أمهات كتير بتشتكي من عدم تركيز أطفالهم في المذاكرة، وإهمال الدراسة، وتوجيه كل تركيزهم ناحية اللعب والحركة، وبالتالي بيقل مستواهم الدراسي، ودا بيسبب الإحباط لكتير من الأمهات.
لكن متيأسيش من طفلك، واعرفي السبب وراء قلة تركيزه وحاولي تتغلبي عليه.
هنقدم من خلال المقال أعراض عدم التركيز في المذاكرة عند الأطفال، وأهم أسبابه، وكيفية التغلب عليها.
علامات تدل على عدم التركيز في المذاكرة عند الأطفال
من أهم العلامات اللي هتظهر على طفلك نتيجة قلة تركيزه بالمذاكرة بنلاقي:
- انخفاض المستوى الدراسي للطفل
- كره المدرسة
- السلوك السلبي في الفصل
- ملاحظة الأم سرحان الطفل وتركيزه في أمور تانية
- صعوبة الحفظ عند الطفل
- الحركة الكتيرة، وظهور علامات الملل أثناء المذاكرة
- حل المسائل البسيطة بصعوبة وبعد تكرارها
- شكاوى المعلمين من السرحان أثناء الشرح
ودلوقتي دورك تكتشفي إيه السبب وراء ضعف تركيز طفلك في المذاكرة، عشان تقدري تحليه.
10 أسباب لعدم التركيز في المذاكرة عند الأطفال
في أسباب كتير لعدم التركيز في المذاكرة عند الأطفال، ومنها:
1- وجود الطفل في بيئة جديدة
من أبرز أسباب عدم التركيز في المذاكرة عند الأطفال هو وجودهم في بيئة جديدة، ودا بنلاحظه كتير لما الأطفال بيكون عندهم صعوبة في التركيز في المدرسة بسبب وجودهم في بيئة جديدة عليهم، وبالتالي بيكون تركيز الطفل كله على كل حاجة حواليه من أشخاص، وأشكال، وأصوات.
وبالتالي بيرجع البيت بيكون تحصيله قليل جداً من المعلومات، فتبدأ المعاناة في إنك تفكري؛ هل العيب في طريقة الشرح؟ ولا المدرسة؟ ولا طفلك عنده مشكلة؟
والحل هنا إنك تسألي طفلك عن انطباعه عن المدرسة، والمعلمين، وأصدقائه، عشان لو في مشكلة تحليها معاه.
ولازم تسألي عن سلوكه في المدرسة، ومستواه الدراسي بشكل دوري، وتتبعي خطة لزيادة تركيز طفلك بالاتفاق مع المعلمين والإخصائيين اللي بيتابعوا الطلاب وسلوكهم.
2- عدم فهم الطفل للمادة
من أهم أسباب عدم التركيز في المذاكرة عند الأطفال هو عدم فهمه للمادة بشكل كافي، ودا بيُفقِد الطفل الاهتمام بالمادة، وبتتراجع درجاته في المادة دي.
ممكن الطفل يكون مستواه قليل في مادة واحدة، ويكون السبب هو إن طريقة الشرح مش مناسبة معاه، أو الواجب كتير عليه، أو معاملة المعلم معاه مش كويسة.
فبتسألي الطفل عن سبب المشكلة، وتوجهي معلم المادة لتغيير سلوك معين بيضايق الطفل، وتطلبي منه يتبع معاه أسلوب تاني للشرح.
دا بجانب إنك بتكثفي المذاكرة معاه في المادة دي، وتحاولي تشرحيها له بطرق ممتعة، عشان يحبها، ويتقبلها زي باقي المواد.
3- التشتت
من أكتر الأسباب اللي بتسبب عدم التركيز في المذاكرة عند الأطفال، هي عوامل التشتت المختلفة حواليه زي:
عوامل تشتت في المدرسة
في المدرسة بيكون في كلام جانبي، وصوت أطفال خارج الفصل، وأصوات سيارات أو أي صوت تاني ممكن يشتت الطفل، وبيفقده تركيزه.
عوامل تشتت في البيت
من العوامل دي:
- صوت إخواته بيلعبوا
- صوت التليفزيون، والراديو
- وجود شخص ماسك الموبايل قريب منه
- وجود أي جهاز للألعاب.
فبالتالي بيكون تركيز الطفل على كل المؤثرات دي، وبيشوف إن غيره بيلعب ويقضي وقته بشكل ممتع، وهو بيذاكر لوحده، فبتكون المذاكرة مملة بالنسباله، وبيقل تركيزه واهتمامه.
دورك في البيت تبعدي عنه كل وسائل التشتت دي، وتوفري له مكان هادي إضاءته كويسة للمذاكرة، وحاولي إن التليفزيون يكون مقفول وقت مذاكرته، وابعدي عنه الألعاب المشتتة.
4- عدم وجود حافز
واحد من أشهر أسباب عدم التركيز في المذاكرة عند الأطفال هو عدم وجود حافز، فاهتمام الطفل بالمذاكرة بيقل مع الوقت، وبيفقد تركيزه تدريجيًا، عشان مفيش حاجة تشجعه يكمل.
هنا الطفل بيكون محتاج تشجيع للمذاكرة زي: إنك توعديه بالخروج، أو تشتري له لعبة، أو ياخد بريك كل ما يذاكر جزء، ويكون له هدية لما يجيب درجات عالية وهكذا.
5- أسلوب تعلم غير مناسب للطفل
من أكتر أسباب عدم التركيز في المذاكرة عند الأطفال شيوعًا هو استخدام أسلوب تعلم غير مناسب للطفل، ودا لأن استجابة الأطفال لأساليب التعليم مختلفة، فبعض الأطفال بيتعلموا أفضل من خلال الأمثلة، والبعض من خلال التكرار، أو السمع والرؤية، وغيرهم.
فلو طفلك ما تعلمش بالأسلوب المناسب ليه بيفقد التركيز والفهم، وهنا دورك تركزي مع طفلك والأساليب اللي بتلفت انتباهه أكتر، وتركزي فيها، وتنبهي معلمه بيها.
6- قلة النوم وسوء التغذية
الطفل لازم ينام من 8- 10 ساعات يومياً، فلو ما أخدش كفايته من النوم طاقته بتقل، وبالتالي بيفقد جزء كبير من تركيزه، والنوم متأخر بيعد من العادات السيئة اللي طفلك ممكن يتعود عليها.
بجانب قلة النوم، فكمان سوء التغذية، وعدم تنظيم الوجبات للطفل، أو تخطى وجبة أساسية زي الإفطار مثلًا بيقلل من تركيزه، وبيخليه مستعد لتشتت الانتباه أكتر.
فلازم تحرصي إنك تقدمي لطفلك وجبات متكاملة فيها العناصر الأساسية اللي جسمه محتاجها، وتنظمي أوقات تناولها عشان يكون عنده طاقة كافية للمذاكرة.
7- عدم تنظيم الوقت أو المكان
واحدة من المشاكل اللي بتقلل من تركيز الطفل هي عدم تنظيم مكان المذاكرة، فبيضيع وقت كبير في البحث عن أدواته أو كتبه.
وعشان كده اهتمي بتعليمه عادة التنظيم في الوقت، والمكان اللي يخصه، زي إنه يرتب مكتبه وشنطته على حسب الجدول في المدرسة، في الأول ساعديه، وبعدين خليه هو يعملها لوحده.
وجهزي معاه جدول أسبوعي ويومي، بكل الأنشطة من مذاكرة، وتمرين، ومدرسة، ولعب؛ عشان يقدر يستمتع بوقته أكتر، ويركز في مذاكرته، وما تكونش عبء عليه.
8- صعوبات التعلم
أمهات كتير بتفكر إن طفلها مش ذكي، ومش بيحب التعليم بشكل فطري، لكن كل دي حاجات مش سليمة، لإن الطفل ممكن يكون بيعاني من صعوبات التعلم زي:
صعوبات التعلم النمائية
اللي بتنقسم إلى:
- ضعف التركيز.
- ضعف الانتباه.
- ضعف الإدراك.
- عدم القدرة على التفكير.
- ضعف القدرات اللغوية.
صعوبات التعلم الأكاديمية
واللي بتترتب على صعوبات التعلم النمائية، وبيندرج تحتها:
- عسر القراءة – Dyslexia.
- عسر الكتابة.
- عسر الحساب.
كل دي مشاكل بتقلل من تركيزه واستيعابه بشكل كبير، وبينتج عنها حصوله على درجات منخفضة، وهنا بيكون محتاج نعرضه على متخصص، عشان يشخص حالته ويساعدك تتعاملي معاه بشكل صحيح.
9- قلة الانتباه تجاه الطفل
واحد من أسباب عدم التركيز في المذاكرة عند الأطفال، هو عدم تركيز الأم مع الطفل، فبيبدأ يشد انتباهها بإنه ما يركزش في المذاكرة، أو يحل غلط، أو يكتب بخط وحش.
وهنا هييجي دورك فإنك لازم تقضي وقت مع طفلك، وخاصةً وقت المذاكرة، عشان تقدري تقيمي مستواه، ولإنه لما هيحس بالاهتمام منك هيحاول يكون أحسن؛ عشان تشجعيه؛ وتكوني مبسوطة بيه.
10- المشاكل الأسرية
من الأسباب الشائعة لعدم التركيز في المذاكرة عند الأطفال هو وجود مشاكل بين الأب والأم، ودا بيحسس الطفل بعدم الأمان، وبيخليه يفكر في الأحداث دي، وبالتالي تركيزه بيقل سواء في المذاكرة، أو أثناء الشرح في المدرسة.
عشان كدا ابعدي طفلك عن أي خلاف بينك وبين والده تماماً، وما تتكلميش قدام الطفل عن والده بشكل مش كويس، لإن نفسيته بتأثر على تركيزه ومستواه الدراسي بشكل كبير
ودي كانت أهم 10 أسباب ممكن تخلي طفلك مش مركز في مذاكرته.
أهم شيء إنك تصبري على طفلك، وتفهمي إن الضرب مش حل، وفي طرق تانية ممكن تساعدك في التغلب على المشكلة دي.
اقرأ أيضاً: أبرز 16 طريقة لزيادة الثقة بالنفس عند الأطفال.
نصائح للتغلب على مشكلة عدم التركيز في المذاكرة عند الأطفال
بتختلف قوة تركيز كل طفل عن التاني، وتكون قصيرة جداً في المرحلة العمرية ما بين 6 – 12 سنة، بمعنى إن الطفل ممكن ما يقدرش يحل الواجب بالسرعة اللي أنتي متخيلاها، ودا طبيعي.
وخليكي عارفة قاعدة مهمة؛ كل سنة في عمر طفلك بيقابلها دقيقة من التركيز، يعني لو طفلك عمره 7 سنوات، بيكون تركيزه 7 دقايق وبتزيد أو تقل دقيقتين.
لكن في حالة إن تركيز طفلك قليل جداً وتحصيله الدراسي قليل، لازم تعرفي السبب واللي ممكن يكون واحد من الأسباب السابقة، ومن أهم النصائح اللي هتساعدك تتغلبي على مشكلة عدم التركيز في المذاكرة عند الأطفال:
- اهتمي بتوفير نظام غذائي صحي لطفلك، لزيادة قدرته على التركيز والانتباه.
- حافظي على معدل شرب طفلك للمياه يومياً بقدر كافي؛ لإن المياه بتساهم في تحسين وظائف المخ لطفلك.
- اسمحي لطفلك باللعب، واختاري له ألعاب تساعد في تحسين تركيزه وزيادة الذكاء والانتباه.
- اجعلي طفلك يلعب ألعاب بدنية، لإنها بتحسن من نفسيته، وبتزود طاقته الإيجابية.
- قسمي المذاكرة اللي عنده لمهمات صغيرة، عشان يقدر ينجزها بشكل صحيح.
- اطلبي المساعدة من مختصين لو طفلك بيعاني من صعوبات التعلم، عشان تقدري تفهمي الحالة، وينسق معاكي خطة تناسب تعليم طفلك.
- قللي الأوامر قدر الإمكان، الطفل بيكون صعب عليه تنفيذ التعليمات طول الوقت ومتابعتها، وخاصةً لو أكتر من أمر في نفس الوقت، ودا من الخطوات الفعالة في تجنب عدم التركيز في المذاكرة عند الأطفال.
- حددي وقت للمذاكرة لطفلك، لإن دا بيعلمه الإنجاز والتركيز.
- جربي مع طفلك تمارين لزيادة التركيز زي: الجلوس في وضع اليوجا بهدوء والتركيز على الشهيق والزفير لدقايق، دا بيحسن من موده، وبيقلل التوتر.
- اسألي طفلك محتاج إيه عشان يركز أكتر في المذاكرة، وحاولي تنفذيه لو شايفة إنه مناسب، بس بشكل ما يسببش تشتت ليه.
- ركزي مع طفلك وحددي العلامات اللي بتبان عليه لما بيسرح زي: وضع إيده على خده، النظر ناحية أي شيء غير الكتاب وهكذا، والفتي انتباهه عشان يرجع يركز.
- امدحي طفلك وشجعيه لو أنجز الواجب في وقت أقل أو حفظ معاني درس أسرع، ووضحيله إن تركيزه بيتحسن عشان يفضل متحمس للمذاكرة.
الخلاصة
من أهم أسباب عدم التركيز في المذاكرة عند الأطفال هي عدم فهم الطفل للمادة، والتشتت، وأساليب التعلم الخاطئة، وعدم وجود حافز، وقلة النوم وسوء التغذية، وصعوبات التعلم، وقلة الانتباه، والمشاكل الأسرية، وغيرهم زي ما قولنا، وبالتالي لازم تحددي السبب الأساسي، وتعالجيه.
إلى جانب إنك تستخدمي النصائح اللي قدمناها، عشان تقدري تتغلبي على المشكلة دي معاه.
أضف تعليق