أسباب رفض الطفل الذهاب إلى المدرسة كتيرة، وبتختلف من طفل للتاني، لأنها مشكلة عاطفية وسلوكية ممكن تحصل لأي طفل في سن المدرسة، ووقتها بيصدر منه تصرفات غريبة، ممكن توصل لإنه يدّعي المرض عشان بس يغيب عن حضور يوم دراسي واحد!
ففي حين إن بعض الأطفال بيحبوا الذهاب للمدرسة عشان يقابلوا أصدقائهم، ويستمتعوا بالوقت معاهم، بنلاقي إن في فئة تانية منهم بتشوف إن الذهاب للمدرسة هو إكراه ملوش أي علاقة بالمتعة، وبيكون عندهم قلق وخوف شديد من فكرة الذهاب للمدرسة، وبيوصل الموضوع أحيانًا للاكتئاب.
عشان كدا في المقال دا هنتكلم عن علامات وأسباب رفض الطفل الذهاب إلى المدرسة، وكيفية التعامل معاه في الحالة دي، وهنختم بنصائح تساعد الأطفال والأمهات على الاستعداد بشكل جيد للعودة للدراسة بعد إجازة الصيف.
علامات رفض الطفل الذهاب إلى المدرسة
لما بيوصل الطفل لحالة رفض الذهاب للمدرسة بتكون مشكلة كبيرة على الأم، لإنك بتحسي إن كل صباح مدرسي جديد هو عبارة عن معركة جديدة بتختبري فيها إرادتك، وإرادة الطفل، لحد ما تنتصري أنتِ وتنزليه للمدرسة، أو ينتصر هو ويغيب عنها.
ودا ممكن يوضحلنا بعد كدا جزء من أسباب رفض الطفل الذهاب إلى المدرسة، فمن أشهر العلامات دي بنلاقي:
- الشكوى من الأوجاع والآلام الوهمية قبل الذهاب للمدرسة، واللي غالبًا هتختفي لو سمحتي له يغيب.
- حبس الطفل لنفسه في غرفته، ورفض التحرك من مكانه.
- ظهور مستويات عالية من الخوف والقلق عند الطفل.
- توسل الطفل بعدم الذهاب للمدرسة.
- وجود مشاكل في النوم عند الطفل.
- البكاء، والصراخ، ونوبات الغضب.
- تهديد الطفل بإيذاء نفسه.
طبعًا أي أم لما بتشوف الحالة دي ممكن تتخض، وما تبقاش عارفة تتصرف ازاي مع طفلها، خصوصًا لما الطفل يهددِك بإيذاء نفسه، فمن هنا ضروري جدًا نفهم سبب المشكلة دي عشان نقدر نعالجها.
أسباب رفض الطفل الذهاب إلى المدرسة
رفض الطفل للمدرسة ممكن يبدأ تدريجيًا، وممكن يحصل فجأة، بس في النهاية لازم يحصل بسبب، ومن أشهر الأسباب اللي بيرفض الطفل الذهاب للمدرسة عشانها، بنلاقي:
1- الخوف من المدرسة
خوف الطفل من المدرسة ممكن يرجع لأسباب كتير، من أشهرها:
- تعرض الطفل للتحرش أو مشاهدته لواقعة مشابهة داخل المدرسة، وتهديده عشان يسكت.
- خوفه من صوت المعلم العالي، أو أسلوبه الغاضب.
- شعوره بعدم حب زمايله أو مدرسينه في المدرسة.
- تعرضه للإزعاج من أي شخص في باص المدرسة.
- تعرضه للضرب من أحد معلميه أو زمايله.
- تعرضه للتنمر من أصدقائه.
في الحالة دي بنحتاج نتأكد من مشاعر الطفل تجاه المدرسة، فممكن تطلبي منه يرسم المدرسة بالشكل اللي في خياله، ومن خلال مشاهدة الرسمة، ومراقبة سلوك الطفل ممكن نوصل لسبب خوفه من المدرسة.
2- قلق الانفصال عن الأهل
من أشهر أسباب رفض الطفل الذهاب إلى المدرسة هو خوفه وقلقه من فكرة فراقه للأم، وقضاء وقت طويل بعيد عنها، ودي حالة بتحصل أكتر عند الأطفال الصغيرة اللي لسه في مرحلة الروضة، وممكن تستمر فترة لحد المراحل الأولى في المدرسة.
وممكن تستعيني بمقال: كيفية ترغيب الطفل في الروضة، للتغلب على المشكلة دي من بدايتها.
3- المعاناة الأكاديمية
جزء كبير من الأطفال ممكن يحس بالمعاناة الأكاديمية، ودا مش بسبب قلة ذكائهم، لكن غالبًا بيخافوا مثلًا من الاختبارات، ويتوتروا أثناء الحل، فبتكون درجاتهم قليلة، ومن هنا بيكرهوا الاختبارات، وبيخافوا منها.
وممكن كمان كم المعلومات اللي بيتلقاه الطفل يوميًا في المدرسة يكون أكبر من قدرته على الاستيعاب، وبالتالي يحس إن دا حمل تقيل عليه.
4- عدم الرغبة في الاستيقاظ مبكرًا
دا واحد من أسباب رفض الطفل الذهاب إلى المدرسة اللي غالبًا بيحصل بسبب نشأة الطفل على عادات سيئة زي السهر لفترات طويلة من الليل.
وبالتالي لما تيجي تصحيه بدري للمدرسة، هيحس بنوع كبير من التعب والإرهاق اللي يخليه يكرهها ويرفض الذهاب ليها.
5- محاولة جذب الانتباه
في حالة إن الطفل حاسس بقلة اهتمام منك أو من زمايله ومدرسينه، فغالبًا هيحاول يجذب اهتمامكم من تاني، والغياب عن المدرسة ممكن يكون أحد طرق جذب الاهتمام حسب فهمه.
خصوصًا لو حصل قدامه قبل كدا إن حد من زمايله غاب عن المدرسة، وبعدها أصحابه قلقوا عليه واتصلوا بيه يطمنوا أو جابوا له هدايا.
فمن هنا بيفكر في إدعاء المرض والغياب عن المدرسة عشان يحصد اهتمامكم بيه من تاني.
6- تجنب التفاعلات الاجتماعية
ممكن يكون طفلك بيعاني من الرهاب الاجتماعي، أو الخجل والانطواء على نفسه، ودا بيسبب له خوف من التفاعل مع زمايله في المدرسة، أو خوف من استدعائه في الفصل للإجابة عن سؤال معين، ودي كلها حاجات ضمن أسباب رفض الطفل الذهاب إلى المدرسة.
7- كراهية الطفل للإجبار
الطفل مش بيقدر يتحكم في أي حاجة داخل المدرسة، وبيتطلب منه الحضور في وقت معين، والالتزام بقواعد المدرسة، والزي المدرسي .. إلخ.
ودي حاجة ضرورية جدًا طبعًا لمساعدة الطفل على النمو بطريقة سليمة وتكوين شخصية قوية، لكن الأطفال ما بيقدروش يشوفوها من المنظور دا.
8- الاستمتاع بالإجازة
من أهم أسباب رفض الطفل الذهاب إلى المدرسة هو رغبته في الاستمتاع بالإجازة في البيت بعيدًا عن دروسه وواجباته المدرسية، ودا مكسب كبير لأي طفل، ممكن يخليه يخترع أي سبب يغيب عشانه من المدرسة.
9- شعور الطفل بأنه لا فائدة من المدرسة
طبعًا المدرسة ليها فوايد كتير لا غنى عنها، لكن الطفل بيتساءل دايمًا عن الفوايد دي، ولو مش مُدركها هيبدأ يتعامل مع المدرسة والدراسة على إنها حاجة غير مرغوب فيها، وغير ضرورية.
وبيزيد التساؤل دا أكتر في أوقات التعب والإرهاق اللي ممكن تقابله في المدرسة، والمذاكرة، وبالتالي بيكون ضروري جدًا نفهمه أهميتها.
10- وجود مشاكل أسرية
ممكن تستغربي إن دا سبب يخلي الطفل عاوز يقعد في البيت بدل ما يهرب منه، لكن في أغلب الأوقات حضور الطفل للمشاكل الأسرية بيخليه يعاني أكتر من الرهاب الاجتماعي، ويخاف من مواجهة المجتمع الخارجي.
وبالتالي بيرفض يروح المدرسة، فضروري جدًا نبعد الأطفال عن المشاكل اللي زي دي.
كيفية التصرف عندما يرفض الطفل الذهاب إلى المدرسة
بعد معرفة أسباب رفض الطفل الذهاب إلى المدرسة، بيكون التعامل معاه أسهل، لأننا خلاص حددنا المشكلة وهنبدأ نشوف لها حلول واقعية وحاسمة، والحلول دي بتتمثل في:
1- معالجة سبب خوف الطفل من المدرسة
ذكرنا فوق إن الخوف هو أحد أسباب رفض الطفل الذهاب إلى المدرسة، وبالتالي حل الجزئية دي هيبدأ عن طريق إنك تتكلمي مع طفلك، وتفهمي منه سبب الخوف دا، وتحاولي تعالجيه.
فلو كان بيتعرض مثلًا للضرب من معلمه، أو للتنمر من أصدقائه، يبقى تتواصلي مع إدارة المدرسة، وتخليهم يحلوا المشكلة دي.
ولو طفلك بيخاف من الطريق أو حد بيضايقه في الباص، يبقى ممكن توديه المدرسة بنفسك، أو تغيري الباص وتبعتيه للمدرسة مع حد بتثقي فيه، وهكذا.
2- تقوية شخصية الطفل من البداية
عملًا بمبدأ “الوقاية خيرُ من العلاج”، فضروري تشتغلي من البداية على تقوية شخصية طفلك، وتدريبه على تحمل المسئولية، وبيساعدِك في دا إنك تاخدي رأيه في أمور مهمة، عشان يحس من بدري إن رأيه مهم، وإن طبيعي جدًا يعبر عن رأيه قدام الناس.
ضروري كمان تسيبيه يجاوب عن الأسئلة اللي بتتوجه له من قرايبكم أو من الطبيب بنفسه، ولو عنده مشكلة تخليه يشارك في حلها بدل ما تحليها أنتِ لوحدك.
وبالطريقة دي الطفل هيتعود على التعبير عن نفسه ورأيه، وهتقللي فرصة تعرضه لمشاكل الرهاب الاجتماعي، والخجل، والانطوائية، وهتزودي ثقته في نفسه.
3- الاهتمام بمواعيد النوم والتغذية الجيدة
لو أسباب رفض الطفل الذهاب إلى المدرسة متعلقة بضعف تركيز الطفل، أو رفضه للصحيان بدري، يبقى غالبًا الطفل اتعود على نظام حياة غلط جوه البيت، ولازم تبدئي تغيري له النظام دا، يعني هتحطي مواعيد نوم محددة ما ينفعش يخالفها، وتهتمي بتغذيته بالأكل الصحي.
واحرصي كمان على تعليمه مهارات تنظيم الوقت وإدارة المهام، عشان يعرف يقسم وقته كويس بين المدرسة، والمذاكرة، واللعب، وحددي معاه وقت معين للعب على الأجهزة الذكية، عشان الإفراط في استخدامه ليها بيزود عنده معدلات الخمول، والإرهاق.
4- منح الطفل الاهتمام اللازم
هنا أنتِ مُطالبة بإظهار اهتمامك بطفلك في كل حالاته مش وقت المرض بس، وإنك تعبري له عن حبك غير المشروط، وتقضي معاه وقت بشكل خاص بيه بس، من غير أي مشتتات لحد منكم، زي التلفزيون، أو الموبايلات، أو اللاب توب.
لأن دا هيخليه يفهم إن اهتمامِك بيه غير مرتبط بحدث معين، وبالتالي مش هيدور على أسباب غريبة يختلقها عشان يجذب اهتمامِك ليه مرة تانية.
5- تهيئة الطفل لمرحلة الدراسة
لو كانت أسباب رفض الطفل الذهاب إلى المدرسة بتتمثل في حبه للإجازة، أو كراهيته للالتزامات المدرسية، أو إحساسه بإن مفيش أهمية للدراسة، يبقى بالضرورة أنتِ ما هيأتيش طفلك صح للمرحلة دي.
والخطوة دي مهمة جدًا في تلاشي المشكلة من البداية، فمثلًا ممكن تاخدي طفلك معاكِ للمدرسة وأنتِ بتقدمي له فيها من البداية، وتطلبي من الإدارة إنه يشوف المدرسة ويتفرج عليها، وتبلغيه بالقواعد اللي لازم يلتزم بيها جوه المدرسة، وتوريله الزي المدرسي.
وكمان تعرفيه إن مش مسموح بدخول الآباء والأمهات للمدرسة بعد كدا، عشان ما يتفاجئش من حاجة زي دي فيما بعد، وتقللي من احتمالية رفضه الذهاب للمدرسة.
6- الحديث عن مميزات المدرسة
الخطوة دي ليها أهمية كبيرة في معالجة أسباب رفض الطفل الذهاب إلى المدرسة، لأن أي طفل في العالم بيستمد أفكاره ويشكل آرائه في بداية حياته من أهله.
وبالتالي لما هيشوف اهتمامك بالمدرسة، وكلامك الإيجابي عنها طول الوقت، هيبدأ يقتنع بدا، ويعرف أهميتها.
7- الاستمرار في إرسال الطفل للمدرسة
استجابتِك لطلب الطفل في الغياب عن المدرسة في كل مرة هيزود من صعوبة المشكلة، بل وهيظهر مشاكل أكبر منها كمان، لأن الطفل هيتعود على مواجهة مشاكله بالهروب منها، ودي حاجة هتضعف من شخصيته مع الوقت.
وبالتالي ضروري تستمري في إرسال طفلك للمدرسة أثناء بحثِك عن المشكلة اللي بتواجهه وحلها، لأن دا هيساعده في بناء ثقته بنفسه، وزيادة قدرته على التحمل والصمود.
8- التواصل مع الإدارة
تواصلِك مع إدارة المدرسة وطلب المساعدة منهم أمر ضروري، لأنهم مسئولين زيك بالظبط عن حل مشاكل الطلاب، والتوصل لطرق فعّالة تعالج أسباب رفض الطفل الذهاب إلى المدرسة، وخصوصًا لو الطفل بيشتكي من أحد معلميه، أو زمايله.
تصرفات لا يجب فعلها عند رفض طفلك الذهاب للمدرسة
لما الطفل بتحصل معاه المشكلة دي، بتظهر بعض التصرفات الخاطئة من أولياء الأمور، واللي لازم تعرفيها كويس، وتتجنبيها، لإنها هتزود المشكلة بدل ما تساعدِك في حلها، ومن أهم التصرفات دي:
- تقديم تهديدات وعقوبات مبالغ فيها، لإجبار الطفل على الذهاب للمدرسة.
- السماح للطفل باللعب في ميعاد المدرسة، وكأن مفيش حاجة حصلت.
- تغيير المدرسة أو المدرس، بالرغم من عدم وجود مشاكل ناتجة منهم.
- تهويل المشكلة، والتعامل معاها على إنها نهاية مستقبله الدراسي.
- تجاهل المشكلة، اعتمادًا على إن الطفل هيتعود مع الوقت.
- تقديم حلول سطحية، من غير أي معرفة بسبب المشكلة.
- ضرب الطفل والقسوة عليه، وحمله بالإجبار إلى المدرسة.
- الصراخ في وجه الطفل، وتعنيفه عشان يروح المدرسة.
- الاستجابة للطفل، وإبقاؤه في البيت لفترة طويلة.
دي كلها سلوكيات لو عملتيها فغالبًا هتزودي من أسباب رفض الطفل الذهاب إلى المدرسة، بدل ما تعالجيها، وبالتالي لازم تبتعدي عنها تمامًا، وتكوني هادية مع طفلك أثناء بحثِك عن سبب المشكلة، وحلها.
اقرئي أيضًا: أبرز الأخطاء الشائعة في تربية الأطفال وكيفية تجنبها.
نصائح لمساعدة الأطفال والأمهات على الاستعداد للمدرسة
من أشهر أسباب رفض الطفل الذهاب إلى المدرسة هو عدم تهيئته بشكل مناسب لدخولها أو للرجوع ليها بعد فترة الإجازة، وعشان كدا بنقدم شوية نصايح للأمهات، تقدري تتبعيها في فترة الإجازة، وهي كالتالي:
- تقليل الوقت المسموح بيه لمشاهدة التلفزيون، والأجهزة الإلكترونية خلال فترة الدراسة.
- تشجيع الطفل على قراءة كتاب واحد على الأقل، قبل بداية العام الدراسي الجديد.
- زيارة المدرسة مع الطفل في أول يوم لمساعدته على التعود على الأجواء.
- التحدث مع المدرسين، وسؤالهم عن أي مشاكل ممكن يواجهها الطفل.
- الرجوع لمواعيد النوم المعتادة في فترة الدراسة قبل أسبوع من بدايتها.
- توجيه الطفل لتحضير شنطة المدرسة بتاعته يوميًا قبل ما ينام.
- اصطحاب الطفل في عملية شراء الأدوات المدرسية اللازمة.
وتقدري كمان تطلعي على: أهم خطوات الاستعداد للاختبارات للأطفال.
الخلاصة
فهم أسباب رفض الطفل الذهاب إلى المدرسة هو أمر ضروري جدًا للوالدين، عشان يقدروا يساعدوا أطفالهم في التغلب على المشكلة دي، فمن خلال معرفة العوامل النفسية، والعاطفية، والمجتمعية، اللي بتأثر على الطفل وبتخليه يرفض الذهاب للمدرسة، هتقدروا توجهوا طفلكم وتساعدوه.
اهتمامك بالطفل في كل الأوقات، والاستماع ليه، وسؤاله عن مشاكله، وتقديم الدعم والحب غير المشروط، وتهيئته لمرحلة الدراسة، وتقوية شخصيته من البداية، دي كلها حاجات هتساعد طفلك جدًا في التغلب على أي مشكلة ممكن تقابله، مش بس رفضه للذهاب للمدرسة.
أضف تعليق