تبعًا لدراسة المركز المصري الكندي لنظم المعرفة بنلاقي إن 84% من طلاب المدارس بيتم تشخيصهم بالإصابة بصعوبات القراءة سواء ناتجة عن مرض وراثي أو عوامل عصبية، ودا بيسبب مشكلة على المستوى الدراسي.
وبالتالي بيبدأ ولي الأمر يدور على الأسباب، وطرق التعامل الصحيحة مع حالة الطفل، وهنا بييجي دور الأنشطة اللي بتساعد في تخفيف الأعراض.
طيب إيه هي أنشطة لعلاج صعوبات القراءة؟ وإزاي نقدر ننفذها مع الطفل؟
دا اللي هنعرفه من خلال المقال.
تعريف صعوبات القراءة
صعوبات القراءة هي مشكلة لغوية، وتعد نوع من أنواع صعوبات التعلم اللي بتحصل في سن صغير للطفل، وبتكون نتيجة إن الدماغ مش بتقدر تربط بين الكلام المكتوب ونطقه صوتيًا، وبالتالي بيحصل تأخر وتعسر في القراءة.
وبنلاحظ إن الموضوع هنا مش متعلق بنقص الذكاء، بالعكس الطفل بيكون بارع وذكي في حاجات تانية مختلفة.
تشخيص صعوبات القراءة
عشان تقدر تعرف إذا كان طفلك بيعاني من عسر القراءة أو لأ، وتقدم اللي يناسبه من أنشطة لعلاج صعوبات القراءة لازم يخضع لاختبار من المدرسة أو الإخصائي النفسي، لتقييم مهاراته اللغوية، ومحاولة فهم سبب تأخره في النطق الصحيح.
وكمان لازم يوضع في الاعتبار التاريخ الطبي للعائلة، لإن عدد كبير من الأطفال المعرضين للإصابة بعسر القراءة بيكون حد من عائلتهم اتصاب به.
وعشان التشخيص بداية العلاج، فالمنظمات الصحية عرفت بشكل عام الأعراض اللي بتكون موحدة بين معظم مصابين عسر القراءة، وهي:
- التقطيع في القراءة، والتوقف بين نطق كل حرف والتاني لتكوين كلمة.
- الصعوبة في تمييز وقراءة الحروف والكلمات وفهم تركيبها.
- عدم تذكر الحروف والأرقام، وممكن الطفل يعكسها.
- الحاجة لوقت أطول من المعتاد لقراء النصوص.
- عدم التنسيق بين حركة العينين في القراءة.
- صعوبة التفرقة بين الشمال واليمين.
- صعوبة تكوين إجابات صحيحة.
- عدم القدرة على فهم المكتوب.
ولازم تعرف إن الأعراض دي بتختلف من طفل للتاني حسب عمره، وأسباب تعسر القراءة عنده، وعشان كدا التقييم في مرحلة مبكرة بيكون مهم في رحلة علاج الطفل.
أنواع صعوبات القراءة
مشكلة عسر القراءة بترجع لأنواع مختلفة بتصيب كل طفل بشكل غير التاني، وعشان نقدر نتعامل معاها ونسهل على أولياء الأمور والمُدرسين توفير أنشطة لعلاج صعوبات القراءة، لازم نحدد الأنواع دي، ونعرف التحديات اللي بتواجه الطفل في كل نوع.
وبنلاقي إن إخصائيين علم النفس قسموا عسر القراءة لـ 5 أنواع، وهي:
1- عسر القراءة الصوتي
يعاني المصابين بعسر القراءة الصوتي من صعوبة في معالجة أصوات الحروف والكلمات المكتوبة، ودا بيسبب عدم مطابقة الأصوات مع الحروف أو الرموز اللي بيقرأها، وهو من الأنواع المنتشرة.
وفيه علامات بتظهر للي عندهم عسر القراءة الصوتي منها:
- عدم تمييز الكلمة المكتوبة في جملة مختلفة.
- إعادة نطق نفس الكلمة بطرق مختلفة.
- القراءة البطيئة، والتوقف بين الكلمات.
- صعوبة تعلم أصوات الحروف.
- صعوبة نطق الكلمات الغريبة.
- تجنب الأنشطة القرائية.
2- عسر القراءة السطحي
النوع دا من عسر القراءة عرفته نانسي ماذر وباربرا ويندلينج في كتاب “أساسيات التقييم والتدخل لعسر القراءة” على إنه نوع من عسر القراءة يتميز بصعوبة التعرف على الكلمات بأكملها وتهجيها، خاصة لما بتحتوى الكلمات على تطابقات صوتية وهجائية غير منتظمة.
وفسر الأطباء إن دا بيحصل لإن الدماغ مش بتقدر تتعرف على شكل الكلمة بسرعة عشان تعالجها، ومن خلال اتباع أنشطة لعلاج صعوبات القراءة مع الطفل بيتم علاج المشكلة بالتمرين المستمر.
ومن علامات عسر القراءة السطحي بنلاقي:
- صعوبة التعرف على الكلمات.
- صعوبة فهم الكلمات الجديدة.
- صعوبة القراء السريعة.
- صعوبة في التهجي.
3- عسر القراءة التلقائي السريع
غالبًا بيواجه الأشخاص اللي بيعانوا من عسر القراءة التلقائي مشكلة في تسمية الأشياء بسرعة زي: الأرقام، الألوان، والحروف، وبيكونوا عارفين من الشكل إيه هي الحاجة بس بياخدوا وقت أطول في تكوين الكلمة.
وبتشمل أعراض عسر القراءة التلقائي:
- قراءة كلمات مش موجودة بالنص، وعدم وضوح معناها.
- محاولة استبدال الكلمات في القراءة.
- الهروب من نطق الكلمات وتركها.
- استخدام الإيماءات بدل الكلمات.
- البطء في الرد على الكلمات.
4- عسر القراءة البصري
بيكون عبارة عن صعوبة فهم المعلومات عن طريق البصر، بالتالي بيواجه المصاب به مشكلة في إنه يفتكر تكوين الحروف وطريقة التهجي، والنوع دا ممكن يؤثر على القراءة بشكل كبير، وبيحتاج للتدخل بأنشطة لعلاج صعوبات القراءة بتركز على تقوية البصر والتركيز، وبنلاقي إن أعراضه بتشمل الآتي:
- ظهور الحروف والكلمات بشكل مزدوج.
- صعوبة متابعة السطر اللي بيقرأ فيه.
- الشعور بالإجهاد والصداع عند القراءة.
- عدم وضوح الكلمات والحروف.
ومن المهم الكشف الطبي من متخصص على نظر الطفل للتأكد من عدم وجود مشكلة طبية بالعين أدت لضعف بصره.
5- عسر القراءة المزدوج
بنلاقي في مشكلة عسر القراءة المزدوج إن المصاب بيجمع بين نوعين من صعوبات القراءة، وهما عسر القراءة السريع وعسر القراءة الصوتي، ودا اللي بيخليه من أصعب الأنواع، لإن الطفل مش يبواجه مشكلة واحدة، وبيكون من المهم التركيز في تنفيذ أنشطة لعلاج صعوبات القراءة بشكل مكثف.
اقرأ كمان: أنواع عسر التعلم عند الأطفال
الآثار الاجتماعية والعاطفية لعسر القراءة
في الغالب إصابة الطفل بعسر القراءة بيعرضه لآثار نفسية، وكمان التأخر في تشخيصه بيكون سبب في حدوث مشاكل اجتماعية له، ومن الآثار النفسية اللي بتحصله:
- عدم رغبته في التعلم، لإن القراءة من المهارات الأساسية المعتمد عليها المواد الدراسية.
- فقد الثقة في نفسه بسبب تعرضة للتنمر من آخرين، أو تعنيف من المدرسين.
- شعوره بالإحباط والإحراج اللي بيخليه يتجنب اللعب مع الأطفال في سنة.
- تخليه عن أحلامه وطموحاته بسبب عواقب التعليم.
أنشطة لعلاج صعوبات القراءة
بالرغم من عدم وجود علاج محدد لمشكلة صعوبات القراءة، إلا إنه من المهم السيطرة عليها من خلال الأنشطة والتمارين العلاجية.
وبيختلف تطبيق الأنشطة دي حسب الطفل، ودرجة ونوع إصابته، واللي بيفرق معاها جدًا تشخيصه المبكر عشان تقدر تساعده يتخطى الموضوع أسرع، ومن هنا هنقسم الأنشطة حسب كل نوع.
أنشطة عسر القراءة الصوتي
الطفل اللي بيعاني من صعوبة دمج الكلمات مع الصوت، بيكون محتاج تكرار النشاط بأسلوب لطيف وجذاب عشان تقدر تخليه يتفاعل معاك، ومن الألعاب والأنشطة اللي تقدر تطبقها معاه:
1- لعبة البطاقات
لعبة البطاقات نشاط ممتع في التعامل مع عسر القراءة، وبنستخدم بطاقات كبيرة مكتوبة عليها حروف الأبجدية، وبطاقات صغيرة عليها كلمات بسيطة.
وفكرة اللعبة إننا بنوزع على الأطفال بطاقات الحروف سواء بشكل عشوائي أو على حسب صعوبتها، وبنوزع بطاقات الكلمات على الترابيزة قصادهم، وبيبدأ كل طفل يختار حرف من اللي معاه، ويدور على كلمة بتبدأ بنفس الحرف، ويحاول ينطقها صح.
2- نشاط سماع القصص الصوتية
النشاط السمعي بيفيد الطفل في نطق الكلمات بالتكرار اللفظي لها، وهنا بنحاول نخليه يعيد القصة بعد سماعها حسب فهمه ليها، أو ممكن نقف عند الكلمات الصعبة ونخليه يسمعها ويكررها.
وبكدا نكون بننشط القراءة عن طريق الذاكرة الصوتية.
أنشطة عسر القراءة السطحي
في عسر القراءة السطحي بيكون الطفل ضعيف في تمييز الكلمات المكتوبة، وهنا لازم تدخل تمارين قرائية ممتعة ضمن البرنامج التعليمي، ومن ضمن أنشطة لعلاج صعوبات القراءة السطحية اللي بتساعدك في تدريب الطفل:
3- القراءة والتلوين
وهنا هندخل مع تمرين القراءة حاجات ممتعة زي التلوين، ونحاول نوفر أشكال مغرية تفسر الحرف أو الكلمة المكتوبة، عشان الطفل يستوعب أكتر.
4- بناء الكلمات باللوح المغناطيسي
لوح المغناطيس من الأنشطة اللمسية والتفاعلية، ويبدأ ولى الأمر أو المدرس يطلب كلمات بسيطة يقدر الطفل يشكلها على اللوحة ويقرأها ببطء، وبنفضل ندرج صعوبة الكلمات حسب مستوى الطفل واستيعابه.
5- لوحة القراءة
هو عبارة عن مجموعة ورق مطبوع للكلمات بأسلوب ممتع بيساعد الطفل على مزج القراءة بالأشكال المفضلة له، ومعرفة الكلمات بالشكل المرسوم على الورق، وممكن نعمل تدريب مثلًا زي توصيل الكلمة بالشكل ونطقها.
6- لعبة الألغاز بالبحث عن الكلمات
في اللعبة دي بتخفي كلمات وسط مجموعة كبيرة من الأحرف، ويفضل تكون الكلمات بسيطة بحروف صغيرة، والطفل بيبحث عن الكلمات أفقي ورأسي، وكل ما يلاقي كلمة يعلم عليها بلون مختلف، وينطقها أكتر من مرة.
أنشطة عسر القراءة التلقائي السريع
بنلاقي إن في مجموعة أنشطة لعلاج صعوبات القراءة معتمدة على السرعة مع التلقين والتكرار، ومن الأنشطة المفيدة في تحسين القراءة بشكل تلقائي:
7- سباق الكلمات المنتشرة
اطبع الكلمات السهلة والمستخدمة يوميًا، وحطهم على حائط قدام الطفل، واطلب منه يقرأها بدون تفكير، وكرر النشاط أكتر من مرة.
8- التسوق
اكتب قائمة التسوق الأسبوعية واقرأها للطفل، ولما يروح الطفل معاك السوبر ماركت وخليه يشوف إيه اللي موجود في الرفوف وفاكره من القائمة، وخليه يقرأه سريعًا بصوت عالى ويجيبه، ودا هيحفز الذاكرة السمعية والبصرية، والقراءة بشكل تلقائي بدون تفكير.
9- لعبة السرعة الصوتية
في اللعبة دي بتختار مجموعة من الكلمات الصعبة بصريًا، وبتسجلها بقراءة سريعة نسبيًا، ثم بتسمع الطفل التسجيل، وتخليه يكررها بنفس السرعة اللي سمع بيها الكلمات.
أنشطة عسر القراءة البصري
النشاط البصري بيعد من ضمن أنشطة لعلاج صعوبات القراءة، اللي بتنمي المهارات الحسية عند الطفل ولازم الأول تتأكد من عدم وجود مشكلة طبية تمنعه من الرؤية بوضوح، ومن الأنشطة البصرية:
10- لعبة نط الحبل
بما إن طفلك بيعاني من مشكلة بصرية، فالحبل لعبة ممتعة هتساعده على التركيز من خلال النط على حبل رفيع وتفادي وقوعه.
11- البحث عن الصور
اطبع صور لكائنات مختلفة سواء حيوانات، أو طيور، أو نباتات، وجهز ورق فيه أساميهم، واطلب من طفلك يلاقي الكلمات المكتوبة اللي بتعبر عن الصور دي.
12- البازل اللفظي
هتقسم الصورة لقطع بازل، كل قطعة مكتوب عليها جزء من الكلمة، وخلي طفلك يرتبها لحد ما يكون كلمة صحيحة.
أنشطة عسر القراءة المزدوج
عشان تقدر تعالج عسر القراءة المزدوج اللي بيجمع بين نوعين من مشاكل صعوبات القراءة وهما الصوتي والتلقائي محتاج تستخدم أنشطة لعلاج صعوبات القراءة اللي ذكرناها في النوعين دول، وتجمعها بشكل يناسب طفلك، وكمان فيه نشاط فعال تقدر تمارسه معاه وهو:
13- الألعاب الصوتية
الألعاب الصوتية اللي بتنطق الكلمات زي الحيوانات والطيور وأصواتهم، وبعض الكلمات اليومية، ومع تكرار الطفل تهجي الكلمات مع اللعبة هنلاحظ إن الدماغ بتربط بين الصوت والقراءة بشكل تلقائي.
بجانب اللي ذكرناه بخصوص أنشطة لعلاج صعوبات القراءة، أوقات الطفل بيعاني من مشكلة متعلقة بعسر القراءة، واللي بتكون متمثلة في صعوبة مسك القلم، التوازن، ربط وفك الأزرار باللبس، وهنا التمارين لازم تكون يدوية زي: التلوين، والرسم، واستخدام ألعاب خرزية أو تكوينية، أو حتى القص واللزق.
نصائح تشجع طفلك على القراءة
تشجيع طفلك على القراءة بيساعده على تنمية مهاراته الحسية والبصرية، وبينمى حبه ليها، وكمان هيخليك تلاحظ لو بيواجه مشكلة محتاجة لتطبيق أنشطة لعلاج صعوبات القراءة، أو الاستعانة بمتخصص.
وعشان كدا هنوضح نصائح عامة تقدر تستخدمها مع طفلك، ومنها:
- اقرأ معاه بانتظام قصص قبل النوم، أو اتفق معاه على وقت محدد للقراءة خلال اليوم.
- وفر مجموعة قصص ممتعة ومفيدة، وخليه يختار القصة اللي حابب يقرأها.
- خلي القراءة فيها نوع من المناقشة، والأسئلة عن القصة اللي بتقروها.
- اشترك له في مكتبة قريبة من البيت، وعوده على القراءة فيها.
- كافئه على القراءة الصحيحة، عشان يحس بالتقدير لمجهوده.
- وفر جو هادي للقراءة، عشان يتعلم إنه محتاج يركز وهو بيقرأ.
الخلاصة
دعمك للطفل وعدم تجاهل مشاكله بيخليه متزن نفسيًا، وبيتحدى الصعوبات اللي بتواجُهه، ومع التشخيص المبكر والتقييم هتقدر تطبق أنشطة لعلاج صعوبات القراءة بشكل صحيح سواء الصوتية، البصرية، أو حتى التلقائية.
وكمان تساعده على تقوية نقاط ضعفه، وتخلق عنده الثقة بالنفس، والتعامل بدون إحراج أو ضغط نفسي.
أضف تعليق