تأثير التكنولوجيا على الأطفال: أبرز التأثيرات السلبية والإيجابية

تأخر في النطق، عدم تركيز وانتباه، ومشاكل في النوم، وإجهاد دائم؛ كلها أعراض ممكن تلاحظيها على طفلك بسبب الاستخدام الزائد للتكنولوجيا.

فوفقا لدراسات الأكاديمية الأمريكية للطب النفسي للأطفال والمراهقين، زيادة عدد الساعات اللي بيقضيها الطفل قدام شاشات الهواتف، بتزود من الآثار السلبية على صحته العقلية والجسدية والنفسية . ودا يخلينا نتسأل هل التكنولوجيا ضارة بشكل عام على طفلك؟

الفكرة إن تأثير التكنولوجيا على الأطفال بيختلف حسب الهدف من الاستخدام، والمدة المحددة للطفل. ومن هنا هتعرفي في المقال دا إزاي طفلك بيشوف التكنولوجيا،، وأبرز تأثيراتها السلبية والإيجابية عليه. كمان هتكتشفي ازاي تخلقي توازن في حياة طفلك ما بين الواقع والتكنولوجيا.

ماذا تمثل التكنولوجيا لطفلك؟

الطفل بطبيعته بينجذب لأي شيء جديد، وبيبقى عنده شغف يكتشفه. والتكنولوجيا بالنسبة لطفلك ما هي إلا لعبة جديدة حابب يكتشفها، ويعرف ازاي يستخدمها، وبداية تأثيرها على الأطفال بالسلب هو الاستخدام المفرط اللي بيأذي بأكتر من طريقة.

وعشان كدا، دورك كأم بيكمن في خلق الوعي عند طفلك بخصوص استخدام التكنولوجيا.

تأثير التكنولوجيا على الأطفال بشكل إيجابي

تعد التكنولوجيا سلاح ذو حدين. فهي ممكن تتسبب في أذية طفلك، بسبب الاستخدام المفرط، أو تكون حلقة الوصل بينه وبين مستقبل مليان إنجازات. ولكن السؤال، إزاي التكنولوجيا ممكن تساعد طفلك في بناء مستقبل أفضل؟

الحقيقة نقدر نقول أن تأثير التكنولوجيا على الأطفال بشكل إيجابي بيتمثل في تطور الطفل من ناحيتين، وهما:

1- تطور في السلوك

وهنا الطفل بيتعلم حاجات جديدة بتغير في سلوكياته على المدى البعيد، زي:

• تنمية التفكير النقدي والتحليلي عند الطفل عن طريق ألعاب الألغاز، وألعاب حل المسائل الرياضية، والمتاهات.
• تعزيز إبداع طفلك عن طريق تعلم الرسم الديجيتال وتطبيقه كمهارة جديدة.
• تزايد مهارة التخيل البصري عن طريق استخدام تطبيقات زي Google Earth للتعرف على خريطة كل بلد، ومدنها وعاصمتها.
• نمو مهارات التحدث والتواصل بسبب اكتشاف ثقافات مختلفة في العالم، ومعرفة معلومات تاريخية عن البلاد والقارات.

2- تطور في المعرفة

ودا بيبدأ من البحث والسعي وراء المعلومات، فهي العامل الأساسي لاكتساب طفلك معرفة كبيرة عن العالم حواليه. وبما أن التكنولوجيا هي عالم واسع من المعلومات، فمن تأثير التكنولوجيا على الأطفال بشكل إيجابي إنه هتساعدهم:

• يبدأوا في التعلم الإلكتروني من صغره، سواء من خلال توجيهات المدرسة، أو عن طريق الكورسات ومواقع الجامعات العالمية.
• يتعلموا لغة جديدة من الصفر عن طريق قنوات اليوتيوب، والتطبيقات زي Duolingo و Memrise وغيرهم من المواقع والكورسات المخصصة للأطفال.
• يستكشفوا متاحف العالم وطفلك في مكانه من خلال استخدام خاصية Google Arts & Culture.
• يقدروا يستخدموا الـ Applications الخاصة بوضع الخطط الأسبوعية، وتحقيق الأهداف، وازاي يرتبوها ويبدأوا ينجزوها بمساعدتك ليهم.
• يقرأوا بشكل مستمر في كتب مختلفة من اختيارك، وتحت اشرافك.

تأثير التكنولوجيا على الأطفال بطريقة إيجابية هو الهدف الأساسي من استخدامها. ولكن انطلاقا من أن كل ما هو زائد عن الحد بينقلب للضد، فالاستخدام المفرط للتكنولوجيا بدون رقابة هو السبب في التأثير السلبي للتكنولوجيا.

وعشان تقدري تحمي طفلك من سلبيات التكنولوجيا، مهم تدركِ عمق تأثيرها في تصرفاته وسلوكياته.

تأثير التكنولوجيا على الأطفال بشكل سلبي

على الرغم من أن التكنولوجيا ليها إيجابيات، إلا أن كتير من الأمهات بتعاني من تأثير التكنولوجيا على الأطفال بشكل سلبي، واللي بيظهر بشكل ملحوظ في تأخر نمو الطفل سواء البدني أو العاطفي أو المعرفي. دا غير اضطرابات النوم والقلق اللي بيعاني منها.

وبداية حل المشكلة هو معرفة الجوانب اللي بتتأثر سلبياً نتيجة الاستخدام الزايد للتكنولوجيا. وهي:

1– الجانب الصحي

الجلوس لفترة طويلة قدام شاشات التليفزيون أو الكمبيوتر بيضعف من نظر طفلك، وبيأثر على النمو الصحيح لعظامه؛ لانه بيفضل قاعد بوضعية معينة لمدة كبيرة، ودا بيأثر على ظهره وفقراته. دا غير التنميل، وهو إحساسه بتخدير في ذراعه وإيده، وطبعاً الإرهاق والتعب المستمر.

كمان قضاء وقت كبير في ألعاب الفيديو بيصيب الطفل بالكسل والخمول، فبيستهلك كل طاقته. بالتالي مش بيبقى عنده وقت أو طاقة إنه يلعب سباحة، أو كرة القدم، أو حتى يقضي وقت مع باقي الأطفال.

وكل العوامل دي ممكن تسبب مشكلة من اتنين؛ إما ضعف نموه الجسدي، بسبب إنه بيأكل بشكل قليل وغير منتظم، أو السمنة، ودا يرجع لعدم ممارسة أي نشاط بدني.

ونتيجة لكل دا، بيصاب طفلك باضطرابات كبيرة في النوم، مش بس بتأثر على صحته الجسدية والعقلية، ولكن كمان النفسية.

2- الجانب النفسي

نفسية طفلك هي أول حاجة بتتأذى من الاستخدام المفرط للتكنولوجيا. فضروري كأم تكوني مُطلعة على تأثير التكنولوجيا النفسي على الأطفال، عشان تقدري تحميه من سلبياتها، واللي بتتمثل في:

الاكتئاب

وهو واحد من أخطر الأمراض اللي بتنتج عن الاستخدام المتواصل للتكنولوجيا. بسبب سلوكيات كتير زي: الوحدة، وقلة التواصل الاجتماعي أو الأسري، والقلق، وكم المشاعر المختلطة اللي بيتلقاها طفلك من خلال الألعاب والـ Social Media والفيديوهات. كلها تراكمات بتخرج في النهاية على شكل اكتئاب.

مشاكل عاطفية

لسوء الحظ، تأثير التكنولوجيا على الأطفال مش بيقف عند الاكتئاب، ولكن بيتعمق وبيخلق فجوة في ردود أفعال طفلك، وبيسبب التشتت الدائم، وتبلد في المشاعر، لأنه بيفقد اهتمامه بالعالم حواليه. دا غير إن عالم التكنولوجيا دايمًا بيكون مثالي بشكل غير حقيقي، ودا بيخلق إحساس عند طفلك بعدم الرضا والكفاية.

ضعف القدرات الذهنية

الاستخدام المفرط للتكنولوجيا بيأثر بشكل سلبي على طفلك، من ناحية عدم التركيز، وانخفاض مستوى التفكير الإبداعي عنده. دا غير إنها بتقلل من فرصة اكتسابه مهارات معينة. كمان بتضعف قدرة الطفل على التعبير عن نفسه ومتطلباته، ودا ممكن يسبب مشاكل في الكلام.

يمكنك قراءة: أنشطة وألعاب ذكاء للأطفال في البيت من عمر 1 إلى 15 سنة.

3- الجانب السلوكي

تأثير التكنولوجيا على الأطفال بيبدأ بتغيير سلوكيات الأطفال، وبينتهي بالقضاء على علاقاتهم الملموسة، وفقدان مهاراتهم الشخصية. على سبيل المثال قضاء وقت كبير مع الموبايل بيخلي طفلك منعزل، وبيغير في سلوكه، ومش بيحب يقضي وقت مع العائلة، ودايمًا عاوز يقضي الوقت مع الموبايل.

دا طبعاً غير زيادة سلوكيات العدوان والعنف في التعامل مع الآخرين، بسبب محتوى ألعاب الفيديو العنيف اللي بيشوفه؛ ولأن طفلك في السن دا مش بيقدر يفرق بين الحقيقة والخيال، بالتالي أي حاجة بيشوفها بيقلدها على أرض الواقع.

ومن جانب تاني، من تأثير التكنولوجيا على الأطفال بشكل سلبي إنها ممكن تعرض طفلك لخطر التنمر وسوء المعاملة، سواء بالألفاظ السيئة اللي ممكن يشوفها أو يسمعها من خلال المحتوى المختلف على الـ Social Media، أو المحتوى البصري في الألعاب والصور، اللي بيهيئ له إن السخرية شيء عادي ونوع من أنواع الهزار.

4- الجانب الاجتماعي

طبيعي جداً بعد انعزال طفلك المستمر وتقضية وقت كبير مع شاشات الهواتف، إن التواصل بينه وبين المجتمع الخارجي يتأثر. واللي كتير بينتج عنه:

• انخفاض مستواه الدراسي؛ لأن التكنولوجيا بتسرق وقته، بالتالي مش بيلاقي لا وقت، ولا تركيز، ولا طاقة إنه يذاكر دروسه.
• انعدام الخصوصية؛ لأنه بيبقى عاوز يقلد بعض الناس الموجودة على الـ Social Media في نشر الصور والفيديوهات.
• انفتاح غير محدود؛ لأن التكنولوجيا عالم كبير جداً، ومليان محتوى مختلف، والطفل بطبعه شخص فضولي، وبيحب يستكشف كل حاجة حواليه بلا وعي.
• اعتمادية مفرطة على الأشخاص من حواليه؛ لأن قلة الحركة والجلوس في مكان لوقت طويل، بتخلق طفل كسول، مش بيحب يعمل مجهود.

وعلى الرغم من تأثير التكنولوجيا على الأطفال بالسلب، واللي يرجع طبعاً إلى الاستخدام المفرط، وقلة الرقابة. إلا أننا لا يمكن نتغاضى عن إيجابيات التكنولوجيا وتأثيرها في التعليم الأكاديمي للطفل، واكتسابه مهارات جديدة.

عشان كدا، بنقدملك بعض الطرق اللي أثبتت نتايجها الفعالة في تجنب تأثير التكنولوجيا على الأطفال، والاكتفاء بإيجابياتها.

كيف تحمي طفلك من التكنولوجيا وتحدِ من استخدامه لها؟

طرق حماية طفلك من تأثير التكنولوجيا، مش حاجة خارقة ومختلفة زي ما كل الأمهات ممكن تتوقع. ولكن هي طرق ممكن تكون مرت على كل أم، فكرت انها مش هتنفع من غير ما تجرب. بس التجربة والثبات على موقفك مع الطفل هما خير دليل يساعدك في تحقيق نتيجة إيجابية.

ومن ضمن الطرق الفعالة اللي ممكن تنفيذها، هي:

1- تخصيص وقت لاستخدام التكنولوجيا

التكنولوجيا بالنسبة للطفل هي لعبة بيقضي وقته من خلالها زي ما قولنا. عشان كدا تخصيص وقت محدد في اليوم لاستخدام التكنولوجيا من باب الترفيه أو من باب التعلم هيحمي طفلك من سلبيات التكنولوجيا.

2- وضع شروط الاستخدام

تأثير التكنولوجيا على الأطفال بشكل عام بيبدأ من أنهم يفهموا دور التكنولوجيا الحقيقي في حياتهم. وكونها أداة مساعدة لهم مش حاجة أساسية. ووضع شروط الاستخدام مع طفلك هو اللي هيساعده يستوعب. زي إنك:

– تقترحي عليه مواضيع معينة يبحث ويعرف عنها.
– تشاركيه الحاجات اللي بيعملها ويشوفها هناك، شيء مهم.
– تعرضي فيه قنوات يوتيوب من اختيارك مخصصة له.
– تلتزمي معاه بالوقت المحدد في اللعب وإنه مينفعش يستبدل أوقات التعلم بألعاب الفيديو.

3- تعزيز الحياة الواقعية

تحول تأثير التكنولوجيا على الأطفال من السلبي إلى الإيجابي بيبدأ بملء فراغ طفلك بأنشطة مفيدة له. على سبيل المثال: مساعدته على تكوين صداقات في النادي أو المدرسة، واتباع نظام صحيان بدري، وكتابة الأهداف اليومية، المشاركة في الألعاب الرياضية والمسابقات.

4- تفعيل تطبيقات حماية الطفل

تفعيل تطبيقات حماية الطفل هي الدرع الخفي لكل أم بتسعى لحماية طفلها من التأثير السلبي للتكنولوجيا. زي تطبيق Digital Wellbeing، واللي بيسمح لك تتحكمي في وقت استخدام أي تطبيق على الهاتف المحمول أو التابليت.

كمان ممكن تستفيدي من إعدادات اليوتيوب، فهي بتسمح لك تحطي وقت استخدام محدد للتطبيق. دا غير فيه منصة اليوتيوب الخاصة بالأطفال فقط.

الخلاصة

تأثير التكنولوجيا على الأطفال تقدري كأم تتحكمي فيه بطرق كتيرة. أهم شيء هو تنظيم يوم طفلك ما بين أنشطة كتير مفيدة، وفي نفس الوقت تكون خارج نطاق التكنولوجيا. ودا هيخليه يستوعب إن التكنولوجيا مش محور الحياة، ولكن جزء منها فقط.

يمكنك أيضًا قراءة:

المصادر

The positive and negative effects of technology on children
Increased Screen Time as a Cause of Declining Physical, Psychological Health, and Sleep Patterns: A Literary Review
Positive and Negative Effects of Technology on Children
Positive And Negative Effects Of Technology On Children