تعليم القيم الأخلاقية للأطفال هو جزء لا يتجزأ من مستقبلهم، لإنه بيمثل حجر الأساس اللي بيبنوا عليه شخصياتهم، وسلوكياتهم، وعلى أساسها بيقدروا يوصلوا للقرارات الصحيحة بخصوص أي مشكلة تقابلهم، وبيتعلموا تحمل المسؤولية.
التربية الصحيحة على أُسس أخلاقية سليمة هي المهمة الأساسية لكل أب وأم ربنا وهبهم طفل صغير، لأنهم بيكونوا قدام عينه طول الوقت، وبالتالي الطفل بياخدهم قدوة ليه، فمن خلال تقديم قدوة حسنة للطفل، وتوجيهه للتصرفات الصحيحة، هتقدر تغرس فيه قيم أخلاقية حميدة، تفيده وتفيد المجتمع كله.
وفي المقال دا، هنتكلم عن مفهوم القيم الأخلاقية، وأهم القيم الحميدة اللي لازم تربي أطفالك عليها من صغرهم، وكيفية غرسها في نفوسهم، والآثار الإيجابية المترتبة على دا.
مفهوم القيم الأخلاقية
بتتمثل القيم الأخلاقية للأطفال في الأسس، والمبادئ، والقواعد اللي بيعتاد عليها الطفل من صغره، عشان تبقى جزء أساسي من شخصيته، وطريقة تفكيره بعد كدا، واللي بيحدد على أساسها توجهاته ورغباته، وبيقرر من خلالها إيه السلوكيات المقبولة، وإيه السلوكيات المرفوضة.
وبيظن بعض الأهالي إن تعليم القيم الأخلاقية للأطفال في سن صغير أمر صعب وشاق، لكن على العكس تمامًا، فالأسهل هو غرس القيم دي في نفوس أطفالهم من بدري، دا أفضل ليهم وللطفل في نفس الوقت، لإن التوقيت دا بالذات هو أكتر فترة بيكون الطفل عنده قابلية للتعلم فيها، وبيبص لأبوه وأمه على إنهم قدوته.
وتقدر كمان تطلع على: أبرز الأخطاء الشائعة في تربية الأطفال وكيفية تجنبها.
أهم القيم الأخلاقية للأطفال التي يجب غرسها فيهم
في مجموعة من القيم الأخلاقية الحميدة اللي لازم نغرسها في نفوس أطفالنا من صغرهم، عشان يخرجلنا في المستقبل جيل جديد قادر على القيادة، والإبداع، وتحمل المسؤولية، والخوف من عقاب الله، ونبذ الكراهية والعنف.
ومن أهم القيم دي بنلاقي:
1- الإيمان والتقوى
حب الله، والإيمان به، والخوف منه، والاعتقاد بوحدانيته، هي أُسس أخلاقية بيشجع الإسلام على تعليمها للأطفال من صغرهم، عشان يكبروا على التعلق بالله، وتقواه، ودي كلها صفات ضرورية لأي مسلم.
والتقوى بتشير إلى “الخوف من الله تعالى باجتناب ما نهى عنه واتباع ما أمر به”، والتحلي بيها هو وصية من الله سبحانه وتعالى لعباده، فقد قال تعالى: “يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ ۖ وَاتَّقُوا اللَّهَ ۚ إِنَّ اللَّهَ خَبِيرٌ بِمَا تَعْمَلُونَ”.
2- الصدق
بيعد الصدق واحد من أهم القيم الأخلاقية للأطفال اللي لازم يتربوا عليها، ودا لإن الإنسان الكداب بيكون مكروه ومنبوذ من اللي حواليه.
وعشان تعلم طفلك الصدق، لازم تصدق أنت كمان في أقوالك وأفعالك معاه، وتنبذ الكذب بصورة نهائية، من غير تساهل معاه في النقطة دي.
فلو طفلك كذب عليك في حاجة، مينفعش تعدي الموضوع بسهولة كأن محصلش حاجة، طبّق عليه عقاب بسيط، يفهم منه مدى خطورة الكذب، وعواقبه السيئة.
3- الأمانة
حث الإسلام على الأمانة، والحفاظ على ممتلكات الآخرين، ونهى عن سرقتها، أو إخفائها بعيد عن أصحابها، وقد قال الله تعالى في سورة الأنفال: “يَا أَيُّهَا الَّذِينَ آمَنُوا لَا تَخُونُوا اللَّهَ وَالرَّسُولَ وَتَخُونُوا أَمَانَاتِكُمْ وَأَنتُمْ تَعْلَمُونَ”.
والأمانة مش بتقتصر على كدا بس، لكن لازم كمان تعلم طفلك يكتم الأسرار، ويتعلم الأمانة في البيع والشراء، وتقدر تساعده في دا بإنك تكتم أسراره، فيبدأ هو يقلدك.
4- بر الوالدين
من أهم القيم الأخلاقية للأطفال اللي حث عليها الإسلام هو تعليم الطفل قيمة العائلة، واحترام الوالدين، وطاعتهم في كل الأمور اللي مش بتغضب ربنا.
وخليك فاهم إن طفلك وهو صغير هيشوفك بتتعامل مع أهلك ازاي، ويقلدك بعد كدا لما يكبر، ويتصرف معاك بنفس الطريقة.
5- الوفاء بالوعود
الوفاء صفة جميلة في الإنسان، ويُفضل تعليمها للطفل من صغره، وبيسهل عليك الموضوع دا إنك توفي بوعودك معاه.
وبالتالي مهما حصل ما تديش لطفلك وعود بحاجة أنت عارف إنك مش هتنفذها، ولا تضغط عليه عشان يوعدك بحاجة أنت عارف إنه رافضها، عشان يتعلم يوفي بوعوده هو كمان بعد كدا.
6- تحمل المسؤولية
تحمل المسؤولية هو واحد من أهم القيم الأخلاقية للأطفال اللي لازم يتعلموها من صغرهم، لأن الطفل لما بيتعود من صغره على دا بيكبر وهو قادر على مواجهة تحديات الحياة، والتغلب على الأمور الصعبة كلها لوحده.
على عكس الطفل اللي مش بيتعود على دا، فبيكبر وهو مستني العون والمساعدة من أي حد حواليه في كل أمور حياته.
7- الصبر
تحلي أي طفل بالصبر حاجة صعبة جدًا والوصول ليها مش سهل، لكنه ضروري ومهم في تنمية شخصية الطفل، فعلى الأرجح إن الطفل اللي بيتعلم الصبر من وهو صغير بيكون عنده قدرة أكبر لما يكبر على النجاح، وتخطي الأزمات.
وتقدر تساعد طفلك يتعلم الصبر عن طريق تأخير استجابتك لبعض طلباته بشكل مُتعمد، فمثلاً لما يطلب منك حاجة وأنت مشغول، قوله إنك هتخلص اللي بتعمله الأول، وبعد كدا تنفذ له طلبه.
8- التواضع
دا واحد من الصفات المهمة اللي محتاج تزرعها في طفلك، عشان يقدر بعد كدا يتعامل مع عيلته، وأصدقائه بشكل كويس، ويعترف بأخطائه بسهولة، ويبعد عن صفات زي الغرور، والتكبر.
وهنا محتاج تتكلم مع طفلك عشان تفهمه إن التواضع مش معناه ضياع حقوقه أو كرامته، ولكن معناه التعامل بلطف وتراحم مع الآخرين، ودي حاجة ربنا هيحبه بسببها، لأنها بتدل على طاعته ليه.
9- العدل
العدل هو واحد من أهم القيم الأخلاقية للأطفال اللي لازم نربيهم عليها، لأنه أساس الحياة المجتمعية السليمة، وبيتولد الإنسان بفطرته وهو كاره للظلم.
فبيكون دورك هنا إنك توعي طفلك بمساوئ الظلم، وتفهمه إنه عايش في المجتمع مع ناس تانية، بيكرهوا الظلم زي ما هو بيكرهه، فلازم يعدل في التعامل معاهم.
10- الأدب والاحترام
المجتمعات حوالينا مليئة بالشتم، والسب، وعشان كدا محتاج تنقي لطفلك أصدقاء صالحين، وتكون قدوة حسنة ليه، عن طريق إنك تمتنع عن ذكر أي لفظ خارج قدامه، لإن الطفل بيردد أي كلام بيسمعه، من غير ما يفهم معناه، ودا ممكن يسبب لك إحراج قدام الناس بعد كدا.
دا غير إن كل الشرائع الدينية بتدعو لتحلي الإنسان بالأخلاق الطيبة، واحترام الغير، واحترام عقيدة الآخرين، وعاداتهم، وتقاليدهم، وأفكارهم، وطموحاتهم.
11- الشجاعة
تعليم الطفل للشجاعة هو أمر ضروري جدًا لمستقبله، لإنه هيكون أقوى في مواجهة تحدياته، وهيقدر يتغلب على مشاكله من غير ما يستنى مساعدة من حد.
وعشان كدا مهم إنك تسيبه يتصرف في أمور كتير تخصه من صغره، وتسأله عن الحاجات اللي بتخوفه، وتساعده إنه يتغلب عليها بالتدريج.
12- التعاون
من أبرز القيم الأخلاقية للأطفال اللي لازم نربيهم عليها هو خُلُق التعاون، ودا لإننا مخلوقات اجتماعية بطبعها، فبالتالي تربية الأطفال من صغرهم على إدراك قيمة التعاون وأهميته، بيفيد المجتمع كله مستقبلًا.
ومن الطرق الفعّالة هنا هو إنك تطلب من الطفل يساعد في الأعمال المنزلية، ويشوف بعينه التعاون بين أفراد الأسرة بيكون ازاي، عشان يقدر فيما بعد يتعاون مع زمايله في المدرسة في أداء الأنشطة اللي هتتطلب منهم.
13- حب العلم
التعليم هو أقوى سلاح ممكن يمتلكه أي إنسان، وعشان كدا ضروري تربي طفلك من صغره على حب العلم، والاهتمام بيه، وتفهمه إن عن طريق العلم هيكون ليه دور عظيم جدًا في خدمة مجتمعه، ودا اللي حثنا عليه الإسلام في أكتر من موضع.
اقرأ أيضًا: أبرز 9 تمارين تعليم القراءة والكتابة لطفلك.
14- احترام المواعيد
دا واحد من أهم القيم الأخلاقية للأطفال اللي لازم تزرعها في طفلك من بدري، عشان يفهم قيمة الوقت، ويتجنب إهداره لما يكبر، ومن أفضل الطرق اللي بتنمي عند الطفل احترامه للمواعيد هي المحافظة على الصلاة، لإنها هتساعد الطفل على حساب الوقت بدقة، وتنظيمه.
15- الثقة بالنفس وتقدير الذات
هنا بيكون ضروري إن الأهل يفهموا كويس الفرق بين الثقة بالنفس، والغرور، ويربوا طفلهم على تقدير ذاته، والثقة بنفسه، بس بدون تكبّر أو تعالي على حد تاني.
وبيساعدك في دا إنك تجالس طفلك وتتكلم معاه، وتظهرله احترامك لرأيه واهتمامك بيه.
وكمان تسيب له الحرية الكاملة في التعبير عن رأيه في أي حاجة تخصه، وتجنب مقارنته مع أي طفل تاني من صحابه، عشان تنمي عنده احترامه لنفسه.
الآثار الإيجابية لغرس القيم الأخلاقية في الأطفال
بتتمثل أهمية غرس القيم الأخلاقية للأطفال في سن مبكر في:
تنمية شخصية الطفل
تعليم القيم والأخلاق الحميدة للطفل بيساهم بشكل كبير في تشكيل شخصيته، وتطوير سلوكياته الإيجابية، وزيادة قدرته على اتخاذ القرارات الصائبة.
بناء مجتمع أفضل
لما يتربى الأطفال من صغرهم على أسس قوية من القيم الأخلاقية، هيقدروا يبنوا مجتمع متعاون ومحترم بشكل أكبر.
تقوية العلاقات الاجتماعية
الأطفال اللي بيتعلموا قيمة الاحترام، والتفاهم، والتعاون مع الآخرين، بيكونوا قادرين بعد كدا على تكوين علاقات إيجابية وصحية مع الناس اللي حواليهم.
الاستقلالية
من أهم الآثار الإيجابية المترتبة على غرس القيم الأخلاقية للأطفال هو تنمية شعورهم بالاستقلالية، ودا بينعكس على تصرفاتهم بعد كدا إنهم يقدروا ياخدوا القرارات الصحيحة بنفسهم من غير تدخل من حد.
تشجيع المسؤولية الاجتماعية
بوجود قيم أخلاقية قوية وصحيحة في نفوس الأطفال، هيقدروا يحسوا أكتر بدورهم تجاه المجتمع، ويفهموا طبيعة دورهم إيه، ويتحملوا المسؤولية تجاهه.
الحد من السلوكيات الخاطئة
لما يكون الطفل عنده قيم أخلاقية قوية هيقدر يتجنب التصرفات الضارة، والخاطئة زي: التنمر، والسلوك العدائي ضد الآخرين.
تحسين الصحة النفسية للطفل
تعلم الطفل للقيم الأخلاقية الحميدة بيأثر بشكل كبير في تحسين نفسيته، لأنه بيتعلم ازاي يتعامل مع الضغوط والتحديات الحياتية بطريقة صحيحة.
كيفية غرس القيم الأخلاقية للأطفال منذ الصغر
بيظن البعض إن غرس القيم الأخلاقية في نفوس الأطفال بيتم بالتلقين، لكن الأطفال لما بيحسوا إنهم بياخدوا أوامر بشكل دائم بيقابلوا دا بالعند، وبيحسوا بالملل تجاهها، ومش بيستجيبوا ليها.
وعشان كدا هنعرض بعض النصائح اللي هتساعدك على غرس القيم الأخلاقية الحميدة في طفلك، وهي كالتالي:
1- تقديم القدوة الحسنة
أي طفل في فترة نشأته بيشكل شخصيته عن طريق تقليد اللي حواليه، سواء أبوه أو أمه أو المعلمين بتوعه في المدرسة.
وعشان كدا بيحتاج الأبوين في المرحلة دي إنهم ياخدوا بالهم من تصرفاتهم قدام أطفالهم، ويظهروا قدامهم بصورة حسنة طول الوقت.
2- ممارسة الأنشطة الأخلاقية
ذكر موقع “Research Gate” إنه تمت دعوة 379 معلم أسترالي من أصحاب الخبرة في التدريس للأطفال الصغار في سنواتهم الأولى، للمشاركة في استطلاع رأي عن أبرز الأساليب الفعّالة في تعليم القيم الأخلاقية للأطفال، وكانت النتيجة إن أغلبهم بيشوف إن وضع الطفل في أنشطة لتعليمه القيم دي ليه الدور الأكبر في التأثير عليه.
3- الاعتذار عند الخطأ
الاعتذار للطفل عند ارتكاب الأخطاء في حقه له دور كبير في تعليمه التواضع والتسامح في نفس الوقت، وعشان كدا مينفعش تتكبر عن الاعتذار عن الخطأ أبدًا، ودا تصرف مفيد في الحياة بشكل عام، مش في تربية الأطفال بس.
4- رواية القصص والحكايات
دي واحدة من أكتر الطرق المفيدة واللي ليها فعالية كبيرة في غرس القيم الأخلاقية للأطفال، لإنك عن طريق القصص والحكايات بتقدر توصّل للطفل المعلومة اللي عاوز تقولهاله، بس بطريقة شيّقة وممتعة.
فمثلاً تقدر تحكي لطفلك قصة من قصص الأنبياء في القرآن والسنة، وبعدها تفتح معاه نقاش حول القصة دي، وتستخرجوا منها سوا الدروس المستفادة.
اقرأ أيضًا: معايير اختيار قصص الأطفال
5- مشاركة التجارب اليومية
عن طريق مشاركة تجاربك الحياتية اليومية مع طفلك تقدر تفتح معاه باب للحديث عن مشكلة، أو قيمة أخلاقية معينة من اللي ذكرناهم، وتشرح معناها عشان يتعلم الطفل منها.
6- تربية الحيوانات الأليفة
تربية الطفل للحيوانات الأليفة ليها دور مهم في تعليمه التراحم، والصداقة، والرعاية، ودا اللي اتكلم عنه معهد “NCBI” في دراسة نشرها بعنوان “ارتباط الطفولة بالحيوانات الأليفة“، وأُجريت الدراسة على أكتر من ألف طفل بتتراوح أعمارهم بين 7 لـ 12 سنة في المملكة المتحدة.
ووضحت الدراسة أن غالبية الأطفال مرتبطين بشدة بحيواناتهم الأليفة، وإن الارتباط دا بيزود من الآثار الإيجابية المتعلقة بتربية الطفل على قيم حميدة زي التسامح، والتعاطف، وتقليل سلوكه العدواني مع الآخرين.
7- التشجيع على العمل الخيري
اطلب من طفلك التبرع بقطع من ملابسه، أو بجزء من مصروفه، وشجعه على العمل الخيري والتطوعي، لأنه له دور كبير جداً في غرس القيم الأخلاقية للأطفال، زي: العطاء، والتعاون، والتراحم مع الآخرين.
وممكن كمان تقدمله مكافأة مادية أو معنوية عند كل تصرف سليم بيحمل قيمة إيجابية بيعمله.
8- التوجيه الإيجابي
بيتوجب عليك محاسبة الطفل على أخطائه بأسلوب هادي، وتوجيهه للصح، وتشجيعه على تحسين سلوكه، والتعلم من أخطائه.
9- الاستخدام المحدود للأجهزة الإلكترونية
من أكبر الأخطاء اللي بيقع فيها الأبوين إنهم يسيبوا الطفل يفرط في مشاهدة التلفزيون أو استخدام الانترنت، لكن ضروري جداً تراقب أي حاجة بيشوفها طفلك عليهم، وتحدد مواعيد معينة لاستخدامهم.
وممكن تستفيد أكتر بخصوص النقطة دي لما تقرأ مقال: تأثير التكنولوجيا على الأطفال.
10- المشاركة في حل المشاكل
اسمح لطفلك -حسب سنه- إنه يشارك في حل المشاكل اللي بتقابلكم، وخد رأيه فيها واسمع له باهتمام، عشان يحس بقيمة رأيه ويكون إيجابي في حياته بعد كدا.
الخلاصة
يعد تعليم القيم الأخلاقية للأطفال أحد أهم الأمور اللي بتساعدهم في تشكيل شخصياتهم، وتوجيه سلوكياتهم في المستقبل.
وبالاعتماد على قيم مهمة زي: الصدق، والأمانة، والتواضع، واحترام الآخرين، وتحمل المسؤولية، يقدر الطفل ينمي من قدراته عشان يكون فرد مسؤول ومتعاون في مجتمعه.
تعليم الطفل للقيم الأخلاقية الحميدة هو استثمار حقيقي في مستقبله، ومستقبل المجتمع كله، وعشان كدا دي حاجة بتتطلب مننا الوعي التام بيها قبل إنجاب الأطفال، وتوحيد جهودنا في غرس القيم دي في نفوس الأطفال.
فعن طريق تقديم نماذج سليمة للطفل يقتدي بيها، وتوجيهه بشكل إيجابي، وتحفيزه على العمل الخيري، هيقدر الوالدين يطوروا من شخصية طفلهم، وتربية فرد مسؤول أخلاقيًا عن اللي حواليه، ومساهم في بناء مجتمع مُحترم، وإيجابي بشكل أكبر.
المصادر
10 Important Moral Values For Students.
Important Moral Values for Students to Help them Be a Good Person in Life.
أضف تعليق