الخوف من الامتحانات عند الأطفال | الأسباب، والأعراض، وكيفية التغلب عليه

بالرغم من أهمية الامتحانات لتقييم المستوى الدراسي للطفل، والاهتمام بمعالجة نقط الضعف عنده، إلا إن الخوف من الامتحانات عند الأطفال بيسبب مشاكل كتير، لإن التوتر الناتج عن الخوف دا بيسبب ضعف في مستوى الطفل خلال الامتحان، وأوقات بيوصل الموضوع لأمراض ومشاكل صحية. 

رهبة الامتحانات بتمثل تحدي منقدرش نتجاهله، لإنها مش مجرد مرحلة عابرة، دي تجربة ممكن يتعرض لها أي حد من أول يوم دراسي، وتأثيرها بيكون عميق على عقل كل طفل، والتجربة دي ممكن تنقلب لعائق كبير للتعلم لو اتعاملنا معاها من غير فهم وما قدمناش الدعم المناسب لأطفالنا. 

عشان كدا في المقال دا هنتكلم عن أسباب الخوف من الامتحانات عند الأطفال، وأعراضه والمشاكل اللي ممكن تترتب عليه، وفي النهاية هنقدملك نصايح للتغلب على المشاكل دي، عشان تحمي طفلك من الانهيار اللي ممكن يتعرضله بسبب الضغط الكبير اللي عليه. 

أسباب الخوف من الامتحانات عند الأطفال 

معظم الطلاب بيعانوا من القلق والتوتر قبل الامتحان أو أثناء الامتحان نفسه، وأحياناً بيزيد الموضوع عشان يوصل لنوع من العصبية اللي بتأثر على حياته كلها خلال فترة الامتحانات، ودي اللي بنسميها “رهاب الامتحانات – examinophobia”، واللي بتأثر على الطفل من كل الجوانب، نفسياً، وعاطفياً، واجتماعياً. 

وأحسن طريقة للتخلص من الخوف من الامتحانات عند الأطفال هي إننا ندور على الأسباب اللي بتأدي للحالة دي ونعالجها، وهنا ممكن ناخد مدرسة “ASPAM” الاسكتلندية كمثال، واللي بتنظم جلسات بشكل مستمر مع طلابها لمناقشة المشاكل اللي بتواجههم. 

ومن أهم المشاكل اللي بيناقشوها دايماً في جلساتهم هي “الخوف من الامتحانات”، وذكر موقع المدرسة “5 أسباب شائعة لخوف الأطفال من الامتحانات“، وهي كالتالي: 

1- الاستعداد غير الكافي 

المشكلة دي بتنتج عن قلة مذاكرة الطفل لمواده الدراسية، أو ضعف انتباهه لشرح المدرس في الفصل، ودي حاجات بتأثر على استعداده للامتحانات، لإنه أثناء حل الامتحان بيحس بالضغط وبالتالي ممكن حتى ينسى أجزاء من اللي ذاكرها كويس بسبب التوتر دا. 

اقرأ أيضًا: أهم خطوات الاستعداد للاختبارات للأطفال

2- المعتقدات السلبية 

دي واحدة من أبرز أسباب الخوف من الامتحانات عند الأطفال، واللي بتنتج بسبب مخاوف الطفل من حاجات ملهاش وجود من الأساس، زي إنه يشك في نفسه، وما يثقش في قدرته على النجاح رغم كل الجهود اللي بذلها في مذاكرته. 

وكمان بيخاف إنه ما يحققش درجات عالية في الامتحان، فتقل قدرته على المنافسة مع زمايله، ودي كلها معتقدات خاطئة، بتخلق عبء وقلق غير ضروري أثناء فترة الامتحانات.  

3- ضغط غير مبرر 

بيبدأ الطفل يحس بضغط مالهوش لازمة بسبب التوقعات العالية اللي بيفرضها عليه أهله، ومدرسينه، وأصحابه، ومعارفه، والضغط دا بيأدي لحالة من التوتر والخوف من المجهول، واللي بيأدي في النهاية للخوف المرضي من الامتحانات. 

اقرأ أيضًا: أسباب عدم التركيز في المذاكرة عند الأطفال وكيفية التغلب عليها. 

4- الخوف من الرسوب  

أحد أشهر أسباب الخوف من الامتحانات عند الأطفال هو الخوف من الرسوب، وبيوصل الخوف دا عند أطفال كتير لدرجة كبيرة جداً من فقدان التركيز، واللي بدوره بيأثر على قدرة الطالب على الفهم، وبيخلق عنده خوف من الامتحان ممكن بسببه يحل غلط رغم إنه كان عارف الإجابة الصح من قبل كدا. 

5- ضعف الثقة بالنفس 

ضعف الثقة في النفس وعدم احترام الذات بيعد سبب إضافي لكل اللي ذكرناه، فلما يكون الطالب غير متأكد من استعداده وتخطيطه للامتحانات، بيميل للارتباك، وبيفشل في التعامل مع ورقة الامتحان بشكل صحيح، وبالتالي بتتأثر درجاته بشكل كبير. 

وبالإضافة للأسباب اللي ذكرتها المدرسة، فدي أسباب تانية ممكن تأدي لحالة من الخوف من الامتحانات عند الأطفال، وهي: 

• المنافسة مع زمايله، خصوصًا لو درجة الامتحان هتأثر على اختيار المدرسة في المرحلة اللي بعدها. 
• سوء التغذية، والأكل غير الصحي، زي: الوجبات السريعة، والسكريات، والكافيين، والدهون. 
• النوم غير المنتظم، وقلة حصول الطفل على فترات راحة كافية من وقت للتاني. 
• العقاب النفسي أو البدني اللي ممكن يتعرض له الطفل في المدرسة. 
• المماطلة والتسويف، بسبب الخوف من ضخامة المنهج الدراسي. 

اقرأ أيضًا: أبرز 16 طريقة لزيادة الثقة بالنفس عند الأطفال

في النهاية دي كلها أسباب نقدر نتغلب عليها لو قدمنا الدعم المناسب للطفل، ووفرنا له الظروف المناسبة للمذاكرة، والاستعداد للامتحانات، وتقدر تعرف تفاصيل أكتر عن دا من خلال مقال: الاستعداد للاختبارات. 

أعراض الخوف من الامتحانات عند الأطفال 

نقدر نقسم أعراض الخوف من الامتحانات لـ 3 أنواع كالتالي: 

1- الأعراض الجسدية 

• ضربات قلب سريعة. 
• التعرّق والغثيان. 
• جفاف الفم.
• الإسهال. 
• الإغماء. 

2- الأعراض العاطفية 

• الشعور بعدم الكفاءة، وعدم الرضا. 
• الشعور بالعجز واليأس. 
• قلة احترام النفس. 
• الغضب والاكتئاب. 

3- الأعراض المعرفية والسلوكية 

• الحديث السلبي مع النفس. 
• تجنب حضور الامتحانات. 
• ضعف الثقة بالنفس. 
• الملل والنسيان. 

الخوف من الامتحانات عند الأطفال هو ظاهرة شائعة جداً في كل دول العالم، وبنلاقي إن حوالي من 25 لـ 40% من الطلاب الأمريكيين بيعانوا من اضطرابات قلق الامتحانات، ودا وفقًا للإحصائية اللي نشرها موقع “NIH” في مقاله عن “قلق الاختبار والعوامل المرتبطة بيه“. 

نصائح للتغلب على الخوف من الامتحانات عند الأطفال 

التغلب على ظاهرة الخوف من الامتحانات بيكون مسئولية مشتركة بين الطفل والوالدين، وعشان كدا بنقسم النصايح بتاعتنا لجزئين كالتالي: 

نصائح للوالدين 

الأهل ليهم دور كبير جداً في تهيئة الجو العام للطفل عشان يذاكر ويتغلب على خوفه من الامتحانات، ودا ممكن يتم عن طريق: 

• اتكلم معاه قبل الامتحان، وهيئه نفسياً ليه، وفهمه إنه مجرد اختبار بسيط عن الحاجات اللي ذاكرها. 
• ادعم طفلك للتخلص من التوتر، وما تضغطش عليه عشان يحقق درجات معينة أعلى من قدراته. 
• متتكلمش عن صعوبة الامتحانات ولا عن الخوف منها قدام الطفل، عشان دا بيزود من توتره. 
• امدح أداء طفلك، وقدّر مجهوده، وفهمه إنك بتحبه أياً كانت نتيجة امتحاناته في النهاية. 
• وفرّ له أجواء منزلية هادية، بعيدة عن المشاكل العائلية، لأنها بتشتت انتباهه. 
• تجنب استخدام أسلوب الترهيب مع الطفل، أو عقابه على نتيجة الامتحانات. 
• تجنب مقارنة درجاته مع درجات زمايله، لأنها حاجة بتقلل من احترامه لنفسه. 
• اديله مساحة من الوقت للعب والترفيه، عشان ميزهقش من المذاكرة. 
• ما تقعدش جنبه كتير أثناء المذاكرة، عشان دا بيحسسه بالضغط. 
• اهتم بتغذيته على أسس سليمة، وابعده عن الوجبات الجاهزة. 
• ساعده على تنظيم وقته. 

نصائح للطفل نفسه 

هنتكلم هنا عن بعض النصائح اللي بتساعد في تقليل الخوف من الامتحانات عند الأطفال، لكن ضروري نفهم إن لو الطفل لسه في مراحل طفولته الأولى، فهو برضو محتاج مساعدة والديه في تنفيذ النصائح دي، واللي منها: 

• تنظيم وقت المذاكرة، وقضاء وقت الراحة في ممارسة الهوايات المفضلة. 
• ممارسة التمارين البسيطة، زي التنفس بهدوء لإزالة الخوف والتوتر. 
• البعد عن الأصدقاء المتوترين باستمرار، وأصحاب الطاقة السلبية. 
• حل تمارين وامتحانات سابقة كتير في البيت قبل دخول الامتحان. 
• تجنب السهر لساعات متأخرة من الليل، والنوم بشكل منتظم. 
• ممارسة الرياضة في البيت. 

لو النصائح دي كلها ما جابتش نتيجة فعلية مع الطفل لتقليل توتره وقلقه، يبقى من الضروري ساعتها استشارة طبيب نفسي متخصص في الحالات اللي زي دي. 

الخلاصة 

الخوف من الامتحانات عند الأطفال بيشكل جزء كبير ومهم من رحلتهم التعليمية، وفهم أسباب الخوف دا والتعرف على العلامات التحذيرية اللي بتشير لوجوده هو الخطوة الأولى لتقديم الدعم الفعّال والمناسب. 

وبيظهر هنا دور الوالدين بشكل أساسي في مساعدة أطفالهم للتغلب على الخوف دا، عن طريق تحفيز الطفل على المذاكرة، وتحديد أهداف واقعية معاه، وتعليمه كيفية التغلب على التوتر والقلق، وزيادة ثقته في نفسه. 

كمان الاستراتيجيات الحديثة زي طُرق التنفس، وتعلم فنون الاسترخاء بتساهم بشكل إيجابي في تقليل الضغط، وزيادة التركيز، دا بالتوازي مع ممارسة النشاط البدني والرياضات المختلفة حسب هواية كل طفل، فمن هنا بنقدر نحول الصعوبات دي لفرصة مثالية للنمو والتطور.