا على الاب توب اللي بيستلمه الطالب عشان يكون معاه في فترة دراسته.

مدارس زويل للمتفوقين مش متاحة لكل الطالب ليها شروط محددة لو توفرت في الطالب هيكون متاح ليه دخولها.

2. ما هي شروط الالتحاق بمدرسة زويل للمتفوقين؟

من أهم الشروط اللي لازم تتوفر عشان يلتحق الطالب بمدرسة زويل للمتفوقين ومدارس STEM:

١- السن

لازم يكون عمر الطالب أقل من ١٨ سنة.

٢- مجموع الطالب

لازم يكون المجموع اللي حصل عليه الطالب مش أقل من ٢٤٧.٥ اللي بتعادل بالنسبة المئوية ٩٨٪ ، وكمان بيشترط إن الطالب يكون جايب الدرجة النهائية في أي مادة من المواد دي : العلوم، الرياضيات، اللغة الإنجليزية.

أما لو كان المجموع الكلي للطالب ٢٦٦ واللي بيعادل ٩٥٪ فلازم يكون جايب الدرجة النهائية على الأقل في مادة من الـ ٣ مواد : العلوم، الرياضيات، اللغة الإنجليزية.

٣- الشهادة

لازم يكون حاصل على شهادة إتمام لمرحلة التعليم الأساسي في الدور الأول للعام اللي هيقدم فيه.

٤- الكشف الطبي

بيمر الطالب بكشف طبي في التأمين الصحي في الإدارة التابع ليها.

٥- اختبارات القبول

بيمر الطالب كمان باختبارات متنوعة ومتعددة زي اختبارات الذكاء والحفظ واللغة عشان يقيس قدرات الطالب.
وبيكون في رسوم تقريبًا ١٥٠ جنية عشان الطالب يقدر يدخل الامتحان ويلتحق بمدرسة زويل للمتفوقين وبيتسدد المبلغ عن طريق البنك ومش متاح الدفع من خلال الحوالات البريدية.

3. كيفية عمل نظام الدراسة في مدرسة زويل للمتفوقين (مدارس STEM)؟

بيختلف نظام الدراسة في مدارس المتفوقين عن غيرها من المدراس، وأهم ملامح الاختلاف بتظهر في:

1- بتضم المرحلة الثانوية فقط واللي متاح يدخلها فئة الطلاب اللي مهتمة بالمجال العلمي بس سواء علمي علوم أو علمي رياضة.

2- نظام التعليم بيعتمد على البحث والتطبيق بدرجة أولى، ومفيش كتب ومناهج محددة الطالب بيدرس منها بيكون اعتماده على البحث على الإنترنت والمراجع العلمية المختلفة، وفي معامل مختلفة هشان يقدر الطالب يجرب ويطبق بنفسه.

3- المعلم هو الموجه بس في العملية التعليمية دوره يوجه الطالب ويمشي معاه خطواته في بداية دراسته لحد ما يتعود على النظام وبعد كده بيك ن دوره مقتصر على الإشراف والتصحيح لو في معلومة غلط او توضيح معلومة مش واضحة بشكل كافي للطالب.

4- الطالب بيقيم طول أيام الدراسة في المدرسة فبيكون يومه كله وجدوله مترتب وبنظام محدد.
5- هيتنمى عند الطالب فكرة العمل الجماعي والتعاون ما بين الطلاب لإن شرح وتوضيح المنهج بيكون معتمد على الطلبة نفسهم فكل طالب بيكون مخصص ليه جزء بيشرحه ويوضحه لزمايله.

4. ما هي مواد مدرسة زويل للمتفوقين (STEM)؟

طالب مدرسة زويل للمتفوقين ومدارس STEM بيدرس خليط من مواد الثانوي العام بالإضافة لمواد تانية ودراسته كاملة بتكون بالإنجليزي ما عدا العربي والدراسات الاجتماعية والدين.
المواد اللي بيدرسها الطلاب:

1- اللغة العربية
2- اللغة الإنجليزية
3- لغة ثانية: بتكون إما ألماني أو فرنساوي بس
4- مادة الفيزياء
5- مادة الأحياء
6- مادة الكيمياء
7- مادة رياضيات
8- مادة الجيولوجيا
9- مادة دراسات اجتماعية
10- ميكانيكا
11- تكنولوجيا المعلومات It

الطالب مش مجرد بيكتفي إنه يبحث في المواد دي يتعلم ويتوسع فيه لكنه كمان بيكون مطالب إنه يسلم capstone.
هو عبارة عن مشروع الطالب بيسلمه وبيكون عليه 60٪ من المجموع الكلي في سنة أولى وتانية أما في سنة تالتة فبيكون عليه 20٪ بس، بيتسلم المشروع باللغة الإنجليزية.

بيتم تقسيم الطلبة إلى مجموعات كل مجموعة بتضم تقريبًا 4 أشخاص وبيشتغلوا بشكل جماعي.

بيكون في مشرف على المجموعة بيساعدهم، بيتحدد موضوع معين المدرسة كاملة بتشتغل عليه، وخلال فترة الدراسة بيكون في تقييم عبارة عن أربعة أسئلة تقريبًا في المشروع اللي شغال عليه الطالب عشان يقيس إذا فعلًا الطالب شغال بشكل كويس ولا لأ.

في النهاية بيسلم الطالب poster و prototype هو الفريق بتاعه وفي تفاصيل كامله عن المشروع اللي كانوا شغالين عليه.

5. هل مدرسة زويل للمتفوقين معترف بها من المجلس الأعلى للجامعات؟

بتعتبر مدرسة زويل للمتفوقين ومدارس STEM تابعة لوزارة التربية والتعليم إلا إن التعامل مع الخريجين من المدراس دي بيختلف عن خريجين مدارس الثانوية العامة الحكومية، بيتم الاعتماد في تنسيق القبول الجامعي لطلاب مدارس المتفوقين على ما يعرف بالنسبة المرنة.

النسبة المرنة هي عبارة عن قسمة عدد الطلاب الناجحين في المدارس دي على عدد طلاب الثانوية العامة اللي دخلوا الكليات العلمية (الطب البشري، وطب الأسنان، والصيدلة، والهندسة، وحاسبات ومعلومات، العلوم)، فهنلاقي العدد الأكبر لطلبة مدارس المتفوقين بيدخلوا كلية علوم وبيفقدوا فرص كبيرة جدًا لدخول الكليات التانية، فضلًا عن إن الطالب كمان ممكن يلاقي صعوبة في الحصول على منح عشان يستكمل دراسته بالخارج، الأمر اللي خلى الطلبة وأولياء الأمور يظهروا اعتراضات واحتجاجات كبيرة ومناشدات وصلت لرئيسة الجمهورية عشان يلاقي حل يناسب الطلبة ويقدروا يحققوا رغباتهم ويكملوا في المجال اللي نفسهم فيه وميتظلموش بدخول كلية تانية مش حابين مجالها.

ظهر أثر الاعتراضات وبالفعل تم التوجيه والبدء في بناء 4 جامعات للعلوم والتكنولوجيا تخص طلاب المدارس المتفوقين عشان الطالب بعد ما يتخرج من مدرسته يقدر يلاقي مكان في الجامعة على حسب المجال اللي بيفضله ويحب يكمل فيه.

6. هل تقدم مدرسة زويل للمتفوقين (STEM) مميزات عن الثانوية العامة؟

بعد المرحلة الإعدادية وأول ما بيختار الطالب نوع المدرسة اللي هيكمل فيها مرحلة الثانوية العامة بتظهر الفروقات الكبيرة والوساعة بين أنواع المدارس، وعلى الرغم من التشابه الكبير بين مدارس الثانوية العامة الحكومية ومدارس المتفوقين وخصوصًا بعد التعديلات الجديدة اللي بتطرأ على منظومة التعليم، وعلى الرغم كمان إننا هنلاقي طالب مدارس المتفوقين ريدرس بعض مواد الثانوية العامة إلا إن مازال في اختلاف واضح بيظهر في أمور منها:

أسلوب التعليم

بيعتمد أسلوب التعليم في مدارس المتفوقين على نظام أمريكي اللي بيخلي الطالب هو حجر الأساس في التعليم وبيسمح له بفرص واسعة للبحث والاستكشاف وتنمية مهارات الإبداع وتنمية عقلية التفكير وتقديم الحلول من خلال المشاريع الفعلية اللي بيشتغل عليها الطالب وبيتم تفعيل المعامل في مواد مختلفة عشان يبحث الطالب بنفسه ويجرب بإيده بالتالي المعلومة عنده تكون متوثقة وفي نفس الوقت ثابتة.

الاكتشافات والاختراعات

طلاب مدارس المتفوقين بيكون ليهم فرصة أكبر في الاكتشاف والاختراع بسبب التسهيلات اللي بتقدم ليهم وممكن يشاركوا في جوائز عالمية ويقدموا اختراعات فعلية يقدر يستفيد منها المجتمع.

الشعبة

متاح للطالب في مدراس المتفوقين يختار بس ما بين شعبة علمي علوم أو شعبة علمي رياضة أم طالب الثانوية العامة فهو قدامه فرصة للاختيار ما بين الشعبة العلمية أو الشعبة الادبية.

التنسيق ودخول الجامعات

وهنا بيظهر تفوق مدارس الثانوي العام على مدارس المتفوقين لإن طالب الثانوي العام بيكون متاح قدامه الكليات بشكل واسع وكبير على عكس طالب مدارس المتفوقين اللي الكليات ليه بتكون محددة جدًا.

7. ما هي عيوب مدرسة زويل للمتفوقين؟

على الرغم من المميزات اللي بتظهر لمدارس المتفوقين إلا إن ليها عيوب واضحة واللي من أهمها:

الضغط

هنلاقي الطالب واقع تحت ضغط عصبي ونفسي كبير جدًا بسبب طبيعة الدراسة والمناهج والمتطلبات اللي المفروض الطالب بيأديها.

نسبة الرسوب عالية

على الرغم من إن المدارس دي خاصة بالمتفوقين والمتميزين دراسيًا إلا إن بيظهر فيها نسبة كبيرة جدًا من الراسبين.

اللغة

دخول مدارس المتفوقين والاستمرار فيها بيتطلب إن الطالب تكون لغته الإنجليزية مستواها عالي عشان يقدر يفهم ويبحث ويقدر يتخطى الامتحانات والمشروع اللي مطلوب منه.

الالتحاق بالجامعات

بيتم التعامل مع خريجين مدرسة زويل للمتفوقين ومدارس STEM بالنسبة المرنة فالبتالي هتلاقي الطالب فقد فرصته لدخول كليات كتير جدًا كانت حلمه وأغلب الطلبة بتدخل كلية علوم.

الحياة الاجتماعية

بيفقد طالب مدرسة زويل للمتفوقين شكل حياته الاجتماعية بشكل عام بسبب ضيق وقته والضغط الكبير اللي بيكون عليه وبيميل أكتر للعزلة عن الناس وهيفقد مهارات اجتماعية مهمة وعلاقات مهمة، لو محاولش الطالب يوازن بين دراسته وحياته الاجتماعية بشكل مقبول وميضرش أي جانب فيهم.

غياب الكفاءات الحقيقة

بتظهر مشكلة واضحة في عدم توفر المعلمين المتمكنين اللي عندهم العلم والخبرة الكافية واللي فعلًا يقدروا يساعدوا ويوجهوا الطالب خلال رحلته التعليمية.

غموض المستقبل

عدد كبير من أولياء الأمور شايفين إن مدرسة زويل للمتفوقين (مدارس STEM) لمتفوقين ملهاش خطط واضحة وبتعتبر مستقبل مجهول، مفيش نظام لتطوير أو آليات تقدر ترفع من مستوى المدارس دي أكتر وتحافظ على استمراريتها، وبالتالي هيكون مستقبل أولادهم مرتبط بالمجهول.

مدرسة زويل للمتفوقين مينفعش الطالب يدخلها لمجرد الشكل والاسم بس؛ لإن المدرسة محتاجة مجهود كبير جدًا وبيكون فيها ضغط وتحديات ولكنها في نفس الوقت بتعلم الطالب بطريقة مميزة وبتديله المهارات والأدوات الأساسية لتعليم واعتماده على نفسه وبتبني فيه عقلية مميزة صاحبة فكر مميز؛ فعشان كده قبل ما تقرر تدخل ابنك مدرسة المتفوقين للعلوم والتكنولوجيا ادرس الجوانب المختلفة للمدرسة، واعرف شخصية ابنك وهل هيكون النوع دا من المدارس هو الأفضل ليه وهيظهر موهبته وقدرته ويعلمه بشكل صحيح ولا هيكون عائق في مسيرة تعليمه ومستقبله؟