رغبتك إنك تكون أب مثالي لأولادك مش بالضرورة تكون كافية عشان تمنعك من ارتكاب بعض الأخطاء الشائعة في تربية الأطفال، ودا لإنه بالرغم من تمني الوالدين إن أطفالهم يكونوا أحسن منهم، إلا إنهم بشر في النهاية، وكل إنسان ممكن يغلط من وقت للتاني.
وطبعًا طريقة تعامل الأب والأم مع الطفل بتأثر بشكل مباشر على نموه، وتطوره، وسلوكه، وأحيانًا بيتعامل الوالدين عن طريق غريزتهم بس، عشان كدا بيكون طبيعي يغلطوا كتير خصوصًا لو دا الطفل الأول.
لكن مع الانفتاح وتعدد مصادر المعرفة في الوقت الحالي بقى أسهل على كل ولي أمر إنه يعرف أكتر عن الأخطاء الشائعة في التربية وإزاي يتجنبها.
وفي المقال دا هنكلمك عن أبرز الأخطاء دي، وازاي بتأثر على الطفل، وهنقدملك بعض النصائح اللي هتفيدك في تجنبها.
كيف يؤثر سوء التربية على الطفل؟
سوء تعامل الوالدين، وارتكابهم أحد الأخطاء الشائعة في تربية الأطفال مع أولادهم، ممكن يعرض الأطفال لمشاكل كتير بتأثر على صحتهم الجسدية والنفسية، زي:
1- المشاكل الجسدية
- ضعف الجهاز المناعي.
- السمنة.
- الصداع.
2- المشاكل النفسية
- قلة احترام الذات، وضعف الثقة بالنفس.
- قلة التركيز، وضعف الأداء الدراسي.
- نوبات الخوف المستمرة.
- السلوك العدواني.
- اضطرابات الأكل.
- القلق والاكتئاب.
أهم الأخطاء الشائعة في تربية الأطفال
مفيش أب أو أم بيحبوا يأذوا أطفالهم، إلا لو مرضى نفسيين مثلًا، لكن في الحالة الطبيعية مش هيكون عندهم رغبة في دا، وبتحصل أغلب الأخطاء دي عن طريق الغفلة، أو الصدفة، أو حتى الجهل بمعلومة مهمة كانت ممكن تفرق في طريقة التعامل مع الطفل.
ووفقًا لدراسة حديثة اتنشرت في “The Times of India” عن عدد الأخطاء اللي بيرتكبها الوالدين مع أطفالهم بنلاقي إن الوالد العادي بيرتكب حوالي 221 خطأ تربوي سنويًا، ودا معناه إنه بيرتكب ما يقرب من 4000 خطأ في الفترة ما بين ولادة الطفل وبلوغه سن الـ 18 عام.
عشان كدا هنكلمك عن أبرز الأخطاء الشائعة في تربية الأطفال اللي ممكن تقع فيها، ودورك إنك تتجنبها، واللي من أهمها:
1- الصراخ في وجه الطفل وتهديده بالعقاب
بيرتكب الأطفال أخطاء غير مبررة، زي إنه يوقع طبق الأكل في المطبخ، أو يكسر لعبة غالية مثلًا، وطبعًا دي حاجات بتدفع الأم غالبًا للخروج عن شهورها، والصراخ في وجه الطفل، وتهديده بالعقاب، ودي حاجة بتكون صعبة جدًا على الطفل ومش بيقدر يتحملها.
لأن الصراخ بيسيب عند الطفل آثار سلبية بتأثر على شخصيته، وبيخليها عدوانية أكتر، وبيضعف العلاقة بين الأم وابنها، وبيخليه مُعرض بشكل أكبر للاكتئاب.
عشان كدا ضروري إن الأم والأب يسيطروا على غضبهم، والكلام مع الطفل ومعاتبته يكون بهدوء.
2- المبالغة في تقدير حجم المشكلة أو التقليل منها
من أشهر الأخطاء الشائعة في تربية الأطفال هو تقدير حجم المشكلة بشكل خاطئ، وعدم التفريق بين المشكلة والسلوك الطبيعي للطفل حسب سنه، فلازم الأول تحدد إذا كان تصرف الطفل بيمثل مشكلة ولا لأ، ولو طلع بيمثل مشكلة فلازم تبدأ تتصرف بهدوء.
فمثلًا لو لقيت طفلك في سن المراهقة بيحاول يحس بنوع من الاستقلال، يبقى دا سلوك طبيعي لسنه، لكن لو لقيته بيسرق أو بيشرب سجاير، يبقى وقتها دي مشكلة كبيرة لازم تحلها معاه، بس بهدوء زي ما اتفقنا.
3- التفريق في المعاملة بين الأولاد
سواء كان التصرف دا بقصد أو لأ، فهو خطأ بيأثر بشكل سلبي جدًا على نفسية الطفل، وممكن يسببله مشكلة تلازمه طول حياته، ودي حاجة بتولّد نوع من الحقد والكراهية بين الإخوة، وعشان كدا ضروري إن الوالدين يعاملوا كل أبنائهم بنفس الطريقة، ويوزعوا حبهم وحنانهم عليهم بالتساوي.
4- عدم تحديد موعد ثابت للنوم
واحد من أكتر الأخطاء الشائعة في تربية الأطفال اللي بيضر صحة الطفل وسلوكياته هو السهر لأوقات متأخرة من الليل، ودي حاجة بيهملها أولياء أمور كتير بالرغم من أهميتها.
5- وضع توقعات غير منطقية
رفع سقف توقعات الوالدين لدرجة غير واقعية بيكون سبب كافي جدًا لاختلاق المشاكل، فمثلًا بتغضب الأم وتحس بالإحباط لمجرد إن طفلها اللي مكملش 6 سنين لسه بيبلل السرير بتاعه، أو إن ابنها المراهق متقلب المزاج.
فلازم تكون حاطط لنفسك توقعات واقعية، ومتماشية مع قدرات طفلك، ونموه، ومرحلته العمرية، لأن حتى الأطفال في نفس السن مش كلهم بيتصرفوا زي بعض.
6- الإهانة اللفظية أمام الآخرين
دا واحد من أكتر الأخطاء الشائعة في تربية الأطفال اللي بتقتل المشاعر الجميلة اللي بيحملها كل طفل لوالديه، لأنه بيحول العلاقة بينهم لعلاقة خوف وتهديد، بدل ما كانت هتبقى علاقة حب واحترام، ودا بيعد من أهم أسباب فقدان الثقة بالنفس والانطوائية عند الأطفال.
اعرف أكتر عن طرق زيادة ثقة الطفل بنفسه من خلال مقال: أبرز 16 طريقة لزيادة الثقة بالنفس عند الأطفال.
7- استخدام نفس الحلول رغم فشلها سابقًا
اختلاف شخصيات الأطفال بيسبب اختلاف كبير في طريقة التعامل اللي بتنجح مع كل واحد منهم، وهنا بيحصل خطأ مشهور من الأخطاء الشائعة في تربية الأطفال، وهو إن ولي الأمر يفضل مثبت طريقة التصرف بتاعته مع نفس المشكلة اللي بتواجهه كل مرة، ويكون مستني نتيجة مختلفة.
فمثلًا بيعتقد بعض الآباء إن الضرب أداة تربوية ناجحة، وفعلًا ممكن يجيب نتيجة في بعض الأوقات، لكن لما تلاقي نفسك مضطر تستخدم نفس الفعل دا يوميًا لتعديل نفس السلوك بدون نتيجة، يبقى دي طريقة فاشلة، ولازم تغيّرها فورًا.
8- إهمال وضع القواعد والحدود
أهالي كتير بيهملوا وضع القواعد لأطفالهم، ظنًا منهم إن دا حاجة كويسة ولازم يسيبوا الطفل على حريته، بس بالرغم من كدا بنلاقي إن معظم الأطفال اللي سنهم صغير بيواجهوا صعوبة في العيش من غير أي إرشادات أو قواعد.
وضع القواعد، واتباع إجراءات روتينية محددة بيساعد الطفل على ممارسة حياته بطريقة أسهل، وتوقع الحاجات اللي ممكن تحصل في يومه.
9- المقارنة
خطأ المقارنة هو أحد أبرز الأخطاء الشائعة في تربية الأطفال اللي بيقع فيها معظم الآباء، وبيقارنوا أبنائهم بالأصدقاء، أو الأقارب، أو حتى مقارنة الإخوة مع بعضهم، ودي حاجة ليها نتيجة كارثية على شخصية الطفل ونفسيته.
وبالتالي لازم الوالدين يفهموا إن كل طفل له شخصيته، ومهاراته، وقدراته الخاصة بيه اللي بتميزه عن باقي الأطفال، ومن واجبهم مساعدة الطفل على اكتشاف القدرات دي وتنميتها.
10- المدح والدلال الزائد
النوع دا من الأخطاء بيكون كارثي على شخصية الطفل في المستقبل، طبعًا مفيش مانع من دعم الطفل وتشجيعه، لكن يكون الموضوع في الحدود الطبيعية، لأن مدح الطفل وتدليله بشكل زائد لدرجة إنك متقدرش تقوله “لأ” على حاجة بيخليه يحس إنه أهم من كل الناس اللي حواليه، وبينتظر بعد كدا نفس التصرف من كل الناس.
وبالتالي الطفل اللي بيكبر على دا بيفشل في علاقاته الاجتماعية بعد كدا، وبيخرج للمجتمع كصديق، أو زوج، أو أب فاشل، وبيفقد قدرته على التعامل مع الناس اللي حواليه بصورة سليمة.
اقرأ أيضًا: مشكلات الأطفال السلوكية | أسباب وعلاج أبرز 11 مشكلة سلوكية.
11- الانشغال عن الأطفال طول الوقت
دا واحد من أكتر الأخطاء الشائعة في تربية الأطفال اللي بيقع فيه الأب بالذات، ودا بسبب انشغاله الدائم بالشغل وضغوطات الحياة، وبالتالي معندوش وقت كافي يقعد فيه مع أطفاله، ودي حاجة بتنعكس بالسلب على الطفل.
فضروري جدًا إن الآباء يخصصوا وقت محدد للجلوس مع أبنائهم، من غير أي مشتتات خارجية، زي التلفزيون أو الرد على مكالمات شغل. لازم يكون الوقت مخصص للطفل بس عشان يحس بأهميته في حياة والديه.
12- إنقاذه الدائم من الفشل
مواجهة الطفل للتحديات حاجة ضرورية جدًا حتى لو فشل فيها، لأنه بالأساس عشان يتعلم صح لازم يفشل في البداية، وبالتالي إنقاذ طفلك باستمرار بيمنعه من التعلم، وبيأثر على شخصيته بالسلب.
فمثلًا لو كان مستوى الطفل سيء في المدرسة، والأم عملت الواجب مكانه، فدا هيأثر على نجاحه الدراسي فيما بعد بشكل سلبي، لأنه مش هيلاقي حد يحل مكانه وقت الامتحان.
نصائح تقلل فرصة ارتكاب الأخطاء الشائعة في تربية الأطفال
التعامل الصحيح من جانب الأب والأم مع أولادهم بيفرق كتير في تكوين شخصياتهم، وبيبعدهم عن أغلب المشاكل اللي ذكرناها فوق، ومن أهم النصائح دي:
- ما تقارنش طفلك بطفل تاني، وحاول تستكشف مواهبه الخاصة بيه، وتساعده يطورها.
- ناقش طفلك في الأخطاء اللي بيعملها، وعلمه ثقافة الاعتذار، وتصحيح الأخطاء.
- فهمه الفرق بين السلوكيات الصحيحة والخاطئة، وعرّفه إزاي يميز بينهم.
- اتكلم مع طفلك، واسمع له كويس، عشان تفهم وجهة نظره، ومشاكله.
- ساعده في حل مشاكله، واطلب المساعدة من المختصين عند الحاجة.
- امتنع عن استخدام الألفاظ الخارجة، أو المسيئة للطفل.
- وضّح له طبيعة العقاب اللي هيتعرض له لما يغلط.
- خليك قدوة ليه، واغرس جواه التفكير الإيجابي.
الخلاصة
تربية الأبناء بتتطلب مجهود مستمر، وتوجيه صحيح، عشان نضمن نموهم وتطور شخصياتهم بشكل إيجابي، ودور الوالدين هنا إنهم يبنوا جسور من الحب والثقة مع أطفالهم، ويتجنبوا ارتكاب الأخطاء الشائعة في تربية الأطفال قدر الإمكان من خلال التعلم أكتر عن التربية.
ومن خلال التواصل الفعّال، وتحديد توقعات واقعية، والاهتمام بالصحة النفسية للطفل، وتوفير بيئة داعمة وتحفيزية تشجع الطفل على الاستقلال والاعتماد على نفسه، بيقدر الوالدين يوجههوا أطفالهم بشكل أفضل، ويساهموا في بناء أساس قوي لمستقبلهم.
عشان كدا بنفكر كل أب وأم بأهمية التعلم المستمر، والتكيف مع تغيُّر احتياجات الطفل الخاصة بكل مرحلة عمرية، والسعي لتحسين حياته، وتقديم الدعم والحب اللازم، ودي كلها حاجات بتخلق بيئة إيجابية بتساعد في تحقيق النجاح والسعادة للأسرة كلها.
المصادر
11 Common Parenting Mistakes to Avoid.
أضف تعليق