هل من الطبيعي إن طفلك يسرق؟
خلينا نقول إن أغلب الأطفال في مراحل حياتهم الأولى بيجهلوا القيمة المالية للأشياء، وبالتالي الطفل لما بيعوز حاجة ممكن يمد إيده وياخدها على طول من غير استئذان، ويرجع يكرر السلوك دا تاني حتى لو اتعاقب من أهله، لإنه شايف إن اللي بيعمله دا حاجة عادية!
مشكلة السرقة عند الأطفال بتظهر لما الطفل يعدي من المرحلة دي من غير توعية شديدة من أهله بخطورة الفعل دا، وبتحصل كمان لو الطفل معندوش القدرة على ضبط نفسه، أو اتحاوط بأصدقاء السوء اللي بيسرقوا، وهو بيعمل زيهم كنوع من التقليد عشان يتقبلوه وسطهم.
وفي المقال دا، هنتكلم عن أشكال السرقة عند الأطفال، وأسبابها، وكيفية علاج المشكلة دي، وامتى بنحتاج لتدخل طبي، لكن خلينا الأول نجاوب عن سؤال مهم.
هل الطفل بيفهم معنى السرقة؟
مفهوم مشكلة السرقة عند الأطفال بيختلف بشكل كبير عن الكبار، أنت كشخص كبير وعاقل بتكون فاهم معنى السرقة، وخطورتها، وأضرارها، وبتقدر تحكم صح على أفعالك.
لكن الأمر بيختلف تمامًا بالنسبة للطفل؛ هو بمجرد ما شاف حاجة عجبته بقى عنده رغبة في امتلاكها من غير ما يفهم إنه لازم يدفع تمنها، وبالتالي ما ينفعش في الحالة دي نقول على الطفل إنه لص، أو حرامي!
ومن هنا نقدر نقول إن المسؤولية في البداية بتقع على عاتق الوالدين، فلازم في الفترة دي تبدأ تعلمه يستأذن قبل ما ياخد حاجة من صاحبها، وإنه يدفع تمن الحاجة اللي بيشتريها الأول قبل ما ياخدها ويمشي، وتفهمه إن السرقة عمل خاطئ هيتحاسب عليه لو عمله.
فلو عملت اللي عليك في المرحة دي، وبرضو الطفل مصمم على السلوك دا، فعلى الأغلب الموضوع بيتحول لسلوك مرضي محتاج للعلاج من بدري، قبل ما يتفاقم ويستمر في السرقة في المستقبل، لإن حوالي 66% من الأفراد اللي اعترفوا بممارسة سلوك السرقة مدى الحياة، قالوا إن الموضوع بدأ معاهم من قبل سن الـ 15.
أشكال السرقة عند الأطفال
بتختلف أشكال مشكلة السرقة عند الأطفال حسب طبيعة المشكلة عند كل طفل منهم، فبنلاقي:
1- سرقة الحرمان
ودا نوع بيلجأ فيه الطفل للسرقة بسبب حرمانه من حاجات بيستمتع بيها باقي الأطفال اللي في سنه، زي: الأكل، واللبس، والمصروف، فبيحاول يسرق جزء من ممتلكاتهم، عشان يستمتع زيهم.
2- سرقة جذب الانتباه
وهنا بيلجأ الطفل للسرقة عشان يلفت نظر والديه، ودا طبعًا ممكن يحصل نتيجة تعرضه للإهمال، أو الرفض، أو انشغالهم عنه، وهنا ممكن تستفيد أكتر من خلال قراءة مقال: الاحتياجات النفسية للطفل.
3- سرقة التقليد
مشكلة السرقة عند الأطفال ممكن تحصل بغرض التقليد بس مش أكتر، ففيها بيسرق الطفل تقليدًا لصحابه، اللي بيلاقوا في السرقة نوع من الإثارة بتخليهم يستمروا فيها.
4- سرقة الانتقام
هنا بيلجأ الطفل للسرقة بسبب كراهيته الشديدة للشخص اللي بيسرقه، سواء كان بيسرق من شخص كبير أو من طفل زيه، فبيسرق بغرض إنه يصيبهم بالحزن والألم.
5- سرقة إثبات الذات
في الحالة دي الطفل بيسرق عشان يثبت لنفسه، ولغيره من صحاب السوء بإنه الأقوى، خصوصًا وإنهم بيحسوا بلذة في النوع دا من الأفعال.
6- السرقة كاضطراب نفسي
بتظهر مشكلة السرقة عند الأطفال في أغلب الأحيان كاضطراب نفسي بيعاني منه الطفل، ودا بيحتاج لتدخل من متخصص لعلاج الطفل.
7- سرقة حب التملك
بيلجأ الطفل في النوع دا لإشباع احتياجاته من خلال سرقة الآخرين، خصوصًا لو كان عنده حب تملك للأشياء، وعاوزها ليه هو بس دونًا عن غيره.
اقرأ كمان: 6 طرق فعالة لعلاج الطمع عند الأطفال وتعليمهم القناعة.
أبرز أسباب مشكلة السرقة عند الأطفال
قبل محاولة معالجة المشكلة دي لازم نفهم الأول إيه الدافع اللي بيخلي الطفل يسرق، ويستمتع بالمخاطرة بارتكاب فعل زي دا، وعشان كدا هنذكر بعض الأسباب الشائعة للسرقة عند الأطفال:
1- نقص الفهم
زي ما اتكلمنا من شوية، وارد الطفل يسرق بسبب عدم فهمه لقيمة الأشياء المادية، ودا سبب شائع جدًا خصوصًا لو الطفل لسه صغير.
وهنا كل اللي عليك إنك تفهّمه إنه يستأذن الأول قبل ما ياخد أي حاجة من صحابه، وإنه يدفع تمن الحاجة اللي بياخدها من السوبر ماركت .. إلخ.
2- صعوبة التحكم في الانفعالات
عدد كبير من الأطفال في سن الابتدائية والإعدادية بيعاني من صعوبة التحكم في انفعالاته، وبالتالي أول ما بيشوف حاجة عاوزها بيحطها في جيبه بسرعة بدون تفكير في أي عواقب.
عشان كدا دا سبب شائع من أسباب مشكلة السرقة عند الأطفال.
3- نقص وعي الآباء
ممكن حد يشوف ابنه بيسرق ويتعامل مع الموضوع على إنه نوع من شقاوة وعفوية الطفل، ودا ممكن ينعكس بشكل سلبي عليه، لإنه هيعتبر السرقة نوع من التسلية والترفيه من غير ما يفهم خطورتها.
4- الأخطاء التربوية
أخطاء الأب أو الأم التربوية بتتسبب بشكل مباشر في تزايد مشكلة السرقة عند الأطفال بدلًا من حلها، فمثلًا بعض الآباء هيلجأوا لعقاب أطفالهم على طول من غير ما يدوروا على السبب الحقيقي للسرقة.
وجزء تاني هيعمل تحقيق مع الطفل عشان يجبره على الاعتراف بيها، ودا ممكن يضطره للكذب عشان يدافع عن نفسه، وبالتالي بدل ما نحل مشكلة السرقة، زودنا عليها مشكلة تانية زي الكذب!
وممكن الموضوع يبقى أسوأ في حالة التشهير بالطفل بين الصحاب والمعارف، أو إطلاق ألفاظ نابية على الطفل زي إنك تقوله يا حرامي، أو يا كذاب.
دي كلها تصرفات بتزود المشكلة أكتر، وبتسبب للطفل أزمات نفسية واجتماعية، بتتعب نفسيته، وتقلل ثقته في نفسه.
5- الدلال الزائد
استكمالًا للنقطة اللي فاتت هنلاقي إن تدليل الطفل بشكل مبالغ فيه بيتسبب في ظهور مشكلة السرقة عند الأطفال، لإن بعضهم اتعود من أهله إن كل طلباته مجابة، وإن أي حاجة عاوزها بياخدها عادي، ومن هنا بيلجأ الطفل للسرقة، ظنًا منه إن دي حاجة عادية ومسموح بيها.
6- تقليد الأكبر سنًا
في بعض الحالات بيكون السبب الوحيد للسرقة، إن الطفل بيقلد حد أكبر منه في السن بيقتدي بيه، زي أخوه الكبير، أو أبوه، أو أمه، أو أي حد من أسرته وصحابه، وعشان كدا ضروري نظهر قدام أطفالنا بشكل كويس، ونكون قدوة حسنة ليهم.
7- تفريغ الكبت
أحد أسباب مشكلة السرقة عند الأطفال المشهورة هو إن الطفل يعاني من قسوة الوالدين في المعاملة معاه، أو يحس بالتمييز بينه وبين باقي إخواته، فبيلجأ للسرقة كنوع من لفت الانتباه، زي ما اتكلمنا في أشكال السرقة من شوية.
8- الخوف والهروب من العقاب
بعض الأطفال لما بيضيعوا حاجة من أدواتهم المدرسية، بيلجأوا لسرقة الحاجة اللي ضاعت منهم دي من حد من زمايلهم، عشان يتجنبوا عقاب أهلهم ليهم على إهمالهم واستهتارهم،.
وعشان كدا بننصح بالتعامل مع الأطفال برفق شوية، لإنهم في النهاية أطفال، ولازم هيغلطوا في بعض الأوقات.
9- الحرمان المادي والعاطفي
كمان من أسباب مشكلة السرقة عند الأطفال هو الحرمان بنوعيه المادي والعاطفي، فهتلاقي إن بعض الأطفال اللي بيعانوا من الحرمان المادي، بيسرقوا عشان جعانين مثلًا، وبالتالي بيجي هنا دور الأهل في تزويد الطفل بطعام يكفيه، ومصروف مناسب لسنه.
أما بالنسبة للحرمان العاطفي، فهنلاقي إن الطفل ممكن يسرق بسبب افتقاده لمشاعر الأمان، والعطف، والاحتواء داخل أسرته، ودا احتماليته بتزيد أكتر في حالة فقددان أحد الوالدين، أو وجود مشاكل ما بينهم، أو انفصالهم.
10- التأثير السلبي للبيئة المحيطة بالطفل
بتلعب البيئة المحيطة دور حيوي جدًا في نقص أو تزايد مشكلة السرقة عند الأطفال، وغيرها من السلوكيات المختلفة، لإن الطفل في السن الصغير دا بيتأثر بالبيئة بتاعته في تكوين شخصيته، وبالتالي لو مثلًا أسرة الطفل بتعاني من فقر شديد، فممكن دا يدفعه للسرقة بغرض تعويض النقص!
نصائح فعّالة للتخلص من مشكلة السرقة عند الأطفال
الظواهر السلبية اللي من النوع دا، لازم ننظر لكل جوانبها عشان نعرف نعالجها، عشان كدا دي شوية نصائح هتساعدك في حلها:
- اغرس المبادئ، والقيم، والأخلاق الحميدة في طفلك من صغره، وفهّمه الفرق بين الحلال والحرام.
- وجّه طفلك دينيًا وأخلاقيًا، ووضحله عقاب السرقة عند ربنا، عشان لو بيجهل معناها من الأساس.
- حاول توفر للطفل كل احتياجاته الأساسية، زي الأكل، والشرب، واللبس، عشان ما يبصش لغيره.
- حدد سبب المشكلة الأساسي، واتعامل معاها بهدوء وصبر، لإنه في الآخر طفل ولازم هيغلط.
- راقب ممتلكات الطفل باستمرار، عشان تعرف إذا كان معاه حاجة مش بتاعته ولا لأ.
- ابعد طفلك عن صحاب السوء، عشان ممكن يكون بيسرق تقليدًا ليهم زي ما قولنا.
- ابعد عن الضرب والتوبيخ الحاد في حالة لو سرق، عشان ليهم آثار نفسية سيئة.
- شجع طفلك على الكلام معاك، وفهمه إنك هتساعده لما يعترفلك بأخطائه.
- احكيله قصص كتير عن مفهوم الصدق، والأمانة، واحترام ممتلكات الآخرين.
- خصص مصروف شخصي ثابت، مناسب لسن الطفل، واحتياجاته.
- احرص على إشباع جميع احتياجات الطفل العاطفية والنفسية.
- خليك قدوة حسنة لأطفالك، وراقب كل تصرفاتك قدامهم.
- اديله فرصة يتعامل مع الفلوس، وعلّمه ازاي يحافظ عليها.
- ساعده يرجع الحاجة اللي سرقها لأصحابها، وكافئه على دا.
- ربّي طفلك على القناعة، وإنه ميبصش لحاجة في إيد غيره.
دي كلها تصرفات هتساعدك بشكل كبير في التخلص من مشكلة السرقة عند الأطفال، بس خليك فاهم إن الموضوع صعب، ومحتاج شوية صبر وحكمة، وخلينا نختم كلامنا بسؤال مهم.
متى تلجأ للمساعدة الطبية؟
في حالة إنك حددت سبب المشكلة الأساسي عند الطفل، واتبعت معاه كل الطرق اللي قولنا عليها عشان تمنعه عن السرقة، ومع ذلك هو مستمر في اللي بيعمله، يبقى على الأغلب السرقة تحولت معاه لمرض، وهنا ضروري تطلب المساعدة من طبيب متخصص في الحالات اللي زي دي.
اقرأ كمان: كيفية التعامل مع الطفل المريض نفسيًا.
الخلاصة
مشكلة السرقة عند الأطفال من المشاكل الخطيرة اللي ممكن تعود عليك وعلى الطفل بمسائلة قانونية بعد كدا، وعشان كدا لازم تتعامل معاها بجدية، بس في نفس الوقت تتحلى بالصبر والحكمة في التعامل معاه، لإنه في النهاية طفل، ولسه محتاج يتعلم الصح من الغلط.
يعني حاول تفهّم طفلك القيمة المادية للأشياء، وإن كل شخص ليه ممتلكات خاصة بيه مينفعش ناخدها منه من غير استئذان، وإن أي حاجة هياخدها من السوبر ماركت مثلًا لازم يدفع تمنها، وكمان تربيه من صغره على القيم والأخلاق الحميدة، وتكون قدوة حسنة ليه.
أضف تعليق