تعرفي إن طفلك ممكن يطلع كاتب روايات مشهور، أو مترجم أو صحفي متفوق عشان بيقرأ كتير وبيحب القراءة؟
ودا لأن القراءة مهارة أساسية في حياة الطفل، عشان كدا لازم يبدأ غرسها في الطفل من صغره، لأنها بتساعده على التواصل بشكل أفضل مع الآخرين، وبتزود من إبداعه، وبتكون عنده حصيلة لغوية كبيرة. وعلى الرغم من سهولتها، إلا أن بعض الأطفال ممكن يواجهوا صعوبات في تعلمها.
وفي المقال دا هنعرف صعوبات القراءة عند الأطفال، والأضرار اللي بتعود على الطفل بسببها، كمان هنتناقش طرق واستراتيجيات التغلب على الصعوبات دي.
صعوبات القراءة عند الأطفال
القراءة من المهارات اللي بتفرق جداً في حياة الطفل سواء وهو صغير أو حتى بعد ما يكبر. ولكن كل طفل بتختلف عنده درجات الاستيعاب والفهم، ومن هنا بتظهر صعوبات القراءة عند الأطفال، واللي ممكن نحصرها في أكتر 4 صعوبات شائعة بتواجهيها مع طفلك، وهما:
1- صعوبة النطق
أطفال كتير بيبقى عندها أزمة في نطق الحروف أو الكلمات، وأحياناً دا بيكون يا إما بسبب إنه خايف ينطق عشان ما يغلطش، أو محتاج يحسن من مهارة الثقة في النفس، أو إنه ما عرفش من البداية النطق الصحيح لكل حرف وطريقة تجميع الأصوات مع بعضها عشان يقدر يكّون كلمة وينطقها.
وعشان تقدري تتغلبي على أول صعوبات القراءة عند الأطفال، محتاجة تنفذي بعض الخطوات مع طفلك، زي:
- الاستماع الجيد لصوت كل حرف في اللغة سواء عن طريق معلم أو فيديوهات اليوتيوب.
- تقسيم الكلمة خلال القراءة، ومن بعدها تقسيم الكلمات نفسها لو بيقرأ سطر أو أكتر.
- كتابة الكلمات مع النطق، والخطوة دي مهمة جدًا وهتفرق في مستواه.
- رؤية صور لكل حرف أو كلمة بيحاول ينطقها، وهنا هتساعديه في حفظ صوت الحروف خلال الكلام.
سهل تتغلبي على صعوبة النطق، لأن الطرق المتبعة مش بتكون صعبة أوي على الطفل، وكمان لأنك بتنفذيها معاه وقت المذاكرة مش في وقت منفصل. ولكن الأهم هو التمرين المستمر، وتنفيذ الطرق والاستراتيجيات المفيدة للطفل زي التشجيع وعدم الترهيب، ووجود حافز للتعلم، طبعاً مع الدعم المستمر منك كأم، كلها حاجات بسيطة لكن هتفرق بشكل ملحوظ مع الطفل.
2- صعوبة الفهم
أحياناً مهارة النطق عند طفلك بتكون كويسة، ولكن من صعوبات القراءة اللي بيواجهها، هي فهم الكلمة نفسها. بس إزاي؟ وليه طفل يعرف ينطق بس مش بيقدر يفهم كويس؟
المشكلة كلها تكمن في قلة التركيز، سواء في التفاصيل الصغيرة الموجودة في النص اللي بيقرأه طفلك أو حتى في المعلومات الأساسية اللي بيناقشها النص. ودا مش بيكون أبداً بسبب ضعف قدرات الطفل، ولكن بعض الأطفال نسبة التشتت بتكون أعلى عندهم من نسبة التركيز.
والحل للتغلب على صعوبة فهم النص عند طفلك بتتمثل في أكتر من أسلوب، منهم:
- اطرحي أسئلة تنشط من ذاكرة طفلك بعد قراءة نص معين.
- خليه يقرأ بشكل جزئي، لو كان النص كبير عليه.
- اطلبي منه يعمل ملخص سريع لكل جزء بيخلص قراءته.
- ساعديه يختار مواضيع بيحبها خارج منهج الدراسة، ويبدأ في قراءتها وتلخيصها.
- وفري له رسومات ومخططات خاصة بالأطفال، تساعده على التركيز وتثبيت المعلومات بشكل أسرع.
دعم طفلك وتطوير مستواه في القراءة عن طريق هواياته، والحاجات اللي بيحبها هيساعده جداً في التغلب على صعوبات الفهم، وكمان المناقشة والحوار المستمر معاه هيفرق في مستوى معرفته وتركيزه.
3- صعوبات فردية
صعوبات القراءة عند الأطفال مش بتنحصر في أسباب متعلقة بالقراءة والكتابة بس، ولكن فيه أسباب مختلفة ليها، وأشهرها هي عوائق التعلم غير الإرادية، مثلاً زي:
الـ Dyslexia
وهو ما يسمى بعسر القراءة، واللي بتلاحظي تأثيره على مستوى الطفل في القراءة والكتابة والتهجي، وأحياناً بيكون سبب إضافي في صعوبات القراءة عند الأطفال، زي صعوبة النطق، أو الربط بين أصوات الحروف وبعضها.
الـ ADHD
وبيعرف باسم اضطراب فرط الحركة ونقص الانتباه، واللي بيكون عامل إضافي في التاثير على مستوى تركيز طفلك خلال التعلم، ودا بيخلي فهم الطفل للكلمات والجمل أكتر صعوبة.
والحل لاضطرابات زي دي بيكون من خلال:
- الاستعانة بمتخصصين يساعدوكي تتعاملي مع طفلك بشكل سليم
- تنظيم وقت طفلك ما بين تعلم القراءة وممارسة اللعب، حتى لو وقت اللعب هيكون أكبر من وقت التعلم في البداية
- توفير بيئة تعلم منظمة بصرياً عن طريق استخدام المخططات والكتب المصورة
- تقسيم مهامه اليومية إلى أجزاء أصغر، بحيث يكون بينها أوقات استراحة أقل، واللي هيساعد الطفل على الحفاظ على تركيزه.
- تشجيع الألعاب الرياضية، لإنه بيحسن من مستوى الانتباه، وبيقلل التشتت عند الطفل، وخصوصاً أصحاب اضطراب الـ ADHD، وتُعد من أفضل الطرق في الحماية من صعوبات القراءة عند الأطفال.
هل عدم الاهتمام بالقراءة ممكن يشكل صعوبة عند طفلك؟
في البداية عرفنا أن صعوبات القراءة عند الأطفال ممكن تختلف من طفل للتاني، يعني بتعبير آخر ممكن طفلك ما يكونش بيعاني من أي صعوبة في القراءة في بداية تعلمه، ولكن بعد دخوله الحضانة أو المدرسة تلاقيه بيقرأ بصعوبة، وبيواجه مشاكل في نطق بعض الكلمات والحروف. ولكن ياترى ممكن يكون السبب إيه؟
خوف، وقلة ممارسة، وعدم اهتمام بالقراءة!
ممكن يكون سبب صعوبات القراءة عند الأطفال واحد من التلاتة دول، ولكن الأكيد إن العامل الأساسي هو عدم الاهتمام بالقراءة، ولو طفلك بيمارس القراءة كل يوم بشكلها الصحيح دا هيقوي عنده المهارة نفسها، وهيخليه يكتسب ثقة في نفسه. بالتالي مش هيكون خايف ينطق.
أسباب عدم اهتمام الطفل بالقراءة
نقدر نقسم أسباب عدم الاهتمام بالقراءة لحاجتين:
1- التعرض المحدود للقراءة
ودا بيولد صعوبة، لأن الطفل بطبيعة الحال بيقضي معظم وقته ما بين اللعب والتليفزيون، بدلاً من إنه يقرأ قصة أو كتاب للأطفال، ولكن استثمار ساعة واحدة في اليوم للقراءة هيكون ليه فاعلية كبيرة على تطور الطفل، وتُعد من الطرق الفعالة للقضاء على صعوبات القراءة عند الأطفال.
2- الإصابة بملل القراءة
أحياناً ممكن يصاب طفلك بالملل من القراءة، لأنه مش قادر يدرك قيمة القراءة في حياته، ودا من أخطر المؤثرات في سلسلة صعوبات القراءة عند الأطفال، لأن الطفل لو بيمل من القراءة من صغره، هيتأثر جداً كل ما يكبر، وممكن يوصل لمرحلة الجامعة وهو مش بيقدر يقرأ بطلاقة، ومخارج الحروف عنده مش مظبوطة، بالتالي ممكن جداً يتعرض للتنمر أو الإساءة.
والحل هنا هو اهتمام الوالدين بغرس أهمية القراءة في الطفل، ودا عن طريق ربط هوايات طفلك بالقراءة. بمعنى إنه لو بيحب الكورة يقرأ عنها قصص ومقالات مناسبة لسنه، ولو بيميل للطبيعة يبدأ يقرأ كتب مصورة عن النباتات والأشجار وأنواعها، أو روايات صغيرة عن الأخلاق والدين مناسبة لعمره.
كلها أنشطة هتكسر حاجز الملل عند الطفل مع الوقت، وهتزود من مستوى اهتمامه بالقراءة.
نصائح ومعلومات إضافية للتغلب على صعوبات القراءة عند طفلك
بعد معرفة الأسباب المتعلقة بصعوبة القراءة عند طفلك، بيكون سهل تعالجيها وتطبيقها بأفضل شكل يتناسب معاكي ومع الطفل. وإلى جانب الخطوات اللي هتتخذيها، فيه بعض النصائح الإضافية اللي هتساعدك، ومن أهمها:
- تقسيم الكلمات عند النطق، لإن دا هيسهل على طفلك ينطق الكلمة بسهولة، ويكتبها صح.
- البحث عن معنى الكلمات والجمل خلال القراءة، ودا بيثبت الكلمات ونطقها في دماغ طفلك، وبيزود من حصيلته اللغوية.
- تكرار النطق سواء للكلمة أو الجمل، وقراءة قصة ما أكتر من مرة مهم، لإنه بيأثر بشكل إيجابي على ذاكرة الطفل واحترافه للنطق.
- تقديم الدعم المستمر للطفل، وتوصيل إحساس إن صعوبات القراءة عنده شيء طبيعي وهينتهي، أمر مهم جداً وهيفرق في استجابته للتعلم.
الخلاصة
صعوبات القراءة عند الأطفال هي تحدي ممكن يكون عند طفلك وطفل تاني لأ، ولكن اكتشاف الأمر بشكل مبكر وعدم إهمال المشكلة هو بداية الطريق للتخلص من الصعوبات دي، وبالتأكيد وجود الدعم النفسي والمعنوي للطفل هيفرق جداً في استجابته لأي أسلوب، ويساعده يواجه أي تحدي في حياته بشكل أقوى.
اقرأ أيضًا: أنماط التعلم الأربعة | الطريقة الأشهر لمعرفة نمط التعلم المفضل لطفلك
أضف تعليق