شروط مدارس ستيم للتقديم عام 2024-2025

مدارس STEM بتفتح أبوابها كل سنة لجميع الطلبة الحاصلين على الشهادة الإعدادية اللي بيهتموا بتطوير نفسهم في العلوم والتكنولوجيا، عشان تساعدهم على تنمية مهاراتهم، وتأهلهم للالتحاق بالكليات العلمية. 

لكن عشان الطالب يتقبل في نظام مدراس ستيم، لازم ينجح في امتحانات القبول اللي بتتعمل بعد ملء استمارات التقديم، ويحقق باقي الشروط المطلوبة. 

في المقال ده هنتعرف بالتفصيل على شروط مدارس ستيم للعام الدراسي 2024-2025، وازاي نقدر نأهل طلبة المرحلة الإعدادية للالتحاق بيها. 

ماذا يعني نظام STEM؟

نظام STEM هو نظام تعليمي أمريكي الأصل، اتطبق في مصر من حوالي 10 سنين، واتبنت مدارس مخصوصة ليه في العديد من المحافظات، تحت إشراف وزارة التربية والتعليم. 

النظام بيعادل الثانوية العامة في مصر، وبيهدف لرعاية الموهوبين والمتفوقين في العلوم، والرياضيات عن طريق التعليم من خلال المشاريع، والأنشطة على مدار العام الدراسي. 

الدراسة في النظام دا تابعة لشروط مدارس ستيم العالمية، وبالتالي بتكون معتمدة على الطالب بشكل أساسي، لإنه بيكون مسئول عن البحث وتحضير المعلومات عن دروس المنهج، وشرحها لمجموعة من زمايله في حضور مشرف المجموعة. 

كمان لازم يشارك في المشروع اللي بيطّلب منه كل فصل دراسي ويفهمه كويس، ويحاول يفكر في حلول منطقية للمشاكل الموجودة فيه، لأن المشروع دا هو اللي هيحدد الطالب هينجح ولا لأ. 

وعشان تقدر تفهم قيمة النظام التعليمي دا، يكفي نقولك إن التوقعات بتشير لنمو فرص التوظيف في قطاعات العلوم، والتكنولوجيا، والهندسة، والرياضيات (STEM) بنسبة 10.8%، في الفترة بين 2022 إلى 2032، مقارنةً مع نمو بنسبة 2.3٪ بس لجميع المهن الأخرى، ودا وفقًا لإحصائيات “Bureau of Labor Statistics“. 

مناهج مدارس ستيم

قبل ما نتكلم عن شروط مدارس ستيم اللي وضعتها الإدارة للتقديم، فخلينا الأول نتعرف على المناهج فيها، وطريقة الدراسة. 

فمدارس ستيم هي مدارس ثانوية حكومية أو خاصة، والدراسة فيها بتستمر لمدة 3 سنوات زي الثانوية العامة عادي، لكن الفرق إن المناهج في مدراس ستيم بتعتمد بشكل كبير على التفكير زي ما قولنا، ومفيش مجال لنظام حفظ المعلومات اللي موجود في الثانوية العامة. 

الطالب بيدرس في السنة الأولى 10 مواد أساسية زي: الفيزياء، والكيمياء، والرياضيات، واللغة الإنجليزية، وغيرهم، لكن المناهج بتكون مختلفة عن المدارس الحكومية، دا غير إن الدراسة مستمرة طول الأسبوع لأنها مدرسة داخلية. 

وفي السنة التانية بيختار الطالب الشعبة اللي حابب يكمل فيها، سواء كانت شعبة علمي علوم أو علمي رياضة، زي ما بيحصل في نظام الثانوية العامة كدا، لكن الشعبة الأدبية مش بتكون موجودة لأن المدرسة مهتمة فقط بالمتفوقين في العلوم والتكنولوجيا. 

المدرسة نموذج لدمج التكنولوجيا بالعملية التعليمية، وفي نهاية الدراسة بتمنح المدرسة الشهادة الثانوية المصرية في العلوم والتكنولوجيا للخريجين منها. 

شروط مدارس ستيم 2024-2025

مدارس STEM بتتيح فرصة الالتحاق بيها لجميع الطلبة الحاصلين على الشهادة الإعدادية، بس لازم الأول يحققوا كل الشروط المطلوبة، عشان تتأكد إن الطالب هيقدر يتأقلم مع نظام الدراسة الجديد. 

وبالنسبة لشروط مدارس ستيم للتقديم فهي: 

1. أن يكون الطالب مصري الجنسية

أول شرط لازم يتحقق هو إن الطالب يكون مصري، لإن المدارس دي مش بتقبل أي طالب غير مصري.

2. ألا يزيد عمر الطالب عن 18 عام

نظام ستيم بيحدد إن عمر الطالب لازم ما يتخطاش 18 سنة في 1 أكتوبر، وإلا هيكون الطالب فقد شرط مهم من شروط مدارس ستيم، وأصبح غير مؤهل للالتحاق بمدارس ستيم للمتفوقين. 

3. الحصول على الحد الأدنى للقبول

أحد أهم شروط مدارس ستيم هو إن الطالب لازم يحصل على الحد الأدنى للقبول اللي بتحدده إدارة المدرسة أو يتخطاه، عشان يقدر يلتحق بيها. 

مدارس ستيم بتطلب مجموع 95% كحد أدنى مع الحصول على الدرجة النهائية في مادة واحدة من الـ 3 مواد دول: (رياضيات، ولغة إنجليزية، وعلوم)، أو الحصول على مجموع 98%، وساعتها بيتلغي شرط الحصول على الدرجة النهائية في مادة من التلاتة. 

لو الطالب مجموعه أقل من الحد الأدنى لكنه حاصل على براءة اختراع، بيتم إلغاء الشرط دا، وفي حالة تحقيق باقي شروط مدارس ستيم بيتم قبوله. 

4. اجتياز امتحانات القبول

بعد ملئ استمارات التقديم في مدارس ستيم بيتم تحديد موعد لإجراء امتحانات القبول، وبيتم توزيع الطلبة على المدارس الحكومية لإجراء الامتحانات دي، وبتكون إلكترونية بنظام الاختيار من متعدد (MCQ). 

الامتحانات دي هدفها اختبار مستوى الطالب في 4 نواحي: 

• القدرات الذهنية. 
• اللغة الإنجليزية. 
• الرياضيات. 
• العلوم. 

المعلومات المطلوبة بتكون تراكمية، فطبيعي إن بعض الأسئلة هتكون صعبة على الطالب، لكن لازم يحصل على درجة عالية لأن أعلى الدرجات بس هي اللي بتتقبل. 

ولو الطالب اجتاز الامتحانات دي مع تحقيق باقي شروط مدارس ستيم، بيسلم ورقه لمدرسة من المدارس التابعة لنظام ستيم حسب الرغبات اللي كتبها، ودرجاته في الامتحانات دي. 

شروط مدارس ستيم 2024 وارد جدًا يحصل فيها تعديلات على مدار السنين الجاية، فلازم الطالب يقرأ الشروط كويس قبل ما يقدم في النظام دا. 

بالتالي عشان الطالب يقدر يدخل مدارس ستيم لازم يكون في تأهيل أثناء الدراسة الإعدادية للطلبة المتفوقين في العلوم والتكنولوجيا؛ عشان يقدروا يتأقلموا مع نظام الدراسة في مدارس ستيم بسهولة. 

اقرأ أيضًا: مشاكل مدارس ستيم في مصر 2023. 

تأهيل طلبة الإعدادية للالتحاق بمدارس المتفوقين

طالب مدرسة ستيم دايمًا في بداية التحاقه بالمدرسة بيحس بفجوة كبيرة بين نظام دراسته في السنوات اللي فاتت، ونظام الدراسة في ستيم. 

وفي الحالة دي يا إما بيحاول يتأقلم مع النظام الجديد، أو بيفكر في التحويل لمدرسة تانية بتطبق نظام التعليم التقليدي عشان يقدر ينجح. 

وعشان نأهل طلبة الإعدادية للالتحاق بنظام STEM لازم نهتم بكذا حاجة، زي: 

1- تطوير مهارات الطالب

مهارات التواصل، والمشاركة، والعمل الجماعي، وتكوين العلاقات، كلها مهارات أساسية لازم نهتم بتطويرها عند طالب المرحلة الإعدادية، لأنها هتساعده في التعامل مع زمايله مستقبلًا في مدارس ستيم. 

كمان مهم إننا نوجه اهتمامه أكتر ناحية التفكير والإبداع، ونعلمه ازاي يفكر صح ويدور على المعلومات، وازاي يعتمد على نفسه في التعليم، عشان يقدر ينجح في النظام الجديد اللي هيدخل عليه، ويحقق أهم شروط مدارس ستيم وهو اجتياز اختبارات القبول. 

2- الاهتمام برفع مستواه الدراسي

اجتهاد طالب المرحلة الإعدادية في دراسته شيء أساسي عشان يقدر يدخل مدارس ستيم؛ لأن من شروط مدارس ستيم الحصول على مجموع عالي في السنة السابقة لالتحاق الطالب بـ STEM. 

ولو مجموع الطالب كان أقل منه مش بيقدر يدخل المدرسة إلا لو حاصل على براءة اختراع زي ما وضحنا. 

3- تحسين اللغة الإنجليزية

لازم الطالب يطور من لغته الإنجليزية وهو في المرحلة الإعدادية، ويبدأ ياخد كورسات ويطبق، لإن الدراسة بتكون باللغة الإنجليزية، ودي واحدة من النقاط اللي البعض بيشوفها من عيوب مدارس ستيم. 

ولكن اللغة الإنجليزية مش هي أكبر مشكلة؛ لإن مع الممارسة والتعود على نظام الدراسة في ستيم بتبدأ المشكلة دي تختفي. 

4- تحديد مدى قابليته لنظام التعليم في مدارس STEM

من المهم إننا نوضح للطالب إن طريقة التعليم في ستيم هتكون معتمدة على التفكير بطريقة منطقية، وبعيدة جدًا عن الحفظ المعتاد، وأغلب الدراسة هتكون عبارة عن أنشطة ومشاريع هيعملها على مدار السنة. 

علشان كدا أهم من تحقيق شروط مدارس ستيم اللي حددتها المدرسة، هو التأكد إذا كان الطالب مستعد فعلًا لخوض التجربة دي ولا لأ. 

الأوراق المطلوبة للتقديم

طالما اتكلمنا عن شروط مدارس ستيم للتقديم، يبقى لازم كمان تعرف إيه هي الأوراق المطلوبة، عشان لو قررت تقدم لابنك فيها، وهي: 

• شهادة صحية مُعتمدة بكشف طبي من مستشفى حكومي أو التأمين الصحي. 
• أصل الشهادة الإعدادية معتمدة من الإدارة التعليمية + 4 صور منها. 
• إيصال دفع تأمين اللاب اللي بيستلمه الطالب من المدرسة. 
• صورة طبق الأصل من شهادة إتمام الدراسة الابتدائية. 
• 10 أظرف بريدية عادية، و3 أظرف بلاستيكية بكبسولة. 
• صورة من بطاقة الرقم القومي لولي الأمر. 
• إيصال سداد المصروفات الدراسية. 
• أصل شهادة الميلاد + 4 صور منها. 
• تحليل فصيلة دم وسكر تراكمي. 
• طابع تعليمي، وطوابع بريد. 
• 8 صور حديثة للطالب 4*6. 
• تحليل صورة دم كاملة. 

في حالة وفاة الوالد بتقدم شهادة الوفاة للمدرسة، وصورة من الوصاية أو الولاية التعليمية، أما في حالة سفر الأب، فهتقدم بصورة من التوكيل الرسمي. 

حسب شروط مدارس ستيم فعادةً بتبدأ مواعيد التقديم في المدرسة من منتصف شهر يوليو، وبتستمر لحد منتصف شهر أغسطس، وبيتم إعلان نتائج القبول في منتصف سبتمبر. 

مستقبل طلبة STEM 

مدارس STEM بتأهل خريجيها للالتحاق بالكليات العلمية المختلفة، فبالنسبة لخريجي شعبة علمي علوم بيكون قدامهم فرصة الالتحاق بكليات: 

• العلاج الطبيعي. 
• الطب البيطري. 
• الطب البشري. 
• الصيدلة. 
• الأسنان. 
• العلوم. 

أما عن خريجي شعبة علمي رياضة فيقدروا يدخلوا كليات: 

• حاسبات ومعلومات. 
• الهندسة. 
• العلوم. 

مدارس ستيم بتتيح فرصة الالتحاق بالجامعات طبعًا بعد تطبيق النسبة المرنة، والنسبة دي بتتغير كل سنة على حسب عدد الناجحين في النظام ده، والناجحين في نظام الثانوية العامة. 

وبالتالي إذا كان الهدف الوحيد للطالب من دخوله مدارس ستيم هو الحصول على كلية علمية معينة فالأفضل بالنسبة له إنه يلتحق بنظام الثانوية العامة لأن فرصته في دخول الكلية دي هتكون أكبر. 

أما لو كان هدفه هو التفوق في المجال العلمي بوجه عام، بدون تحديد لكلية معينة فنظام STEM هيساعده يحقق هدفه، وهيتيح له كلية عملية في النهاية. 

وبجانب الكليات العلمية اللي ممكن يدخلها الطالب من نظام ستيم، بنلاقي إن المدارس دي بتزود فرصة قبول خريجيها في المنح الدراسية الخارجية. 

اعرف كمان عن: أشهر أنظمة التعليم الحديثة في مصر ومُميزات كل منها. 

الخلاصة

مدارس STEM هي أحد المدارس الموجودة في مصر، اللي نظامها بيتيح للطلبة تطوير مهاراتهم والتفوق في المجالات العلمية المختلفة، وشهادتها بتعادل شهادات مدارس الثانوية العامة، فبتأهل الطلبة للالتحاق بالكليات العلمية لكن بعد تطبيق نظام النسبة المرنة. 

وبنلاقي إن أبرز شروط مدارس ستيم لعام 2024 هي إن عمر الطالب ما يزيدش عن 18 سنة في الأول من أكتوبر لسنة التقديم، وإنه يكون حاصل على الشهادة الإعدادية بمجموع أعلى من أو يساوى الحد الأدنى المطلوب، بالإضافة إلى اجتياز جميع اختبارات القبول اللي بتحددها المدرسة. 

ومن هنا لازم ولي الأمر يتأكد إن ابنه مستوفي كل الشروط عشان يتقبل، وكمان محتاج يفكر مع ابنه في كون المدرسة مناسبة ليه ولا لأ، ويتفقوا على قرار واحد قبل ما ياخد خطوة التقديم.

وطبعًا لو محتاج تسأل عن أي معلومة تخص مدارس ستيم ما تترددش تسألنا.