شروط مدارس ستيم

شروط مدارس STEM لعام 2021

 

مدارس STEM بتفتح أبوابها كل سنة لجميع الطلبة الحاصلين على الشهادة الإعدادية اللي بيهتموا بتطوير نفسهم في العلوم والتكنولوجيا؛ عشان تساعدهم على تنمية مهاراتهم، وتأهلهم للالتحاق بالكليات العلمية.

لكن عشان يتم قبول الطالب في نظام مدراس ستيم لازم ينجح في امتحانات القبول اللي بتتعمل بعد ملئ استمارات التقديم، ويحقق باقي الشروط المطلوبة.

في المقال ده هنتعرف بالتفصيل على شروط مدارس ستيم لعام 2021، وإزاي نقدر نأهل طلبة المرحلة الإعدادية للالتحاق بيها.

ماذا يعني نظام STEM؟

نظام STEM هو نظام تعليمي أمريكي الأصل تم تطبيقه في مصر من حوالي 10 سنين، وبناء مدارس مخصصة له في العديد من المحافظات تحت إشراف وزارة التربية والتعليم.

النظام بيعادل الثانوية العامة في مصر، وبيهدف إلى رعاية الموهوبين والمتفوقين في العلوم والرياضيات عن طريق التعليم من خلال المشاريع والأنشطة خلال العام الدراسي.

الدراسة في النظام ده معتمدة على الطالب بشكل أساسي، لإنه بيكون مسئول عن البحث وتحضير المعلومات عن دروس المنهج، وشرحها لمجموعة من زمايله في حضور مشرف المجموعة.

كمان لازم يشارك في المشروع اللي بينطلب منه كل فصل دراسي ويفهمه كويس، ويحاول يفكر في حلول منطقية للمشاكل الموجودة فيه؛ لإن المشروع ده هو اللي هيحدد الطالب هينجح ولا لأ.

مميزات وعيوب نظام STEM

مميزات وعيوب مدارس STEM

نظام الدراسة في مدارس ستيم بيختلف تمامًا عن نظام الدراسة التقليدية الموجود في الثانوية العامة، وده بيمنحه كتير من المميزات، إلا إن في بعض العيوب اللي لازم الطالب وولي الأمر يكونوا على دراية بيها قبل التقديم.

مميزات نظام STEM

من أهم النقاط اللي بتميز نظام الدراسة في مدارس ستيم:

  • التطبيق العملي على المشاريع

مدراس STEM بتطلب كل فصل دراسي عمل مشروع هدفه الوصول لحل مشكلة موجودة بالفعل في مصر، وده بيساعد الطالب على التفكير بطريقة عملية.

  • المناهج معتمدة على التفكير

مناهج مدارس STEM بتعتمد بشكل كبير على التفكير والإبداع بعيدًا عن نظام الحفظ الموجود في عدة أنظمة تعليمية تانية.

ودي ميزة مهمة جدًا للطلبة المهتمين بالبحث العلمي؛ لإن مدارس ستيم بتعلمهم إزاي يعتمدوا على نفسهم في البحث عن المعلومات ويفهموها كويس.

  • اكتساب مهارات جديدة

مدارس ستيم مش بتفيد الطالب على المستوى العلمي فقط، لكن كمان بتساعده يكتسب مهارات جديدة هتفيده على مدار حياته زي المشاركة؛ لإنه دايما بيشتغل مع زمايله سواء أثناء المشروع أو وقت المذاكرة وتجهيز المعلومات المطلوبة.

كمان بتعمل الطالب الاعتماد على النفس لإنه بيضطر للإقامة خارج بيته في فترة الدراسة عشان يقدر يتابع مع المدرسة وينجز المهام المطلوبة منه واللي أحيانًا بتكون كتيرة، وبكده بيتعلم يشتغل تحت ضغط.

عيوب ومشاكل نظام STEM في مصر

أما عن العيوب الموجودة في نظام STEM:

  • وجود النسبة المرنة

مدراس STEM مش بتخضع لتنسيق الثانوية العامة بشكل كامل، بمعنى إن كل سنة بيتم توفير عدد مقاعد محدودة جدًا لطلبة STEM في الكليات المصرية؛ لإن عددهم أقل بكتير من عدد خريجي الثانوية العامة.

وبكده بتكون فرصة التحاق خريجي الثانوية العامة بالكليات الطبية والعلمية أكبر من فرصة خريجي STEM.

  • عدم توافر كتب مدرسية

مدارس STEM مش بتوفر كتب مدرسية للطلبة، هي بس بتكتفي بتوفير لابتوب خاص لكل طالب يساعده على عمل الأبحاث المطلوبة منه.

ولإن بعض الطلاب مش بيقدروا يتعلموا بالطريقة دي، وبيفضلوا وجود المعلومات المطلوب دراستها في الكتب فبيعتبروا النقطة دي أحد عيوب مدارس المتفوقين.

  • الدراسة باللغة الإنجليزية

من المشاكل اللي بتقابل الطلبة في نظام ستيم هي الدراسة باللغة الإنجليزية؛ لإن أغلبهم بيكونوا متعودين على الدراسة باللغة العربية، وده بيخليهم يفكروا كتير قبل ما يقدموا في مدارس STEM.

ولكن اللغة الإنجليزية مش هي أكبر مشكلة؛ لإن مع الممارسة والتعود على نظام الدراسة في ستيم بتبدأ المشكلة دي تختفي تمامًا.

  • صعوبة التحويل إلى نظام تعليمي آخر

بعض الطلبة مش بتقدر تتأقلم على نظام ستيم بسهولة، وده بيخليهم يفكروا في التحويل منها لمدراس الثانوية العامة.

مدراس STEM بتتيح فرصة التحويل بالفعل، لكنها بتجبر أولياء الأمور على سداد رسوم إقامة الطالب خلال فترة الدراسة اللي قضاها فيها، والرسوم دي بتكون كتيرة.

  • الضغط النفسي للطالب

أحيانًا بيعاني الطالب في مدارس ستيم من ضغط نفسي كبير نتيجة زيادة المهام والأنشطة المطلوبة منه خلال الفصل الدراسي.

وبجانب الأنشطة دي بيكون مطلوب من الطالب الحصول على درجة كبيرة في المرحلة الإعدادية عشان يقدر يلتحق بالكلية اللي حابب يكمل فيها في ظل تطبيق النسبة المرنة.

شروط مدارس ستيم 2021

شروط مدارس ستيم 2021

مدارس STEM بتتيح فرصة الالتحاق بيها لجميع الطلبة الحاصلين على الشهادة الإعدادية ولكن بعد تحقيق كل الشروط المطلوبة؛ عشان تتأكد إن الطالب هيقدر يتأقلم مع نظام الدراسة الجديد.

من شروط مدارس ستيم للتقديم هنلاقي:

1. عمر الطالب لا يزيد عن 18 عام

نظام ستيم بيحدد إن عمر الطالب لازم لا يتخطي 18 عام في 1 أكتوبر وإلا هيكون الطالب فقد أول شرط من شروط مدارس ستيم وأصبح غير مؤهل للالتحاق بمدارس ستيم للمتفوقين.

2. الحصول على الحد الأدنى للقبول

لازم الطالب يحصل على الحد الأدنى اللي بتحدده مدارس ستيم أو يتخطاه عشان يقدر يلتحق بيها.

مدارس ستيم بتطلب مجموع 95% كحد أدنى مع الحصول على الدرجة النهائية في مادتين من تلاتة (رياضيات، ولغة إنجليزية، وعلوم)، أو الحصول على مجموع 98% مع الدرجة النهائية في مادة واحدة من المواد المذكورة.

لو الطالب مجموعه أقل من الحد الأدنى لكنه حاصل على براءة اختراع بيتم إلغاء الشرط ده، وفي حالة تحقيق باقي شروط مدارس ستيم بيتم قبوله.

3. اجتياز امتحانات القبول

بعد ملئ استمارات التقديم في مدارس ستيم بيتم تحديد موعد لإجراء امتحانات القبول، وبيتم توزيع الطلبة على المدارس الحكومية لإجراء الامتحانات دي، وبتكون إلكترونية بنظام الاختيار من متعدد.

الامتحانات دي هدفها اختبار مستوى الطالب في 4 نواحي:

  • قدرات ذهنية
  • لغة إنجليزية
  • العلوم
  • الرياضيات

المعلومات المطلوبة بتكون تراكمية فطبيعي إن بعض الأسئلة هتكون صعبة على الطالب، لكن لازم يحصل على درجة عالية لإن أعلى الدرجات بس هي اللي بتتقبل.

لو الطالب اجتاز الامتحانات دي مع تحقيق باقي شروط مدارس ستيم بيتم تسليم ورقه لمدرسة من المدارس التابعة لنظام ستيم حسب الرغبات اللي كتبها، ودرجاته في الامتحانات دي.

شروط مدارس ستيم 2021 وارد جدًا يحصل فيها تعديلات على مدار السنين الجاية، فلازم الطالب يقرأ الشروط كويس قبل ما يقدم في النظام ده.

بالتالي عشان الطالب يقدر يدخل مدارس ستيم لازم يكون في تأهيل أثناء الدراسة الإعدادية للطلبة المتفوقين في العلوم والتكنولوجيا؛ عشان يقدروا يتأقلموا مع نظام الدراسة في مدارس ستيم بسهولة.

تأهيل طلبة الإعدادية للالتحاق بمدارس المتفوقين

كيفية تأهيل الطلبة للالتحاق بمدارس المتفوقين

طالب مدرسة ستيم دايمًا في بداية التحاقه بالمدرسة بيحس بفجوة كبيرة بين نظام دراسته في السنوات اللي فاتت ونظام الدراسة في ستيم.

وفي الحالة دي يا إما بيحاول يتأقلم مع النظام الجديد، أو بيفكر في التحويل لمدرسة تانية بتطبق نظام التعليم التقليدي عشان يقدر ينجح.

عشان نأهل طلبة الإعدادية للالتحاق بنظام STEM لازم نهتم بكذا حاجة زي:

تطوير مهارات الطالب

في المرحلة الإعدادية لازم الطالب يهتم بتطوير مهارات التواصل والمشاركة وغيرهم؛ لإنه المهارات دي هتساعده يتعامل كويس مع زمايله أثناء دراسته في ستيم.

كمان مهم إننا نوجه اهتمامه أكثر ناحية التفكير والإبداع ونعلمه إزاي يفكر صح ويدور على المعلومات، وإزاي يعتمد على نفسه في التعليم عشان يقدر ينجح في النظام ويحقق أهم شروط مدارس ستيم وهو اجتياز اختبارات القبول.

تحديد مدى قابليته لنظام التعليم في مدارس STEM

من المهم إننا نوضح للطالب إن طريقة التعليم في ستيم هتكون معتمدة على التفكير بطريقة منطقية، وبعيدة جدًا عن الحفظ المعتاد، وأغلب الدراسة هتكون عبارة عن أنشطة ومشاريع هيعملها على مدار السنة.

علشان كدا اللي أهم من تحقيق شروط مدارس ستيم هو التأكد إذا كان الطالب مستعد فعلًا لخوض التجربة دي ولا لأ.

الاهتمام برفع مستواه الدراسي

اجتهاد طالب المرحلة الإعدادية في دراسته شيء أساسي عشان يقدر يدخل مدارس ستيم؛ لإن من شروط مدارس ستيم الحصول على مجموع عالي في السنة السابقة لالتحاق الطالب بـ STEM.

ولو مجموع الطالب كان أقل منه مش بيقدر يدخل المدرسة إلا لو حاصل على براءة اختراع زي ما وضحنا.

تحسين اللغة الإنجليزية

لازم الطالب يطور من اللغة الإنجليزية وهو في المرحلة الإعدادية، ويبدأ ياخد كورسات ويطبق عشان ما يواجهش مشكلة صعوبة اللغة أثناء دراسته في نظام ستيم وكمان يقدر يجتاز شروط مدارس ستيم.

مناهج مدارس ستيم

المناهج في مدراس ستيم بتعتمد بشكل كبير على التفكير زي ما قولنا ومفيش أي مجال لنظام حفظ المعلومات اللي موجود في نظام الثانوية العامة.

الطالب بيدرس في السنة الأولى 10 مواد أساسية زي الفيزياء والكيمياء والرياضيات واللغة الإنجليزية وغيرهم، لكن المناهج بتكون مختلفة عن المدارس الحكومية.

في السنة الثانية بيختار الطالب الشعبة اللي حابب يكمل فيها سواء كانت شعبة علمي علوم أو علمي رياضة زي ما بيحصل في نظام الثانوية العامة، لكن الشعبة الأدبية مش بتكون موجودة لإن المدرسة مهتمة فقط بالمتفوقين في العلوم والتكنولوجيا.

مستقبل طلبة STEM

مدارس STEM بتأهل خريجيها للالتحاق بالكليات العلمية المختلفة، فبالنسبة لخريجي شعبة علمي علوم بيكون قدامهم فرصة الالتحاق بكليات:

  • الطب البشري
  • الأسنان
  • الصيدلة
  • العلاج الطبيعي
  • الطب البيطري
  • العلوم

أما عن خريجي شعبة علمي رياضة فيقدروا يدخلوا كليات:

  • الهندسة
  • العلوم
  • حاسبات ومعلومات

مدارس ستيم بتتيح فرصة الالتحاق بالجامعات طبعًا بعد تطبيق النسبة المرنة، والنسبة دي بتتغير كل سنة على حسب عدد الناجحين في النظام ده والناجحين في نظام الثانوية العامة.

وبالتالي إذا كان الهدف الوحيد للطالب من دخوله مدارس ستيم هو الحصول على كلية علمية معينة فالأفضل بالنسبة له إنه يلتحق بنظام الثانوية العامة لإن فرصته في دخول الكلية دي هتكون أكبر.

أما لو كان هدفه هو التفوق في المجال العلمي بوجه عام بدون تحديد لكلية معينة فنظام STEM هيساعده يحقق هدفه، وهيتيح له كلية عملية في النهاية.

بجانب الكليات العلمية اللي ممكن يدخلها الطالب من نظام ستيم بنلاقي إن المدارس دي بتزود فرصة قبول خريجيها في المنح الدراسية الخارجية.

الخلاصة

مدارس STEM هي أحد المدارس الموجودة في مصر، اللي نظامها بيتيح للطلبة تطوير مهاراتهم والتفوق في المجالات العلمية المختلفة.

المدارس دي بتعادل المدارس الثانوية، فبتأهل الطلبة للالتحاق بالكليات العلمية لكن بعد تطبيق نظام النسبة المرنة.

من مميزات مدارس STEM إنها بتعلم الطلاب إزاي يفكروا صح ويوصلوا لحلول ونتائج تساعد في حل كتير من المشكلات الموجودة في مصر عن طريق المشاريع المختلفة، وبتنمي عندهم الإبداع.

أما عن عيوبها فهي تطبيق النسبة المرنة اللي بتقلل فرصة دخول الطالب للكلية اللي حابب يكمل فيها، وصعوبة نظام الدراسة على العديد من الطلبة، وده بيسبب لهم ضغط نفسي كبير.

بالإضافة إلى أن الدراسة بتكون باللغة الإنجليزية، وبعض الطلبة بيشوفوا إنه ده هيسبب لهم مشكلة أثناء دراستهم.

من شروط مدارس ستيم لعام 2021 إن عمر الطالب لا يتخطى 18 عام في 1 أكتوبر، ويكون حاصل على الشهادة الإعدادية بمجموع أعلى من أو يساوى الحد الأدنى المطلوب، بالإضافة إلى اجتياز جميع اختبارات القبول.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • eng. mostafa bakr
    يوليو 15, 2021 at 2:11 م

    في اخر المشور ابني بعد الغربة عن البيت و التعب في الدراسة هيدخل الكلية ال حبب يدرس فيها و لا التنسيق هيفرض علية كلية بعينها

  • ba
    ديسمبر 28, 2021 at 5:51 ص

    براْت اختراع زي ايه

  • محمود زكي
    مايو 8, 2022 at 12:19 م

    هل نظام ستيم يقبل الطلبة من المدارس الخاصة ولا فقط من المدارس الحكومية والتجريبي

  • هبة الله
    سبتمبر 10, 2022 at 6:18 ص

    هل ممكن طالبة مصرية درست في السعودية بمدارس انترناشيونال وحققت الدرجات المطلوبة لدخول مدارس ستيم ان تلتحق بمدارس ستيم

أضف تعليق