أبرز تفاصيل نظام الثانوية العامة الجديد 2024-2025

إيه هو نظام الثانوية العامة الجديد 2024؟

الثانوية العامة هي حجر الأساس اللي بيبني عليه الطالب حياته ومستقبله، سواء كانت حياته الجامعية، أو حتى ما بعد الجامعية، ومؤخراً أعلن الدكتور رضا حجازي -وزير التربية والتعليم والتعليم الفني- عن نظام الثانوية العامة الجديد، واللي هيتم عرضه على مجلس النواب، تمهيدًا لاعتماده. 

والنظام دا بيتميز بإنه بيلغي التقسيم التقليدي بتاع الشعبتين “علمي وأدبي”، وبيحل محله نظام المسارات الأربعة، واللي بيفتح فرص دراسية جديدة يقدر الطالب يحدد منها المناسب لميوله، وقدراته. 

هنتكلم في المقال دا بالتفصيل عن ملامح نظام المسارات الجديد، ونفهم كل مسار منهم بيختص بإيه بالظبط. 

الفرق بين الأنظمة القديمة ونظام الثانوية العامة الجديد 2024

الأنظمة القديمة للثانوية العامة في مصر شهدت تغييرات كتيرة على مر السنين، فلو رجعنا بالزمن لسنة 1994م هنلاقي إن الثانوية العامة كانت بتمتد بين العامين التاني والتالت من المرحلة الثانوية، وبتنقسم لشعبتين أساسيتين، واللي هما: (علمي، وأدبي)، بالإضافة لنظام تحسين المجموع اللي كان بيسمح للطالب بدخول الامتحان 5 مرات بغرض تحسين درجته. 

وبعدها بفترة اتلغى نظام التحسين، واستمر العمل بنظام السنتين والشعبتين لحد ثورة يناير، ثم في سنة 2013م اتلغى نظام السنتين، وأصبحت الثانوية العامة بتعتمد على السنة التالتة بس، وبتنقسم لـ 3 شعب أساسية، وهما: (علمي رياضة، وعلمي علوم، وأدبي). 

وأبرز مشاكل النظام دا هي إن الطالب ممكن يتعثر في السنة دي لأي ظرف، وما يقدرش يعوض دا، ولا يقدر يحسّن من درجاته. 

فجاء قرار النظام التراكمي اللي اقترحه الدكتور “طارق شوقي” لحل المشكلة دي على الأخص، وبقى مجموع الطالب بيعتمد على درجاته في الـ 3 سنين بالكامل، لإن دا بيُتيح فرصة أكبر لكل طالب في إنه يعوض القصور اللي ممكن يحصل له في أي فترة من الفترات لأي سبب، بس القرار دا متنفذش وفضل نظام السنة الواحدة مكمل زي ما هو. 

وبالنسبة لنظام الثانوية العامة الجديد 2024 اللي أعلن عنه الدكتور “رضا حجازي” مؤخرًا فهو بيلغي فكرة التشعيب القديم، وبيعتمد في أساسه على وجود 4 مسارات أساسية، وكل مسار منهم بيأهل الطالب لنوع معين من الكليات، ويقدر الطالب يختار من بينها ما يتناسب مع ميوله، وقدراته، وخلينا دلوقت نعرف أكتر عن ملامح النظام دا. 

اقرأ أيضًا: الفرق بين المدارس اليابانية والمدارس الحكومية. 

ملامح نظام الثانوية العامة الجديد 2024

أكدت وزارة التربية والتعليم على وجود تعاون بينها وبين وزارة التعليم العالي، لوضع معايير وخطة عمل لتطبيق النظام الجديد، وإنه هيتم عقد حوار مجتمعي موسع، لإجراء التعديلات المناسبة، وبعدها يتعرض نظام الثانوية العامة الجديد 2024 على مجلس الوزراء، عشان يتم مناقشته بعدها في البرلمان. 

لكن في الوقت الحالي، هنلاقي بعض الملامح الأولية للنظام دا، واللي بتتمثل في: 

• بيسمح النظام الجديد للطالب إنه يحصّل مواده الدراسية في سنتين بس بدل 3، لو كان يقدر على دا. 
• يقدر كل طالب إنه يختار المسار الدراسي اللي بيتناسب مع ميوله، وقدراته، وطموحاته المستقبلية. 
• بيقدر الطالب إنه يغير مسار دراسته بدون تعقيد أو إجبار على استكمال مسار غير مرغوب فيه. 
• بيسمح النظام الجديد لأي طالب إنه يحسن من مجموعه اللي حصل عليه في الفرصة الأولى. 
• بتتعمل عدة تقييمات مختلفة على مدار السنة لطالب الثانوية، عشان تحدد نتيجته وقدراته. 
• بيمنح نظام الثانوية العامة الجديد 2024 الحرية للطالب في اختيار الكلية اللي حابب يدخلها. 
• بيشمل النظام ربط بين المواد الدراسية، ومجالات ريادة الأعمال، والذكاء الاصطناعي. 
• بيساعد الطالب على زيادة قدرته في التعلم الذاتي، والبُعد عن الدروس الخصوصية. 
• يمكن لأي طالب إنه يجمع بين مسارين بس بحد أقصى، من المسارات الأربعة. 
• بيعمل النظام الجديد على الربط بين النظام التعليمي، وسوق العمل. 
• بيمد الطالب بالمهارات والمعرفة اللازمة لمواكبة وظائف المستقبل. 
• بيتم امتحان الفرصة الأولى على نفقة الدولة، تمامًا زي الوضع الحالي. 
• بيستهدف إنهاء طرق التشعيب، وتغيير ثقافة الحفظ والتلقين. 
• بيشمل تعديل قواعد التنسيق، وطرق الالتحاق بالجامعات. 

وفي خلال تصريحات من وزارة التربية والتعليم، والتعليم الفني لتوضيح الأمر أكتر، أشارت إلى إن النظام الجديد بيسعى للاستفادة من مناهج مدارس النيل الدولية، واللي شهادتها معتمدة من جامعة كامبريدج، ومعترف بيها من الدولة المصرية. 

وتقدر تعرف أكتر عن مدارس النيل من خلال مقال: مصاريف مدارس النيل المصرية. 

مسارات نظام الثانوية العامة الجديد 2024

بتنقسم مسارات الثانوية العامة في النظام الجديد إلى 4 مسارات، واللي هما: 

1- مسار العلوم الإنسانية

المسار دا بيأهل الطالب للالتحاق بكليات الآداب، واللغات، والعلوم الاجتماعية. 

2- مسار القطاع الطبي

بيركز المسار دا على دراسة المواد العلمية اللي بتأهل الطالب للالتحاق بكليات الطب، والصيدلة، وطب الأسنان. 

3- مسار القطاع الهندسي

أما عن المسار التالت من مسارات نظام الثانوية العامة الجديد 2024 فهو بيركز على دراسة الرياضيات، والعلوم الفيزيائية، والكيمياء، وبيأهل الطالب للالتحاق بكليات الهندسة المختلفة. 

4- مسار الذكاء الاصطناعي

والمسار الرابع اللي بيعد إضافة نوعية جديدة لنظام الثانوية العامة وهو مسار الذكاء الاصطناعي، واللي بيركز على دراسة مبادئ الذكاء الاصطناعي وتطبيقاته، وبيأهل الطالب للالتحاق بالتخصصات الحديثة في المجال دا. 

كل مسار من الأربعة بيتضمن دراسة 4 مواد أساسية، اتنين منها بيتخصصوا في تأهيل الطالب للالتحاق بكليات بعينها، والاتنين التانيين بيضمنوا حصول الطالب على المعارف، والمهارات اللازمة لمواصلة تعليمه العالي. 

موعد تطبيق نظام الثانوية العامة الجديد 2024

نفت وزارة التربية والتعليم خبر تطبيق النظام الجديد دا في الوقت الحالي، وأكد الدكتور “رضا حجازي” استمرار العمل بنظام الثانوية العامة الحالي، لحد صدور قرار وزاري خاص بتغيير النظام. 

وزي ما قولنا من شوية إن في مراحل هتسبق عملية تطبيق النظام الجديد دا، فحاليًا بتتعاون وزارة التربية والتعليم والتعليم الفني مع وزارة التعليم العالي، لإعداد ووضع المعايير الخاصة بالنظام الجديد.

وبعدها هيتم عقد حوار مجتمعي موسع لإجراء التعديلات عليه، ثم هيتعرض على مجلس الوزراء، ثم على مجلس النواب في المرحلة الأخيرة. 

والمراحل دي كلها أكيد هتاخد وقت، فبالتالي النظام دا مش هيتطبق قبل 3 سنين، وقال الوزير “رضا حجازي” إنه من المنتظر تطبيق النظام دا على الصف الأول الثانوي للعام الدراسي 2027/2028، وهيستمر معاهم عشان يوصل للصف الثالث الثانوي في العام الدراسي 2029/2030. 

الموقف من الدروس الخصوصية

من أهم أهداف نظام الثانوية العامة الجديد 2024 هو القضاء على فكرة الدروس الخصوصية، الفكرة اللي انتشرت بشكل كبير جدًا من سنين في المجتمع المصري، وبقى الدرس هو الأساس، واعتماد الطالب عليه بشكل كبير مش على المدرسة. 

ودا هدف اشتغل عليه النظام القديم، والوزراة خلال السنين اللي فاتت قفلت عدد كبير من مراكز الدروس الخصوصية، وطبقت غرامات كبيرة على أصحابها عشان يلتزموا بقرارات الإغلاق، لكن للأسف مع كل الأنظمة والعقوبات دي، استمرت الدروس الخصوصية زي ما كانت، واستمر اعتماد الطالب عليها، 

ودا عكس اللي وزير التعليم السابق كان متوقعه، بل في فئة شايفة إن الدروس الخصوصية زادت وانتشرت بشكل أكبر بسبب التغيير في الأنظمة، عشان يقدر الطالب يواكب التغيير اللي بيحصل دا، وينجح في النظام التراكمي. 

التغيير بيتطلب خطوات كتيرة، ومجهودات كبيرة عشان يظهر أثره فعلًا، وعشان يرجع الطالب المصري يعتمد على المدرسة بالكامل زي زمان.

فلازم يمر نظام التعليم بتغييرات جذرية، تقدر تغير الفكرة السائدة عند أغلبية الناس، ودا اللي منتظرينه يتحقق من خلال النظام الجديد. 

الخلاصة

نظام الثانوية العامة الجديد 2024 بيلغي فكرة التشعيب المعروفة، وبيعتمد على تقسيم مرحلة الثانوية العامة إلى 4 مسارات محددة، وكل مسار منهم بيؤهل الطالب للالتحاق بكليات معينة خاصة بالمسار دا، ومن حق أي طالب إنه يدمج في الدراسة بين أي مسارين منهم. 

وكل مسار من الأربعة، بيتضمن دراسة 4 مواد رئيسية، اتنين منهم متخصصين في المسار التعليمي اللي الطالب اختاره، والاتنين التانيين بيختصوا بتأهيل الطالب لمواكبة التغييرات العالمية الحديثة الخاصة بسوق العمل، ومن حق أي طالب يغير مساره عادي لو اكتشف إنه اختار مساره غلط في البداية. 

وعلى الرغم من عدم الاستقرار التام بخصوص نظام الثانوية العامة الجديد 2024، إلا إن كل دي ملامح من المتوقع هيتم تنفيذها قريب بشكل نهائي، وفي الأحوال اللي زي دي، فمن الضروري إننا ندعم أي محاولة لتطوير وتحسين نظام التعليم المصري، لحد ما نوصل للنظام الأمثل.